شي جينپيڭ تەلەگرامما جولداپ، شولتستىڭ گەرمانيا فەدەراتسياسىنىڭ زۇڭليى بولىپ سايلانعاندىعىن قۇتتىقتادى
لي كىچياڭ شولتسقا قۇتتىقتاۋ تەلەگرامماسىن جولدادى
شينحۋا اگەنتتىگىنىڭ 12 - ايدىڭ 8 - كۇنى بەيجيڭنەن بەرگەن حابارى. 12 - ايدىڭ 8 - كۇنى مەملەكەت ءتوراعاسى شي جينپيڭ ولاف شولتسقا تەلەگرامما جولداپ، ونىڭ گەرمانيا فەدەراتسياسىنىڭ زۇڭليى بولىپ سايلانعاندىعىن قۇتتىقتادى.
شي جينپيڭ بىلاي دەپ اتاپ كورسەتتى: جۇڭگو مەن گەرمانيا ەكى ەل ءوزارا جالپى بەتتىك ستراتەگيالىق سەرىكتەر، تالاي جىلدان بەرى ءوزارا قۇرمەت ەتۋگە، پارىقتاردى ساقتاپ، ورتاقتىققا ۇمتىلۋعا، سەلبەسىپ تەڭ يگىلىككە كەنەلۋگە تاباندى بولىپ، ەكى ەلدى جانە ەكى ەل حالقىن، سونداي - اق دۇنيە ءجۇزىن باقىتقا كەنەلتەتىن قىرۋار ءىرى ىستەردى تىندىردى. 100 جىلدىق وزگەرىس پەن عاسىرلىق ىندەت قاباتتاسقان جاعدايدا جۇڭگو مەن گەرمانيا بايلانىس پەن سەلبەستىكتى كۇشەيتىپ، بۇكىل الەمنىڭ ىندەتكە قارسى اتتانۋىنا بىرگە قولداۋ كورسەتىپ، ەكونوميكانىڭ جاندانۋىن ىلگەرىلەتىپ، ءىرى ەلدىك جاۋاپكەرشىلىگى مەن بورىشىن ايگىلەدى. مەن جۇڭگو - گەرمانيا قارىم - قاتىناسىنىڭ دامۋىنا باسا ءمان بەرەمىن، سىزبەن بىرگە قۇلشىنىپ، كەلەر جىلى ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن قۇتتىقتاۋدى وراي ەتىپ، ساياسي ءوزارا سەنىمدىلىكتى بەكەمدەپ جانە تەرەڭدەتىپ، ءار سالاداعى اۋىس - كۇيىستى، سەلبەستىكتى كەڭەيتىپ، جۇڭگو - گەرمانيا قارىم - قاتىناسىنىڭ تىڭ ساتىعا كوتەرىلۋىن ىلگەرىلەتۋدى قالايمىن.
سول كۇنى مەملەكەتتىك كەڭەستىڭ زۇڭليى لي كىچياڭ شولتستىڭ گەرمانيا فەدەراتسياسىنىڭ زۇڭليى بولىپ سايلانعاندىعىن قۇتتىقتاپ، مىنالاردى ءبىلدىردى: جۇڭگو - گەرمانيا قارىم - قاتىناسى دۇنيە جۇزىندەگى ەڭ ماڭىزدى ەكى جاقتى قارىم - قاتىناستىڭ بىرىنە اينالدى. وزىڭىزبەن تاماشا قىزمەت بايلانىسىن ورناتىپ ءارى ساقتاپ، ساياسي ءوزارا سەنىمدىلىكتى ونان ارى بەكەمدەپ، جۇڭگو مەن گەرمانيانىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ ىشكى مازمۇنىن تولىقتاپ، جۇڭگو مەن گەرمانيانىڭ دوستىق، ءوزارا تيىمدىلىك جەتكىزۋ سەلبەستىگىن ىلگەرىلەتىپ، تاعى دا تاماشا ناتيجە جاراتۋدى ءۇمىت ەتەمىن.
