اۆتور: دۋ جيانحۇي، جياڭ ۋيليان
”جياڭ يۇڭ، باس قۇرايتىن شاعىڭ دا بولدى، وزىڭە ساي لايىقتى بويجەتكەنگە جولىعىپ جاتساڭ شەشەڭە ايتىپ قوي، ۇيلەنۋ تويىن وتكىزەتىن جۇمىستارعا مەن بارمىن“.
”شەشە، ٴبىراز ۋاقىت وتكەن سوڭ قالىڭدىعىمدى ەرتىپ، سىزگە كەلىپ سالەم بەرەمىز“.
9 ـ ايدىڭ 21 ـ كۇنى جۇڭچيۋ مەرەكەسىنىڭ كەشىندە شينجياڭ بايىنعولين موڭعۇل اۆتونوميالى وبلىسى بۇگۇر اۋدانى يەيۇنگوۋ اۋىلى يەيۇنگوۋ قىستاعىنداعى ٴبىر شارۋا اۋلاسىنىڭ ٴجۇزىم سورەسىنىڭ استىندا، ٴبىر ٴۇيلى جان داستارقاننىڭ قاسىندا قورالانا وتىرىپ، ٴدامى ٴتىل ۇيىرەتىن ايكۇلشە، جەمىس ـ جيدەك جەپ، ٴازىل – قالجىڭ ايتىسىپ وتىر. ايەل قوجايىن ايگۇل تايىپ پەن كۇيەۋى ەرجەتكەن 3 بالاعا قۋانا قاراپ، جۇزدەرىنەن باقىت لەبى ەسەدى.
بيىل حانزۋ جىگىت موۋ جياڭيۇڭنىڭ ايگۇل شەشەسىنىڭ ۇيىندە وتكىزگەن 13 ـ رەتكى جۇڭچيۋ مەرەكەسى.
موۋ جياڭيۇڭنىڭ 5 جاسىندا شەشەسى ناۋقاستان قايتىس بولىپ، اكەسى ەكەۋى ٴبىر – بىرىنە سۇيەنىپ كۇن كەشەدى. ونىڭ ەسىندە قالۋىنشا، ول كورشىسى ايگۇلدى شەشە دەپ اتاعان، بالالىق شاعى ايگۇل شەشەسىنىڭ ۇيىندە وتكەن. ايگۇل شەشەيدىڭ موۋ جياڭيۇڭمەن قارايلاس 2 ۇلى قۇربان ياسىن مەن مامەت ياسىن موۋ جياڭيۇڭنىڭ بالا كەزىندەگى ەڭ جاقىن دوستارى بولاتىن.
موۋ جياڭيۇڭ ەسكە الىپ بىلاي دەدى: بالا كەزىمدە ەكى وتباسىنىڭ ەكونوميكالىق شارت - جاعدايى انشا جاقسى بولماعانىمەن، ٴار جولى ايگۇل شەشەمنىڭ ۇيىنە بارىپ تاماق ىشەتىنمىن، ول قاشاندا ماعان ٴتۇرىن وزگەرتىپ ٴدامدى تاماق جاساپ بەرەتىن.
”2008 - جىلى اۋدان قالاشىعىنداعى ورتا مەكتەپكە وقۋعا تۇسكەنىمدە، ايگۇل شەشەم مەنى مەكتەپ اسحاناسىنىڭ تاماعىن جەۋگە داعدىلانباي قالا ما دەپ الاڭداپ، ٴار اپتانىڭ سوڭىندا ەرتەرەك تاماق جاساپ، وقۋدان تاراپ ۇيگە قايتۋىمدى كۇتىپ وتىراتىن“، - دەدى موۋ جياڭيۇڭ.
ٴبىر جولى ايگۇل مەكتەپ مۇعالىمىنىڭ تەلەفونىن قابىلدايدى، مۇعالىم تەلەفوندا موۋ جياڭيۇڭنىڭ اۋىرىپ قالعانىن ايتادى. ول مۇنى ەستي سالا ابىرجىپ، جالما - جان اۆتوبۋزعا وتىرىپ اۋدان قالاشىعىنا بارادى. موۋ جياڭيۇڭ شيپاحانادا ٴبىر اپتا جاتقاندا، ايگۇل اۋرۋ توسەگىنىڭ قاسىندا وعان قارايلاسادى.
2015 - جىلى موۋ جياڭيۇڭ اكەسىمەن بىرگە حىجيڭ اۋدانىنا كەلىپ قونىستانادى. موۋ جياڭيۇڭ ايگۇل شەشەسىن ساعىنعاندا، وعان تەلەفون سوعىپ، انا مەن بالا تەلەفوندا ۇنەمى ۇزىن سونار اڭگىمەگە تۇسەتىن.
2018 - جىلى موۋ جياڭيۇڭنىڭ اكەسى ناۋقاستان قايتىس بولادى. ”شەشە، اكەم قايتىس بولدى، جالعىز قالدىم“، - دەدى اكەسىنەن ايىرىلعان موۋ جياڭيۇڭ ەڭ الدىمەن ايگۇل شەشەسىن ەسىنە الىپ.
”بالام، ٴىس جۇزىندە مەن سەنى حىجيڭگە جىبەرگىم كەلمەگەن. اكەڭ قازا بولدى، دەرەۋ قايتىپ كەل“. تەلەفوننىڭ ار جاعىنان ايگۇل شەشەسىنىڭ شىن پەيىلدى داۋىسى ەستىلدى.
جۇزدەسكەننەن كەيىن، انا مەن بالا قاتتى قۇشاقتاستى. ”بۇدان بىلاي بۇل سەنىڭ ٴۇيىڭ، ەشقايدا بارۋشى بولما“، - دەدى ايگۇل.
موۋ جياڭيۇڭ مەن ايگۇل شەشەسى پالاۋ جەۋدە. ( سۋرەتتى چىن يوۋجىڭ تۇسىرگەن)
موۋ جياڭيۇڭ يەيۇنگوۋ قىستاعىنا قايتىپ كەلگەننەن كەيىن، ايگۇل شەشەسىنىڭ ۇيىنە كەلىپ، وتباسىنىڭ ٴبىر مۇشەسىنە رەسمي اينالدى. ايگۇل وتباسىنىڭ قامقورلىعىندا، موۋ جياڭيۇڭ بىرتە ـ بىرتە اشىق ـ جارقىن، ۇمىتكەر بولا باستادى.
قازىر موۋ جياڭيۇڭ ەكى اعاسىمەن بىرگە اتىزعا بارىپ جۇمىس ىستەپ، وتباسىنىڭ 40 مۋ جەرىن باپتاپ، 150 تۇياق قوي باعىپ، تۇرمىستارى كۇننەن - كۇنگە جاقسارىپ كەلەدى.
”بالا كەزىمدە اكە ـ شەشەم ماعان قارايلاساتىن، ەندى ەرجەتتىم، 2 اعاممەن بىرگە، ٴسوز جوق، جاقسى ىستەپ، اكە ـ شەشەمىزدىڭ تىرشىلىگىنىڭ سوڭعى شاعىن باقىتتى وتكىزۋىنە مۇمكىندىك جاسايمىز“، - دەدى موۋ جياڭيۇڭ.
3 اقىلدى ۇلىنا قاراپ، ايگۇلدىڭ جۇزىنەن كۇلكى ەستى. ول: ”مەن جياڭيۇڭدى ٴوز بالامداي كورىپ كەلەمىن“، - دەدى.
