14 ـ كەزەكتى مەملەكەتتىك حالىق قۇرىلتايى 2 ـ ٴماجىلىسىنىڭ ٴتوراعالار القاسى 1 ـ جيىنىن وتكىزدى
ٴماجىلىستىڭ كۇن ٴتارتىبى سياقتىلاردى بەلگىلەدى، بۇل رەتكى ٴماجىلىس 3 ـ ايدىڭ 5 ـ كۇنى اشىلادى، ٴماجىلىس ۋاقىتى 7 كۇن بولادى
شينحۋا اگەنتتىگىنىڭ 3 ـ ايدىڭ 4 ـ كۇنى بەيجيڭنەن بەرگەن حابارى. 14 ـ كەزەكتى مەملەكەتتىك حالىق قۇرىلتايى 2 ـ ٴماجىلىسىنىڭ ٴتوراعالار القاسى 3 ـ ايدىڭ 4 ـ كۇنى تۇستەن بۇرىن بەيجيڭ حالىق سارايىندا 1 ـ جيىنىن وتكىزدى. مەملەكەتتىك حالىق قۇرىلتايى تۇراقتى كوميتەتىنىڭ باستىعى جاۋ لىجي ٴماجىلىستى باسقاردى.
ٴتوراعالار القاسىنىڭ جيىنىنا قاتىناسۋعا ٴتيىستى 181 ادامنىڭ 180ى قاتىناستى، ٴبىر ادام قاتىناسپادى، قاتىناسقان ادام سانى زاڭدا بەلگىلەنگەن ادام سانىنا ۇيلەسەدى.
جيىن الدىمەن 14 ـ كەزەكتى مەملەكەتتىك حالىق قۇرىلتايى 2 ـ ٴماجىلىسى ٴتوراعالار القاسىنىڭ تۇراقتى ٴتوراعالارىن سايلادى. ٴتوراعالار القاسىنىڭ تۇراقتى ٴتوراعاسى مىندەتىن 14 ـ كەزەكتى مەملەكەتتىك حالىق قۇرىلتايى تۇراقتى كوميتەتىنىڭ باستىعى، ورىنباسار باستىقتارى، باس حاتشىسى وتەيدى. ٴتوراعالار القاسىنىڭ تۇراقتى ٴتوراعاسى ٴتوراعالار القاسىنىڭ جيىنىن شاقىرادى جانە باسقارادى.
جيىن 14 ـ كەزەكتى مەملەكەتتىك حالىق قۇرىلتايى 2 ـ ٴماجىلىسىنىڭ كۇن ٴتارتىبىن داۋىسقا سالىپ ماقۇلدادى. ٴماجىلىستىڭ كۇن تارتىبىنە ساي، بۇل رەتكى ٴماجىلىس 3 ـ ايدىڭ 5 ـ كۇنى تۇستەن بۇرىن اشىلىپ، 3 ـ ايدىڭ 11 ـ كۇنى تۇستەن كەيىن جابىلادى، ٴماجىلىس ۋاقىتى 7 كۇن بولادى.
مەملەكەتتىك حالىق قۇرىلتايىنىڭ ٴىس قاراۋ ەرەجەسىندەگى بەلگىلەمە بويىنشا، ٴتوراعالار القاسىنىڭ 1 ـ جيىنى سايلاعان ٴتوراعالار القاسىنا مۇشە بىرنەشە ادام ٴماجىلىستىڭ ٴار رەتكى جالپى جيىنىنىڭ اتقارۋشى ٴتوراعاسى مىندەتىن جەكە ـ جەكە وتەيدى. داۋىسقا سالۋ ارقىلى جيىن ٴماجىلىستىڭ جالپى جيىندارىنىڭ اتقارۋشى ٴتوراعالارىن سايلادى.
جيىن داۋىسقا سالۋ ارقىلى ليۋ چي، ليۋ جۇنچىن، شين چۇنيىڭ، لوۋ چينجيان، كۇڭ شاۋشۇن، ليۋ جيانبولاردىڭ ٴماجىلىستىڭ ورىنباسار باس حاتشىسى بولۋىن ۇيعاردى. جيىن لوۋ چينجياننىڭ ٴماجىلىستىڭ مالىمدەمەشىسى مىندەتىن قوسىمشا اتقارۋىن ۇيعاردى.
جيىن داۋىسقا سالۋ ارقىلى ٴماجىلىس كەزىندە ۋاكىلدەردىڭ كەڭەستىك جوبا ۇسىنۋ ۋاقىتى 3 ـ ايدىڭ 8 ـ كۇنى ساعات 12گە دەيىن بولادى دەپ ۇيعاردى. ٴماجىلىس كەزىندە ٴماجىلىستىڭ حاتشىلار باسقارماسى ۋاكىلدەر ۇيىرمەسىنىڭ جانە ۋاكىلدەردىڭ ٴماجىلىس كەزىندە ورتاعا قويعان كەڭەس جوبالارىنا زەرتتەۋ جۇرگىزىپ، ٴبىر جاقتى ەتۋ پىكىرىن ورتاعا قويىپ، ٴتوراعالار القاسىنىڭ ۇيعارىم جاساۋىنا مالىمدەيدى.
