شي جينپيڭ جۇڭگو، رەسەي، ءۇندىستان ەلدەرى باسشىلارىنىڭ بەيرەسمي كەڭەسىنە قاتىناستى

شينحۋا اگەنتتىگىنىڭ 11 - ايدىڭ 30 - كۇنى بۋەنوس - ايرەستەن بەرگەن حابارى (تىلشىلەر حو شياۋگۋاڭ، حۋاڭ - ي جيازى). جەرگىلىكتى ۋاقىت 11 - ايدىڭ 30 - كۇنى مەملەكەت ءتوراعاسى شي جينپيڭ بۋەنوس - ايرەستە جۇڭگو، رەسەي، ءۇندىستان ەلدەرى باسشىلارىنىڭ بەيرەسمي كەڭەسىنە قاتىناستى. شي جينپيڭ رەسەي زۇڭتۇڭى پۋتينمەن، ءۇندىستاننىڭ زۇڭليى موديمەن جاڭا جاعدايدا جۇڭگو - رەسەي - ءۇندىستان سەلبەستىگى جونىندە ىشكەرىلەي پىكىرلەستى. ءۇش ەلدىڭ باسشىلارى ءۇش جاقتىڭ سايكەسۋىن كۇشەيتىپ، ءۇش جاقتىڭ ورتاق تانىمىن ۇيىستىرىپ، ءۇش جاقتىڭ سەلبەستىگىن نىعايتىپ، دۇنيە ءجۇزىنىڭ بەيبىتشىلىگىن، ورنىقتىلىعىن، دامۋىن بىرگە جەبەۋگە ءبىر اۋىزدان قوسىلدى.

شي جينپيڭ مىنالاردى اتاپ كورسەتتى: جۇڭگو، رەسەي، ءۇندىستان تۇگەلدەي ماڭىزدى ىقپالى بار ءىرى ەلدەر، ءوزارا ماڭىزدى ستراتەگيالىق سەلبەستىك سەرىكتەر. ءۇش ەلدىڭ كەڭ كولەمدى ورتاق مۇددەسى جانە ۇقساستاۋ دامۋ نىساناسى بار، ءوڭىردىڭ جانە دۇنيە ءجۇزىنىڭ بولاشاعى جونىنەن ماڭىزدى جاۋاپكەرلىك ارقالايدى. قازىرگى جاعدايدا جۇڭگو، رەسەي، ءۇندىستان ەلدەرىنىڭ بىرگە دامۋى مەن تىعىز سەلبەستىگى دۇنيە ءجۇزى جاعدايىنىڭ وزگەرىسىندە بارعان سايىن ماڭىزدى ورنىقتىلىق جانە تۇراقتىلىق سيپات الاتىن كۇشكە اينالۋدا.

شي جينپيڭ مىنالاردى اتاپ كورسەتتى: وتكەن 10 نەشە جىلدا ءۇش ەل اشىق، ىنتىماقتى، ءوزارا ءتۇسىنىسۋ، ءوزارا سەنىم ارتۋ رۋحىمەن ءۇش جاقتىڭ كەڭەسىن، سەلبەستىگىن بەلسەنە ورىستەتىپ، ماڭىزدى ىلگەرىلەۋشىلىككە قول جەتكىزدى. جاڭا سىن - سايىستار الدىندا ءبىز جۇڭگو - رەسەي - ءۇندىستان سەلبەستىگىن اناعۇرلىم ىلگەرىلەتۋىمىز كەرەك. جۇڭگو، رەسەي، ءۇندىستان جاڭاشا حالىقارالىق قاتىناستى دارىپتەپ، ساياسي سەنىمدىلىكتى ۇزدىكسىز بەكەمدەۋى، سەرىكتەسۋى، ءبىراق وداق جاساسپاۋى، ءىرى ەلدەر قارىم - قاتىناسىنىڭ تاماشا اينالىمىن ىلگەرىلەتىپ، سەلبەسىپ، تەڭ يگىلىككە كەنەلۋى كەرەك. 20 ەل توبى، بريكس ەلدەرى، شاڭحاي سەلبەستىك ۇيىمى سياقتى ماڭىزدى كوپ جاقتى مەحانيزم اياسىنداعى سايكەسۋدى، سەلبەسۋدى كۇشەيتۋى قاجەت. جۇڭگو، رەسەي، ءۇندىستان ساۋدانىڭ، قارجى قوسۋدىڭ ەركىن بولۋىن، قولايلى بولۋىن ىلگەرىلەتىپ، اشىق الەمدىك ەكونوميكانى جەبەپ، قورعامپازدىققا، سىڭار جاقتىلىققا تۋى ايقىن تۇردە قارسى تۇرىپ، كوپ جاقتى ساۋدا ءتۇزىلىسىن بىرگە قورعاپ، جاڭادان گۇلدەنگەن ەكونوميكالىق تۇلعالاردىڭ جانە وركەندەپ كەلە جاتقان ەلدەردىڭ مۇددەسىن قورعاۋى كەرەك. جۇڭگو، رەسەي، ءۇندىستان ورتاق، جالپىلىق، سەلبەستىك، باياندى حاۋىپسىزدىك كوزقاراسىن بەلسەنە دارىپتەپ، لاڭكەستىككە قارسى تۇرۋدىڭ حالىقارالىق جانە وڭىرلىك سەلبەستىگىن كۇشەيتىپ، قولامتالى ماسەلەلەردى ساياسي جولمەن شەشۋ اياق الىسىن ىلگەرىلەتىپ، حالىقارانىڭ جانە ءوڭىردىڭ بەيبىتشىلىگى مەن حاۋىپسىزدىگىن قورعاۋ جاعىندا اناعۇرلىم زور رولىن ساۋلەلەندىرۋى كەرەك.

پۋتين مىنانى ءبىلدىردى: رەسەي، جۇڭگو، ءۇندىستان ءبىر - بىرىمەن دوس ەلدەر، ءوزارا تەڭدىك، ءوزارا قۇرمەت ەتۋ نەگىزىندە تاماشا قارىم - قاتىناستى دامىتتى. قازىرگى دۇنيە ءجۇزى جاعدايىندا رەسەي، جۇڭگو، ءۇندىستان ەلدەرىنىڭ سەلبەستىكتى كۇشەيتۋى ءۇش ەلدىڭ ءوز مۇددەسىنە ۇيلەسەدى ءارى دۇنيە ءجۇزى جونىنەن دە بەلسەندى ماڭىزعا يە. ءۇش ەل اناعۇرلىم ءادىل، تۋراشىل حالىقارالىق جۇيە قۇرۋعا قۇلشىنىپ، دۇنيە ءجۇزىنىڭ بەيبىتشىلىگى مەن ورنىقتىلىعىن جەبەپ، 20 ەل توبىنىڭ كەڭەستىك تارتىبىندەگى سەلبەستىكتى قامتىعان ەكونوميكا جانە فينانس سالاسىنداعى سەلبەستىكتى كۇشەيتىپ، ەۆروپا - ازيا ەكونوميكالىق وداعى مەن «ءبىر بەلدەۋ، ءبىر جول» قۇرىلىسىنىڭ ۇشتاسۋىن ىلگەرىلەتۋى كەرەك.

مودي مىنانى ءبىلدىردى: ءۇش ەلدىڭ قازىر دۇنيە ءجۇزى ءدوپ كەلگەن باستى ماسەلەلەر جونىندە تالقى جۇرگىزۋى توتەنشە قاجەتتى. حالىقارالىق جاعدايدا تۇراقسىزدىق كوبەيىپ، سىڭار جاقتىلىق، شاعىن توپ نىسايى باس كوتەرىپ، كوپ جاقتىلىققا سىن - سايىستار اكەلدى. دامىعان ەلدەر وركەندەپ كەلە جاتقان ەلدەرگە كومەك بەرۋ ۋادەسىن ورىنداماي وتىر، ب م ۇ - نىڭ 2030 - جىلعا دەيىنگى باياندى دامۋ نىساناسىن جۇزەگە اسىرۋدا مىندەت اۋىر، جول ۇزاق. ءۇندىستان، جۇڭگو، رەسەي دۇنيە جۇزىندەگى نەگىزگى ەلدەر رەتىندە تىعىز بايلانىستى ساقتاپ، حالىقارانىڭ جانە ءوڭىردىڭ ورنىقتىلىعىن قورعاۋ، ەكونوميكانىڭ گۇلدەنۋىن جەبەۋ، دامۋ تاجىريبەلەرىنەن بىرگە يگىلىكتەنۋ، جاڭا سىن - سايىستاردى بىرگە قارسى الۋ جاعىندا بەلسەندى رول اتقارىپ، كوپ جاقتىلىقتى، كوپ جاقتى جۇيەنى بىرگە قورعاۋ جاۋاپكەرلىگى بار.

ءۇش ەلدىڭ باسشىلارى جۇڭگو، رەسەي، ءۇندىستان ەلدەرىنىڭ سەلبەستىك مەحانيزمىن ونان ارى كۇشەيتۋگە ءبىر اۋىزدان قوسىلدى.

ياڭ جيەچى، ۋاڭ ي قاتارلىلار كەڭەسكە قاتىناستى.