شينحۋا اگەنتتىگىنىڭ 5 ـ ايدىڭ 30 ـ كۇنى بەيجيڭنەن بەرگەن حابارى (تىلشىلەر سۇن ي، ۋاڭ بين). 5 ـ ايدىڭ 30 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپاردا بولۋ ٴارى جۇڭگو _ اراب ەلدەرى سەلبەستىك تالقى مىنبەرى 10 ـ كەزەكتى مينيستر دارەجەلىلەر ٴماجىلىسىنىڭ اشىلۋ سالتىنا قاتىناسۋ ٴۇشىن كەلگەن اراب بىرىككەن امىرلىگى زۇڭتۇڭى مۇحاممەدپەن كەڭەس وتكىزدى.
شي جينپيڭ بىلاي دەپ اتاپ كورسەتتى: اراب بىرىككەن امىرلىگى _ جۇڭگونىڭ ماڭىزدى جالپى بەتتىك ستراتەگيالىق سەرىكتەسى. تاياۋداعى جىلداردان بەرى، ٴبىزدىڭ بىرگە جەتەكشىلىك ەتۋىمىزدە، جۇڭگو _ اراب بىرىككەن امىرلىگى قارىم ـ قاتىناسى تاماشا دامۋ ارىنىن ساقتاپ، جاڭا مەزگىلدەگى جۇڭگو مەن اراب ەلدەرى قارىم ـ قاتىناسىنىڭ تيپتىك ۇلگىسىن ورناتتى. بيىل جۇڭگو مەن اراب بىرىككەن امىرلىگىنىڭ ديپلوماتيالىق قارىم ـ قاتىناس ورناتقاندىعىنىڭ 40 جىلدىعى، جۇڭگو مەن اراب بىرىككەن امىرلىگى قارىم ـ قاتىناسىندا الدىڭعى مەن كەيىنگىنى ۇلاستىرىپ، بۇرىنعىعا مۇراگەر، كەيىنگىگە بۇيداگەر بولاتىن ماڭىزدى كەزەڭ. جۇڭگو جاق اراب بىرىككەن امىرلىگى جاقپەن بىرگە ستراتەگيالىق بيىكتەن جانە ۇزاق بولاشاقتىق تۇرعىدان ەكى ەل قارىم ـ قاتىناسىنىڭ ۇلكەن بەتالىسىن ۇزدىكسىز بەرىك يگەرىپ، جۇڭگو مەن اراب بىرىككەن امىرلىگىنىڭ جالپى بەتتىك ستراتەگيالىق سەرىكتەستىك قارىم ـ قاتىناسىنىڭ باستان ـ اياق قارىشتاپ دامۋىنا شىنايى كەپىلدىك ەتۋدى قالايدى.
شي جينپيڭ بىلاي دەپ باسا دارىپتەدى: جۇڭگو جاق اراب بىرىككەن امىرلىگىنىڭ دەربەس، ٴوز ـ وزىنە قوجايىن بولعان دامۋ جولىمەن ٴجۇرۋىن قولدايدى، اراب بىرىككەن امىرلىگى جاقتىڭ مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋىن قولدايدى، اراب بىرىككەن امىرلىگى جاقپەن ساياسي ٴوزارا سەنىمدىلىكتى بەكەمدەۋدى، سەلبەستىكتى كۇشەيتۋدى، جۇڭگو مەن اراب بىرىككەن امىرلىگىنىڭ تاعدىرلاس ورتاق تۇلعاسىن قول ۇستاسىپ قۇرۋدى قالايدى. جۇڭگو جاق اراب بىرىككەن امىرلىگى جاقپەن ”ٴبىر بەلدەۋ، ٴبىر جولدى“ جوعارى ساپادا بىرگە قۇرۋدى ۇزدىكسىز ىلگەرىلەتىپ، دامۋ ستراتەگياسىن ٴتۇيىلىستىرۋدى كۇشەيتىپ، جۇڭگو مەن اراب بىرىككەن امىرلىگىنىڭ قارجى قوسۋ سەلبەستىگى جوعارى دارەجەلىلەر كوميتەتىن قۇرۋدى وراي ەتىپ، ەكى ەل سەلبەستىگىنىڭ ٴتىپتى دە كوپ جەتىستىكتەرگە قول جەتكىزۋىن ىلگەرىلەتۋدى قالايدى. ساۋدا، ەنەرگيا، نەگىزدىك قۇرىلعىلار سياقتى سالالارداعى سەلبەستىكتى بەكەمدەپ، ينفورماتسيا تەحنيكاسى، جاساندى زەردە، سيفرلى ەكونوميكا، جاڭا ەنەرگيا سياقتى جوعارى تەحنيكا سالاسىنداعى سەلبەستىكتى كەڭەيتەدى. زاڭ اتقارۋ، حاۋىپسىزدىك سەلبەستىگىن كۇشەيتەدى. جاقىندا مەن اراب بىرىككەن امىرلىگىندەگى جۇڭگو ٴتىلىن ۇيرەنۋشىلەرگە ارنايى جاۋاپ حات قايتارىپ، ولاردى جۇڭگو ٴتىلىن جاقسى ۇيرەنۋگە، جۇڭگونى تۇسىنۋگە، جۇڭگو مەن اراب بىرىككەن امىرلىگىنىڭ دوستىعىن جەبەۋگە ۇلەس قوسۋعا ىنتالاندىردىم. جۇڭگو جاق ” 100 مەكتەپتىڭ جۇڭگو ٴتىلىن ۇيرەتۋ“ نىسانىن ۇزدىكسىز قولداپ، اراب بىرىككەن امىرلىگى جۇڭگو مادەنيەت ورتالىعى قۇرىلىسىن ىلگەرىلەتىپ، گۋمانيتارلىق اۋىس ـ كۇيىستى كۇشەيتىپ، ٴوزارا تۇسىنىستىك پەن دوستىقتى كۇشەيتۋدى قالايدى.
شي جينپيڭ بىلاي دەپ اتاپ كورسەتتى: كەزەكتەگى دۇنيە ٴجۇزىنىڭ كوپ ۇيەكتەنۋ بەتالىسى بوگەۋ بەرمەيدى. كوپ ۇيەكتەنۋدىڭ ٴمانى تۇرلىشە وركەنيەتتىڭ، تۇرلىشە ٴتۇزىمنىڭ، تۇرلىشە جولدىڭ ٴوزارا قۇرمەت ەتۋى، بەيبىت قاتار تۇرۋى بولۋعا ٴتيىس. ورتا شىعىس وڭىرىندەگى مەملەكەتتەر _ وركەندەپ كەلە جاتقان ەلدەردىڭ ماڭىزدى قۇرامداس بولىگى، دۇنيە ٴجۇزىنىڭ كوپ ۇيەكتەنۋىندەگى ماڭىزدى كۇش. جۇڭگو جاق وڭىردەگى مەملەكەتتەردىڭ ٴوز ەلىنىڭ مەملەكەت جاعدايىنا ۇيلەسەتىن دامۋ جولىمەن ٴجۇرۋىن، ىنتىماقتاسىپ ٴوزىن الۋەتتەندىرۋ، بەيبىت، جاراسىمدى بولۋ جولىمەن تاباندىلىقپەن ٴجۇرۋىن، الاۋىزدىقتى تىلدەسۋ، كەڭەسۋ ارقىلى شەشۋگە تاباندى بولىپ، بولاشاعىن، تاعدىرىن ٴوز قولىندا ۇستاۋىن قولدايدى. جۇڭگو جاق اراب بىرىككەن امىرلىگى سياقتى اراب ەلدەرىمەن بىرگە قۇلشىنىپ، 2 ـ كەزەكتى جۇڭگو _ اراب ەلدەرى باسشىلار ٴماجىلىسىن ويداعىداي وتكىزىپ، جۇڭگو مەن اراب ەلدەرىنىڭ تاعدىرلاس ورتاق تۇلعاسى قۇرىلىسىن ىلگەرىلەتۋدى قالايدى. جۇڭگو جاق اراب بىرىككەن امىرلىگى جاقپەن جۇڭگو مەن شىعاناق ەلدەرىنىڭ ستراتەگيالىق سەرىكتەستىك قارىم ـ قاتىناسىن كۇشەيتىپ، كوپ جاقتى سەلبەستىكتى كەڭەيتىپ، ”الەمنىڭ وڭتۇستىگىندەگى“ مەملەكەتتەردىڭ ورتاق مۇددەسىن قورعاۋدى قالايدى.
مۇحاممەد مىنالاردى ٴبىلدىردى: ەكىنشى مەكەنىم جۇڭگوعا تاعى دا ساپاردا بولعانىما، سونداي ـ اق ٴتوراعا شي جينپيڭمەن بىرگە جۇڭگو _ اراب ەلدەرى سەلبەستىك تالقى مىنبەرى 10 ـ كەزەكتى مينيستر دارەجەلىلەر ٴماجىلىسىنىڭ اشىلۋ سالتىنا قاتىناسقاندىعىما قاباعات قۋانىشتىمىن. اراب ەلدەرىنىڭ جانە شىعاناق ەلدەرىنىڭ جۇڭگومەن قارىم ـ قاتىناسىنىڭ نەگىزى تەرەڭ، اراب ەلدەرى مەن جۇڭگو قارىم ـ قاتىناسىنىڭ، شىعاناق ەلدەرى مەن جۇڭگو قارىم ـ قاتىناسىنىڭ دامۋىن ۇزدىكسىز تەرەڭدەتۋ اراب ەلدەرى مەن شىعاناق ەلدەرى حالقىنىڭ ورتاق ارمانىنا جانە ٴتۇبىرلى مۇددەسىنە ۇيلەسەدى. اراب بىرىككەن امىرلىگى جاق جۇڭگو جاقپەن بىرگە قۇلشىنىپ، اراب ەلدەرى _ جۇڭگو، شىعاناق ەلدەرى _ جۇڭگو قارىم ـ قاتىناسىن ىلگەرىلەتىپ، ەكى جاق حالقىن ٴتىپتى دە ويداعىداي باقىتقا كەنەلتۋدى قالايدى.
مۇحاممەد مىنالاردى ٴبىلدىردى: اراب بىرىككەن امىرلىگى مەن جۇڭگونىڭ قارىم ـ قاتىناسى ٴوزارا سەنىم ارتقان، ٴوزارا قۇرمەت ەتكەن جانە ورتاق مۇددە نەگىزىندە ورناعان، ٴتۇرلى سالاداعى سەلبەستىگى كەرەمەت دەڭگەيگە جەتتى. اراب بىرىككەن امىرلىگى جۇڭگومەن قارىم ـ قاتىناسىن دامىتۋعا وسكەلەڭ ٴمان بەرەدى، جۇڭگونى ديپلوماتيادا ەڭ الدىمەن ويلاستىراتىن ورىنعا قويادى، جۇڭگونى ۇزاق ۋاقىتتىق سەنىمدى ستراتەگيالىق سەلبەستىك سەرىكتەسى ەسەپتەيدى، ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 40 جىلدىعىن قۇتتىقتاۋدى وراي ەتىپ، ەكونوميكا ـ ساۋدا، قارجى قوسۋ، ەنەرگيا، عىلىم ـ تەحنيكا، وقۋ ـ اعارتۋ، گۋمانيتارلىق ىستەر سياقتى ٴتۇرلى سالاداعى سەلبەستىكتى ونان ارى تەرەڭدەتۋدى، كەڭەيتۋدى قالايدى. اراب بىرىككەن امىرلىگى ۇكىمەتى ٴبىر جۇڭگو ساياساتىن تاباندىلىقپەن اتقارىپ، ٴارقانداي فورماداعى ”تايۋاندى دەربەستەندىرۋگە“ قارسى تۇرادى، جۇڭگونىڭ مەملەكەتتىڭ بىرلىككە كەلۋىن جۇزەگە اسىرۋ جولىندا جاساعان قۇلشىنىستارىن قولدايدى. اراب بىرىككەن امىرلىگى جاق ٴتوراعا شي جينپيڭ العا قويعان الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن ايرىقشا القايدى، بەلسەنە قولدايدى، ”ٴبىر بەلدەۋ، ٴبىر جولدى“ بىرگە قۇرۋعا ۇزدىكسىز بەلسەنە ات سالىسىپ، جۇڭگو جاقپەن كوپ جاقتى بايلانىستى، ىستەستىكتى قويۋلاتىپ، ٴوڭىردىڭ جانە دۇنيە ٴجۇزىنىڭ بەيبىتشىلىگىن، دامۋىن، گۇلدەنىپ ـ كوركەيۋىن جەبەۋ جاعىندا بەلسەندى قۇلشىنىس جاساۋدى قالايدى.
ەكى جاق پالەستينا _ يزرايل قاقتىعىسى جونىندە دە پىكىر اۋىستىردى. شي جينپيڭ بىلاي دەپ باسا دارىپتەدى: كەزەكتەگى شۇعىل مىندەت _ جاپپاي قاقتىعىستى دوعارىپ، سوعىستى توقتاتىپ، ادامگەرشىلىك داعدارىستى شەشۋ. حالىقارالىق قوعام پالەستينا ماسەلەسىن ”ەكى ەل جوباسى“ نەگىزىندە كۇنى بۇرىن كەلىسسوز وتكىزۋ ارقىلى شەشۋدى ٴبىر اۋىزدان قولداۋى كەرەك. جۇڭگو _ اراب بىرىككەن امىرلىگى ەكى جاقتىڭ پالەستينا ماسەلەسىندەگى تۇرعىسى بىردەي، بىرگە قۇلشىنىس جاساپ، پالەستينا ماسەلەسىن جالپى بەتتىك، ٴادىل، باياندى شەشۋدى ىلگەرىلەتۋى كەرەك.
كەڭەستەن كەيىن ەكى ەلدىڭ مەملەكەت باسشىلارى قارجى قوسۋ، ”ٴبىر بەلدەۋ، ٴبىر جولدى“ بىرگە قۇرۋ، عىلىم ـ تەحنيكا، يادرو ەنەرگياسىنان بەيبىت پايدالانۋ، جۇڭگو ٴتىلى وقۋ ـ اعارتۋى، مادەنيەت ـ ساياحات سياقتى سالالارداعى كوپ جاقتى، ەكى جاقتى سەلبەستىك حۇجاتتارىنا قول قويىلۋىنا بىرگە كۋا بولدى.
كەڭەستەن بۇرىن شي جينپيڭ حالىق سارايىنىڭ سولتۇستىك ۇلكەن زالىندا مۇحاممەدكە ارناپ قارسى الۋ سالتىن وتكىزدى.
تيان ـ انمىن الاڭىندا 21 رەت ساليۋت اتىلدى، قۇرمەت قاراۋىلى قاتار تۇزەپ قۇرمەت ٴبىلدىردى. ەكى ەلدىڭ مەملەكەت باسشىلارى سالتانات مىنبەسىنە شىقتى، اسكەري وركەستر جۇڭگو مەن اراب بىرىككەن امىرلىگى ەكى ەلدىڭ مەملەكەت ٴانىن ورىندادى. مۇحاممەد شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ٴارى قاتارعا ٴبولىنىپ پاراتتان ٴوتۋىن كوردى.
سول كۇنى كەشتە شي جينپيڭ حالىق سارايىنىڭ جينسى زالىندا مۇحاممەدكە ارناپ قارسى الۋ قوناعاسىن وتكىزدى.
ۋاڭ ي جوعارىداعى قيمىلدارعا قاتىناستى.
