شينحۋا اگەنتتىگىنىڭ 2 ـ ايدىڭ 8 ـ كۇنى بەيجيڭنەن بەرگەن حابارى. مەملەكەت ٴتوراعاسى شي جينپيڭ 2 ـ ايدىڭ 8 ـ كۇنى پورتۋگاليا زۇڭتۇڭى دەسوۋسامەن ٴوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 45 جىلدىعىن قۇتتىقتادى.
شي جينپيڭ بىلاي دەپ اتاپ كورسەتتى: ديپلوماتيالىق قارىم ـ قاتىناس ورناتقان 45 جىلدان بەرى جۇڭگو مەن پورتۋگاليا ٴوزارا قۇرمەت ەتۋ، اشىق، سيىسىمدى بولۋ ۇستانىمىن ۇستانىپ، دوستىق بەينەدە كەڭەسۋ ارقىلى اۋمىن ماسەلەسىن ۇيلەسىمدى شەشىپ، اۋقىمدى باعامداپ، جان ـ جاقتى ستراتەگيالىق سەرىكتەستىك قارىم ـ قاتىناس ورناتىپ، حالىقارالىق فينانس داعدارىسى مەن دۇنيە جۇزىلىك الەۋمەتتىك دەنساۋلىق ساقتاۋ سىن ـ سايىستارىنا تىزە قوسا توتەپ بەرىپ، كاسىپورىنداردىڭ ٴوزارا پايدا جەتكىزۋ سەلبەستىگىن كەڭەيتىپ، ”ٴبىر بەلدەۋ، ٴبىر جولدى“ قول ۇستاسا بىرگە قۇرىپ، جۇڭگو _ ەۆروپا وداعى قارىم ـ قاتىناسىنىڭ دامۋىن بىرگە جەبەپ، كوپ جاقتىلىقتى قورعاپ، مەملەكەت پەن مەملەكەتتىڭ دۇرىس بىرگە جاساسۋ جولىن جاندى تۇردە ٴتۇسىندىردى. مەن جۇڭگو _ پورتۋگاليا قارىم ـ قاتىناسىنىڭ دامۋىنا ايرىقشا ٴمان بەرەمىن، دەسوۋسا زۇڭتۇڭمەن بىرگە قۇلشىنىپ، جۇڭگو مەن پورتۋگاليانىڭ جان ـ جاقتى ستراتەگيالىق سەرىكتەستىك قارىم ـ قاتىناسىنىڭ ۇزدىكسىز تەرەڭدەۋىنە جەتەكشىلىك ەتىپ، ەكى ەل حالقىنا اناعۇرلىم ويداعىداي تيىمدىلىك جەتكىزىپ، جۇڭگو _ ەۆروپا وداعى قارىم ـ قاتىناسىنىڭ اقاۋسىز، ورنىقتى دامۋىن ىلگەرىلەتىپ، دۇنيەنىڭ بەيبىتشىلىگىنە، ورنىقتىلىعىنا جانە گۇلدەنۋىنە ۇلەس قوسۋدى قالايمىن.
دەسوۋسا مىنالاردى ٴبىلدىردى: پورتۋگاليا جۇڭگودان شالعاي جاتقانىمەن، ەكى ەل باستان ـ اياق جاراسىمدى بىرگە جاساسىپ، ساياسي، ەكونوميكا، مادەنيەت، قوعام سياقتى سالالاردا دوستىق بارىس ـ كەلىستى ساقتادى. پورتۋگاليا مەن جۇڭگو ديپلوماتيالىق قارىم ـ قاتىناس ورناتقاننان بەرى ەكى جاقتى قارىم ـ قاتىناس قارىشتاپ دامىپ، ەكى ەل اۋمىن بيلىگىن ورنىقتى وتكىزىپ بەرۋدى ٴساتتى جۇزەگە اسىرىپ، جۇڭگو _ پورتۋگال ٴتىلدى مەملەكەتتەردىڭ ەكونوميكا ـ ساۋدا سەلبەستىگى تالقى مىنبەرىنىڭ دامۋىن بىرگە ىلگەرىلەتىپ، كوپ جاقتى سەلبەستىكتى بەلسەنە ورىستەتتى. پورتۋگاليا جاق جۇڭگو جاقپەن بىرگە قۇلشىنىپ، ٴداستۇرلى دوستىقتى جالعاستىرىپ، ەكى ەل قارىم ـ قاتىناسىندا اناعۇرلىم زور دامۋدىڭ جۇزەگە اسۋىن ىلگەرىلەتۋدى قالايدى.
