”بۇگىنگى تۇيە ٴسۇتىن تۇگەل ساتىپ بولدىم، مىناۋ تۇيە ٴسۇتىن ساتقان 1200 يۋان، جاقسىلاپ ساقتاپ قوي“. 4 ـ ايدىڭ 24 ـ كۇنى تۇستەن كەيىن، تۇيە ٴسۇتىن ساتىپ بولعان ەركىنقان مۇقامەتقالي جايشىلىقتاعىداي اقشاسىن ايەلى سايراگۇل قاناعاتقا بەردى. ەركىنقان مۇقامەتقالي وتباسى پارتيانىڭ ابزال ساياساتىنا سۇيەنىپ، تۇيە باعىپ كىرىسىن ارتتىرىپ، اۋقاتتاندى.
ەركىنقان مۇقامەتقالي قىستاقتاعى اۋقاتتانۋ شەبەرى، ال بىرنەشە جىلدىڭ الدىندا ونىڭ وتباسى كەدەي وتباسى بولاتىن. 2013 ـ جىلى 4 ـ ايدا ەركىنقان مۇقامەتقالي مەن ايەلى، 2 ۇلى ۇيىندەگى 3 تۇيەنى الىپ، تارباعاتاي ايماعى تولى اۋدانى تەمىرتام قالاشىعى حاتۋ قىستاعىنداعى بايكوۋچۋان مال شارۋاشىلىق تۇيىنىنە كەلىپ، بار ىنتاسىمەن تۇيە باعا باستادى. دەن قويا باعىمشىلىقپەن شۇعىلدانعانىمەن، كىرىسى كۇندەلىكتى شىعىمنان اسپادى.
تۇيە ٴسۇتىنىڭ قۇرامىندا كالتسي ەلەمەنتى مول، وڭاي قورىتىلىپ سىمىرىلەدى، ۇنەمى ىشسە كالتسيدى تولىقتاپ، سۇيەكتىڭ بوساۋىنان ساقتاپ، بالالاردىڭ ٴوسىپ - جەتىلۋىن جەبەپ، دەنەنىڭ يممۋنيتەتتىك قۋاتىن ارتتىرادى. حاتۋ قىستاعى بايكوۋچۋان مال شارۋاشىلىق ءتۇيىنىنىڭ سۋى مول ءشوبى شۇيگىن، دارىلىك قۇنعا يە شوپتەر مول وسەدى، وسى اراداعى تۇيەلەردىڭ ٴسۇتى دە ”ٴدارى مەن ازىقتىق ورنىنا ورتاق قولدانۋداي“ مەديتسينالىق قۇنعا يە بولعاندىقتان، ٴار ۇلت بۇقاراسىنىڭ قىزۋ قارسى الۋىنا يە بولعان. ەركىنقان مۇقامەتقالي بىلاي دەدى: ”وسىنشاما جاقسى تۇيە ٴسۇتى بولسا دا، ساۋدانىڭ ەبىن كەلتىرە المادىق، شىنىمدى ايتسام ٴوزىمىز دە قاتتى ابىرجىدىق“.
2020 ـ جىلى 9 ـ ايدا تەمىرتام قالاشىق پارتكومى، قالاشىق ۇكىمەتى، قىستاق ”ەكى كوميتەتى“ جانە قىزمەت اترەتى ەركىنقان مۇقامەتقاليدىڭ وتباسىن ٴتۇيىندى سۇيەمەلدەۋ وبيەكتىسى رەتىندە قاراپ، تالاي رەت ۇيىنە بارىپ احۋال ۇعىسىپ، ونىڭ ٴوزىنىڭ ٴىس جۇزىندىك جاعدايىنا, جەرگىلىكتى جاعدايعا ۇشتاستىرىپ، تۇيە باعىمشىلىعىن دامىتۋىنا قولداۋ كورسەتتى، سونداي ـ اق بەلسەندى تۇردە وعان شاعىن سومالى قارىز اقشا ٴبىتىرىپ، ايەلى ەكەۋىنىڭ دەربەس شارۋاشىلىق قۇرىپ، تۇيە باعىمشىلىعىمەن شۇعىلدانۋ ارقىلى اۋقاتتانۋ سەنىمىن بارىنشا ارتتىردى.
تۇيە باعۋ تەحنيكالىق جۇمىس، تۇيە باعۋ ٴۇشىن ەركىنقان مۇقامەتقالي اۋدانداعى، قالاشىقتاعى مال شارۋاشىلىق تەحنيكتەرىنەن كىشپەيىلدىكپەن كەڭەس الىپ، مال شارۋاشىلىق تەحنيكتەرىمەن ۇنەمى ٴۇنحات ارقىلى اڭگىمەلەسىپ، تەحنيكا ۇيرەنىپ، ىندەتتەن ساقتانىپ، قيىن ماسەلەلەردى شەشتى. ول تۇرعان مال شارۋاشىلىق ٴتۇيىنى ٴبىرشاما شالعاي بولعاندىقتان، قالاشىقتا، قىستاقتا ۇيىمداستىرىلعان باعىمشىلىق تەحنيكاسى كۋرستەرىنە قاتىناسا الماي، جاقىن ماڭداعى قارامايلى قالاسىنىڭ جايرانبۇلاق رايونىنا بارىپ كۋرسقا قاتىناسىپ، قول تەلەفون ارقىلى ۇيرەندى، باعىمشىلىقپەن شۇعىلداناتىن باسقا دا وتباسىلارمەن ٴوزارا اۋىس ـ كۇيىس جاساپ، تاماشا باعىمشىلىق ٴادىسى مەن تاجىريبەسىن ٴبولىستى.
بىرنەشە جىل دەن قويا باعۋ ارقىلى ونىڭ 3 تۇيەسى كوبەيىپ 60 نەشەگە جەتتى. بيىل تاعى دا 20 نەشە ىنگەن بوتالادى، قازىر وسى 20 نەشە تۇيەنىڭ ساۋاتىن مەزگىلى جەتىپ، كۇنىنە 40 نەشە كيلوگرام ءسۇتتىڭ ٴار كيلوگرامىن 30 يۋان باعامەن قارامايلى قالاسىنا ساتىپ، كۇنىنە 1200 يۋاننان استام كىرىس كىرگىزدى، تەك تۇيە باعۋدىڭ وزىنەن ونىڭ وتباسى جىلىنا 300 مىڭ يۋاننان استام كىرىس كىرگىزدى.
”قارامايلى قالاسىنىڭ جايرانبۇلاق رايونىنان ٴبىر جولدا اقشا تولەپ، 80 شارشى مەترگە تاياۋ ٴۇي ساتىپ الىپ، تۇيە ٴسۇتىن ساتۋ ورنى جانە ۇلىمنىڭ قارامايلى قالاسىندا جۇمىس ىستەيتىن تۇراعى ەتتىم“. ەركىنقان مۇقامەتقالي بىلاي دەدى: قازىر وتباسىمنىڭ كىرىسى ارتتى، تۇرمىسىم دا بارىنشا جاقساردى، ٴۇي ساتىپ الۋمەن بىرگە، جەڭىل اۆتوكولىك، پيكا اۆتوكولىگىن جانە جۇك تاسىمال اۆتوكولىگىن دە ساتىپ الدىق.
”تۇيەنىڭ سانى كۇن سايىن ارتقانىنا ساي، وتباسىمنىڭ تۇرمىسى دا بارعان سايىن جاقساردى، قانشا جاپا شەكسەم دە، قانشا شارشاسام دا تاتيدى دەپ ويلايمىن“. ەركىنقان مۇقامەتقالي كۇلىمسىرەي: ”وتباسىمداعىلارمەن اقىلداسىپ، تاپقان اقشاممەن ۇزدىكسىز قارجى قوسۋعا بەكىندىم، قالاشىق پارتكومى جانە قىستاق ’ەكى كوميتەتى‘، قىزمەت اترەتىنىڭ قولداۋىندا، باعىمشىلىق ورنى مەن كولەمىن كەڭەيتىپ، باسقا باعىمشىلىق وتباسىلارى جانە مالشىلارمەن بىرلەسىپ، كولەمدى باعىمشىلىق سەلبەستىك كووپەراتيۆىن قۇرىپ، باعىمشىلىقتى، تۇيە ٴسۇتىن جانە تۇيە ەتىن مانەرلەۋدى، ساتۋدى ٴبىر تۇلعالاندىرىپ، كاسىپ سالاسىن ۇلعايتىپ، قىستاق تۇرعىندارىن ٴوزىم سياقتى اۋقاتتانۋعا باستاۋعا قۇلشىنامىن! “، ـ دەدى.
تەمىرتام قالاشىعى پارتكومىنىڭ مۇشەسى، قالاشىق باستىعىنىڭ ورىنباسارى توقتار دۇيسەنباي بىلاي دەدى: ”سوڭعى جىلدارى قالاشىق پارتكوم، قالاشىق ۇكىمەت ەگىنشى ـ مالشى قاۋىمىنىڭ مال باعىمشىلىعىن دامىتۋىن بەلسەنە سۇيەمەلدەۋمەن بىرگە، ٴبىر توپ بايۋدىڭ ۇلگىلەرىن بەلسەنە تاڭداپ شىعارىپ، باسقا قىستاق تۇرعىندارىن باعىمشىلىق كاسىبىن دامىتۋعا جەتەكتەپ، كاسىپ سالاسى كولەمىن ونان ارى كەڭەيتىپ، ٴوندىرىس ـ تيجارات تىزبەگىن ۇزارتىپ، اۋىل ـ قىستاقتىڭ گۇلدەنۋىنە دەم بەردى“. (ەرىكتى ٴتىلشى ۋاڭ زىرۇڭ)
