«حالىق
گازەتى»، 12 – ايدىڭ 1 - كۇنى، بۋەنوس - ايرەس (تىلشىلەر جاۋ جياميڭ، دۋ شاڭزى).
سول جەر ۋاقىتى بويىنشا 12 – ايدىڭ 1 – كۇنى كەشتە مەملەكەت ءتوراعاسى شي جينپيڭ
ۇسىنىس بويىنشا ا ق ش – تىڭ پرەزيدەنتى ترامپپەن بۋەنوس – ايرەستە كەشكى استا بىرگە
بولدى ءارى كەزدەستى. ەكى ەلدىڭ مەملەكەت باسشىلارى بۇكپەسىز، دوستىق بەينەدە جۇڭگو
– ا ق ش قاتىناسى جانە بىرگە كوڭىل بولەتىن حالىقارالىق ماسەلەلەر جونىندە
ىشكەرىلەي پىكىر الماستىرىپ، ماڭىزدى ورتاق تانىمعا كەلدى. ەكى جاق ءوزارا
تيىمدىلىك جاساۋ، ءوزارا پايدا جەتكىزۋ نەگىزىندە سەلبەستىكتى كەڭەيتىپ، ءوزارا
قۇرمەت ەتۋ نەگىزىندە الاۋىزدىقتى تەجەپ، سايكەستىكتى، سەلبەستىكتى، ورنىقتىلىقتى
نەگىزگى ارنا ەتكەن جۇڭگو – ا ق ش قاتىناسىن بىرگە ىلگەرىلەتۋگە ماقۇل
بولدى.
شي جينپيڭ
مىنالاردى اتاپ كورسەتتى: جۇڭگو مەن ا ق ش دۇنيە ءجۇزىنىڭ بەيبىتشىلىگى مەن
گۇلدەنۋىن جەبەۋ قاعىندا ماڭىزدى جاۋاپكەرلىك ارقالاپ وتىر. جۇڭگو مەن ا ق ش
اراسىنداعى تاماشا قاتىناس ەكى ەل حالىقتارىنىڭ ءتۇبىرلى مۇددەسىنە ۇيلەسەدى ءارى
حالىقارالىق قوعامنىڭ جالپى بەتتىك ءۇمىتى. سەلبەستىك __ جۇڭگونىڭ دا، ا ق ش – تىڭ
دا ەڭ جاقسى تالعامى. ەكى جاق جۇڭگو – ا ق ش قاتىناسى دامۋىنىڭ زور بەتالىسىن
ويداعىداي يگەرىپ، ەكى ەل قاتىناسىنىڭ ۇزاق مەزگىل اقاۋسىز، ورنىقتى دامۋىن
ىلگەرىلەتىپ، ەكى ەل حالىقتارىنا جانە دۇنيە جۇزىندەگى ەلدەر حالىقتارىنا اناعۇرلىم
كوبىرەك، اناعورلىم ويداعىداي باقىت جاراتۋى كەرەك.
ترامپ شي
جينپيڭنىڭ ەكى ەلدىڭ قاتىناسى جونىندەگى باعاسىن قۇپتادى. ترامپ بىلاي دەدى: ا ق ش
– جۇڭگو قاتىناسى وتە ەرەكشە، ماڭىزدى، ءبىزدىڭ ەكى ەل دۇنيە جۇزىندە ىقپالعا يە
ماڭىزدى مەملەكەتتەر، ەكى جاقتىڭ تاماشا سەلبەستىك قاتىناسىن ساقتاۋى ەكى ەلگە جانە
دۇنيە جۇزىنە پايدالى. ا ق ش جۇڭگومەن كەڭەسۋ ارقىلى ەكى ەلدىڭ سەلبەستىگىن
نىعايتۋدى ءارى ەكى جاقتا ورىن تەپكەن ماسەلەلەر جونىندە ەكى جاققا بىردەي ءتيىمدى
شەشۋ ءادىسىن بەلسەنە قاراستىرۋدى قالايدى.
كەلۋ قاينارى: حالىق
تورابى
