شينحۋا اگەنتتىگىنىڭ 3 ـ ايدىڭ 23 ـ كۇنى بەيجيڭنەن بەرگەن حابارى. 3 ـ ايدىڭ 23 ـ كۇنى مەملەكەت ٴتوراعاسى شي جينپيڭ دومينيكا زۇڭتۇڭى بارتونمەن ٴوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 20 جىلدىعىن قۇتتىقتادى.
شي جينپيڭ بىلاي دەپ اتاپ كورسەتتى: دومينيكا _ جۇڭگونىڭ كارايب وڭىرىندەگى ماڭىزدى سەلبەستىك سەرىگى. جۇڭگو مەن دومينيكا ديپلوماتيالىق قارىم ـ قاتىناس ورناتقان 20 جىلدان بەرى ەكى ەلدىڭ قارىم ـ قاتىناسى جوعارى دەڭگەيدە دامۋدان جازباي، ساياسي ٴوزارا سەنىمدىلىگى ۋاقىت وتكەن سايىن بەكەمدەلدى، ناقتى ىستەر سەلبەستىگىنىڭ جەتىستىگى مول بولىپ، حالىقتار دوستىعى كۇن سايىن تەرەڭدەدى. مەن جۇڭگو مەن دومينيكا قارىم ـ قاتىناسىنىڭ دامۋىنا ايرىقشا ٴمان بەرەمىن، بارتون زۇڭتۇڭمەن بىرگە ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 20 جىلدىعىن تىڭ باستاما ەتىپ، ەكى جاقتىڭ ٴار سالاداعى سەلبەستىگىن تەرەڭدەتىپ، ”ٴبىر بەلدەۋ، ٴبىر جولدى“ جوعارى ساپامەن بىرگە قۇرىپ، جۇڭگو مەن دومينيكا قارىم ـ قاتىناسىنىڭ اناعۇرلىم كوركەم بولاشاعىن بىرگە جاراتۋدى قالايمىن.
بارتون مىنالاردى ٴبىلدىردى: دومينيكا مەن جۇڭگونىڭ قارىم ـ قاتىناسى مىعىم، مول جەتىستىككە يە. دومينيكا جاق جۇڭگومەن دوستىعىن قاستەرلەيدى، جۇڭگو جاقتىڭ قولداۋ كورسەتكەندىگىنە جانە كومەگىنە العىس ايتادى، جۇڭگو جاقپەن بىرگە ٴوزارا تيىمدىلىك جەتكىزىپ، سەلبەسۋدى ۇزدىكسىز تەرەڭدەتىپ، الەمدىك سىن ـ سايىسقا بىرگە توتەپ بەرۋدى قالايدى.
سول كۇنى مەملەكەتتىك كەڭەستىڭ زۇڭليى لي چياڭ دومينيكانىڭ زۇڭليى سكەرريدپەن ٴوزارا قۇتتىقتاۋ تەلەگرامماسىن جولدادى. لي چياڭ مىنالاردى ٴبىلدىردى: جۇڭگو جاق دومينيكا جاقپەن بىرگە قۇلشىنىپ، ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 20 جىلدىعىن قۇتتىقتاۋدى وراي ەتىپ، جۇڭگو مەن دومينيكانىڭ ٴار سالاداعى ناقتى ىستەر سەلبەستىگىنىڭ ۇزدىكسىز تەرەڭدەۋىن ىلگەرىلەتىپ، ەكى ەل حالقىنا اناعۇرلىم كوپ قۇت ـ ىرىس الا كەلۋدى قالايدى.
سكەرريد مىنالاردى ٴبىلدىردى: ديپلوماتيالىق قارىم ـ قاتىناس ورناتقان 20 جىلدان بەرى، دومينيكا مەن جۇڭگو ٴوزارا قۇرمەت ەتىپ، ٴوزارا ٴتۇسىنىستى، جۇڭگونىڭ قولداۋى مەن سەلبەستىگى دومينيكانىڭ ەكونوميكالىق، قوعامدىق دامۋىنا ماڭىزدى ۇلەس قوستى. مەن دومينيكا _ جۇڭگو قارىم ـ قاتىناسىنىڭ ۇزدىكسىز كۇشەيەتىندىگىنە جانە داميتىندىعىنا كامىل سەنەمىن.
