شينحۋا اگەنتتىگىنىڭ 9 - ايدىڭ 23 - كۇنى حاڭجوۋدان بەرگەن حابارى (تىلشىلەر ۋاڭ بين، تاڭ تاۋ). 9 - ايدىڭ 23 - كۇنى تۇستەن بۇرىن مەملەكەت ءتوراعاسى شي جينپيڭ حاڭجوۋداعى شيحۋ مەملەكەتتىك قوناق ۇيىندە 19 - كەزەكتى ازيا سپورت جارىسىنىڭ باستالۋ سالتىنا قاتىناسۋعا كەلگەن كامبودجا پاتشاسى سيحامونيمەن كەزدەستى.
شي جينپيڭ بىلاي دەپ اتاپ كورسەتتى: بيىل − جۇڭگو مەن كامبودجانىڭ ديپلوماتيالىق قارىم - قاتىناس ورناتقاندىعىنىڭ 65 جىلدىعى جانە جۇڭگو − كامبودجا دوستىق جىلى. مەنىڭ سيحاموني پاتشامەن ەكى رەت كەزدەسۋىم جۇڭگو مەن كامبودجانىڭ ءبىر ءۇيلى جانداي ەتەنە تەرەڭ دوستىق سۇيىسپەنشىلىگىن ايگىلەيدى. تاياۋدا مەن بەيجيڭدە باس ءۋازىر حۇڭمانايمەن كەزدەسىپ، ۇرپاقتان - ۇرپاققا جالعاسقان دوستىقتى جالعاستىرۋ، جالپى بەتتىك ستراتەگيالىق سەلبەستىكتى تەرەڭدەتۋ جونىندە ماڭىزدى ورتاق تانىمعا كەلدىك. جۇڭگو جاق كامبودجا پاتشا اۋلەتىمەن ەرەكشە دوستىعىن قاستەرلەيدى، جۇڭگو مەن كامبودجا قارىم - قاتىناسىنىڭ دامۋىنا وسكەلەڭ ءمان بەرەدى، كامبودجا جاقپەن بىرگە جۇڭگو مەن كامبودجانىڭ تاعدىرلاس ورتاق تۇلعا قۇرىلىسىنىڭ تەرەڭدەۋىن، ناقتىلانۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: بيىل − مەنىڭ تاتۋ، ادال، قايىرىمدى، كەڭ پەيىل بولۋ ۇستانىمىن العا قويعاندىعىمنىڭ 10 جىلدىعى. جۇڭگو مەن كامبودجا قارىم - قاتىناسى وسى ۇستانىمدى جانە جۇڭگونىڭ كورشىلەرمەن تاتۋ - ءتاتتى ءوتۋ، كورشىلەردى سەرىك تۇتۋ سىندى توڭىرەكتىك ديپلوماتيا باعىتىنا تاباندى بولعاندىعىن شوعىرلى بەينەلەدى. جۇڭگو كامبودجانىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن قولدايدى، كامبودجانىڭ ورنىقتىلىق پەن دامۋدى جۇزەگە اسىرۋىن قولدايدى، كامبودجانىڭ حالىقارالىق جانە وڭىرلىك ساحنادا ماڭىزدى رول اتقارۋىن قولدايدى. ەكى جاق جوعارى جىكتەگىلەردىڭ بارىس - كەلىسىن ساقتاپ، ءوزارا ءتيىمدى سەلبەستىكتى تەرەڭدەتىپ، ”الماستىڭ التى قىرى“ سەلبەستىك جۇلگەسىن تىڭعىلىقتى ىلگەرىلەتىپ، ”ونەركاسىپتى دامىتۋ ءدالىزى“ جانە ”بالىق، كۇرىش ءدالىزى“ قۇرىلىسىنىڭ تەز ارادا كورنەكتى تابىستارعا قول جەتكىزۋىن ىلگەرىلەتىپ، ءوز ەلدەرىنىڭ وسىزامانداندىرۋ ىستەرىنە قىزمەت وتەۋى كەرەك. ەكى جاق وقۋ - اعارتۋ، مادەنيەت، جاستار سياقتى سالالارداعى اۋىس - كۇيىستى، سەلبەستىكتى ۇزدىكسىز ىلگەرىلەتىپ، جۇڭگو − كامبودجا دوستىعىن جۇرت جۇرەگىنە اناعۇرلىم تەرەڭ ۇيالاتۋى كەرەك.
سيحاموني مىنالاردى ءبىلدىردى: مەن ۇيىرمە باستاپ كورىكتى حاڭجوۋعا كەلىپ، 19 - كەزەكتى ازيا سپورت جارىسىنىڭ باستالۋ سالتىنا قاتىناسقانىمدى زور مەرەي سانايمىن. جۇڭگو ازيا سپورت جارىسىن ەكى رەت ءساتتى وتكىزدى، مەن ءتوراعا شي جينپيڭنىڭ پارمەندى باسشىلىعىندا، جۇڭگونىڭ دۇنيە جۇزىنە تاعى ءبىر كەزەك تارتىمدى دا تاماشا سالتاناتتى دەنە تاربيە جينالىسىن سيلايتىندىعىنا، ازيا ۇلى شاڭىراعىنىڭ ىنتىماعى مەن دوستىعىن جەبەۋگە تىڭ ۇلەس قوساتىندىعىنا كامىل سەنەمىن. كامبودجا حالقى سىحانوك پاتشانىڭ جۇڭگونىڭ باسشىلارىمەن بىرگە ورناتقان باۋىرلاستىق سۇيىسپەنشىلىگىن ماڭگى ەستەرىندە بەرىك ساقتايدى، كامبودجا − جۇڭگو ەكى ەلى ورناتقان بۇلجىماس بەرىك دوستىقتى قاستەرلەيدى، ءتوراعا شي جينپيڭ العا قويعان تاتۋ، ادال، قايىرىمدى، كەڭ پەيىل بولۋ سىندى توڭىرەكتىك ديپلوماتيا ۇستانىمىن تولىق قۇپتايدى. كامبودجا جاق ءبىر جۇڭگو ساياساتىن باتىل اتقارادى، جۇڭگو جاقپەن بىرگە ”ءبىر بەلدەۋ، ءبىر جولدى“ بىرگە قۇرىپ، كامبودجا مەن جۇڭگونىڭ تاعدىرلاس ورتاق تۇلعاسىن قۇرۋدى قالايدى. كامبودجا − جۇڭگو دوستىعىنىڭ ماڭگى جالعاسۋىن تىلەيمىن!
ساي چي، ديڭ شۋەشياڭ، ۋاڭ ي، شىن يچين قاتارلىلار كەزدەسۋگە قاتىناستى.
شينحۋا اگەنتتىگىنىڭ 9 - ايدىڭ 23 - كۇنى حاڭجوۋدان بەرگەن حابارى (تىلشىلەر شاڭ ييىڭ، ۋاڭ بين). 9 - ايدىڭ 23 - كۇنى تۇستەن كەيىن مەملەكەت ءتوراعاسى شي جينپيڭ حاڭجوۋداعى شيحۋ مەملەكەتتىك قوناق ۇيىندە 19 - كەزەكتى ازيا سپورت جارىسىنىڭ باستالۋ سالتىنا قاتىناسۋ جانە رەسمي ساپاردا بولۋ ءۇشىن جۇڭگوعا كەلگەن نەپالدىڭ زۇڭليى پراچاندامەن كەزدەستى.
شي جينپيڭ بىلاي دەپ اتاپ كورسەتتى: جۇڭگو مەن نەپال تاۋ - وزەندەرى جالعاسقان، ۇرپاقتار بويى دوس بولىپ كەلە جاتقان ەلدەر. ديپلوماتيالىق قارىم - قاتىناس ورناتقان 68 جىلدان بەرى ەكى ەل بەيبىت قاتار تۇرۋ بەس پرينسيبىنە تاباندى بولىپ، ۇلكەندى - كىشىلى ەلدەردىڭ تەڭ تۇرعىدا مامىلە جاساۋىنىڭ، سەلبەستىك جاساپ، تەڭ يگىلىككە كەنەلۋىنىڭ ۇلگىسىن ورناتتى. جۇڭگو مەن نەپال مەملەكەتتىڭ دامۋىن، گۇلدەنۋىن جۇزەگە اسىرۋ جولىندا ءبىر - بىرىنە سەرىك بولىپ، ءبىر - بىرىنە وراي جاراتتى. جۇڭگو جاق جۇڭگو - نەپال قارىم - قاتىناسىنا وسكەلەڭ ءمان بەرەدى، نەپال جاقپەن بىرگە دامۋ ستراتەگياسىن ءتۇيىلىستىرۋدى كۇشەيتىپ، جۇڭگو − نەپال قارىم - قاتىناسىنىڭ ۇزدىكسىز تىڭ دامۋشىلىقتارعا قول جەتكىزۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: ەكى جاق ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە باستان - اياق ءوزارا ءتۇسىنىسىپ، ءوزارا قولداۋ كورسەتۋى، ەكى ەل قارىم - قاتىناسىنىڭ ساياسي نەگىزىن ۇزدىكسىز بەكەمدەۋى كەرەك. جۇڭگو مەن نەپالدىڭ ”ءبىر بەلدەۋ، ءبىر جولدى“ بىرگە قۇرۋ سەلبەستىگى ۇزدىكسىز بەلسەندى جەتىستىكتەرگە قول جەتكىزىپ، گيمالاي اتتاعان ستەرەولدى ۇلاستىرۋ - تۇتاستىرۋ تورى العاشقى قادامدا قالىپتاستى. ەكى جاق نەگىزدىك قۇرىلعىلاردى ۇلاستىرۋدى، تۇتاستىرۋدى ءتۇيىندى تۇردە ىلگەرىلەتىپ، شەكارالىق تاسىمال سەلبەستىگىن كەڭەيتىپ، نەپالدىڭ ”قۇرلىقتا تۇيىقتالعان ەلدەن“ ”قۇرلىقتى بايلانىستىراتىن ەلگە“ ەرتەرەك ويىسۋىنا دەم بەرۋى كەرەك. جۇڭگو جاق جۇڭگو كاسىپورىندارىن نەپالعا بارىپ قارجى قوسىپ، شارۋاشىلىقتارىن گۇلدەندىرۋگە شابىتتاندىرىپ، نەپالدىڭ جۇڭگوعا باعىتتالعان ەكسپورتىن جەبەيدى، نەپال جاقپەن ەل باسقارۋ تاجىريبەلەرىن اۋىستىرۋدى كۇشەيتىپ، نەپالدىڭ ەكونوميكالىق، قوعامدىق دامۋىنا مۇمكىندىكتىڭ بارىنشا كومەكتەسۋدى قالايدى. جۇڭگو مەن نەپالدىڭ حالىقارالىق جانە وڭىرلىك ىستەردە كەڭ كولەمدى ورتاق مۇددەسى بار. جۇڭگو جاق نەپال جاقپەن كوپ جاقتى سەلبەستىكتى كۇشەيتىپ، ەكى ەلدىڭ جانە وركەندەپ كەلە جاتقان ەلدەردىڭ ورتاق مۇددەسىن قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.
پراچاندا مىنالاردى ءبىلدىردى: ءتوراعا شي جينپيڭ − كورەگەن دۇنيە جۇزىلىك باسشى، بۇكىل نەپال حالقىنىڭ ابزال دوسى. ءتوراعا شي جينپيڭنىڭ باسشىلىعىندا، جۇڭگو دۇنيەنى جالت قاراتقان دامۋ جەتىستىكتەرىنە قول جەتكىزدى، جۇڭگوشا سوتسياليزم جولى مەن جۇڭحۋا ۇلتىنىڭ ۇلى گۇلدەنۋى جورىعىندا اناعۇرلىم زور تابىستارعا قول جەتكىزەتىنى داۋسىز. نەپال − جۇڭگو ءبىرىن - ءبىرى تۇسىنەتىن، ءبىر - بىرىنە ارقا سۇيەيتىن، ءبىرىن - ءبىرى قولدايتىن دوستار جانە سەرىكتەر. نەپال جاق جۇڭگو جاقتىڭ نەپالدىڭ ەكونوميكالىق قۇرىلىسى، كەدەيلەردى سۇيەمەلدەۋ جانە ىندەتكە قارسى تۇرۋ سياقتى جاقتارعا كورسەتكەن قالتقىسىز كومەگىنە شىن جۇرەكتەن العىس ايتادى. نەپال جاق ءبىر جۇڭگو ساياساتىن باتىل اتقارادى، تايۋان جانە شيزاڭ جۇڭگو تەرريتورياسىنىڭ ايرىلماس ءبىر بولىگى، نەپال جاق ءارقانداي كۇشتىڭ نەپال تەرريتورياسىنان پايدالانىپ جۇڭگونىڭ يەلىك ۇقىعى مەن حاۋىپسىزدىگىن بۇلدىرەتىن ارەكەتتەرمەن شۇعىلدانۋىنا جول قويمايدى، بۇل تۇرعىدان مىزعىمايدى، استە اۋىتقىمايدى. نەپال جاق ”ءبىر بەلدەۋ، ءبىر جولدى“ بىرگە قۇرۋدى بارىنشا القايدى ءارى وعان بەلسەنە ات سالىسىپ، گيمالاي اتتاعان ستەرەولدى ۇلاستىرۋ - تۇتاستىرۋ تورى قۇرىلىسىن ىلگەرىلەتەدى، مۇنىڭ نەپال ەلىنىڭ ەكونوميكالىق دامۋىنا بارىنشا دەم بەرەتىندىگىنە سەنەدى. نەپال جاق ءتوراعا شي جينپيڭ العا قويعان ءبىر قىدىرۋ ماڭىزدى باستامانى، دارىپتەمەنى قولدايدى، جۇڭگو جاقپەن بىرگە حالىقارالىق ءتارتىپتىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتىپ، وركەندەپ كەلە جاتقان ەلدەردىڭ ورتاق مۇددەسىن قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى. بۇگىن كەشتە اشىلاتىن حاڭجوۋ ازيا سپورت جارىسىنىڭ، ءسوز جوق، تارتىمدى دا ءساتتى بولىپ، ازيا حالىقتارى اراسىنداعى ءوزارا ءتۇسىنىسۋدى جانە دوستىقتى جەبەيتىندىگىنە سەنەمىن.
ساي چي، ديڭ شۋەشياڭ، ۋاڭ ي، شىن يچين قاتارلىلار كەزدەسۋگە قاتىناستى.
شينحۋا اگەنتتىگىنىڭ 9 - ايدىڭ 23 - كۇنى حاڭجوۋدان بەرگەن حابارى (تىلشىلەر ياڭ يجۇن، شاۋ يبو). 9 - ايدىڭ 23 - كۇنى تۇستەن بۇرىن مەملەكەت ءتوراعاسى شي جينپيڭ حاڭجوۋداعى شيحۋ مەملەكەتتىك قوناق ۇيىندە 19 - كەزەكتى ازيا سپورت جارىسىنىڭ باستالۋ سالتىنا قاتىناسۋ ءۇشىن جۇڭگوعا كەلگەن شىعىس تيموردىڭ زۇڭليى شيانانامەن كەزدەستى. ەكى ەلدىڭ باسشىلارى جۇڭگو جانە شىعىس تيمور قارىم - قاتىناسىن جالپى بەتتىك ستراتەگيالىق سەرىكتەستىك قاتىناس دەڭگەيىنە كوتەرەتىندىكتەرىن بىرگە جاريالادى.
شي جينپيڭ بىلاي دەپ اتاپ كورسەتتى: جۇڭگو مەن شىعىس تيمور دوستىعىنىڭ تامىرى تەرەڭدە جاتىر. جۇڭگو شىعىس تيموردىڭ تاۋەلسىزدىگىن ەڭ ەرتە مويىنداعان، سونداي - اق شىعىس تيمورمەن ديپلوماتيالىق قارىم - قاتىناس ورناتقان. ديپلوماتيالىق قارىم - قاتىناس ورناتقان 20 نەشە جىلدان بەرى ەكى ەلدىڭ قارىم - قاتىناسى حالىقارالىق اۋمالى - توكپەلى جاعدايدىڭ سىنىنان ءوتتى، ساياسي نەگىزى اناعۇرلىم بەكەمدەلىپ، مازمۇنى ۇزدىكسىز بايىدى، كەڭەيدى. ەكى ەلدىڭ قارىم - قاتىناسىن جاپپاي ستراتەگيالىق سەرىكتەستىك قارىم - قاتىناس دەڭگەيىنە كوتەرۋ − ەكى ەل سەلبەستىگىنىڭ داۋىرمەن بىرگە العا باسۋدىڭ رەال قاجەتى، سونداي - اق ەكى ەل حالقىنىڭ ورتاق ارمانى. جۇڭگو جاق تاتۋ، ادال، قايىرىمدى، كەڭ پەيىل بولۋ ۇستانىمى بويىنشا، وسىزامانداندىرۋ جورىعىندا شىعىس تيمورمەن قول ۇستاسا العا ىلگەرىلەپ، ەكى ەل حالقىنا ءتىپتى دە ويداعىداي باقىت جاراتۋدى قالايدى.
شي جينپيڭ بىلاي دەپ باسا دارىپتەدى: ءبىر - ءبىرىنىڭ وزەكتى مۇددەسىن جانە ءجىتى قاداعالاپ وتىرعان كەلەلى ىستەرىن باستان - اياق باتىل قولداۋ − جۇڭگو مەن شىعىس تيمور قارىم - قاتىناسىنىڭ ۇزدىكسىز بيىك بەلەسكە كوتەرىلۋىندەگى ماڭىزدى ساياسي نەگىز. ەكى جاق تاڭداۋلى ءداستۇردى ۇزدىكسىز ساۋلەلەندىرىپ، ءوزارا قولداۋدى كۇشەيتىپ، حالىقارالىق سەلبەستىكتى نىعايتىپ، ەكى ەلدىڭ جانە وركەندەپ كەلە جاتقان ەلدەردىڭ ورتاق مۇددەسىن ويداعىداي قورعاۋى كەرەك. ەكى جاق ”ءبىر بەلدەۋ، ءبىر جولدى“ بىرگە قۇرۋدى ۇزدىكسىز ىلگەرىلەتىپ، كاسىپ سالاسىن گۇلدەندىرۋ، نەگىزدىك قۇرىلعى قۇرىلىسى، استىقتا وزىنە سۇيەنۋ، حالىق تۇرمىسىن جاقسارتۋ سىندى 4 ۇلكەن ءتۇيىندى سالاداعى سەلبەستىكتى تەرەڭدەتۋى كەرەك. جۇڭگو جاق شىعىس تيموردىڭ وڭىرلىك دامۋ ارناسىمەن اناعۇرلىم ويداعىداي توعىسۋىن قولدايدى، شىعىس تيموردىڭ جۇڭگو − پورتۋگال ءتىلدى مەملەكەتتەردىڭ ەكونوميكا - ساۋدا سەلبەستىك تالقى مىنبەرى سياقتى تۇعىرلاردا اۋىس - كۇيىستى، سەلبەستىكتى كۇشەيتىپ، ادامزاتتىڭ تاعدىرلاس ورتاق تۇلعاسىن قول ۇستاسا قۇرۋىن قالايدى.
شيانانا مىنالاردى ءبىلدىردى: مەن 2014 - جىلى جۇڭگوعا ساپارلاي كەلىپ، ءتوراعا شي جينپيڭمەن كەزدەسكەن كەزدەگى كورىنىس كۇنى كەشەگىدەي ءالى ەسىمدە، تاياۋ جىلداردان بەرى ەكى جاقتى قارىم - قاتىناستا ۇزدىكسىز بەلسەندى جەتىستىكتەرگە قول جەتكەندىگىنە قاباعات قۋانامىن. شىعىس تيمورىڭ ۇلت تاۋەلسىزدىگىنە قول جەتكىزۋى بارىسىندا جۇڭگو حالقى باستان - اياق قىمباتتى قولداۋ كورسەتتى، شىعىس تيمور جاڭا تيپتى ايدارشا ۆيرۋس ىندەتىنە قارسى اتتانۋ بارىسىندا جۇڭگو ۇكىمەتى دەر كەزىندە پارمەندى كومەك كورسەتتى، مۇنى شىعىس تيمور حالقى كوكەيىندە بەرىك ساقتايدى. جۇڭگو جاقتىڭ ەمدەۋ كەمەسىنىڭ شىعىس تيمۋر حالقىنا قىسىلعاندا قول ۇشىن بەرگەندىگىنە العىس ايتادى. ءتوراعا شي جينپيڭ العا قويعان ”ءبىر بەلدەۋ، ءبىر جولدى“ بىرگە قۇرۋ باستاماسى ءار ەلدىڭ نەگىزدىك قۇرىلعى قۇرىلىسى جونىندەگى سۇرانىسىنا جاۋاپ بەردى، شىعىس تيمور مۇنى باتىل قولدايدى ءارى بەلسەنە ات سالىسادى. شىعىس تيمور ءبىر جۇڭگو ساياساتىن باتىل اتقارىپ، ءتوراعا شي جينپيڭ العا قويعان الەمدىك دامۋ باستاماسى، الەمدىك حاۋىپسىزدىك باستاماسى جانە الەمدىك وركەنيەت باستاماسى سياقتى ماڭىزدى ۇستانىمداردى، باستامالاردى جانە ساياساتتىق قۋاتتامالاردى قولدايدى، جۇڭگو كاسىپورىندارىنىڭ شىعىس تيمورعا بارىپ قارجى قوسۋىن قارسى الادى، شىعىس تيموردىڭ مەملەكەت قۇرىلىسىنا دەم بەرۋىن قالايدى، جۇڭگو جاقپەن بىرگە نەگىزدىك قۇرىلعى، استىق حاۋىپسىزدىگى، بايلىق اشۋ، ەمدەۋ، دەنساۋلىق ساقتاۋ سياقتى سالالارداعى سەلبەستىكتى كۇشەيتىپ، ەكى جاقتى قارىم - قاتىناستىڭ جالپى بەتتىك ستراتەگيالىق سەرىكتەستىك قارىم - قاتىناستىڭ جاڭا كەزەڭىنە قادام تاستاۋىن ىلگەرىلەتۋدى قالايدى.
ەكى جاق «جۇڭحۋا حالىق رەسپۋبليكاسى مەن شىعىس تيمۋر دەموكراتيالىق رەسپۋبليكاسىنىڭ جاپپاي ستراتەگيالىق سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىن» جاريالادى.
ساي چي، ديڭ شۋەشياڭ، ۋاڭ ي، شىن يچين قاتارلىلار كەزدەسۋگە قاتىناستى.
شينحۋا اگەنتتىگىنىڭ 9 - ايدىڭ 23 - كۇنى حاڭجوۋدان بەرگەن حابارى (تىلشىلەر ليۋ حۋا، ۋاڭ بين). 9 - ايدىڭ 23 - كۇنى تۇستەن كەيىن مەملەكەت ءتوراعاسى شي جينپيڭ حاڭجوۋداعى شيحۋ مەملەكەتتىك قوناق ۇيىندە 19 - كەزەكتى ازيا سپورت جارىسىنىڭ باستالۋ سالتىنا قاتىناسۋعا كەلگەن كورەيانىڭ زۇڭليى حان دىجۋمەن كەزدەستى.
شي جينپيڭ بىلاي دەپ اتاپ كورسەتتى: جۇڭگو مەن كورەيا ەتەنە جاقىن كورشى، سونداي - اق سەتىنەمەيتىن سەلبەستىك سەرىكتەر. 1992 - جىلى ديپلوماتيالىق قارىم - قاتىناس ورناتقاننان بەرى جۇڭگو مەن كورەيانىڭ قارىم - قاتىناسى تەز دامىپ، ەكى ەل حالقىنا ماڭىزدى تيىمدىلىكتەر اكەلدى. جۇڭگو مەن كورەيا قارىم - قاتىناسىنىڭ ورنىقتى بولۋى، مىعىم بولۋى ەكى ەلدىڭ جانە ەكى ەل حالقىنىڭ ورتاق مۇددەسىنە ۇيلەسەدى، بۇل ءوڭىردىڭ بەيبىتشىلىگى مەن دامۋىن جەبەۋگە دە ءتيىمدى. جۇڭگو جاق كورەيا جاقپەن بىرگە قۇلشىنىپ، جۇڭگو مەن كورەيانىڭ ستراتەگيالىق سەلبەستىك سەرىكتەستىك قاتىناسىنىڭ داۋىرمەن بىرگە العا باسۋىن، ۇزدىكسىز دامۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: جۇڭگو مەن كورەيا ديپلوماتيالىق قارىم - قاتىناس ورناتقاننان بەرى دوستىق سەلبەستىك ورناتۋ باستان - اياق جۇڭگو مەن كورەيا قارىم - قاتىناسىنداعى نەگىزگى اعىن بولىپ كەلدى. جۇڭگو جاق كورەيامەن تاتۋ كورشىلىك دوستىق ساياساتىنا تاباندى بولىپ، كورەيا جاقتىڭ جۇڭگو − كورەيا سەلبەستىگىنە كۇش سالۋداعى بەلسەندى تىلەگىنە ءمان بەرەدى. كورەيا جاقتىڭ جۇڭگو جاقپەن ءبىر باعىتتا العا تارتىپ، جۇڭگو − كورەيا قارىم - قاتىناسىنا ءمان بەرۋدى جانە ونى دامىتۋدى ساياسات جانە ارەكەت جاعىندا ايگىلەپ، ءوزارا قۇرمەت ەتىپ، دوستىق سەلبەستىكتىڭ جالپى بەتالىسىن قورعاۋدى قالايدى. جۇڭگو قازىر جوعارى ساپالى دامۋ ارقىلى جۇڭگو ۇلگىسىندەگى وسىزامانداندىرۋدى جەبەۋدە، ءبىر ميلليارد 400 ميلليوننان استام حالىق جالپى بەتتىك وسىزامانداندىرۋعا قاراي قادام تاستاۋدا، مۇنىڭ وراسان زور بازار ورايىن ونان ارى جارىققا شىعاراتىنى داۋسىز. جۇڭگو مەن كورەيانىڭ ەكونوميكالىق بايلانىسى تىعىز، كاسىپ سالاسى تىزبەگى مەن قامداۋ تىزبەگى ىشكەرىلەي توعىسقان، ەكى ەلدىڭ ءوزارا تيىمدىلىك جاساپ، سەلبەستىكتى تەرەڭدەتىپ، ۇزدىكسىز تابىسقا جەتۋىنە بولادى. جۇڭگو مەن كورەيا كوپ جاقتىلىقتى جانە الەمدىك ەركىن ساۋدا جۇيەسىن قورعاۋدى دارىپتەيدى، اۋىس - كۇيىستى، سايكەسۋدى كۇشەيتىپ، حالىقارالىق ءتارتىپتىڭ اناعۇرلىم ءادىل، ۇيلەسىمدى باعىتقا قاراي دامۋىن ىلگەرىلەتەدى.
حان دىجۋ مىنالاردى ءبىلدىردى: جۇڭگونىڭ جاقىن كورشىسى بولعان كورەيا حاڭجوۋداعى ازيا سپورت جارىسىنىڭ تابىستى وتكىزىلۋىن شىن جۇرەكتەن تىلەيدى. بىلتىر بالي ارالى 20 ەل توبى باسشىلارىنىڭ باسشىلار ماجىلىسىندە زۇڭتۇڭ يىن شييۋە ءتوراعا شي جينپيڭمەن تاماشا پىكىر اۋىستىردى. قازىر حالىقارالىق قوعام كوپتەگەن سىن - سايىستارعا ءدوپ كەلىپ وتىر، كورەيا مەن جۇڭگونىڭ جوعارى جىكتەگىلەر بارىس - كەلىسىن ساقتاۋى ەكى ەل قارىم - قاتىناسىنىڭ دامۋىن ىلگەرىلەتۋگە، سىن - سايىستارعا سەلبەسىپ توتەپ بەرۋگە ءتيىمدى. كورەيا جۇڭگومەن بىرگە اقاۋسىز، كەمەلدى كورەيا − جۇڭگو قارىم - قاتىناسىن دامىتۋعا كۇش سالۋدى قالايدى. ەكى جاقتىڭ ەكونوميكا - ساۋدا سەلبەستىگىن، ادامدار بارىس - كەلىسىن جانە مادەنيەت اۋىس - كۇيىسىن كۇشەيتىپ، كوپ جاقتىلىققا جانە ەركىن ساۋداعا تاباندى بولىپ، دۇنيە ءجۇزى ەكونوميكاسىنىڭ قالپىنا كەلۋىن، ارتۋىن بىرگە جەبەۋدى قالايدى.
ساي چي، ديڭ شۋەشياڭ، ۋاڭ ي، شىن يچين قاتارلىلار كەزدەسۋگە قاتىناستى.
