مىسال دەلو
ءبىر كۇنى اسقار ءۇي مايلاۋ جارناماسىن كورىپ، ءۇيدى مايعا بەرۋشى بەكەنمەن بايلانىس جاساپ، ءۇي مايلاۋعا قاتىستى جاعدايلاردى سۇرايدى. كەلەسى كۇنى ۋيچات ارقىلى بەكەنگە 10 مىڭ يۋان تاپسىرىس بەرۋ قاراجاتىن جوتكەيدى ءارى 15 كۇننەن كەيىن ءۇي مايلاۋ توقتامىنا قول قوياتىن بولىپ كەلىسەدى. 3 كۇننەن كەيىن بەكەن ءۇيدى سەرىككە مايعا بەرەدى. وسىنداي جاعدايدا، اسقار بەكەننەن الدەقاشان تولەپ بولعان تاپسىرىس بەرۋ قاراجاتىن ەكى ەسەلەپ قايتارىپ بەرۋدى تالاپ ەتەدى، بەكەن ونىڭ بۇل تالابىنا قوسىلمايدى. اسقاردىڭ بەكەننەن 20 مىڭ يۋان تولەۋدى تالاپ ەتۋىنىڭ زاڭدىق نەگىزى بار ما؟
دەلو ارقىلى زاڭدى ءتۇسىندىرۋ
نەگىزى جوق. تاپسىرىس بەرۋ سوماسى ادەتتە الدىن الا تاپسىرىلعان اقى دەپ قارالادى، ال، كەپىلدىك سوما توقتامنىڭ اتقارىلۋىنا كەپىلدىك ەتۋ سيپاتىنا يە. ازاماتتىق زاڭنامانىڭ 586 – تارماعىندا بىلاي دەپ بەلگىلەنگەن: تاراپتاردىڭ ءبىر جاقتىڭ قارسى جاققا الاشاقتىق كەپىلدىگى رەتىندە كەپىلدىك سوما بەرۋى جونىندە كەلىسۋىنە بولادى. كەپىلدىك سوما توقتامى كەپىلدىك سوما ناقتى تاپسىرىس بەرىلگەن كەزدە جاسالعان بولادى. ازاماتتىق زاڭنامانىڭ 587 – تارماعىندا بىلاي دەپ بەلگىلەنگەن: بەرەشەك يەسى بەرەشەگىن وتەسە، كەپىلدىك سومانى اقشاعا دولايلاستىرۋى نەمەسە قايتارىپ الۋى كەرەك. كەپىلدىك سومانى تولەۋشى جاق بەرەشەگىن وتەمەگەندىكتەن نەمەسە بەرەشەگىن وتەۋى كەلىسىمگە ۇيلەسپەگەندىكتەن توقتامداعى ماقساتتى ورىنداۋ مۇمكىن بولماسا، كەپىلدىك سومانى قايتارىپ بەرۋدى تالاپ ەتۋگە ۇقىقسىز؛ كەپىلدىك سومانى الۋشى جاق بەرەشەگىن وتەمەگەندىكتەن نەمەسە بەرەشەگىن وتەۋى كەلىسىمگە ۇيلەسپەگەندىكتەن توقتامداعى ماقساتتى ورىنداۋ مۇمكىن بولماسا، كەپىلدىك سومانى ەكى ەسەلەپ قايتارۋى كەرەك.
