انار بۇلت / شينجياڭ گازەتىنىڭ ءتىلشىسى ياڭ شۋحان
2 - ايدىڭ 12 - كۇنى لوپ اۋدانى بۇيا اۋىلى اياققى كونزيا قىستاعىنىڭ قىستاق تۇرعىندار كوميتەتىندە 10 نەشە مەتر ۇزىندىقتاعى 2 ”رەڭدى ايداعار“ بىردە جوعارىلاپ، بىردە تومەندەپ، كەيدە وڭعا، كەيدە سولعا تەربەلىپ، كورۋگە كەلگەن بۇقارانىڭ تولاسسىز ماداعىنا يە بولدى.
”وسى بىرنەشە كۇندە ءار كۇنى «باتىسقا ساياحاتتىڭ» مۋزيكاسى ەستىلىپ تۇردى، مۋزيكا ءۇنى شىقسا بولدى، بالالار تاماققا دا قاراماي قىستاق تۇرعىندار كوميتەتىنە قاراي تۇرا جۇگىرەدى“. قىستاق تۇرعىنى مۇحتار ارسىلان بىلاي دەدى: بالالارعا ىلەسىپ قىستاق تۇرعىندار كوميتەتىنە بارعاندا عانا، اۋىلداستاردىڭ مۇندا ويىن نومىرلەرىن ورىنداپ قاربالاس جۇرگەندىكتەرىن كوردىم.
2 ”رەڭدى ايداعاردىڭ“ اۋلادا ىرعاتىلا بيلەۋىنە ىلەسە، مەرەكەلىك راي دۋماندادى، قىستاق تۇرعىندارىنىڭ كەيبىرەۋى بەينە ەكران ارقىلى تۋىستارىنا الىستان تىكە تاراتسا، كەيبىرەۋى بەينەجازبا ءتۇسىرىپ ۇيلەرىندەگى قارتتارعا اپارىپ كورسەتتى، ەندى بىرەۋلەر دوۋيىنعا تىكە شىعاردى. لوپ اۋدانى بۇيا اۋىلدىق پارتكومنىڭ شۋجيى گو جىچياڭ تانىستىرىپ بىلاي دەدى: بۇيا اۋىلى ءار اپتادا ءارقايسى قىستاقتار اراسىنداعى حالىقتىق ونەرپازداردىڭ كونسەرتىن ۇيىمداستىرادى نەمەسە اۋىلدىق مادەنيەت پۋنكتى ”ءبىر اۋىلدا ءبىر ۇيىرمە“ حالىقتىق ونەرپازدار ۇگىت لەكسيا ۇيىرمەسىن كونسەرت قويۋعا جىبەرەدى، نومىرلەردىڭ مازمۇنى پارتيانىڭ حالىقتى يگىلىككە كەنەلتۋ ساياساتىن نەگىز ەتىپ، ءبي، ءان جانە مۋزيكا اسپاپتارىن ورىنداۋ سياقتى فورمالارمەن ورىستەتىلەدى.
”قىستاقتاعى قيمىلدىڭ ارقان تارتۋ، باسكەتبول جارىسى، ورىندىققا تالاسۋ، ايەلىن ارقالاپ جۇگىرۋ سياقتى قىزىقتى بولۋىنا ءمان بەرىلدى، ادەبيەت - كوركەمونەر نومىرلەرىن دە قىستاق تۇرعىندارى وزدەرى دايىنداپ، وزدەرى ورىنداپ، وزدەرى شەرتىپ، وزدەرى ايتادى“. گو جىچياڭ بىلاي دەدى: بۇل قيمىلدار اۋىل - قىستاق تۇرمىسىن دۋمانعا بولەپ، بۇقارانىڭ مادەني تۇرمىسىن بايىتىپ، مەرەكەلىك رايدى جانداندىرىپ، بۇقاراعا شات - شادىمان، بەرەكەلى راي ىشىندە جۇڭحۋانىڭ تاڭداۋلى ءداستۇرلى مادەنيەتىنىڭ باۋرامدىلىعىن سەزىندىردى.
لوپ اۋداندىق پارتكوم ۇگىت ءبولىمىنىڭ ۇنەمىلىك ىستەرگە جاۋاپتى ورىنباسار باستىعى ازيزوللا ءراجاپ تىلشىگە: جاقىنداعى جىلداردان بەرى اۋىل - قىستاق بۇقاراسىنىڭ مادەنيەت تۇرمىسىندا بىلىنبەي وزگەرىستەر تۋىلۋدا، مۇنى لوپ اۋدانىنىڭ، ءتىپتى، حوتان ايماعىنىڭ اۋىل - قىستاق مادەنيەت قۇرىلىسىن ۇزدىكسىز كۇشەيتىپ، بۇقارانىڭ كۇن سايىن ارتىپ وتىرعان رۋحاني مادەنيەت قاجەتىن قاناعاتتاندىرىپ، جاڭاشا اۋىل - قىستاق مادەنيەتىن بارىنشا دامىتۋىنان، بارىنشا گۇلدەندىرۋىنەن بولە قاراۋعا بولمايدى، - دەدى.
”اۋىل - قىستاقتى گۇلدەندىرۋ باي رۋحاني، مادەني تۇرمىستى قاجەت ەتەدى، نەگىزگى ساتىداعى بۇقارانىڭ مادەني تۇرمىسىن ۇزدىكسىز بايىتقاندا عانا، اۋىل - قىستاق مادەنيەتىن جانداندىرۋعا، قىستاق تۇرعىندارىنىڭ سەنىمىن كۇشەيتۋگە، وسى ارقىلى اۋىل - قىستاقتى گۇلدەندىرۋدىڭ جوعارى ساپالى دامۋىن ىلگەرىلەتۋگە بولادى“، - دەدى ازيزوللا ءراجاپ.
