مادەنيەت مۇرالارىن قورعاۋدى، جالعاستىرۋدى كۇشەيتىپ، جۇڭحۋانىڭ تاڭداۋلى ٴداستۇرلى مادەنيەتىن اسقاقتاتايىق

«ىزدەنۋ» جۋرنالى باس شۋجي شي جينپيڭنىڭ ماڭىزدى ماقالاسىن جاريالايدى

　　مادەنيەت مۇرالارىن قورعاۋدى، جالعاستىرۋدى كۇشەيتىپ، جۇڭحۋانىڭ تاڭداۋلى ٴداستۇرلى مادەنيەتىن اسقاقتاتايىق

     شينحۋا اگەنتتىگىنىڭ 4 ـ ايدىڭ 15 ـ كۇنى بەيجيڭنەن بەرگەن حابارى. 4 ـ ايدىڭ 16 ـ كۇنى باسپادان شىعاتىن «ىزدەنۋ» جۋرنالىنىڭ 8 ـ سانى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭنىڭ «مادەنيەت مۇرالارىن قورعاۋدى، جالعاستىرۋدى كۇشەيتىپ، جۇڭحۋانىڭ تاڭداۋلى ٴداستۇرلى مادەنيەتىن اسقاقتاتايىق» اتتى ماڭىزدى ماقالاسىن جاريالايدى. وعان باس شۋجي شي جينپيڭنىڭ 2013 ـ جىلى 8 ـ ايدان 2023 ـ جىلى 9 ـ ايعا دەيىنگى مەزگىلدەگى قاتىستى ماڭىزدى بايىمداۋلارىنان ۇزىندىلەر ەنگىزىلگەن.

　　ماقالادا مىنالار باسا دارىپتەلدى: جۇڭحۋا وركەنيەتى ارىدان باستالىپ، ەجەلدەن ٴۇزىلىس جاساماي، ٴبىزدىڭ ۇلى ۇلتىمىزدى سومدادى. مادەني ەسكەرتكىشتەر مەن مادەنيەت مۇرالارى جۇڭحۋا ۇلتىنىڭ گەنىن جانە قان تامىرىن جالعاپ جاتىر، ولار قايتا تۋىندامايتىن، ورنىن باسقا ەشتەڭە باسا المايتىن جۇڭحۋانىڭ تاڭداۋلى وركەنيەت بايلىعى. ول ٴبىزدىڭ بۋىنعا عانا ٴتان ەمەس، بىزدەن كەيىنگى ۇرپاقتارعا دا تاۋەلدى. پارتيا ورتالىق كوميتەتىنىڭ قورعاۋدى ٴبىرىنشى ورىنعا قويۋعا، باسقارۋدى كۇشەيتۋگە، قۇنىن ايگىلەۋگە، ٴونىمدى پايدالانۋعا، مادەني ەسكەرتكىشتەردى جانداندىرۋعا تاباندى بولۋ جونىندەگى قىزمەت تالابىن مۇقيات دايەكتىلەندىرىپ، تياناقتاندىرىپ، مادەني ەسكەرتكىشتەردى قورعاۋ، پايدالانۋ جانە مادەنيەت مۇرالارىن قورعاۋ، جالعاستىرۋ دەڭگەيىن جاپپاي جوعارىلاتۋىمىز كەرەك.

　　ماقالادا مىنالار اتاپ كورسەتىلدى: مادەني ەسكەرتكىشتەردى سويلەتۋ، تاريحتى سويلەتۋ، مادەنيەتتى سويلەتۋ كەرەك. ٴداستۇرلى مادەنيەت بايلىعىن جۇيەلى سالالاپ، ىشكى وردادا ساقتالىپ جاتقان مادەني ەسكەرتكىشتەردى، بايتاق دالاعا تاراعان مۇرالاردى، بايىرعى كىتاپتاردا جازىلعان جازۋلاردى تۇگەلدەي جانداندىرۋ كەرەك. مادەني ەسكەرتكىشتەردى قورعاۋدى، پايدالانۋدى جانە مادەنيەت مۇرالارىن قورعاۋدى، جالعاستىرۋدى كۇشەيتىپ، مادەني ەسكەرتكىشتەردى زەرتتەۋ، ٴتۇسىندىرۋ جانە كورسەتۋ، تاراتۋ دەڭگەيىن جوعارىلاتۋ كەرەك. تاڭداۋلى ٴداستۇرلى اۋىل مادەنيەتىن ىشكەرىلەي اشىپ، وعان مۇراگەرلىك ەتىپ، جاڭالىق اشىپ، ەلىمىزدىڭ تاريحى ۇزاق ەگىنشىلىك وركەنيەتىنىڭ جاڭا داۋىردەگى باۋرامدىلىعى مەن كەلبەتىن ايگىلەۋ كەرەك. مادەنيەت جاۋھارلارىن جالعاستىرۋدى جانە بەيزاتتىق مادەنيەت مۇرالارىن قورعاۋدى قولداۋدى جانە سۇيەمەلدەۋدى كۇشەيتىپ، از ۇلتتاردىڭ تاريحى، مادەنيەتى جونىندەگى زەرتتەۋدى كۇشەيتىپ، جۇڭحۋا ۇلتى ورتاق تۇلعا تانىمىن بەرىك ورناتۋ كەرەك. توڭكەرىستىك مادەنيەتتى اسقاقتاتىپ، قىزىل گەندى جالعاستىرىپ، توڭكەرىستىك مادەني ەسكەرتكىشتەردى شىن مانىندە ويداعىداي قورعاۋ، ويداعىداي باسقارۋ، ودان ويداعىداي پايدالانۋ كەرەك. جۇڭحۋا وركەنيەتىن جالعاستىرۋ سىندى قويۋ قوعامدىق راي قالىپتاستىرىپ، بۇقارانى، اسىرەسە، جاستار مەن ورەندەردى جۇڭحۋا وركەنيەتىن اناعۇرلىم ويداعىداي تانۋعا جانە شىنايى مويىنداۋعا تاربيەلەپ، جەتەكتەپ، جۇڭگولىق بولۋ جىگەرىن، جالىنىن، سەنىمىن كۇشەيتۋ كەرەك.

　　ماقالادا مىنالار باسا دارىپتەلدى: دۇنيە ٴجۇزى باي مازمۇندى، الۋان ٴتۇرلى وركەنيەتتەردەن قۇرام تاپقان، جۇڭگو _ دۇنيە جۇزىندەگى ەڭ بايىرعى تاريحى جانە مادەنيەتى بار ەلدەردىڭ ٴبىرى. جۇڭحۋا وركەنيەتى ەجەلدەن ٴتۇرلى وركەنيەتتەر اراسىنداعى ٴوزارا ٴتۇسىنىسۋدى جانە قۇرمەتتەۋدى جاقتايدى. بۇكىل الەمنىڭ جەر ـ جەرىمەن مادەنيەت اۋىس ـ كۇيىسىن كۇشەيتىپ، مادەنيەتتىڭ گۇلدەنىپ ـ كوركەيۋىن، دامۋىن، مادەنيەت مۇرالارىن قورعاۋدى، وركەنيەتتەر اۋىس ـ كۇيىسىن، ٴوزارا ۇلگى الۋىن بىرگە ىلگەرىلەتىپ، الەمدىك وركەنيەت باستاماسىن امالياتتا ايگىلەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە تەرەڭ، باياندى مادەنيەت كۇشىن ۇستەۋ كەرەك.