ءبىر ءۇيلى جانداي ەتەنە جاقسى كورشىلەر

日期:2021年01月08日
来源:新疆日报
【字体:

قارامايلى قالاسى ورقى رايونى

ءبىر ءۇيلى جانداي ەتەنە جاقسى كورشىلەر

  12 - ايدىڭ 10 - كۇنى قارامايلى قالاسىنىڭ ورقى رايونىنا قار جاۋدى، الايدا ءتىلشى وسى ارادان مەيىرىمدىلىكتى، جىلۋلىقتى سەزىندى. تالاي جىلدان بەرى ورقى رايونىنداعى ءار ۇلت بۇقاراسى كورشى وتىرىپ، ءوندىرىس، تۇرمىس بارىسىندا ءوزارا ۇيرەنىپ، ءوزارا كومەكتەسىپ، ۇلتتار ىنتىماعىنىڭ جاڭا كارتيناسىن كەسكىندەدى.

  ”ءسىڭلىم، بۇگىن كەشكى استى ءبىزدىڭ ۇيدەن ءىش، ەكەۋىمىز تۇشپارا تۇيەيىك“. 12 - ايدىڭ 10 - كۇنى تۇستەن كەيىن ورقى رايونى ورقى قالاشىعى شاعانوت قىستاعىنىڭ تۇرعىنى ءماريقان ءداۋىت كورشىسى پاڭكا ءبونبۇرانىڭ ۇيىنە كەلىپ، ونى بىرگە تاماقتانۋعا شاقىردى.

  جاسى 70تەن اسقان ءماريقان مەن جاقىندا زەينەتكە شىققان پاڭكا 40 نەشە جىلدىق كونە كورشى. تالاي جىلدان بەرى ءار كۇنى ءوزارا امانداسىپ، ءار رەت قيىنشىلىققا جولىققاندا دا ءوزارا سەرىك بولىپ، قارايلاسىپ، ەكەۋى سىرلاس اپەكەلى - سىڭلىگە اينالىپ، ەكى وتباسى دا ءبىر ءۇيلى جانداي ەتەنە بولدى.

  ”الىستاعى تۋىستان جاقىنداعى كورشى ارتىق، كورشى بولعان ۋاقىتىمىز ۇزاق، ەكەۋىمىز شارۋامىز بولسا دا، بولماسا دا ۇنەمى بىرگە بولىپ، تاتۋ اپەكە - سىڭلىگە اينالدىق“، - دەدى ءماريقان كۇلىپ.

  ءماريقان مەن پاڭكا قۋانىشتارىن ءبولىسىپ، ءوزارا قارايلاسىپ ءوتتى. ءماريقاننىڭ جوعارى قان قىسىمى بار، تىزەسى جارالانعان، ءجۇرىپ - تۇرۋى قولايسىز. پاڭكا وعان ۇنەمى امانداسىپ بارىپ، ۋاعىندا ءدارىسىن ءىشۋدى تاپسىرادى ءارى وعان ءدامدى تاماق جاساپ بەرەدى. اۋا رايى جاقسى كۇندەرى پاڭكا تاعى ءماريقاندى سۇيەپ سىرتقا شىعارىپ سەيىلدەپ، كۇن شۋاقتايدى.

  ”ءبىزدىڭ شينجياڭدا قاي جەرگە بارساڭىز دا ۇلتتار ءبىر ءۇيلى جانداي ەتەنە، بەينە ءبىز ەكى وتباسى سياقتى ءار رەت باس قوسقاندا دىر - دۋمانعا بولەنەمىز. قاراڭىز، مىناۋ وتكەندەگى كوكتەم مەرەكەسى كەزىندە باس قوسۋ داستارقانىندا تۇسكەن سۋرەتىمىز“، - دەدى تىلشىگە پاڭكا قول تەلەفونىنداعى سۋرەتتەرىن كورسەتىپ.

  ”ليۋ اعاي ايتا بەرەدى ەكەنسىز، ايەلدەر بەكەر ءجۇر دەپ كىم ايتادى“... كەشقۇرىم ورقى رايونى ليۋشۋ كوشەسى ءمالىسى ليۋيۋان الەۋمەتتىك اۋماعى پارتيا مەن بۇقاراعا قىزمەت كورسەتۋ ورتالىعى شياڭياڭحۋا قيمىل ۇيىندە الەۋمەتتىك اۋماق تۇرعىنى روزىحان امەت زەينەتكە شىققان تۇرعىن ۋي حۇيلياننان حىنان تەاترىن ۇيرەنۋدە. العاش ۇيرەنگەنىمەن، روزىحان بارلىق ارەكەتتى ءوز بابىندا ىستەپ جاتتى.

  ”ۋي اپەكە ەكەۋىمىز ۇستىڭگى - استىڭعى قاباتتا تۇراتىن كورشىلەرمىز، اپەكەمنىڭ ۇيىندە تەاتر ايتىپ جاتقانىن ۇنەمى ەستيمىن، كىشكەنتايىمنان تەاترعا قىزىعۋشى ەدىم، سونىمەن اپەكەمنەن تەاتر ۇيرەنۋ ويىنا كەلدىم. قازىر الەۋمەتتىك اۋماقتىڭ ارنايى قيمىل ءۇيى بار، تاعى حاتكەرلىك سياقتى كۋرستار دا بار، تەاتردى ۇيرەنىپ العان سوڭ، حاتكەرلىك تە ۇيرەنىپ، مادەنيەت ساپامدى جوعارىلاتقىم كەلەدى“. روزىحان ۇيرەنۋ جوسپارىن تولتىرا ورنالاستىرىپتى.

  ليۋيۋان الەۋمەتتىك اۋماعىنىڭ قاراستىلىعىندا 423 وتباسى، 1231 ادام بار، حانزۋ، ۇيعۇر، قازاق، موڭعۇل، حۇيزۋ سياقتى ۇلتتاردان قۇرالعان، ۇلتتار ءوزارا كورشى وتىرىپ، تالاي جىلدان بەرى ءوزارا قارايلاسىپ، ءبىر - بىرىنە سۇيەنىپ بىرگە تۇرمىس كەشىرىپ كەلەدى.

  روزىحان تىلشىگە بىلاي دەدى: ءار جولعى مەرەكە - مەيرامداردا شاعىن اۋماقتاعى تۇرعىندار ءبىر اراعا باس قوسىپ، ەرەكشە دۋماندى بولادى. ”بۇل كۇندەرى ’قوس ورتالىق‘ قيمىل ءۇيى ءبىزدىڭ اناعۇرلىم كوبىرەك بىرگە قيمىل وتكىزۋىمىزگە وراي جاراتتى“، - دەدى روزىحان.

  روزىحان ايتىپ وتىرعان قوس ورتالىق − ورقى رايونى جاڭا ءداۋىر وركەنيەت امالياتى ورتالىعى مەن پارتيا - بۇقارا قىزمەت كورسەتۋ ورتالىعى، ورقى قالا اۋماعىنىڭ ورتالىعىنداعى ليۋشۋ كوشەسى مالىسىنە ورنالاسقان. ”قوس ورتالىققا“ بارا قالساڭىز، جاسىل جەلەكپەن كومكەرىلگەندىگىن، جيھازدارىنىڭ رەتتى تىزىلگەندىگىن، قورشاعان ورتاسىنىڭ تازا ەكەندىگىن بايقايسىز، كىتاپ وقۋ بولمەسى، دەنە شىنىقتىرۋ ءۇيى، ءبي بولمەسى، ءان - كۇي بولمەسى سياقتىلاردىڭ ءبارى تولىق، تىنىسىڭىز كەڭەيىپ قالادى.

  ”ءبىز قيمىل ورنىن ۇلتتار ىنتىماعىنىڭ شەبىنە اينالدىرىپ، قاراستى اۋماقتاعى ءار ۇلت بۇقاراسىنا بىرگە قيمىل جاسايتىن، كوڭىل اشاتىن، ۇيرەنەتىن تۇعىر ازىرلەدىك. فورماسى الۋان ءتۇرلى، مازمۇنى باي قيمىلدار ارقىلى ۇلتتاردىڭ كەڭ كولەمدە ارالاسۋىن، جاپپاي ىشتەسۋىن، تەرەڭ توعىسۋىن جەبەدىك“، - دەدى ليۋيۋان الەۋمەتتىك اۋماعى پارتيا ياچەيكاسىنىڭ شۋجيى ۋاڭ في.

  الەۋمەتتىك اۋماق سونىمەن بىرگە ءار ۇلت تۇرعىندارىنا شارۋاشىلىق قۇرۋ شەبەرلىگىنە باۋلۋ كۋرسى سياقتىلاردى اشتى. الەۋمەتتىك اۋماقتىڭ قولداۋىندا تۇرعىن التىنچيميك الەۋمەتتىك اۋماق قيمىل بولمەسىنىڭ جانىنان تىگىنشىلىك دۇكەنىن اشىپ، شارۋاشىلىعىن دوڭگەلەتە ءجۇرىپ، شاكىرت تاربيەلەدى.

  ”ءداستۇرلى كەستە ونەرىن ءار ۇلت تۇرعىندارىنا جەتكىزگىم كەلەدى، ءبىز بىرگە ۇيرەنىپ، بىرگە العا باسىپ، بىرگە بايىپ، قول ۇستاسا اناعۇرلىم تاماشا تۇرمىسقا جەتەمىز“، - دەدى التىنچيميك.