شينحۋا اگەنتتىگىنىڭ 3 - ايدىڭ 2 - كۇنى بەيجيڭنەن بەرگەن حابارى. 3 - ايدىڭ 2 - كۇنى مەملەكەت ءتوراعاسى شي جينپيڭ كوتديۆۋاردىڭ زۇڭتۇڭى ۋاتالامەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 40 جىلدىعىن قۇتتىقتادى.
شي جينپيڭ بىلاي دەپ اتاپ كورسەتتى: ديپلوماتيالىق قارىم - قاتىناس ورناتقان 40 جىلدان بەرى، جۇڭگو − كوتديۆۋار ەكى جاق باستان - اياق شىنايى دوس بولىپ، ءبىر - ءبىرىنىڭ وزەكتى مۇددەسىنە ساياتىن جانە ءجىتى قاداعالاپ وتىرعان كەلەلى ماسەلەلەردە ءبىرىن - ءبىرى قولدادى، دامۋ، گۇلدەنۋ جولىنداعى ماڭىزدى دوس جانە سەرىك بولدى. بىلتىر جىل سوڭىندا مەن ۋاتالا زۇڭتۇڭمەن تەلەفوندا سويلەسىپ، ەكى ەلدىڭ ءارقايسى سالالارداعى سەلبەستىگىن تەرەڭدەتۋ جونىندە جاڭا ورتاق تانىمعا كەلدىك. مەن جۇڭگو − كوتديۆۋار قارىم - قاتىناسىنىڭ دامۋىنا ايرىقشا ءمان بەرەمىن، ۋاتالا زۇڭتۇڭمەن بىرگە قۇلشىنىپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 40 جىلدىعىن وراي ەتىپ، ءوزارا قولداۋدى بەكەمدەپ، جان - جاقتى سەلبەستىكتى كۇشەيتىپ، جۇڭگو − كوتديۆۋار قارىم - قاتىناسىنىڭ ۇزدىكسىز تىڭ ساتىعا كوتەرىلۋىن ىلگەرىلەتىپ، ەكى ەل حالقىن اناعۇرلىم ويداعىداي باقىتقا كەنەلتۋدى قالايمىن.
ۋاتالا مىنالاردى ءبىلدىردى: وتكەن 40 جىلدان بەرى، ەكى ەل قارىم - قاتىناسى جوعارى دەڭگەيدە دامىپ كەلەدى، جۇڭگو جاقتىڭ كوتديۆۋاردىڭ نەگىزدىك قۇرىلعىلار جانە ەنەرگيا سياقتى سالالارداعى قۇرىلىسىن باستان - اياق قولداپ كەلگەندىگىنە العىس ايتامىن. كوتديۆۋار جاق جۇڭگو جاقپەن بىرگە سەلبەستىكتى كۇشەيتىپ، ەكى ەلدىڭ دوستىق سەلبەستىك قارىم - قاتىناسىنىڭ ىنتىماقتى دا قارايلاسىمدى بولاتىن، تىعىز اۋىس - كۇيىس جاسايتىن، جەتىستىكتەرى مول جاڭا داۋىرگە قاراي قادام تاستاۋىن ىلگەرىلەتىپ، تىڭ دا اناعۇرلىم زور دامۋعا قول جەتكىزۋىن قالايدى.
