8 ـ ايدىڭ 19 ـ كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى سۋ لينمەن كەڭەس وتكىزدى. سۋرەتتە: كەڭەستەن بۇرىن شي جينپيڭ مەن حانىمى پىڭ لييۋان سۋ لين مەن حانىمى ۋ فاڭليمەن بىرگە سۋرەتكە تۇسۋدە.
□ سۋرەتتى شينحۋا اگەنتتىگىنىڭ ٴتىلشىسى شيە حۋانچى تۇسىرگەن
شينحۋا اگەنتتىگىنىڭ 8 ـ ايدىڭ 19 ـ كۇنى بەيجيڭنەن بەرگەن حابارى. 8 ـ ايدىڭ 19 ـ كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى سۋ لينمەن كەڭەس وتكىزدى.
شي جينپيڭ سۋ ليننىڭ ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى بولىپ سايلانعاندىعىن تاعى ٴبىر رەت قۇتتىقتادى. شي جينپيڭ بىلاي دەپ اتاپ كورسەتتى: ٴسىز باس شۋجي بولىپ تاعايىندالعان سوڭ تۇڭعىش ساپارىڭىزدا جۇڭگوعا كەلدىڭىز، بۇل ەكى پارتيا، ەكى ەلدىڭ قارىم ـ قاتىناسىنا ايرىقشا ٴمان بەرەتىندىگىڭىزدى تولىق ايگىلەدى، جۇڭگو _ ۆيەتنام قارىم ـ قاتىناسىنىڭ جوعارى دەڭگەيى مەن ستراتەگيالىق سيپاتىن دا ايگىلەدى. ورتاق مۇرات ـ سەنىم _ جۇڭگو _ ۆيەتنام ەكى پارتياسىنىڭ ۇرپاقتان ـ ۇرپاققا جالعاسقان قىزىل گەنى، وعان ”ۆيەتنام مەن جۇڭگونىڭ دوستىعى تەرەڭ، جولداس ۇستىنە باۋىرلاس بولۋ“ سىندى ٴداستۇرلى دوستىعى ۇيىسقان. قازىرگى دۇنيە جۇزىندە بيلىك جۇرگىزىپ وتىرعان ەكى كوممۋنيستىك پارتيا رەتىندە، جۇڭگو _ ۆيەتنام ەكى پارتياسى دوستىق اۋەلگى ماقساتىن ۇستانىپ، ٴداستۇرلى دوستىقتى ۇزبەي جالعاستىرىپ، ورتاق بورىشتى ەستە بەرىك ساقتاپ، كوممۋنيستىك پارتيانىڭ باسشىلىعىنا جانە سوتسياليستىك تۇزىمگە تاباندى بولىپ، ستراتەگيالىق مانگە يە جۇڭگو _ ۆيەتنام تاعدىرلاس ورتاق تۇلعاسى قۇرىلىسىن ۇزدىكسىز تەرەڭدەتىپ، دۇنيە ٴجۇزى سوتسياليزم ىستەرىنىڭ دامۋىن بىرگە جەبەۋى كەرەك. مەن سۋ لين جولداسپەن تاماشا قىزمەت قارىم ـ قاتىناسىن جانە جەكە دوستىق ورناتىپ، جۇڭگو _ ۆيەتنام تاعدىرلاس ورتاق تۇلعاسى قۇرىلىسىنىڭ تەرەڭدەۋىنە، ناقتىلانۋىنا بىرگە جەتەكشىلىك ەتۋدى قالايمىن.
شي جينپيڭ بىلاي دەپ اتاپ كورسەتتى: دۇنيە ٴجۇزىنىڭ وزگەرىسى، ٴداۋىردىڭ وزگەرىسى، تاريحتىڭ وزگەرىسى الدىندا، جۇڭگو مەن ۆيەتنام ەكى ەل ەكونوميكانىڭ تەز قارقىنمەن دامۋىن جانە قوعامنىڭ ۇزاق ۋاقىتتىق ورنىقتىلىعىن ساقتاپ، سوتسياليستىك ٴتۇزىمنىڭ ابزالدىلىعىن جانە سوتسياليزم ىستەرىنىڭ ومىرشەڭدىك كۇشىن ايگىلەدى. جۇڭگو جاق ۆيەتنامدى توڭىرەكتىك ديپلوماتياداعى الدىمەن ەسكەرىلەتىن باعىت ەتىپ، ۆيەتنامنىڭ پارتيانىڭ باسشىلىعىنا تاباندى بولىپ، ٴوز ەلىنىڭ مەملەكەت جاعدايىنا ۇيلەسەتىن سوتسياليزم جولىمەن ٴجۇرىپ، جاڭالىق جاساۋ، ەسىك اشۋ جانە سوتسياليستىك وسىزامانداندىرۋ ىستەرىن ىشكەرىلەي ىلگەرىلەتۋىن قولدايدى. ٴار جاق ٴوز ەلىمىز دامۋىنىڭ، گۇلدەنۋىنىڭ شەشۋشى مەزگىلىندە، جۇڭگو مەن ۆيەتنام تاعدىرلاس ورتاق تۇلعا قۇرىلىسىنىڭ بەتالىسىن ٴدال مەڭگەرىپ، ساياسي ٴوزارا سەنىمدىلىگى اناعۇرلىم جوعارى، حاۋىپسىزدىك سەلبەستىگى اناعۇرلىم مىعىم، ناقتى ىستەر سەلبەستىگى اناعۇرلىم تەرەڭ، حالىق رايى نەگىزى اناعۇرلىم بەكەم، كوپ جاقتى كەلىسۋى، سايكەسۋى اناعۇرلىم تىعىز، الاۋىزدىقتاردى باسقارۋ ـ مەڭگەرۋى، شەشۋى اناعۇرلىم جاقسى بولۋ سىندى ”التى اناعۇرلىم“ دامۋ ارناسىن بەكەمدەۋىمىز كەرەك. جۇڭگو جاق ۆيەتنام جاقپەن بىرگە ٴجيى ستراتەگيالىق كەڭەسۋدى جانە جوعارى جىكتەگىلەردىڭ بارىس ـ كەلىسىن ساقتاپ، ٴوزارا باتىل قولداۋ كورسەتىپ، ”ٴبىر بەلدەۋ، ٴبىر جولدى“ بىرگە قۇرۋ باستاماسى مەن ”ەكى ٴدالىز، ٴبىر شەڭبەر“ جۇلگەسىن ٴتۇيىلىستىرۋ سەلبەستىگىن كەڭەيتۋ جاعىندا بەلسەندى ىزدەنىس جاساپ، تەمىر جول، جوعارى قارقىندى تاس جول، شەكارا وتكەلى نەگىزدىك قۇرىلعىلارىنىڭ ”قاتتى بولشەكتەرىن ۇلاستىرۋدى“ جەدەل ىلگەرىلەتىپ، زەردەلى كەدەننىڭ ”جۇمساق بولشەكتەرىن ۇلاستىرۋدى“ جوعارىلاتىپ، حاۋىپسىز، ورنىقتى كاسىپ سالاسى تىزبەگىن، قامداۋ تىزبەگىن قول ۇستاسا تۇلعالاۋدى قالايدى. كەلەر جىلى جۇڭگو مەن ۆيەتنامنىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعىن قۇتتىقتاۋدى وراي ەتىپ، ”جۇڭگو _ ۆيەتنام گۋمانيتارلىق اۋىس ـ كۇيىس جىلى“ سياقتى جەلىلەس قيمىلداردى بىرگە ويداعىداي وتكىزىپ، ەكى ەلدىڭ حالىق رايى نەگىزىن بەكەمدەۋ كەرەك. ەكى جاق بەيبىت قاتار تۇرۋدىڭ بەس پرينسيبى سياقتى حالىقارالىق قارىم ـ قاتىناستىڭ نەگىزگى ولشەمدەرىنە تاباندى بولىپ، تەڭ، ٴتارتىپتى دۇنيە ٴجۇزىنىڭ كوپ ۇيەكتەنۋىن، جالپىعا ٴتيىمدى، سيىسىمدى ەكونوميكانىڭ جاھاندانۋىن ىلگەرىلەتىپ، حالىقارانىڭ ادىلدىگىن، تۋراشىلدىعىن جانە وركەندەپ كەلە جاتقان ەلدەردىڭ ورتاق مۇددەسىن قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋى كەرەك.
شي جينپيڭ جۇڭگو كوممۋنيستىك پارتياسى 20 ـ كەزەكتى ورتالىق كوميتەتى ٴۇشىنشى جالپى ٴماجىلىسىنىڭ قاتىستى جاعدايلارىن تانىستىرىپ، بىلاي دەپ باسا دارىپتەدى: جۇڭگونىڭ رەفورمانى ونان ارى جاپپاي تەرەڭدەتىپ، جوعارى دەڭگەيدەگى سىرتقا ەسىك اشۋدى ىلگەرىلەتۋى ۆيەتنامدى قامتىعان ٴارقايسى ەلدەردىڭ دامۋىنا جاڭا قوزعاۋشى كۇش، جاڭا وراي اكەلەدى. جۇڭگو جاق ۆيەتنام جاقپەن بىرگە پارتيا باسقارۋ، ەل باسقارۋ تاجىريبەلەرى جونىندە اۋىس ـ كۇيىس جاساۋدى تەرەڭدەتىپ، مەملەكەتتى باسقارۋ جۇيەسى مەن باسقارۋ قابىلەتىن وسىزامانداندىرۋ دەڭگەيىن بىرگە جوعارىلاتىپ، وسىزاماندانۋعا بىرگە قادام تاستاۋدى قالايدى.
سۋ لين مىنالاردى ٴبىلدىردى: مەن ۆيەتنام كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى رەتىندە، تۇڭعىش رەتكى شەتەلگە ساپارىمدا جۇڭگوعا كەلدىم، بۇل ۆيەتنام پارتياسى مەن ۇكىمەتىنىڭ جۇڭگومەن قارىم ـ قاتىناستى دامىتۋعا ەجەلدەن ٴمان بەرەتىن تۇرعىسىن، جۇڭگونى ۆيەتنامنىڭ سىرتقى ساياساتىنىڭ ستراتەگيالىق تاڭداۋى جانە ماڭداي الدى ماڭىزدى ٴىسى ەتەتىندىگىن تولىق ايگىلەدى. ۆيەتنام پارتياسى مەن ۇكىمەتى رۋان فۋجۇڭ جولداستىڭ مۇراتىنا مۇراگەرلىك ەتىپ، كوممۋنيستىك پارتيانىڭ باسشىلىعىنا تاباندى بولىپ، سوتسياليزم جولىنا تاباندى بولىپ، ەكى ەلدىڭ اعا بۋىن باسشىلارىنىڭ، اسىرەسە، باس شۋجي رۋان فۋجۇڭ مەن باس شۋجي شي جينپيڭنىڭ بىرگە تۇراقتاندىرعان جولىمەن باتىل العا ىلگەرىلەپ، ”التى اناعۇرلىم“ جالپى تۇلعالىق نىساناسى بويىنشا، ۆيەتنام مەن جۇڭگونىڭ جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناسىن تەرەڭدەتىپ، ستراتەگيالىق مانگە يە ۆيەتنام _ جۇڭگو تاعدىرلاس ورتاق تۇلعاسىن قۇرۋدى ىلگەرىلەتەدى. شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، جۇڭگو جۇڭگو كوممۋنيستىك پارتياسى 18 ـ كەزەكتى ورتالىق كوميتەتىنىڭ ٴۇشىنشى جالپى ماجىلىسىندە تۇراقتاندىرعان بارلىق رەفورما مىندەتىن جەڭىسپەن ورىنداپ، وراسان زور دامۋ تابىستارىنا قول جەتكىزدى، حالىقارالىق ورنى مەن ىقپالى كۇن سايىن جوعارىلاپ، دۇنيە ٴجۇزىنىڭ بەيبىتشىلىگى مەن دامۋىنا جانە بۇكىل ادامزاتتىڭ العا باسۋىنا ماڭىزدى ۇلەس قوستى. ۆيەتنام جاق جۇڭگو كوممۋنيستىك پارتياسى 20 ـ كەزەكتى ورتالىق كوميتەتىنىڭ ٴۇشىنشى جالپى ٴماجىلىسىنىڭ تابىسپەن اشىلىپ، رەفورمانى ونان ارى جاپپاي تەرەڭدەتۋدىڭ، جۇڭگو ۇلگىسىندەگى وسىزامانداندىرۋدى ىلگەرىلەتۋدىڭ جاڭا ٴداۋىرىن اشقانىن قۇتتىقتايدى. باس شۋجي شي جينپيڭنىڭ باسشىلىعىندا، جۇڭگونىڭ، ٴسوز جوق، ەكىنشى 100 جىلدىق كۇرەس نىساناسىن جەڭىسپەن جۇزەگە اسىرىپ، جاپپاي سوتسياليستىك وسىزاماندانعان قۇدىرەتتى مەملەكەت قۇرىپ شىعاتىندىعىنا سەنەمىز. ۆيەنتام جاق دەربەس، ٴوز ـ وزىنە قوجايىن بولۋعا تاباندى بولادى، ٴبىر جۇڭگو ساياساتىن تاباندىلىقپەن اتقارادى، تايۋان _ جۇڭگو تەرريتورياسىنىڭ ايرىلماس ٴبىر بولىگى دەپ قارايدى، ٴارقانداي فورماداعى ”تايۋاندى دەربەستەندىرۋ“ بولشەكتەۋشىلىك ارەكەتىنە باتىل قارسى تۇرادى، جۇڭگونىڭ مەملەكەتتى بىرلىككە كەلتىرۋدى جۇزەگە اسىرۋىن باتىل قولدايدى. شياڭگاڭ، شينجياڭ، شيزاڭ ىستەرى _ تۇگەلدەي جۇڭگونىڭ ىشكى ٴىسى، ۆيەتنام جاق ٴارقانداي كۇشتەردىڭ جۇڭگونىڭ ىشكى ىسىنە كيلىگۋىنە باتىل قارسى تۇرادى. ۆيەتنام جاق جۇڭگو جاقپەن جوعارى جىكتەگىلەردىڭ ٴجيى بارىس ـ كەلىسىن ساقتاپ، پارتيا باسقارۋ، ەل باسقارۋ تاجىريبەلەرىن ٴبولىسىپ، ستراتەگيالىق ٴوزارا سەنىمدىلىكتى تەرەڭدەتىپ، دامۋ ستراتەگيالارىن ٴتۇيىلىستىرۋدى كۇشەيتۋدى، سونداي ـ اق مەملەكەت قورعانىسى، حاۋىپسىزدىك، ەكونوميكا ـ ساۋدا، قارجى قوسۋ، شەكارا اتتاعان نەگىزدىك قۇرىلعىلاردى ۇلاستىرۋ سياقتى سالالاردا ٴوزارا پايدا جەتكىزىپ، سەلبەستىك جاساۋدى قالايدى. كەلەر جىلعى ”ۆيەتنام _ جۇڭگو گۋمانيتارلىق اۋىس ـ كۇيىس جىلىن“ بىرگە ويداعىداي وتكىزىپ، جاستار، جەرگىلىكتى ورىندار اۋىس ـ كۇيىسىن، سەلبەستىگىن كۇشەيتىپ، ەكى ەلدىڭ قوعامدىق حالىق رايى نەگىزىن بەكەمدەۋ كەرەك. ۆيەتنام جاق جۇڭگو جاقپەن بىرگە تەڭىزدەگى الاۋىزدىقتاردى ۇيلەسىمدى مەڭگەرىپ، ٴوڭىردىڭ بەيبىتشىلىگىن، ورنىقتىلىعىن بىرگە قورعاۋدى قالايدى. ۆيەتنام جاق ٴتوراعا شي جينپيڭ العا قويعان ادامزاتتىڭ تاعدىرلاس ورتاق تۇلعاسىن قۇرۋدى جانە الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن قولدايدى جانە وعان بەلسەنە ات سالىسۋعا پەيىل. ۆيەتنام جاق جۇڭگو جاقپەن كوپ جاقتىلى حالىقارالىق ىستەستىكتى جيىلەتىپ، كوپ جاقتىلىقتى قورعاپ، حالىقارانىڭ ادىلدىگىن، تۋراشىلدىعىن قورعاپ، دۇنيە ٴجۇزىنىڭ بەيبىتشىلىگى مەن دامۋىن جەبەۋگە بەلسەندى ۇلەس قوسۋدى قالايدى.
كەڭەستەن كەيىن ەكى جاق پارتيا مەكتەبى، ۇلاستىرۋ، تۇتاستىرۋ، ونەركاسىپ، فينانس، كەدەندىك تەكسەرۋ ـ كارانتيندەۋ، دەنساۋلىق ساقتاۋ، اقپارات قۇرىلىمدارى جانە مەديا، جەرگىلىكتى ورىن، حالىق تۇرمىسى سياقتى سالالارداعى كوپ ٴتۇرلى ەكى جاقتى سەلبەستىك حۇجاتتارىنا قول قويىلۋىنا بىرگە كۋا بولدى.
قول قويۋ سالتىنان كەيىن، شي جينپيڭ سۋ لينمەن بىرگە شاعىن كولەمدە شاي ىشە وتىرىپ اڭگىمەلەستى، ىقىلاستى دوستىق ورتادا ورتاق كوڭىل ٴبولىپ وتىرعان ماڭىزدى ماسەلەلەر جونىندە ۇزدىكسىز ىشكەرىلەي پىكىر اۋىستىردى.
كەڭەستەن بۇرىن شي جينپيڭ مەن حانىمى پىڭ لييۋان حالىق سارايىنىڭ شىعىس قاقپاسىنىڭ سىرتىنداعى الاڭدا سۋ لين مەن حانىمى ۋ فاڭليگە ارناپ قارسى الۋ سالتىن وتكىزدى.
سۋ لين كەلگەندە قۇرمەت قاراۋىلى قاتار تۇزەپ قۇرمەت ٴبىلدىردى. شي جينپيڭ سۋ لينمەن بىرگە سالتانات مىنبەسىنە شىقتى، اسكەري وركەستر جۇڭگو مەن ۆيەتنام ەكى ەلدىڭ مەملەكەت ٴانىن ورىندادى، تيان ـ انمىن الاڭىندا 21 رەت ساليۋت اتىلدى. سۋ لين شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ٴارى قاتارعا ٴبولىنىپ پاراتتان ٴوتۋىن كوردى.
سول كۇنى تۇستە شي جينپيڭ مەن پىڭ لييۋان حالىق سارايىنىڭ جينسى زالىندا سۋ لين مەن ونىڭ حانىمىنا ارناپ قارسى الۋ قوناعاسىن وتكىزدى.
ساي چي، ۋاڭ ي، ۋاڭ شياۋحۇڭ قاتارلىلار جوعارىداعى قيمىلدارعا قاتىناستى.
سۋ لين جۇڭگودا ساپاردا بولعان كەزدە، ەكى جاق «جۇڭحۋا حالىق رەسپۋبليكاسى مەن ۆيەتنام سوتسياليستىك رەسپۋبليكاسىنىڭ جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناسىن اناعۇرلىم كۇشەيتۋ، جۇڭگو _ ۆيەتنام تاعدىرلاس ورتاق تۇلعاسى قۇرىلىسىن ىلگەرىلەتۋ جونىندەگى بىرلەسكەن مالىمدەمەسىن» جاريالايدى.
