شينحۋا اگەنتتىگىنىڭ 2 ـ ايدىڭ 8 ـ كۇنى بەيجيڭنەن بەرگەن حابارى. 2 ـ ايدىڭ 8 ـ كۇنى تۇستەن كەيىن جۇڭگونىڭ ەگىنشىلىك كالەندارى بويىنشا جاڭا جىل كەلۋ قارساڭىندا، مەملەكەت ٴتوراعاسى شي جينپيڭ رەسەي زۇڭتۇڭى پۋتينمەن تەلەفوندا سويلەستى.
ەكى ەلدىڭ مەملەكەت باسشىلارى كوكتەم مەرەكەسى بايلانىسىمەن ٴوزارا سالەم جولدادى. شي جينپيڭ بىلاي دەپ اتاپ كورسەتتى: جۇڭگونىڭ كوكتەم مەرەكەسى تاياپ قالدى، مەرەكە رايى وتە كۇشتى بولدى، جۇڭگو حالقى كەلۋ الدىندا تۇرعان ۇلۋ (ايداعار) جىلى جونىنەن ۇمىتكە جانە سەنىمگە تولى! پۋتين زۇڭتۇڭ مىنالاردى ٴبىلدىردى: ايداعار جۇڭگو مادەنيەتىندە اقىل ـ پاراساتتىڭ جانە كۇش ـ قۋاتتىڭ سيمۆولى، مەن دوس جۇڭگو حالقىنا ەڭ ىزگى تىلەگىمدى بىلدىرەمىن! جۇڭگو حالقىنىڭ ۇلۋ (ايداعار) جىلىنىڭ كوڭىلدى ٴوتۋىن، بارلىق ىستەرىنىڭ ىلگەرى باسۋىن تىلەيمىن!
شي جينپيڭ بىلاي دەپ اتاپ كورسەتتى: ەسكى جىلدىڭ سوڭىندا، جاڭا جىلدىڭ باسىندا ٴوزارا سالەم جولداۋ، ەكى جاقتى قارىم ـ قاتىناستىڭ دامۋ جەتىستىكتەرىن قورىتىندىلاۋ، بولاشاققا بىرگە كوز جىبەرۋ الدەقاشان ٴبىزدىڭ ارامىزداعى تاماشا داستۇرگە اينالعان. وتكەن ٴبىر جىلدا، ٴبىز 2 رەت ديدارلاسىپ، قىرۋار ورتاق تانىمعا كەلدىك. ٴبىزدىڭ بىرگە جەتەكشىلىك ەتۋىمىزبەن، ەكى ەلدىڭ ۇكىمەتتەرى، زاڭ شىعارۋ قۇرىلىمدارى، ساياسي پارتيالارى اراسىنداعى بارىس ـ كەلىس جاندانا ٴتۇستى، ٴار سالاداعى سەلبەستىكتەردە سەرپىمدىلىك پەن جالىندى كۇش ايگىلەندى، ەكى جاق جىلدىق ساۋدا نورما نىساناسىن مەزگىلىنەن بۇرىن ورىندادى، ەكى ەلدىڭ گۋمانيتارلىق جانە جەرگىلىكتى ورىندار اراسىنداعى بارىس ـ كەلىسى تەبىندى ورىستەتىلىپ، دەنە تاربيە اۋىس ـ كۇيىس جىلى تابىسپەن اياقتادى. بيىل جۇڭگو مەن رەسەيدىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعى. باسىپ وتكەن جولعا قايىرىلا قاراساق، ٴبىز تالاي داۋىل ـ تولقىننىڭ سىناعىنان سۇرىنبەي ٴوتىپپىز. بولاشاققا كوز جىبەرسەك، جۇڭگو _ رەسەي قارىم ـ قاتىناسى جاڭا دامۋ ورايىنا ٴدوپ كەلىپ وتىر. جۇڭگو جاق رەسەي جاقپەن ٴبىر ـ بىرىنە قول ۇشىن بەرۋ، ۇرپاقتار بويى دوس ٴوتۋ رۋحىن ۇزدىكسىز ۇستانىپ، جۇڭگو _ رەسەي قارىم ـ قاتىناسىنىڭ جاڭا تاراۋىن قول ۇستاسا جازۋدى قالايدى.
شي جينپيڭ بىلاي دەپ باسا دارىپتەدى: ەكى جاق ستراتەگيالىق ىستەستىكتى نىعايتىپ، ٴوز مەملەكەتىنىڭ يەلىك ۇقىعىن، حاۋىپسىزدىگىن، دامۋ مۇددەسىن قورعاپ، سىرتقى كۇشتەردىڭ ىشكى ىسكە كيلىگۋىنە باتىل قارسى تۇرۋى كەرەك. ەكى جاق ەكى ەل سەلبەستىگىنىڭ جاڭا قوزعاۋشى قۋاتىن جەتىلدىرىپ، كاسىپ سالاسى تىزبەگىنىڭ، قامداۋ تىزبەگىنىڭ ورنىقتىلىعىن قورعاپ، جۇڭگو _ رەسەي مادەنيەت جىلىن بىرگە ويداعىداي وتكىزىپ، حالىق تىلەگىن توعىستىراتىن، حالىققا جاقىن، جىلى شۋاقتى مادەنيەت اۋىس ـ كۇيىسىن ويداعىداي وتكىزىپ، ەكى ەل حالقىنىڭ كوڭىل دانەكەرىن ۇزدىكسىز كۇشەيتۋى كەرەك. ەكى جاق قازاقستاننىڭ بيىلعى شاڭحاي سەلبەستىك ۇيىمى باسشىلار ٴماجىلىسىن ويداعىداي وتكىزۋىن قولداپ، ىنتىماقتى، سەنىمدىلىكتى ارتتىرىپ، ٴوڭىردىڭ حاۋىپسىزدىگىن، ورنىقتىلىعىن جانە وڭىردەگى مەملەكەتتەردىڭ ورتاق مۇددەسىن قورعاۋى كەرەك. جۇڭگو جاق رەسەي جاقتىڭ 2024 ـ جىلى بريكس ەلدەرىنىڭ كەزەكتى ٴتوراعا ەلى قىزمەتىن وتەۋىن بەلسەنە قولدايدى، رەسەي جاقپەن بىرگە حالىقارالىق كوپ جاقتى ىستەستىكتى كۇشەيتىپ، ناعىز كوپ جاقتىلىقتى امالياتتا ايگىلەپ، تەرەزەسى تەڭ، ٴتارتىپتى بولعان دۇنيە ٴجۇزىنىڭ كوپ ۇيەكتەنۋىن جانە جالپىعا ٴتيىمدى، سيىسىمدى بولعان ەكونوميكانىڭ جاھاندانۋىن دارىپتەپ، الەمدى جونگە سالۋ جۇيەسىنىڭ اناعۇرلىم ٴادىل، ۇيلەسىمدى باعىتقا قاراي دامۋىن ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە بەلسەندى ۇلەس قوسۋدى قالايدى.
پۋتين مىنالاردى ٴبىلدىردى: بيىل رەسەي مەن جۇڭگونىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعى. ەكى جاقتىڭ بىرگە قۇلشىنۋىنىڭ ارقاسىندا، رەسەي _ جۇڭگو قارىم ـ قاتىناسى بۇرىن بولماعان بيىك دەڭگەيگە كوتەرىلدى. بىلتىر رەسەي مەن جۇڭگونىڭ ٴار سالاداعى سەلبەستىگىنىڭ جەتىستىكتەرى قوماقتى بولدى. مەن ٴتوراعا شي جينپيڭمەن قويۋ بارىس ـ كەلىستى ۇزدىكسىز ساقتاپ، ەكى ەلدى ٴار سالاداعى سەلبەستىكتە جاڭا ىلگەرىلەۋشىلىكتەرگە جەتۋگە باستاۋدى ٴۇمىت ەتەمىن. ەكى جاقتىڭ بيلىعى رەسەي _ جۇڭگو مادەنيەت جىلىن جانە جەلىلەس گۋمانيتارلىق اۋىس ـ كۇيىس قيمىلدارىن بىرگە ويداعىداي وتكىزىپ، ەكى ەل حالقىنىڭ دوستىق نەگىزىن اناعۇرلىم بەكەمدەۋىن ٴۇمىت ەتەمىن. جۇڭگو جاقتىڭ رەسەيدىڭ بيىل بريكس ەلدەرىنىڭ كەزەكتى ٴتوراعا ەلى قىزمەتىن وتەۋىنە قولداۋ كورسەتكەندىگىنە العىس ايتامىن، رەسەي جاق جۇڭگو جاقپەن بىرگە شاڭحاي سەلبەستىك ۇيىمى سياقتى وڭىرلىك جانە حالىقارالىق كوپ جاقتى جۇلگەدە بايلانىس، ىستەستىك ورناتۋدى كۇشەيتىپ، ٴبىرىن ـ ٴبىرى قولداپ، كوپ جاقتىلىقتى قورعاپ، وزدەرىنىڭ ورىندى ۇقىق مۇددەسىن قورعاۋدى قالايدى. رەسەي جاق ٴبىر جۇڭگو پرينسيبىنە تاباندىلىقپەن بويسۇنىپ، تايۋان ماسەلەسىندە جۇڭگوعا ارانداتۋشىلدىق جاسايتىن ٴارقانداي قاتەرلى ارەكەتتەرگە قارسى تۇرادى، جۇڭگونىڭ بەيبىت بىرلىككە كەلۋىنە كەسە ـ كولدەنەڭ بولۋعا ۇرىنعان ٴارقانداي قاسكۇنەمدىكتىڭ ىسكە اسپايتىندىعىنا سەنەدى.
ەكى ەلدىڭ مەملەكەت باسشىلارى قازىرگى حالىقارالىق جانە وڭىرلىك قولامتالى ماسەلەلەر جونىندە ىشكەرىلەي پىكىر اۋىستىردى. ەكى ەلدىڭ مەملەكەت باسشىلارى جاڭا ٴبىر جىلدا تىعىز قارىم ـ قاتىناستى ۇزدىكسىز ساقتاپ، جۇڭگو _ رەسەي قارىم ـ قاتىناسى جانە بىرگە كوڭىل ٴبولىپ وتىرعان ستراتەگيالىق ماسەلەلەر جونىندە ىشكەرىلەي پىكىر اۋىستىرۋعا ٴبىر اۋىزدان قوسىلدى.
