تيانشان تورى - شينجياڭ گازەتىنىڭ ءتىلشىسى گان شيڭحۋا
6 - ايدىڭ 12 - كۇنى، وتباسى ارالاپ جاعداي ۇعىسىپ جۇرگەن ما ليلي تاجىگۇل مامەت اجەيدىڭ تەلەفونىن قابىلدادى، ”قىزىم، ەكى كۇننەن بەرى قاتتى ىسىپ كەتتى، كوبىرەك سۋ ءىش، ىستىق وتكىزىپ الما...“ تەرگە مالشىنعان ما ليلي مۇنى ەستىپ جىميا كۇلدى.
ما ليلي ءۇرىمجى قالالىق قوسىننان شەگىنگەن اسكەريلەر ىستەرى مەكەمەسىنىڭ حيجياشان اۋماعى حيجياشان ارتقى كوشەسى الەۋمەتتىك اۋماعىندا تۇراتىن ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ مۇشەسى. بيىل 1 - ايدىڭ باسىندا الەۋمەتتىك اۋماققا كەلگەننەن كەيىن، وتباسىن ارالاپ جاعداي ۇعىسىپ ءجۇرىپ، 80 جاستاعى جالعىز تۇراتىن تاجىگۇل اجەيدىڭ جۇرەك، جوعارى قان قىسىم اۋرۋى بار ەكەنىنەن حابار تاۋىپ، وعان كوبىرەك كوڭىل ءبولدى.
”تاجىگۇل اجەيگە تۇڭعىش امانداسا بارعاندا ىڭعايسىز كۇيگە تۇسكەنىم ءالى ەسىمدە، سول كەزدە ماعان ەسىك اشىپ بەرگەننەن كەيىن توسەككە بارىپ جاتا قالدى، مەن سويلەسەم دە قارامادى“. الەۋمەتتىك اۋماققا قايتقاننان كەيىن، ونىڭ توسەكتە ءبۇرىسىپ جاتىپ، كۇرس - كۇرس جوتەلگەن بەينەسى ويىنا ورالا بەردى.
ما ليلي ماتەريالدان تاجىگۇلدىڭ باستابىندا ءۇرىمجى قالاسى يۋەجينجيە كوشەسىنىڭ ماڭىندا تۇراتىنىن ۇعىستى، بۇرىن ءوزى دە سول ماڭدا بىرنەشە جىل تۇرمىس كەشىرگەن ەدى.
تاجىگۇل اجەيگە قايتا امانداسا بارعاندا، ما ليلي ونىمەن ءبىر كەزدەردە بىرگە تۇرعان جەرى تۋرالى اڭگىمەلەستى. ”ەسىمدە قالۋىنشا، ول جەردىڭ جولدارى تار ەدى، وتكەن عاسىردىڭ 90 - جىلدارىندا، دۇڭساي باقشاسى بار بولاتىن، مەن ۇنەمى بارىپ كوكونىس ۇزەتىنمىن...“ ”ءبىزدىڭ ۇيدەگىلەر دە سول جەردەن كوكونىس اكەلەتىن“ ... ورتاق تۇرمىس كەشىرمەلەرى قارت اجەيدىڭ اڭگىمەسىنىڭ تيەگىن اعىتتى. اجەي ما ليليدى كورگەن جەردەن وتكەندى ەسكە الىپ اڭگىمە دۇكەن قۇراتىن. كەيىن ما ليليدىڭ ايتقانىنا كونىپ، ۇنەمى سىرتقا شىعىپ، كۇنگە شۋاقتالىپ، توڭىرەكتەگى كورشىلەرمەن كەڭەس قۇراتىن بولدى.
6 - ايدىڭ 12 - كۇنى تۇستە، ما ليلي ءۇرىمجى قالاسى تيانشان رايونى حيجياشان اۋماعى حيجياشان ارتقى كوشەسى الەۋمەتتىك اۋماعىنداعى تاجىگۇل مامەتتىڭ ۇيىندە، اجەيدىڭ شاشىن تاراپ بەردى. سۋرەتتى تيانشان تورى - شينجياڭ گازەتىنىڭ ءتىلشىسى گان شيڭحۋا تۇسىرگەن
5 - ايدىڭ باسىنداعى ءبىر كۇن ەدى، تاجىگۇل اجەي سىرقاتتانىپ قالىپ، ما ليليگە تەلەفون شالادى. ما ليلي دەرەۋ اۆتوكولىگىمەن اجەيدى شيپاحاناعا جەتكىزىپ، ءنومىر الىپ، اقى تاپسىرىپ تىنىم تاپپادى.
”اجەيدىڭ قان قىسىمى جوعارىلاعان، جاقسى تىزگىندەمەسە، شيپاحاناعا جاتىپ ەمدەلۋىنە تۋرا كەلەدى، ونداي كەزدە جاقىن تۋىسقانى قول قويىپ، قاسىندا بولۋى كەرەك“ شيپاگەردىڭ ءسوزىن ەستىگەن تاجىگۇلدىڭ كوزىنە جاس كەلدى، ونىڭ جۇبايى مەن قىزى كوپ جىلدىڭ الدىندا بىرىنەن سوڭ ءبىرى دۇنيەدەن وتكەن ەدى، بۇل دۇنيەدە قازىر ەش تۋىسى جوق. ”تاجىگۇل اجەي، ۋايىمداماڭىز، مەن بار عوي، مەن سىزگە قارايلاسامىن...“ ما ليليدىڭ بۇل ءسوزىن ەستىگەننەن كەيىن، جالعىزىلىك قارت اجەيدىڭ كوڭىلى بوساپ، كوز جاسىنا ەرىك بەردى.
ءدارىنى ۋاعىندا تۇتىنعاندىقتان شيپاحاناعا جاتپايتىن بولدى، ءبىراق كۇندە ۋاقتىلى ءدارى ءىشۋى كەرەك، ما ليلي ىرىقتىلىقپەن قاداعالاپ، اجەيگە ۋاعىندا ءدارى ءىشۋدى ەسكەرتىپ تۇردى. وسىدان كەيىن، ما ليلي تاجىگۇل اجەيدىڭ جاقىن جاناشىرى بولدى. ”قىزىم، ساعان لاڭمان سوزىپ قويدىم، تەز كەلىپ جە...“ ”قىزىم، كورشىم ماعان ساڭزى اكەلىپ بەردى، كەلىپ ءدامىن تات...“ ما ليلي ءار رەت تاجىگۇل اجەيدىڭ تەلەفونىن قابىلداعاندا ايرىقشا قۋانادى، دەمالىس ۋاقىتىنان پايدالانىپ، تاعام ماتەريالدارى سالىنعان ۇلكەن - كىشى دوربالارىن الىپ قىزمەتتەستەرىمەن بىرگە اجەيدىڭ ۇيىنە بارىپ تۇرادى، ءتۇرلى تاعامدار جاساپ بەرىپ، داستارقانىن تولتىرادى.
6 - ايدىڭ 12 - كۇنى، ما ليلي (سولدا) قىزمەتتەسىمەن بىرگە ءۇرىمجى قالاسى تيانشان رايونى حيجياشان اۋماعى حيجياشان ارتقى كوشەسى الەۋمەتتىك اۋماعىنداعى تاجىگۇل مامەتتىڭ ۇيىنە كەلدى، ءار جولى اجەيدىڭ ۇيىندە بولعاندا، سۋرەتكە ءتۇسۋدى ۇناتاتىن اجەيمەن بىرگە ەستەلىك قالدىرادى. سۋرەتتى تيانشان تورى - شينجياڭ گازەتىنىڭ ءتىلشىسى گان شيڭحۋا تۇسىرگەن
”بۇرىن تۋىستارىم، دوس جاراندارىم بولماعاندىقتان جالعىزسىرايتىنمىن، قىزىم مەن ونىڭ قىزمەتتەستەرى ۇنەمى كەلىپ حال - جاعدايىمدى ءبىلىپ، ماعان كوڭىل ءبولىپ، كوڭىلىمدى جىلىتتى“. قازىر، شاعىن رايوندا ”ۇعىسۋ، تيىمدىلىك جاساۋ، توعىستىرۋ“ قىزمەت اترەتىنىڭ مۇشەلەرىن كورسە بولدى، تاجىگۇل ءوزى بارىپ امانداسادى.
ما ليلي: ”ءار رەت تاجىگۇل اجەيدىڭ ’قىزىم قاربالاستايمىن دەپ ءجۇرىپ شارشاپ قالما‘، ’قىزىم قايداسىڭ، قاربالاستىقتان بوساساڭ، ۇيگە كەل...‘ دەگەن سوزدەرىن ەستىگەندە قۋانىپ قالامىن، بۇل اجەيدىڭ مەنىڭ قىزمەتىمە ريزا بولعاندىعى، قىزمەتكە بولعان ىنتام دا اناعۇرلىم كۇشەيە ءتۇستى. ءتىپتى كوپ ادامداردىڭ قىزمەتىمىزدى قولداۋىن ءۇمىت ەتەمىن، تاجىگۇل اجەيدىڭ دە قاسىندا ءبىزدىڭ بولعانىمىزدى باقىت ساناپ، كوڭىلدى ءجۇرۋىن ءۇمىت ەتەمىن“،- دەدى.
