جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك كەڭەستىڭ، ورتالىق اسكەري ىستەر كوميتەتىنىڭ
جيڭ حايپىڭعا ” ەرەكشە دارەجەلى عارىش ۇلەسكەرى مەدالىن“ بەرۋ، جۋ ياڭجۋعا، گۇي حايچاۋعا ”قاھارمان عارىشكەر “ داڭق اتاعىن بەرۋ جانە ”3 ـ دارەجەلى عارىش ۇلەسكەرى مەدالىن“ بەرۋ جونىندەگى قاۋلىسى
(2024 ـ جىلى 4 ـ ايدىڭ 18 ـ كۇنى)
2023 ـ جىلى 5 ـ ايدىڭ 30 ـ كۇنى شىنجوۋ 16 ـ ٴنومىرلى عارىشكەرلى الەم كەمەسى ٴساتتى ۇشىرىلىپ، عارىشكەر جيڭ حايپىڭ، جۋ ياڭجۋ، گۇي حايچاۋ الەم كەمەسىنە وتىرىپ، تيانحى وزەكتى بولمەسىنە ٴساتتى جايعاسىپ، وربيتادا 5 اي تۇرىپ، ىلگەرىندى ـ كەيىندى ٴبىر رەت كەمە بولمەسىنەن شىعىپ قيمىل جاساپ، ٴبىر رەت عارىشتا ساباق ٴوتىپ، ٴبىر قىدىرۋ كەڭىستىك عىلمي تاجىريبەلەرى مەن قولدانىلمالى كوتەرىلىمدىلىكتىڭ وربيتاداعى تاجىريبەسىن (سىناق) جاساپ، كەڭىستىك بەكەتىنىڭ ”ٴۇش بولمە، ٴۇش كەمە“ سىندى قۇرىلىمدىق تيبىندە تۇعىردى باسقارۋ، قارايلاسۋدى ورىنداپ، 2023 ـ جىلى 10 ـ ايدىڭ 31 ـ كۇنى امان ـ ەسەن ورالدى. شىنجوۋ 16 ـ ٴنومىرلىنىڭ ادام الىپ ۇشۋ مىندەتى _ كەڭىستىك بەكەتى جاپپاي قۇرىلىپ، عارىشقا ادام الىپ ۇشۋ ينجەنەرياسىنىڭ قولدانۋ جانە دامىتۋدىڭ جاڭا كەزەڭىنە وتكەندەگى تۇڭعىش رەتكى ادام الىپ ۇشۋ مىندەتى، عارىش جۇرگىزۋشىسى، عارىشقا ۇشۋ ينجەنەرى، كوتەرىمدىلىك مامانى سىندى 3 تۇردەگى عارىشكەرلەر تۇڭعىش رەت بىرگە مىندەت اتقارعان، بۇل جۇڭگونىڭ عارىش ىستەرىنىڭ جوعارى دەڭگەيدەگى عىلىم ـ تەحنيكادا ٴوز كۇشىنە سۇيەنۋدە، ٴوزىن الۋەتتەندىرۋدە تىڭ قادام تاستاعاندىعىنىڭ، عارىش ىستەرىندە قۋاتتى ەل قۇرۋدى جەدەلدەتۋدە تىڭ سەرپىلىستى جۇزەگە اسىرعاندىعىنىڭ بەلگىسى، ەلىمىزدىڭ جالپىلىق مەملەكەت قۋاتىن ارتتىرىپ جانە جۇڭحۋا ۇلتىنىڭ ۇيىسۋ قۋاتىن كۇشەيتىپ، بۇكىل پارتيانى، بۇكىل ارميانى، بۇكىل ەلدەگى ٴار ۇلت حالقىن اسقاق جىگەرمەن ىنتىماقتاسا العا ۇمتىلىپ، جۇڭگو ۇلگىسىندەگى وسىزامانداندىرۋدىڭ جاڭا تاراۋىن قۇلشىنا جازۋعا جىگەرلەندىرۋدە كەلەلى مانگە يە.
شىنجوۋ 16 ـ ٴنومىرلى عارىشكەرلى الەم كەمەسىنىڭ ۇشۋ مىندەتىنىڭ تولىق تابىستى بولۋىنا قالىڭ عىلىم ـ تەحنيكا قىزمەتكەرلەرىنىڭ، عارىشكەرلەردىڭ، كادرلار مەن جۇمىسشى ـ قىزمەتكەرلەردىڭ، ازاتتىق ارميا كوماندير ـ جاۋىنگەرلەرىنىڭ اقىل ـ پاراساتى مەن جۇرەك قانى سىڭگەن. جيڭ حايپىڭ، جۋ ياڭجۋ، گۇي حايچاۋ جولداستار وسىلاردىڭ ۇزدىك ۋاكىلى، ولار وتاننىڭ ٴۇمىتىن اقتاۋدى مۇرات ەتىپ، بورىشقا ادال بولىپ، جاپا ـ ماشاقاتتان، حاۋىپ ـ قاتەردەن جاسقانباي، ىنتىماقتاسا سەلبەسىپ، دۇنيە جۇزىنە قۇدىرەتتى جۇڭگو رۋحىن، جۇڭگو كۇشىن كورسەتتى. جيڭ حايپىڭ جولداس ادام الىپ ۇشۋ مىندەتىن 4 رەت اتقارىپ، 3 رەت بۇيرىق بەرۋشى مىندەتىن اتقارىپ، ادام الىپ ۇشۋ مىندەتىن اتقارعان سانى ەڭ كوپ جۇڭگولىق عارىشكەرگە اينالدى. جۋ ياڭجۋ جولداس قايسار دا باتىل بولىپ، باتىلدىقپەن سايىس جاريالاپ، دەن قويا مۇقيات مەڭگەرىپ، ەلىمىزدەگى ادام الىپ ۇشۋ مىندەتىن اتقارعان، بولمەدەن شىعۋ قيمىلىن ورىستەتكەن تۇڭعىش عارىشقا ۇشۋ ينجەنەرىنە اينالدى. گۇي حايچاۋ جولداس جاپالى جاتتىعۋ جۇرگىزىپ، قات ـ قابات سىناقتاردى باستان وتكەرىپ، شىنجوۋ 16 ـ ٴنومىرلىنىڭ عارىشكەرلەر گرۋپپاسىنا داڭقپەن تاڭدالىپ، ەلىمىزدىڭ ادام الىپ ۇشۋ مىندەتىن اتقارعان تۇڭعىش كوتەرىمدىلىك مامانىنا اينالدى. ولاردىڭ ەلىمىزدىڭ عارىشقا ادام الىپ ۇشۋ ىستەرىنە قوسقان ەرەن ەڭبەگىن ماراپاتتاۋ ٴۇشىن، جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس، ورتالىق اسكەري ىستەر كوميتەتى جيڭ حايپىڭ جولداسقا ”ەرەكشە دارەجەلى عارىش ۇلەسكەرى مەدالىن“ بەرۋدى، جۋ ياڭجۋ، گۇي حايچاۋ جولداسقا ”قاھارمان عارىشكەر“ داڭق اتاعىن بەرۋدى جانە ” 3 ـ دارەجەلى عارىش ۇلەسكەرى مەدالىن“ بەرۋدى ۇيعاردى.
جيڭ حايپىڭ، جۋ ياڭجۋ، گۇي حايچاۋ جولداستار اۋەلگى ماقساتتى ۇمىتپاي، بورىشتى ەستە بەرىك ساقتاپ، وسكەلەڭ ىسكە ٴوزىن ارناعان ٴداۋىر اۆانگاردتارى، الەمدى زەرتتەۋدىڭ، عارىش كەڭىستىگى ارمانىنا قانات قاعۋدىڭ، عارىش ىستەرىندە قۋاتتى ەل قۇرۋدىڭ ونەگەلى ۇلگىلەرى. پارتيا ورتالىق كوميتەتى مىناعان ۇندەيدى: بۇكىل پارتيا، بۇكىل ارميا، بۇكىل ەلدەگى ٴار ۇلت حالقى شي جينپيڭ جاڭا ٴداۋىر جۇڭگوشا سوتسياليزم يدەياسىن جەتەكشى ەتىپ، پارتيا 20 ـ قۇرىلتايىنىڭ رۋحىن جاپپاي دايەكتىلەندىرىپ، ماراپاتتالعان عارىشكەرلەردى ونەگە ەتىپ، ”ەكىنى تۇراقتاندىرۋدىڭ“ شەشۋشى ٴمانىن تەرەڭ ٴتۇسىنىپ، ”ٴتورت تانىمدى“ كۇشەيتىپ، ”ٴتورت سەنىمدى“ بەكەمدەپ، ”ەكىنى قورعاۋدى“ ورىنداپ، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، ”ەكى بومبى، ٴبىر جاساندى سەرىك“ رۋحى مەن عارىشقا ادام الىپ ۇشۋ رۋحىن بار كۇشپەن اسقاقتاتىپ، وزىنە سەنىپ، ٴوزىن الۋەتتەندىرىپ، ٴبىر نيەت، ٴبىر تىلەكتە بولىپ، قايراتتانا العا ۇمتىلىپ، ەرلىكپەن العا باسىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋ جولىندا ىنتىماقتاسا كۇرەس جۇرگىزەيىك!
