يتاليا رەسپۋبليكاسىندا مەملەكەتتىك ساپاردا بولۋ قارساڭىندا، اتاپ ايتقاندا 3 – ايدىڭ 20 – كۇنى مەملەكەت ءتوراعاسى شي جينپيڭ يتاليانىڭ «كەشكى پوچتا گازەتىندە» «شىعىس پەن باتىستىڭ قاتىناسىندا ونەگە جاراتىپ، جۇڭگو مەن يتاليانىڭ دوستىعىندا تىڭ داستان جازايىق» دەگەن تاقىرىپتا اۆتورلى ماقالا جاريالادى. ماقالا تومەندەگىدەي:
شىعىس پەن باتىستىڭ قاتىناسىندا ونەگە جاراتىپ، جۇڭگو مەن يتاليانىڭ دوستىعىندا تىڭ داستان جازايىق
جۇڭحۋا حالىق رەسپۋبليكاسىنىڭ ءتوراعاسى شي جينپيڭ
بارشا تىرشىلىك تۇلەگەن كوكتەمدە پرەزيدەنت ماتتارەللانىڭ ۇسىنىسىمەن يتاليا رەسپۋبليكاسىندا مەملەكەتتىك ساپاردا بولاتىنىما وتە قۋانىشتىمىن. 2011 – جىلى مەن ريمدە «يتاليانىڭ بىرلىككە كەلگەنىنىڭ 150 جىلدىعى» اتىنداعى قۇتتىقتاۋ قيمىلىنا قاتىناستىم، 2016 – جىلى جولشىباي ساردينيا ارالىندا بولدىم. يتاليانىڭ بايىرعى وركەنيەت پەن وسىزامانعى وركەنيەتتى، كلاسسيكالىق ۇلگى مەن جاسامپازدىق ۇلگىنى توعىستىرعان تۇرمىس ءتاسىلى مەن ونەركاسىپ تانىمى ماعان تەرەڭ اسەر بەردى. وسى كورىكتى ەلگە تاعى دا قادام تاستاپ، كەڭ پەيىل يتاليالىق دوستارمەن كەزدەسپەكشىمىن، بۇعان ايرىقشا شاتتانامىن.
جۇڭگو مەن يتاليا ــ شىعىس، باتىس وركەنيەتتەرىنىڭ ۇزدىك ۋاكىلدەرى، ادامزات وركەنيەتىنىڭ دامۋ تاريحىندا بوگەنايى بولەك داستان جازىپ قالدىرعان. بايىرعى ريم وركەنيەتىنىڭ باستالعان جەرى جانە ادەبيەت – كوركەمونەردىڭ قايتا گۇلدەنۋىنىڭ بەسىگى سانالاتىن يتاليانىڭ سالتاناتتى دا كوركەم تاريحي جۇرتتارى، ادەبيەت – كوركەمونەر شەبەرلەرىنىڭ تاڭداۋلى تۋىندىلارى جۇڭگودا كەڭىنەن تانىمال. جۇڭگو مەن يتاليانىڭ ۇلى وركەنيەتتەرىنىڭ دوستىق بارىس – كەلىسى ارىدان باستاۋ الادى. سوناۋ 2 مىڭ جىلدان استام ۋاقىتتىڭ الدىندا بايىرعى جىبەك جولى 10 مىڭ شاقىرىم شالعايدا جاتقان جۇڭگو مەن ريمدى بايلانىستىرعان. حان پاتشالىعى كەزىندە «داكچيندى» ىزدەۋگە ەلشى جىبەرگەن. ريمنىڭ اقىنى ۆيرگەل مەن جاعراپياشىسى پامپونيۋس «جىبەك جولى ەلى» دەگەندى كوپ رەت تىلگە العان. «ماركو پولو ساپار ەستەلىگى» باتىستىڭ تاريحىندا تۇڭعىش رەت «جۇڭگو قۇشتارلىعىن» قوزعاعان. ماركو پولو شىعىس، باتىس مادەنيەت اۋىس – كۇيىسىنىڭ ەلشىسىنە اينالىپ، ۇرپاقتان – ۇرپاققا جالعاسقان دوستىق ەلشىلەرى ونى ونەگە تۇتاتىن بولعان.
