شينحۋا اگەنتتىگىنىڭ 3 ـ ايدىڭ 27 ـ كۇنى بەيجيڭنەن بەرگەن حابارى (ٴتىلشى جىڭ ميڭدا). 3 ـ ايدىڭ 27 ـ كۇنى تۇستەن كەيىن مەملەكەت ٴتوراعاسى شي جينپيڭ حالىق سارايىندا قىزمەت بابىمەن جۇڭگوعا ساپارلاي كەلگەن نيدەرلاندتىڭ باس ٴۋازىرى ريۋتتەمەن كەزدەستى.
شي جينپيڭ بىلاي دەپ اتاپ كورسەتتى: سوڭعى جىلدارى جۇڭگو _ نيدەرلاند قارىم ـ قاتىناسى ورنىقتى، اقاۋسىز، جىلدام دامىدى، ەكى ەلدىڭ ٴارقايسى سالاداعى سەلبەستىگى ۇزدىكسىز تەرەڭدەپ، نيدەرلاند اتى ـ زاتىنا ساي جۇڭگو _ ەۆروپا سەلبەستىگىندەگى ”قاقپاعا“ اينالدى. جۇڭگو جاق نيدەرلاند جاقپەن ٴار جىكتەگى بارىس ـ كەلىستى ساقتاپ، بايلانىس جاساۋعا، تىلدەسۋگە تاباندى بولىپ، ٴوزارا تيىمدىلىك جاساپ تەڭ يگىلىككە كەنەلۋگە تاباندى بولىپ، جۇڭگو مەن نيدەرلاندتىڭ اشىق، ناقتى جان ـ جاقتى سەلبەستىك سەرىكتەستىك قارىم ـ قاتىناسىنىڭ ۇزدىكسىز دامۋىن ىلگەرىلەتۋدى قالايدى. جۇڭگو جاق نيدەرلاندتىڭ ساپالى تاۋارلارى يمپورتىن كەڭەيتۋدى قالايدى، نيدەرلاند كاسىپورىندارىنىڭ جۇڭگوعا كەلىپ قارجى قوسۋىن قارسى الادى، سونداي ـ اق نيدەرلاند جاقتىڭ جۇڭگو كاسىپورىندارىنا ٴادىل، جاريا شارۋاشىلىق ـ ساۋدا ورتاسىن ازىرلەۋىن ٴۇمىت ەتەدى. ەكى جاق اۋىل شارۋاشىلىعى، سۋ يگىلىگى، ەنەرگيا سياقتى ٴداستۇرلى سەلبەستىكتى بەلسەنە ىلگەرىلەتۋى، سونىمەن قاتار جاساندى زەردە، جاسىل تيپ جاڭالاۋ، قارتتار ەكونوميكاسى سياقتى سالالارداعى سەلبەستىك كومەسكى كۇشىن اشۋى كەرەك. ەكى جاقتىڭ ادامداردىڭ بارىس ـ كەلىسىنە قولايلى اناعۇرلىم كوپ شارانى ۇزدىكسىز قولدانىپ، وقۋ ـ اعارتۋ، مادەنيەت جانە حالىقتار اۋىس ـ كۇيىسىنە شابىت بەرۋىن ٴۇمىت ەتەمىن. جۇڭگو جاق نيدەرلاند جاقپەن بىرگە بىرلەسكەن مەملەكەتتەر ۇيىمى، دۇنيە جۇزىلىك ساۋدا ۇيىمى سياقتى كوپ جاقتى قۇرىلىمدارداعى بايلانىستى، سايكەسۋدى كۇشەيتىپ، كليمات وزگەرىسى، ورگانيزمدەردىڭ الۋان تۇرلىلىگى سياقتى الەمدىك سىن ـ سايىستارعا بىرگە توتەپ بەرۋدى قالايدى.
شي جينپيڭ بىلاي دەپ باسا دارىپتەدى: ەكونوميكانىڭ جاھاندانۋى قارسى جەلگە تاپ بولۋى مۇمكىن، ايتسە دە تاريحتىڭ ۇلكەن اۋقىمى وزگەرمەيدى، ”بايلانىستى الشاقتاتىپ، تىزبەكتى ٴۇزۋدىڭ“ شىعار جولى جوق، ەسىك اشۋ، سەلبەستىك جاساۋ بىردەن ـ ٴبىر تالعام. جۇڭگو جاق باستان ـ اياق بىلاي دەپ قارايدى: سەن جەڭىلەسىڭ، مەن جەڭەمىن دەيتىن، قارا بولماسا، اق بولادى دەپ بولەتىن ەكى نەگىزدى قارسىلاسۋ ويىنىڭ ۋاقىتى وتكەن، ناعىز حاۋىپسىز دۇنيە ٴجۇزى تەرەڭدەي توعىسقان، ٴوزارا ارقا سۇيەيتىن دۇنيە ٴجۇزى بولۋعا ٴتيىس. عىلىم ـ تەحنيكا قامالىن قولدان جاساۋ، كاسىپ سالاسى تىزبەگىن، قامداۋ تىزبەگىن بولەكتەۋ تەك بولشەكتەۋشىلىك پەن قاراما ـ قارسىلىقتى عانا تۋدىرادى. جۇڭگو حالقىنىڭ دا ورىندى دامۋ ۇقىعى بار، جۇڭگو عىلىم ـ تەحنيكاسىنىڭ دامۋ، العا باسۋ قادامىن ەشقانداي كۇش بوگەي المايدى. جۇڭگو قاشاندا ورتاق يگىلىككە كەنەلۋ ۇستانىمىن بەرىك ۇستانىپ، جوعارى دەڭگەيدە سىرتقا ەسىك اشۋدى ۇزدىكسىز كەڭەيتىپ، دامۋدىڭ پايداسىنان ٴار جاقپەن بىرگە يگىلىكتەنەدى. جۇڭگونىڭ ەۆروپاعا قاراتقان ساياساتى ٴۇرتىس ورنىقتىلىقتى ساقتادى، ەۆروپانى كوپ ۇيەكتى دۇنيە جۇزىندەگى ماڭىزدى ٴبىر ۇيەك جانە سەلبەستىك سەرىگى دەپ قارادى. نيدەرلاند جاقتىڭ جۇڭگو مەن ەۆروپانىڭ ٴوزارا ٴتۇسىنىسۋىن ىلگەرىلەتۋ، سىندارلى قارىم ـ قاتىناستى دامىتۋ ٴۇشىن ۇزدىكسىز بەلسەندى رول اتقارۋىن ٴۇمىت ەتەمىن.
ريۋتتە مىنالاردى ٴبىلدىردى: 2013 ـ جىلى مەن باس ٴۋازىر رەتىندە، تۇڭعىش رەت جۇڭگوعا ساپارلاي كەلدىم، اسىرەسە، 2014 ـ جىلى ٴتوراعا شي جينپيڭمەن بىرگە نيدەرلاند پەن جۇڭگونىڭ اشىق، ناقتى جان ـ جاقتى سەلبەستىك سەرىكتەستىك قارىم ـ قاتىناسىن ورناتۋدى جاريالاعاننان بەرى، ەكى ەلدىڭ قارىم ـ قاتىناسى تاماشا دامۋدى ساقتاپ، ساۋدا سوماسى ٴبىر ەسەلەندى، ەكى جاقتى سەلبەستىكتە وراسان زور كومەسكى كۇش پەن كەلەشەك جارىققا شىقتى. ”بايلانىستى الشاقتاتىپ، تىزبەكتى ٴۇزۋ“ نيدەرلاند ۇكىمەتىنىڭ ساياساتتىق تاڭداۋى ەمەس، ويتكەنى جۇڭگونىڭ دامۋ مۇددەسىنە زيان جەتكىزەتىن ارەكەت اتاۋلىنىڭ ٴبارى ٴوزىن زياندايدى. جۇڭگو جاقتىڭ نيدەرلاند ازاماتتارىنىڭ جۇڭگوعا بارۋىنا 15 كۇندىك ۆيزاسىز مامىلە ازىرلەگەندىگىنە العىس ايتامىن. نيدەرلاند جاق جۇڭگومەن دوستىق قارىم ـ قاتىناسىن قاستەرلەيدى، جۇڭگو جاقپەن سەرىكتەستىك قارىم ـ قاتىناسىن ۇزدىكسىز تەرەڭدەتىپ، ادامداردىڭ بارىس ـ كەلىسىنە قولايلىلىق جاساپ، ەكونوميكا ـ ساۋدا، كومىر قىشقىل گازىنىڭ شىعارىلۋىن ازايتۋ سياقتى سالالارداعى سەلبەستىكتى كۇشەيتىپ، 20 ەل توبى سياقتى كوپ جاقتى ورىنداعى، سونداي ـ اق حالىقارالىق، وڭىرلىك قولامتالى ماسەلەلەردەگى بايلانىستى، سايكەستىكتى كۇشەيتۋدى قالايدى.
ۋاڭ ي كەزدەسۋگە قاتىناستى.
شينحۋا اگەنتتىگىنىڭ 3 ـ ايدىڭ 27 ـ كۇنى بەيجيڭنەن بەرگەن حابارى (ٴتىلشى جىڭ ميڭدا). 3 ـ ايدىڭ 27 ـ كۇنى تۇستەن كەيىن مەملەكەت ٴتوراعاسى شي جينپيڭ حالىق سارايىندا جۇڭگوعا رەسمي ساپارلاي كەلگەن شريلانكانىڭ زۇڭليى گۇناۋاردەنامەن كەزدەستى.
شي جينپيڭ بىلاي دەپ اتاپ كورسەتتى: جۇڭگو مەن شريلانكانىڭ دوستىعى ارىدان جالعاسقان، ەكى ەل حالقىندا تابيعي جاقىندىق بار. جۇڭگو _ شريلانكا قارىم ـ قاتىناسىن ويداعىداي بەكەمدەۋ، دامىتۋ ەكى ەل حالقىنىڭ ٴتۇبىرلى مۇددەسىنە جانە ورتاق تىلەگىنە ۇيلەسەدى. جۇڭگو جاق شريلانكا جاقپەن بىرگە ”دەربەس ٴوزىن الۋەتتەندىرۋ، ىنتىماقتاسا ٴوزارا قارايلاسۋ“ سىندى «كۇرىش ـ كاۋچۇك كەلىسىمى» رۋحىن ۇزدىكسىز اسقاقتاتىپ، ساياسي ٴوزارا سەنىمدىلىكتى بەكەمدەپ، ەل باسقارۋ تاجىريبەلەرى جونىندەگى اۋىس ـ كۇيىستى كۇشەيتىپ، ناقتى سەلبەستىكتى كەڭەيتىپ، ”ٴبىر بەلدەۋ، ٴبىر جولدى“ جوعارى ساپالى بىرگە قۇرىپ، جۇڭگو مەن شريلانكانىڭ ادالدىقپەن ٴوزارا كومەكتەسەتىن، ۇرپاقتار بويى دوس بولاتىن ستراتەگيالىق سەلبەستىك سەرىكتەستىك قارىم ـ قاتىناسىن ۇزدىكسىز تەرەڭدەتۋدى قالايدى.
شي جينپيڭ بىلاي دەپ باسا دارىپتەدى: جۇڭگو جاق شريلانكانىڭ مەملەكەتتىڭ يەلىك ۇقىعىن، تاۋەلسىزدىگىن، ۇلت نامىسىن قورعاۋىن، ٴوز ەلىنىڭ مەملەكەت جاعدايىنا ۇيلەسەتىن وسىزاماندانۋ جولى جونىندە ىزدەنىس جاساۋىن باتىل قولدايدى، شريلانكانىڭ ەكونوميكالىق، قوعامدىق دامۋىنا شاماسى جەتكەنشە كومەك بەرۋدى جالعاستىرادى. ەكى جاق بىرگە قۇلشىنىپ، ”ٴبىر بەلدەۋ، ٴبىر جولدى“ جوعارى ساپامەن بىرگە قۇرۋدى، اسىرەسە، كولومبو پورت قالاشىعى جانە حامبانتوتا جالپىلىق اشۋ نىسانى سىندى ەكى ٴىرى جەتەكشى نىساندى ىلگەرىلەتىپ، زات اينالىمى، ەنەرگيا، كاسىپ سالالارى سەلبەستىگىن تەرەڭدەتىپ، سيفرلى ەكونوميكا، جاسىل ەكونوميكا، تازا ەنەرگيا، مادەنيەت ـ ساياحات، تەڭىز ـ مۇحيت ەكونوميكاسى سياقتى سالالارداعى اۋىس ـ كۇيىستى، سەلبەستىكتى كۇشەيتۋى كەرەك. جۇڭگو جاق شريلانكانىڭ ەرەكشەلىككە يە، ساپالى ونىمدەرىن يمپورت ەتۋدى ۇزدىكسىز كەڭەيتىپ، جۇڭگو كاسىپورىندارىن شريلانكاعا بارىپ، قارجى قوسىپ، شارۋاشىلىعىن كوركەيتۋگە ىنتالاندىرۋدى قالايدى، شريلانكا جاقتىڭ ٴادىل، جاريا شارۋاشىلىق ـ ساۋدا ورتاسىن ازىرلەۋىن ٴۇمىت ەتەمىز. جۇڭگو جاق شريلانكا جاقپەن اۋىل ـ قىستاقتاردا كەدەيلىكتى ازايتۋ سەلبەستىگىن كۇشەيتىپ، شريلانكانىڭ ەكونوميكانىڭ تيبىن وزگەرتىپ، دارەجەسىن جوعارىلاتۋدى جانە باياندى دامۋدى جۇزەگە اسىرۋىنا دەم بەرۋدى قالايدى. ەكى جاق بەيبىت قاتار تۇرۋ بەس پرينسيبىن ونان ارى اسقاقتاتىپ، حالىقارالىق جانە وڭىرلىك ىستەردەگى ىستەستىكتى كۇشەيتىپ، جۇڭگو مەن شريلانكانىڭ ورتاق مۇددەسى مەن حالىقارالىق ادىلدىكتى، ادىلەتتىلىكتى ويداعىداي قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە ٴتيىس.
گۇناۋاردەنا مىنالاردى ٴبىلدىردى: شريلانكا مەن جۇڭگو ٴداستۇرلى دوس. شريلانكا جاق ٴبىر جۇڭگو پرينسيبىنە تيتتەي دە ٴارى ـ ٴسارى بولماي باتىل بويسۇنادى، جۇڭگومەن دوستىق، سەلبەستىك ساياساتىن تيتتەي دە ٴارى ـ ٴسارى بولماي اتقارادى، جۇڭگونى قاشاندا سىرتپەن قارىم ـ قاتىناستىڭ الدىڭعى ورنىنا قويادى. شريلانكا جاق جۇڭگونىڭ شريلانكا قيىنشىلىقتا قالعاندا ىلعي دا دەر كەزىندە كومەك قولىن سوزاتىندىعىن ۇمىتپايدى، شريلانكا مەن جۇڭگو تاعدىرلاس، تاۋقىمەتتى بىرگە تارتقان دوستار. كولومبو پورت قالاشىعى جانە حامبانتوتا جالپىلىق اشۋ نىسانى سياقتى نىساندار شريلانكانىڭ ەكونوميكالىق، قوعامدىق دامۋىن ايرىقشا سەرپىلتتى، سونداي ـ اق ٴوڭىردىڭ تۇتاس تۇلعالىق دامۋىن پارمەندى جەبەدى. ٴتوراعا شي جينپيڭ العا قويعان الەمدىك دامۋ باستاماسى، الەمدىك حاۋىپسىزدىك باستاماسى، الەمدىك وركەنيەت باستاماسى دۇنيە ٴجۇزىنىڭ بەيبىتشىلىگى مەن دامۋىنا جاڭا قوزعاۋشى كۇش جانە وڭ ەنەرگيا ۇستەدى، شريلانكا جاق بەلسەنە قولدايدى، ات سالىسادى. شريلانكا جاق ۇزدىكسىز جۇڭگو جاقپەن بىرگە بەيبىت قاتار تۇرۋ بەس پرينسيبىن اسقاقتاتىپ، شريلانكا مەن جۇڭگونىڭ دوستىق قارىم ـ قاتىناسىن تەرەڭدەتىپ، ”ٴبىر بەلدەۋ، ٴبىر جولدى“ بىرگە قۇرۋدى ىلگەرىلەتىپ، ەكونوميكا ـ ساۋدا، وقۋ ـ اعارتۋ، ساياحات، كەدەيلىكتى ازايتۋ سياقتى سالالارداعى سەلبەستىكتى كەڭەيتىپ، حالىقارالىق كوپ جاقتى بايلانىستى، ىستەستىكتى قويۋلاتىپ، ازيا تاعدىرلاس ورتاق تۇلعاسىن جانە ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.
ۋاڭ ي كەزدەسۋگە قاتىناستى.
