شينحۋا اگەنتتىگىنىڭ 2 ـ ايدىڭ 24 ـ كۇنى بەيجيڭنەن بەرگەن حابارى. مەملەكەت ٴتوراعاسى شي جينپيڭ جۇڭگو ۇلۋ (ايداعار) جىلىنىڭ يۋانشياۋ مەرەكەسىندە امەريكانىڭ ماسكاتين ورتا مەكتەبىنىڭ جۇڭگوعا ساپارلاي كەلگەن ۋاكىلدەر ۇيىرمەسىندەگى وقۋشىلارعا جاۋاپ حات قايتاردى ٴارى كوكتەم مەرەكەسىن قۇتتىقتاۋ كارتچكاسىن قايتارا سيلاپ، ولارعا جانە مەكتەپتەرىندەگى بارشا وقىتۋشى ـ وقۋشىلارعا مەرەكە بايلانىسىمەن باقىت تىلەدى، امەريكاداعى اناعۇرلىم كوپ جاستار مەن ورەندەردىڭ جۇڭگوعا كەلىپ اۋىس ـ كۇيىس جاساۋىن، ۇيرەنۋىن قارسى الدى.
شي جينپيڭ مىنالاردى ٴبىلدىردى: حاتتارىڭدا حانزۋ ٴارىبىن وتە كوركەم جازىپسىڭدار، قولمەن سىزعان جۇڭگو ايداعارى، ۇلى قورعان جانە مىسىق ايۋ وتە وبرازدى ەكەن! سەندەردىڭ بىرنەشە قالادا ساپاردا بولىپ، مىسىق ايۋدى كورىپ، جۇڭگونىڭ ٴدامدى تاعامدارىن تاتىپ، جۇڭحۋا مادەنيەتىن سەزىنىپ، ”ايرىقشا قۋانىشقا“ بولەنگەندەرىڭنەن حاباردار بولىپ ەرەكشە قۋاندىم. سەندەردىڭ كوپتەگەن جۇڭگولىق كىشكەنتاي سەرىكتەرمەن تانىسقاندارىڭدى ٴارى ولاردى اتا مەكەندەرىڭە قايىرا ساپارلاۋعا ۇسىنىس ەتكەندىكتەرىڭدى، ارالارىڭدا ورناعان دوستىقتىڭ كىسىنى اسەرلەندىرگەندىگىن ەستىدىم.
شي جينپيڭ بىلاي دەپ اتاپ كورسەتتى: جۇڭگودا مىڭ ەستىگەننەن ٴبىر كورگەن ارتىق دەگەن ماتەل بار. 1985 ـ جىلى امەريكاعا تۇڭعىش ساپارلاي بارعان كەزىمدە ىقىلاستى، دوس ـ جار امەريكا حالقى ماعان ۇمىتىلماس اسەر قالدىردى. وسى رەتكى اۋىس ـ كۇيىس ساپارى ارقىلى سەندەردىڭ جۇڭگو مەن جۇڭگو حالقى جونىندە اناعۇرلىم تىكە، اناعۇرلىم تەرەڭ تۇسىنىككە يە بولاتىندىقتارىڭا دا سەنەمىن. سەندەردىڭ جۇڭگوعا تاعى كەلۋلەرىڭدى قارسى الامىن، اناعۇرلىم كوپ امەريكالىق جاستار مەن ورەن دوستاردىڭ جۇڭگوعا كەلىپ اۋىس ـ كۇيىس جاساپ، ۇيرەنۋدە بولىپ، شىنايى، ستەرەولدى، جان ـ جاقتى جۇڭگونى تىكە سەزىنىپ، جۇڭگولىق جاستارمەن، ورەندەرمەن سىرلاسىپ، دوستاسىپ، ٴوزارا ۇيرەنىپ، ٴوزارا ۇلگى الىپ، ەكى ەل حالقىنىڭ دوستىعىن نىعايتۋعا قول ۇستاسا كۇش قوسۋىن دا قارسى الامىن.
شي جينپيڭ جاۋاپ حاتىندا بىلاي دەدى: بۇگىن جۇڭگونىڭ ۇلۋ(ايداعار) جىلىنىڭ يۋانشياۋ مەرەكەسى، يۋانشياۋ مەرەكەسى جۇڭگولىقتاردىڭ تاماشا تۇرمىستى بىرگە قۇتتىقتايتىن ماڭىزدى ٴساتى، مەن سەندەرگە جانە مەكتەپتەرىڭدەگى بارلىق وقىتۋشى ـ وقۋشىلارعا مەرەكە بايلانىسىمەن تاماشا تىلەك تىلەيمىن!
2023 ـ جىلى 11 ـ ايدا ٴتوراعا شي جينپيڭ امەريكاداعى ساپارى كەزىندە جۇڭگو جاقتىڭ الداعى 5 جىلدا امەريكانىڭ جاستارى مەن ورەندەرىنەن 50 مىڭ ادامدى جۇڭگوعا كەلىپ اۋىس ـ كۇيىس جاساۋعا، ۇيرەنۋگە ۇسىنىس ەتۋدى قالايتىندىعىن جاريالاعان ەدى. امەريكانىڭ ايوۆا شتاتىنداعى دوسى ساراھ راندي تاياۋدا ٴتوراعا شي جينپيڭگە حات جولداپ، ماسكاتين ورتا مەكتەبىنىڭ دە وسى جوسپارعا قاتىناسۋىن ٴۇمىت ەتەتىندىگىن ٴبىلدىردى. ٴتوراعا شي جينپيڭنىڭ كوڭىل بولۋىندە 1 ـ ايدىڭ 24 ـ كۇنىنەن 30 ـ كۇنىنە دەيىن وسى نىسان بويىنشا 1 ـ توپتا جۇڭگوعا كەلگەن امەريكانىڭ ورتا مەكتەپ وقۋشىلارى رەتىندە، ماسكاتين ورتا مەكتەبىندەگى 20 نەشە وقۋشى بەيجيڭ، حىبەي جانە شاڭحاي سياقتى جەرلەرگە بارىپ اۋىس ـ كۇيىس جاساپ، ساپاردا بولدى. ۋاكىلدەر ۇيىرمەسى بەيجيڭگە جەتكەندە، ٴتوراعا شي جينپيڭگە جۇڭگو تىلىندە ”شي اتا، ٴبىز كەلدىك“ دەگەن جازۋ جازىلعان مەكتەپ تۋى سياقتى سالەمدەمەلەرىن الا كەلدى. ساپارلارى اياقتاعاننان كەيىن، ۋاكىلدەر ۇيىرمەسىندەگى وقۋشىلار ٴتوراعا شي جينپيڭگە حات جازىپ، جۇڭگودا ساپاردا بولعان قۋانىشتى كوڭىل كۇيلەرىن بايانداپ، ولاردى جۇڭگوعا كەلىپ، اۋىس ـ كۇيىس جاساۋعا، ساپاردا بولۋعا ۇسىنىس ەتكەندىگىنە العىس ايتاتىندىقتارىن ٴبىلدىردى.
