مەن پارتيانىڭ مەيىر - شاپاعاتىندا ەسەيىپ -ەرجەتتىم ۇلتتار ىنتىماعى ماعان كۇش - قۋات سيلادى
توقسۋ اۋداندىق ساياسي كەڭەس پارتيا باسشىلىق گرۋپپاسىنىڭ شۋجيى، ورىنباسار ءتوراعا نۇرنيسام تەلىپ
مەن توقسۋدىڭ وزىندە تۋىپ - ءوستىم، بالا كەزىمىزدە ۇيدە ادام كوپ، كىرىس از ەدى، ءبىر ۇيدەگى 8 جان جالعىز اكەمنىڭ ەڭبەكاقىسىنا سۇيەنىپ كۇنەلتۋشى ەدىك، كۇندەرىمىز تارشىلىقپەن ءوتىپ جاتاتىن. بالا كەزىمىزدەن باستاپ اكەمىز بىزگە ءار ۇلت ءبىر وتباسىنىڭ ادامى، مەملەكەتتە ءبىر تۇتاس قولدانىلاتىن ءتىلدى يگەرۋ قارىم - قاتىناس جاساۋعا، ارالاسۋعا پايدالى بولىپ قانا قالماستان، كەلەشەكتە قىزمەت تابۋعا دا جەڭىل بولادى دەپ تاربيە بەرەتىن. ءبىزدىڭ ۇيدەگى اعا - ءىنى، اپەكە - سىڭلىلەرىمىز كىشكەنتايىمىزدان شاعىن اۋماقتاعى حانزۋ، حۇيزۋ بالالارمەن بىرگە ۇيرەنىپ، بىرگە وينايتىنبىز، شولدەپ، قارنىمىز اشقاندا قايسى كورشىنىڭ ۇيىنە بارساق تا ءشولىمىز قانىپ، قارنىمىز تويىپ قايتاتىنبىز، ارامىزدا ەشقانداي كىربەڭدىك بولماۋشى ەدى. ۇنەمى بىرگە وينايتىندىقتان، ءبارىمىز مەملەكەتتە ءبىر تۇتاس قولدانىلاتىن تىلدە جاتتىق سويلەي الاتىنبىز.
وسى كۇنگە دەيىن ءالى ەسىمدە، كىشكەنە كەزىمدەگى بىرگە وينايتىن سەرىگىم جياڭ شينحۋانىڭ شەشەسىنىڭ اتى ياڭ گۇيفاڭ بولاتىن، ءبىز ءبىر توپ بالا تۇگەلدەي ونى ياڭ اپاي دەپ اتاۋشى ەدىك. ءبىزدىڭ ەكى ءۇيدىڭ ەسىگىنىڭ الدىندادا ۇلكەن تۇت اعاشى بار بولاتىن، ياڭ اپايدىڭ ءۇيىنىڭ ەسىگىنىڭ الدىنداعى تۇت اعاشى قارا ءتۇستى تۇت جەمىسىن بەرەتىن دە، ءبىزدىڭ ءۇيدىڭ ەسىگىمىزدىڭ الدىنداعى تۇت اعاشى اق ءتۇستى تۇت جەمىسىن بەرەتىن. ءار جىلى جاز كىرىسىمەن ءبىز ءبىر توپ بالا تۇت جەمىسىنىڭ تەزىرەك پىسۋىنا اسىعۋشى ەدىك. 5 - اي كەلىسىمەن ابدەن پىسقان تۇت جەمىسىنىڭ اعى مولدىرەپ، قاراسى جالتىراپ تۇراتىن، ۇلكەندەۋ بالالار اتا - اناسى بايقاماعان كەزدە اعاشقا شىعىپ تۇت جەمىسىن ءۇزىپ جەيتىن، كىشكەنە بالالار تەك كوزىمىز باقىرايىپ، سىلەكەيىمىز شۇبىرىپ قاراپ تۇرۋشى ەدىك. شەشەم ۇيدەن ءبىر توسەك جاپقىش الىپ شىعاتىن دا، بىرنەشە بالا بۇرىش - بۇرىشىنان ۇستاپ تۇرعاندا، شەشەم اعاش بۇتاعىنان ۇستاپ سىلكىپ قالعاندا، ەزىلىپ پىسكەن تۇت جەمىستەرى ساۋلاپ تۇسەتىن. جاسىل اعاش ساياسىندا ياڭ اپاي ۇيىنەن كامپيت، پراندىك الىپ شىقسا، شەشەم ساڭزى، بالكۇلشە الىپ شىعاتىن دا، ۇلكەن كىسىلەر مەن بالالار ۇستەلدى قورالاي تۇت جەمىسىن جەپ، بالكۇلشەدەن اۋىز ءتيىپ وتىراتىن، سول كورىنىستى ءالى كۇنگە دەيىن ۇمىتا المايمىن. كەيىن جياڭ شينحۋا قىزمەتكە قاتىناستى، مەن دە ىلگەرىندى - كەيىندى اۋىلعا (قالاشىق)، اۋدانعا توتە قاراستى ورگاندا، ورىندا قىزمەت ىستەدىم، قىزمەت قاربالاستىعىمەن كەزدەسۋىمىز كوپ بولمادى، دەسەدە اندا - ساندا تەلەفوندا ۋادەلەسىپ، بىرگە تاماقتانىپ، اڭگىمە دۇكەنىن قۇرۋشى ەدىك، مەنىڭ جياڭ شينحۋامەن بالا كەزدەگى ورناتقان دوستىعىم بارعان سايىن تەرەڭدەي ءتۇستى، ءبىزدىڭ دوستىق گۇلىمىز تيانشاننىڭ قارعالداعىنداي پاك تە كىرشىكسىز بولىپ، ماڭگى اشىلىپ تۇرا بەردى.
2008 - جىلى مەن اۆتونوميالى رايوندىق حالىق شيپاحاناسىنا اۋرۋ كورسەتۋگە بارىپ، دەنساۋلىق تەكسەرۋ بارىسىندا باس سەسترا ليۋ دۇڭمەيمەن تانىستىم. تەكسەرۋ اياقتاعان سوڭ توقسۋعا قايتتىم، ءبىر اپتادان كەيىن شيپاحاناداعىلار تەلەفون شالىپ، اۋرۋىمنىڭ جاعدايى كۇردەلى ەكەنىن، تاعى كەلىپ قايتالاي تەكسەرۋىم كەرەكتىگىن ايتتى. تەلەفوندى تىڭداپ بولعان سوڭ باسىم زەڭىپ، تالاي ۋاققا دەيىن ەسىم شىعىپ ءجۇردى. مەن جاڭا تانىسقان باس سەسترا ليۋ دۇڭمەيگە تەلەفون شالدىم، تەلەفوننىڭ ارعى باسىنداعى ليۋ دۇڭمەي كوڭىلىمدى اۋلاپ: ”الاڭداما، قازىر ەمدەۋ تەحنيكاسى سونشا كەمەلدى تۇرسا، ونىڭ ۇستىنە اۋرۋ انىقتالىپ بولعان جوق، الاڭسىز كەلىپ تەكسەرىلىپ كور“، - دەدى. مەنىڭ قوبالجىعان كوڭىلىم لەزدە ساباسىنا ءتۇستى. سوڭىنان مەن پويەزبەن تۇندەلەتىپ ۇرىمجىگە تارتتىم. مەن قالجىراعان بەتى اۆتونوميالى رايوندىق حالىق شيپاحاناسىنىڭ قاقپاسىنا جەتكەنىمدە، ويلاماعان جەردەن باس سەستىرا ليۋ دۇڭمەي مەنى كۇتىپ تۇر ەكەن، سول ساتتە ءوز جان اشىر جاقىنىمدى كورگەندەي بولدىم. كەيىن ءار جىلعى تەكسەرۋدە مەن ۇنەمى باس سەستىرا ليۋ دۇڭمەيدى كورەتىن بولدىم، ول ءار جولى مەنى ىقىلاسپەن كۇتىپ الىپ، بار زەيىنىمەن قارايلاسىپ ءجۇردى. 2017 - جىلى نەمەرەم اۆتونوميالى رايوندىق حالىق شيپاحاناسىنا اۋرۋ كورسەتۋگە بارىپ، تاعى دا باس سەسترا ليۋ دۇڭمەيدىڭ تۋىسقانداي قامقورلىعىندا بولدى، مەن قاتتى اسەرلەندىم. قازىرگە دەيىن حابارلاسىپ، ءوزارا كوڭىل ءبولىپ جۇرەمىز، ءبىر ءۇيدىڭ ادامى بولماساق تا، ءبىر ءۇيلى جاننان ارتىقپىز.
باسىپ وتكەن نەشە ون جىلدىق جولىما قايىرىلا قاراعانىمدا، پارتياعا شىن جۇرەكتەن العىس ايتامىن، پارتيانىڭ باۋلۋى مەن قامقورلىعىندا مەن ءبىر قاراپايىم جۇمىسشىنىڭ بالاسىنان بىرتىندەپ ەسەيىپ، اۋدان دارەجەلى پارتيالى باسشى كادر بولىپ جەتىلدىم. بيىل جاڭا جۇڭگو قۇرىلعاندىعىنىڭ 70 جىلدىعى، وتانىمىزدا جەر - كوكتى ءدۇر سىلكىندىرگەن وزگەرىستەر بولدى، مەنىڭ اتا مەكەنىمدە دە وراسان زور وزگەرىستەر تۋىلدى، سىرت جەرلەرگە جۇمىس ىستەپ ورالعان ادامدار اتا مەكەنىمىزدىڭ وزگەرىسىنە تاڭداي قاقپاي تۇرا المايدى. ءار ۇلت باۋىرلاستار ەتەنە سيلاسىپ، ءبىر - بىرىنە دەمەۋشى بولىپ، ءبىر وتباسىنىڭ ادامىنداي وتۋدە، مۇنىڭ ءبارى پارتيانىڭ دانا دا ۇلى باسشىلىعىنىڭ ارقاسى، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ ابزال ساياساتىنىڭ ارقاسى. بۇگىنگى كۇندە تۇرمىس كەشىرىپ جاتقان بىزدەر باقىتتىمىز، كوڭىلدىمىز. ءبىز ماڭگى پارتياعا العىس ايتامىز، پارتيانىڭ سوزىنە قۇلاق اسامىز، پارتياعا ىلەسەمىز!
