جىجياڭ ولكەسى نيڭبو قالالىق ورتا دارەجەلى حالىق سوتى 3 – ايدىڭ 26 – كۇنى ورتالىق كوميتەت ۇگىت ءبولىمى باستىعىنىڭ بۇرىنعى ورىنباسارى لۋ ۋەيدىڭ پارا الۋ دەلوسىنا ءبىرىنشى سوت ۇكىمىن اشىق جاريالادى، ايىپكەر لۋ ۋەيدى پارا الۋ قىلمىسى بويىنشا 14 جىلدىق مەرزىمدى قاماق جازاسىنا ۇكىم ەتتى ءارى حالىق اقشاسىمەن 3 ميلليون يۋان اقشالاي ايىپ سالدى؛ لۋ ۋەيدىڭ پاراعا العان مال – مۇلكى مەن ونىڭ ءوسىمىن قايتارىپ الىپ، ۇكىمەت قازىناسىنا تاپسىرۋدى، تولماي قالعان بولەگىن ۇزدىكسىز قايتارىپ الۋدى ۇكىم ەتتى. لۋ ۋەي سوت ۇستىندە ۇكىمگە مويىنسال بولىپ، جوعارىلاپ ارىزدانبايتىنىن ءبىلدىردى.
تەكسەرۋ ارقىلى انىقتاۋعا قاراعاندا، ايىپكەر لۋ ۋەي شينحۋا اگەنتتىگى پارتيا باسشىلىق گرۋپپاسىنىڭ مۇشەسى، باس حاتشىسى، اگەنتتىگى باستىعىنىڭ ورىنباسارى، بەيجيڭ قالالىق پارتكومنىڭ تۇراقتى مۇشەسى، ۇگىت ءبولىمىنىڭ باسىتىعى، بەيجيڭ قالاسى باستىعىنىڭ ورىنباسارى، مەملەكەتتىك ينتەرنەت ينفورماتسياسى كەڭسەسىنىڭ مەڭگەرۋشىسى، مەملەكەتتىك كەڭەس اقپارات كەڭسەسى مەڭگەرۋشىسىنىڭ ورىنباسارى، ورتالىق ينتەرنەت حاۋىپسىزدىگى جانە ينفورماتسيالاندىرۋعا باسشىلىق ەتۋ گرۋپپاسى كەڭسەسىنىڭ مەڭگەرۋشىسى، ورتالىق كوميتەت ۇگىت ءبولىمى باستىعىنىڭ ورىنباسارى قاتارلى مىندەتتەردى اتقارعان كەزدە، قىزمەت قولايلىلىعىنان، سونداي – اق، قىزمەت ۇقىعى مەن بەدەلىنەن قالىپتاسقان قولايلى شارت – جاعدايدان پايدالانىپ، قاتىستى ورىندار مەن جەكەلەرگە ينتەرنەتتى باسقارۋ، كاسىپورىن تيجاراتى، قىزمەتىن ءوسىرۋ جانە قىزمەتىن جوتكەۋ قاتارلى ىستەردە كومەك كورسەتىپ، تىكەلەي نەمەسە باسقالار ارقىلى جوعارىدا اتالعان ورىندار مەن جەكەلەردەن حالىق اقشاسىنا شاققانداعى قۇنى 32 ميلليون يۋاننان استام كەلەتىن مال – مۇلىكتى قابىلداعان، سۇراپ العان.
نيڭبو قالالىق ورتا دارەجەلى حالىق سوتى بىلاي دەپ قاراعان: ايىپكەر لۋ ۋەيدىڭ ارەكەتى پارا الۋ قىلمىسىن قالىپتاستىرعان، سوماسى وتە قوماقتى، زاڭ بويىنشا جازالاۋ كەرەك. لۋ ۋەي دەلو بارىسىندا ءوزىنىڭ قىلمىستىق ارەكەتتەرىن شىنايى بايانداپ، دەلو ءبىتىرۋ ورىندارى ءالى بىلمەيتىن ءىشىنارا پارا الۋ قىلمىستىق فاكتىلەرىن ىرىقتىلىقپەن تاپسىرىپ، قىلمىسىن مويىنداپ، وكىنەتىنىن بىلدىرگەن، پاراعا العان مال – مۇلكىن ىرىقتىلىقپەن قايتارعان، پاراعا العان مال – مۇلكىنىڭ كوپ ءبولىمى قايتارىلعان، زاڭ بويىنشا جاعدايعا قاراي جازاسىن جەڭىلدەتۋ شارتىنا تولادى، سوندىقتان، وعان بەرىلگەن جازانى زاڭ بويىنشا جەڭىلدەتۋگە بولادى. سوت جوعارىداعىداي ۇكىم شىعاردى.
