3 ـ ايدىڭ 25 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن ناۋرۋ زۇڭتۇڭى ادياڭمەن كەڭەس وتكىزدى. سۋرەتتە: كەڭەستەن بۇرىن شي جينپيڭ حالىق سارايىنىڭ سولتۇستىك ۇلكەن زالىندا ادياڭدى قارسى الۋ سالتىن وتكىزدى.
□ سۋرەتتى شينحۋا اگەنتتىگىنىڭ ٴتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 3 ـ ايدىڭ 25 ـ كۇنى بەيجيڭنەن بەرگەن حابارى (ٴتىلشى ليۋ حۋا). 3 ـ ايدىڭ 25 ـ كۇنى تۇستەن كەيىن مەملەكەت ٴتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن ناۋرۋ زۇڭتۇڭى ادياڭمەن كەڭەس وتكىزدى.
شي جينپيڭ بىلاي دەپ اتاپ كورسەتتى: بيىل 1 ـ ايدا ناۋرۋ ٴبىر جۇڭگو پرينسيبىنە تاباندى بولۋ، جۇڭگومەن ديپلوماتيالىق قارىم ـ قاتىناستى قالپىنا كەلتىرۋ سىندى ساياسي ۇيعارىم جاسادى، بۇل تاريحتىڭ ۇلكەن اۋقىمىنا ۇيلەسەتىن، ٴداۋىر اعىمىنا سايكەسەتىن شارا. دوستىق ەرتە ـ كەش دەپ بولىنبەيدى، باستالادى ەكەن، جارقىن بولاشاققا يە بولادى. سەلبەستىكتىڭ ۇلكەن ـ كىشىسى بولمايدى، شىن ىقىلاس بولسا بولعانى، سۇبەلى جەتىستىككە قول جەتكىزۋگە بولادى. جۇڭگو _ ناۋرۋ قارىم ـ قاتىناسى تاريحتىڭ جاڭا تاراۋىن اشتى. جۇڭگو جاق ناۋرۋ جاقپەن بىرگە جۇڭگو _ ناۋرۋ قارىم ـ قاتىناسىنىڭ كوركەم بولاشاعىن اشىپ، ەكى ەل حالقىن اناعۇرلىم ويداعىداي باقىتقا كەنەلتۋدى قالايدى.
شي جينپيڭ بىلاي دەپ باسا دارىپتەدى: بارىنە تەڭ تۇرعىدا مامىلە جاساۋ _ جۇڭگو ديپلوماتياسىنىڭ ايقىن قاسيەتى. جۇڭگو جاق مەملەكەتتەردى ۇلكەن ـ كىشى، كۇشتى ـ ٴالسىز، كەدەي ـ باي دەپ ٴبولىپ جارماۋدى باستان ـ اياق قۋاتتاپ كەلەدى، بارلىعى دا حالىقارالىق قوعامنىڭ تەرەزەسى تەڭ مۇشەسى. جۇڭگو باستان ـ اياق وركەندەپ كەلە جاتقان ەلدەردىڭ ٴبىر مۇشەسى، جۇڭگونىڭ بىرلەسكەن مەملەكەتتەر ۇيىمى حاۋىپسىزدىك القالار كەڭەسىندەگى وسى ٴبىر بەلەتى ماڭگى وركەندەپ كەلە جاتقان ەلدەرگە ٴتان. جۇڭگو _ ناۋرۋ قارىم ـ قاتىناسى _ ٴبىر ـ بىرىنە قۇرمەت ەتەتىن، تەڭ تۇرعىدا ٴوزارا پايدا جەتكىزەتىن، ٴبىر ـ بىرىنە قولداۋ كورسەتەتىن قارىم ـ قاتىناس. جۇڭگو جاق ناۋرۋدىڭ مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاۋىن باتىل قولدايدى، ناۋرۋدىڭ دەربەس، وزىنە ـ ٴوزى قوجايىن بولا وتىرىپ ٴوز ەلىنىڭ مەملەكەت جاعدايىنا ۇيلەسەتىن دامۋ جولىمەن ٴجۇرۋىن باتىل قولدايدى، ناۋرۋ جاقپەن ٴار جىكتەگىلەردىڭ، ٴار سالانىڭ اۋىس ـ كۇيىسىن، تىلدەسۋىن كۇشەيتىپ، ٴوزارا ٴتۇسىنىسۋ مەن سەنىمدىلىكتى ۇزدىكسىز ارتتىرىپ، ەكى ەل قارىم ـ قاتىناسىنىڭ ساياسي نەگىزىن بەكەمدەۋدى قالايدى.
شي جينپيڭ بىلاي دەپ اتاپ كورسەتتى: جۇڭگو جاق ناۋرۋدىڭ جۇڭگومەن ”ٴبىر بەلدەۋ، ٴبىر جولدى“ بىرگە قۇرۋ سەلبەستىك حۇجاتىنا قول قويىسقان تاعى ٴبىر ەلگە اينالعاندىعىن قارسى الادى، ناۋرۋ جاقپەن ساۋدا، قارجى قوسۋ، نەگىزدىك قۇرىلعىلار قۇرىلىسى سياقتى سالالارداعى ناقتى ىستەر سەلبەستىگىن كەڭەيتۋدى ٴارى ناۋرۋدىڭ دەربەس باياندى دامۋدى جۇزەگە اسىرۋىنا ساياسي شارت قوسىلماعان كومەك بەرۋدى قالايدى. ەكى جاق وقۋ ـ اعارتۋ، مادەنيەت، دەنساۋلىق ساقتاۋ، جاستار سياقتى سالالارداعى اۋىس ـ كۇيىستى كۇشەيتۋى كەرەك، اناعۇرلىم كوپ ناۋرۋ جاستارىنىڭ جۇڭگوعا كەلىپ ٴبىلىم تولىقتاۋىن قارسى الامىز، تۇستىك ەلدەر سەلبەستىگى جۇلگەسىندە ناۋرۋعا كليمات وزگەرىسىنە توتەپ بەرۋ بويىنشا كومەك بەرۋدى قالايمىز. جۇڭگو جاق ناۋرۋ جاقپەن بىرلەسكەن مەملەكەتتەر ۇيىمى، تىنىق مۇحيتتاعى ارال ەلدەرى تالقى مىنبەرى سياقتى كوپ جاقتى سالالاردا تىلدەسىپ جانە سايكەسىپ، تەرەزەسى تەڭ، ٴتارتىپتى بولعان دۇنيە ٴجۇزىنىڭ كوپ ۇيەكتەنۋىن جانە جالپىعا بىردەي، قامتىمدى بولعان ەكونوميكانىڭ جاھاندانۋىن بىرگە دارىپتەپ، وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى.
ادياڭ مىنالاردى ٴبىلدىردى: ۇسىنىس بويىنشا جۇڭگودا مەملەكەتتىك ساپاردا بولىپ، جۇڭگونىڭ ۇزاق تاريحىن، شۇعىلالى مادەنيەتىن جانە ومىرشەڭدىك كۇشكە يە دامۋىن سەزىنگەندىگىمدى ايرىقشا داڭق سانايمىن. جۋىقتا ناۋرۋ تاريحتىڭ دۇرىس جاعىندا تۇرىپ، ٴبىر جۇڭگو پرينسيبىن مويىنداۋ جانە وعان تاباندى بولۋ نەگىزىندە جۇڭگومەن ديپلوماتيالىق قارىم ـ قاتىناستى قالپىنا كەلتىرۋدى ۇيعاردى، بۇل ناۋرۋ ـ جۇڭگو قارىم ـ قاتىناسىنداعى ماڭىزدى بەلەس، ناۋرۋدىڭ مەملەكەت دامۋىنىڭ جانە ناۋرۋ ـ جۇڭگو قارىم ـ قاتىناسىنىڭ جاڭا تاراۋىن اشتى. ناۋرۋ جۇڭگو جاقتىڭ ۇلكەن ـ كىشى ەلدەردىڭ تۇگەلدەي تەرەزەسى تەڭ دەگەنگە دايەكتى تاباندى بولىپ كەلگەندىگىن بارىنشا القايدى، ٴبىر جۇڭگو پرينسيبىنە باتىل بويسۇنىپ، جۇڭگومەن سەلبەستىكتى ۇزدىكسىز تەرەڭدەتۋدى، ناۋرۋ مەن جۇڭگونىڭ ديپلوماتيالىق قارىم ـ قاتىناستى قالپىنا كەلتىرگەندىگىن ماڭىزدى وراي ەتىپ، جۇڭگو جاقپەن بىرگە ٴبىر ـ بىرىنە قۇرمەت ەتىپ، ٴتۇسىنىسۋدى ارتتىرىپ، قىزمەتكەرلەردىڭ بارىس ـ كەلىسى مەن ٴتۇرلى سالاداعى سەلبەستىكتى كۇشەيتىپ، جۇڭگو تاجىريبەلەرىن ۇيرەنىپ جانە ودان ۇلگى الىپ، مول ناتيجەلى جانە ٴوزارا پايدا جەتكىزىپ، تەڭ يگىلىككە كەنەلەتىن سەرىكتەستىك قارىم ـ قاتىناستى دامىتۋدى قالايدى. قازىرگى دۇنيە ٴجۇزى كوپتەگەن الەمدىك سىن ـ سايىسقا ٴدوپ كەلىپ وتىر، ىنتىماق جانە سەلبەستىك بولعاندا عانا، ادامزاتتىڭ بىرگە دامۋىن جانە گۇلدەنۋىن جۇزەگە اسىرۋعا بولادى. ٴتوراعا شي جينپيڭ العا قويعان ٴبىر قىدىرۋ الەمدىك باستامالار ماڭىزدى مانگە يە. ناۋرۋ جاق ”ٴبىر بەلدەۋ، ٴبىر جولدى“ بىرگە قۇرۋعا بەلسەنە ات سالىسىپ، الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن تياناقتاندىرىپ، جۇڭگو جاقپەن كليمات وزگەرىسىنە توتەپ بەرۋ سەلبەستىگىن كۇشەيتۋدى قالايدى.
كەڭەستەن كەيىن ەكى ەلدىڭ مەملەكەت باسشىلارى ”ٴبىر بەلدەۋ، ٴبىر جولدى“ بىرگە قۇرۋ، الەمدىك دامۋ باستاماسىن تياناقتاندىرۋ، ەكونوميكالىق دامۋ، اۋىل شارۋاشىلىعى سياقتى سالالارداعى كوپ ٴتۇرلى ەكى جاقتى سەلبەستىك حۇجاتىنا قول قويۋعا بىرگە كۋا بولدى.
ەكى جاق «جۇڭحۋا حالىق رەسپۋبليكاسى مەن ناۋرۋ رەسپۋبليكاسىنىڭ بىرلەسكەن مالىمدەمەسىن» جاريالايدى.
كەڭەستەن ىلگەرى شي جينپيڭ حالىق سارايىنىڭ سولتۇستىك ۇلكەن زالىندا ادياڭدى قارسى الۋ سالتىن وتكىزدى.
تيان ـ انمىن الاڭىندا 21 رەت قۇرمەت ساليۋتى اتىلىپ، قۇرمەت قاراۋىلى قاتارعا تۇرىپ قۇرمەت ٴبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىعىپ، اسكەري وركەستر جۇڭگو ـ ناۋرۋ ەكى ەلدىڭ مەملەكەت ٴانىن ورىندادى. ادياڭ شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ٴارى قاتارعا ٴبولىنىپ پاراتتان ٴوتۋىن كوردى.
سول كۇنى كەشتە شي جينپيڭ حالىق سارايىنىڭ جينسى زالىندا ادياڭدى قارسى الۋ قوناعاسىن وتكىزدى.
ۋاڭ ي جوعارىداعى قيمىلدارعا قاتىناستى.
