2024 ـ جىلعى كوكتەم مەرەكەسىن توپتىق قۇتتىقتاۋ ماجىلىسىندە سويلەنگەن ٴسوز
(2024 ـ جىلى 2 ـ ايدىڭ 8 ـ كۇنى، تۇستەن بۇرىن)
شي جينپيڭ
جولداستار، دوستار:
ۇلۋ (ايداعار) جىلعى كوكتەم مەرەكەسى كەلۋ الدىندا تۇر. بۇگىن ٴبىز وسى ارادا شاتتىقپەن باس قوسىپ، كونە جىلدى اتتاندىرىپ، جاڭا جىلدى قارسى الىپ وتىرمىز.
ەڭ الدىمەن، مەن پارتيا ورتالىق كوميتەتى مەن مەملەكەتتىك كەڭەس اتىنان كوپشىلىككە مەرەكەلىك ىزگى تىلەك جولدايمىن! بۇكىل ەلدەگى ٴار ۇلت حالقىنىڭ جانە شياڭگاڭ ەرەكشە اكىمشىلىك رايونىنداعى باۋىرلاستاردىڭ، اۋمىن ەرەكشە اكىمشىلىك رايونىنداعى باۋىرلاستاردىڭ، تايۋاندىق باۋىرلاستاردىڭ، شەتەلدەگى چياۋمين باۋىرلاستاردىڭ مەرەكەسىن قۇتتىقتايمىن!
ٴوتىپ كەتۋ الدىندا تۇرعان گۇيماۋ قويان جىلى _ پارتيا 20 ـ قۇرىلتايىنىڭ رۋحىن جاپپاي دايەكتىلەندىرۋ باستالعان جىل. توتەنشە كۇردەلى حالىقارالىق ورتا مەن جاپالى دا اۋىر رەفورما، دامۋ، ورنىقتىلىق مىندەتى الدىندا، ٴبىز جۇڭگو ۇلگىسىندەگى وسىزامانداندىرۋ ارقىلى زەيىن ـ زەردەنى ۇيىستىرىپ، كۇش توپتاپ، ەل ٴىشى، حالىقارا سىندى ەكى كەلەلى جاعدايدى ٴبىر تۇتاس جوسپارلاپ، قايسارلىقپەن ايانباي ايقاسىپ، ەرلىكپەن العا تارتىپ، قات ـ قابات قيىنشىلىقتاردى، سىن ـ سايىستاردى جەڭىپ، جاپپاي سوتسياليستىك وسىزاماندانعان مەملەكەت قۇرۋدىڭ جاڭا جورىعىندا نىق قادام تاستادىق.
ٴبىر جىلدان بەرى ٴبىز جاڭا دامۋ ۇستانىمىن جاپپاي دايەكتىلەندىرىپ، ورنىقتىلىق بارىسىندا ىلگەرىلەۋ قىزمەت جالپى ارناسىنان جازباي، جاڭا تيپتى ايدارشا ۆيرۋس ىندەتىنەن ساقتانۋ ـ تىزگىندەۋدىڭ جاڭا كەزەڭگە ٴوتۋىن باتىل اتقارىپ، ەكونوميكانىڭ قالپىنا كەلۋىن، دامۋىن ىلگەرىلەتىپ، ەكونوميكانىڭ جالپى مولشەرىن 126 تريلليون يۋاننان اسىردىق، استىقتىڭ جالپى ٴونىم مولشەرى تاعى دا تىڭ دەڭگەيگە كوتەرىلدى، جۇمىستاندىرۋ، زات باعاسى جالپى تۇلعالىق جاقتان ورنىقتى بولدى، بۇكىل دۇنيە جۇزىنە نازار سالساق، ”كورىنىس وسى جاقتا كوركەم ەرەك“ بولدى. عىلىم ـ تەحنيكادا جاڭالىق اشۋدا تىڭ سەرپىلىس جۇزەگە استى، جاڭا ساپالى وندىرگىش كۇشتەر جەدەل قالىپتاستى. رەفورما جاساۋ، ەسىك اشۋ ۇزدىكسىز تەرەڭدەپ، پارتيا مەن مەملەكەتتىڭ جاڭا كەزەكتى قۇرىلىم رەفورماسى نەگىزىنەن ورىندالدى. ەكولوگيالىق ورتا ۇزدىكسىز جاقساردى. مەملەكەت قورعانىسى جانە ارميانى وسىزامانداندىرۋدا تىڭ قادام تاستالدى. چىڭدۋ دۇنيە ٴجۇزى جوعارى مەكتەپ وقۋشىلارى جازعى سپورت جارىسى، حاڭجوۋ ازيا سپورت جارىسى تابىستى وتكىزىلىپ، ەلىمىزدىڭ دەنە تاربيە ساڭلاقتارى تاماشا ناتيجەگە قول جەتكىزدى. پارتيانى جاپپاي قاتاڭ باسقارۋ جانە شىرىكتەسۋگە قارسى تۇرۋ كۇرەسى ىشكەرىلەي ىلگەرىلەتىلىپ، تاماشا ساياسي ەكولوگيا ۇزدىكسىز بەكەمدەلدى.
ٴبىز حالىقتى بارىنەن جوعارى قويۋعا تاباندى بولىپ، حالىق تۇرمىسىن كۇش سالا قامتاماسىز ەتىپ جانە جاقسارتىپ، كەدەيلىكتەن ارىلتۋدان قامال الۋ جەتىستىكتەرىن ۇزدىكسىز بەكەمدەپ، كەڭەيتىپ، حالىق بۇقاراسىنىڭ شۇعىل، قيىن، ۋايىمداعان، ٴزارۋ ماسەلەلەرىن دەن قويا، سۇيىسپەنشىلىكپەن شەشتىك، بار كۇشتى سالىپ جاراتىلىستىق اپاتتارعا توتەپ بەردىك جانە اپاتتان كەيىنگى قالپىنا كەلتىرۋدى، قۇرۋدى ىلگەرىلەتتىك، قوعامدىق كەلەلى جاعداي ورنىقتىلىقتى ساقتادى.
ٴبىز شياڭگاڭنىڭ، اۋمىننىڭ مەملەكەت دامۋىنىڭ كەلەلى جاعدايىمەن اناعۇرلىم ويداعىداي توعىسۋىن بەلسەندىلىكپەن قولداپ، ”تايۋاندى دەربەستەندىرۋدى“ كوزدەيتىن بولشەكتەۋشىلىك ارەكەتكە جانە سىرتقى كۇشتەردىڭ كيلىگۋىنە باتىل قارسى تۇرىپ، مەملەكەتتىڭ يەلىك ۇقىعىن، حاۋىپسىزدىگىن، دامۋ مۇددەسىن پارمەندى قورعادىق. جۇڭگوشا ٴىرى ەل ديپلوماتياسىن تىڭعىلىقتى ىلگەرىلەتىپ، وزگەرىس پەن بىلىقپالىق ارالاسقان دۇنيە جۇزىنە ايقىندىلىق جانە وڭ ەنەرگيا ۇستەپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدەگى جاۋاپكەرشىلىك ارقالاۋدى ايگىلەدىك.
وتكەن ٴبىر جىلداعى ايانباي جۇرگىزگەن كۇرەستەرگە قايىرىلا قاراپ، ٴبىز مىنانى اناعۇرلىم تەرەڭ سەزىندىك: جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسى، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋ ٴارى جۇڭگو حالقىنىڭ تاماشا، باقىتتى تۇرمىسقا تالپىنۋىنداعى نۇرلى جول، ٴارى دۇنيە جۇزىنىڭ بەيبىتشىلىگى مەن دامۋىن جەبەيتىن ادىلەت جولى. ٴبىز جولدى وزگەرتپەۋگە، ارىننان تايماۋعا تاباندى بولىپ بۇلجىماي جالعاستىرساق، ٴبىر نيەتپەن كۇش قوسساق بولعانى، ٴسوزسىز، العا باسۋ جولىنداعى ٴتۇرلى جاپا ـ ماشاقات، قيىنشىلىقتاردى، حاۋىپ ـ قاتەر، بوگەتتەردى جەڭىپ، تابىستىڭ تورىنە قاراي ۇزدىكسىز قادام باساتىن بولامىز!
جولداستار، دوستار!
2024 ـ جىل _ جاڭا جۇڭگو قۇرىلعاندىعىنىڭ 75 جىلدىعى، ”14 ـ بەسجىلدىق“ جوبانىڭ نىسانا ـ مىندەتتەرىن جۇزەگە اسىرۋداعى شەشۋشى ٴبىر جىل. ٴبىز ورنىقتىلىق بارىسىندا ىلگەرىلەۋ قىزمەت جالپى ارناسىنان جازباي، ورنىقتىلىق بارىسىندا ىلگەرىلەۋ، ىلگەرىلەۋ ارقىلى ورنىقتىلىقتى جەبەۋ، الدىمەن ورناتىپ، ونان سوڭ كۇشىنەن قالدىرۋ تالابىن دايەكتىلەندىرىپ، جاڭا دامۋ ۇستانىمىن تولىق، دالمە ـ ٴدال، جاپپاي دايەكتىلەندىرىپ، جوعارى ساپالى دامۋ مەن جوعارى دەڭگەيلى حاۋىپسىزدىكتى ٴبىر تۇتاس جوسپارلاپ، ٴتۇيىندى كورنەكتىلەندىرىپ، تەتىكتى يگەرىپ، قايراتتانا العا ۇمتىلىپ، شىنايى يگەرىپ ناقتى ىستەپ، شىن مانىندە ەكونوميكانىڭ ومىرشەڭدىگىن كۇشەيتىپ، حاۋىپ ـ قاتەرلەردەن ساقتانىپ جانە ونى جويىپ، قوعامدىق مەجەنى جاقسارتىپ، ەكونوميكانىڭ قايتا ورلەۋ، جاقسارۋ بەتالىسىن بەكەمدەپ جانە كۇشەيتىپ، حالىق تۇرمىسىنىڭ قۇت ـ ىرىسىن ۇزدىكسىز ارتتىرىپ، قوعامدىق كەلەلى جاعدايدىڭ جاراسىمدىلىعىن، ورنىقتىلىعىن ساقتاۋىمىز كەرەك. رەفورمانى ونان ارى جاپپاي تەرەڭدەتىپ، تەرەڭ قاتپارلى ٴتۇزىلىس ـ مەحانيزم بوگەتتەرى مەن قۇرىلىمدىق قايشىلىقتاردى كۇش سالا شەشىپ، بۇكىل قوعامنىڭ شارۋاشىلىق قۇرۋ، جاڭالىق اشۋ، جاسامپازدىق ومىرشەڭدىگىن تولىق قاۋلاتىپ، جۇڭگو ۇلگىسىندەگى وسىزامانداندىرۋدى ىلگەرىلەتۋگە قۇدىرەتتى قوزعاۋشى كۇش ۇستەپ، جۇڭگو ۇلگىسىندەگى وسىزامانداندىرۋ قۇرىلىسىنىڭ كەدەرگى ـ بوگەتتەردەن تايسالماي ٴوتىپ، ارىنداي العا ىلگەرىلەۋىنە مۇمكىندىك جاساۋىمىز كەرەك.
جولداستار، دوستار!
ايداعار _ جۇڭحۋا ۇلتىنىڭ توتەمى، ونىڭ قايسار دا ايباتتى تۇلعاسى، ەرجۇرەك، تايسالماس جىگەرى، كۇللى الەمدى جارىلقايتىن دارقان پەيىلى، قۇدىرەتتى دە شەكسىز كۇش ـ قۋاتى بار، ول 5000 جىلدان بەرگى جۇڭحۋا ۇلتىنىڭ ٴوزىن تىنباي الۋەتتەندىرىپ، كۇرەسپەن العا ىلگەرىلەگەن رۋحاني قان تامىرىنىڭ سيمۆولى، ونان دا ماڭىزدىسى، جاڭا ٴداۋىردىڭ جاڭا جورىعىنداعى 100 ميلليونداعان جۇڭحۋا ۇلاندارىنىڭ مەملەكەتتى قۇدىرەتتەندىرۋ قۇرىلىسى، ۇلتتى گۇلدەندىرۋ ۇلى ٴىسىن ىلگەرىلەتۋ سىندى بەرىك ەرىك ـ جىگەرى مەن تاماشا تىلەگىن اڭعارتادى. جياچىن ۇلۋ (ايداعار) جىلىندا بۇكىل ەل حالقىنىڭ ارعىماق ايداعار رۋحىن اسقاقتاتىپ، قىرپۋلى دا ٴورشىل قايرات ـ تەبىنمەن ٴورىس اشا جاڭالىق اشىپ، ايانباي ۇلەس قوسىپ، جۇڭگو ۇلگىسىندەگى وسىزامانداندىرۋ قۇرىلىسىنىڭ جاڭا تاراۋىن بىرگە جازۋىن ٴۇمىت ەتەمىن.
سوڭىندا كوپشىلىكتىڭ دەندەرىنىڭ ساۋ، قىزمەتتەرىنىڭ تابىستى، جانۇيالارىنىڭ باقىتتى، ۇلۋ (ايداعار) جىلدارىنىڭ قۇتتى بولۋىن تىلەيمىن!
كوپشىلىككە راقىمەت!
