ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ تاياۋدا تاماقتانۋداعى ىسىراپشىلدىقتى تەجەۋ جونىندە ماڭىزدى نۇسقاۋ بەردى. ول بىلاي دەپ اتاپ كورسەتتى: قازىرگى ىسىراپشىلدىق قۇبىلىسى جان تۇرشىكتىرەدى، كىسىنى اشىندىرادى! «داستارقان باسىندا وتىرىپ تاماق ىشكەندە، ءار ءتۇيىر ءداننىڭ ماڭداي تەرمەن كەلگەنىن ەستەن شىعارماۋ كەرەك». ەلىمىز استىق وندىرىسىندە جىل سايىن مول ءونىم الىپ وتىرعانىمەن، استىق حاۋىپسىزدىگى جونىندە قاي - قاشان دا حاۋىپ - قاتەر تانىمىن ۇستانۋىمىز كەرەك، بيىلعى دۇنيە جۇزىندە تۋىلعان جاڭا تيپتى ايدارشا ۆيرۋس وكپە قابىنۋ ىندەتىنىڭ ىقپالى بىزگە ساقتىق دابىلىن قاقتى.
شي جينپيڭ مىنالاردى دارىپتەدى: زاڭ شىعارۋدى، باقىلاپ - باسقارۋدى كۇشەيتىپ، ۇتىمدى شارالار قولدانىپ، باياندى مەحانيزم ورناتىپ، تاماقتانۋداعى ىسىراپشىلدىقتى باتىل تەجەۋ كەرەك. ۇگىت - تاربيەنى اناعۇرلىم كۇشەيتىپ، ۇنەمشىلدىك ادەتىن شىنايى جەتىلدىرىپ، بۇكىل قوعامدا ىسىراپشىلدىق − نامىس، ۇنەمشىلدىك − داڭق دەيتىن اۋقىم قالىپتاستىرۋ كەرەك.
شي جينپيڭ استىق حاۋىپسىزدىگى مەن «ۇنەمشىل بولۋ، ىسىراپشىلدىققا قارسى تۇرۋ» سىندى قوعامدىق سالتتى دارىپتەۋگە باستان - اياق باسا ءمان بەرىپ كەلەدى، تاماقتانۋداعى ىسىراپشىلدىقتى تەجەۋدى تالاي رەت دارىپتەگەن بولاتىن. 2013 - جىلى 1 - ايدا شي جينپيڭ ماڭىزدى نۇسقاۋ بەرىپ، ۇنەمشىل بولۋدى، ىسىراپشىلدىققا قارسى تۇرۋدى تالاپ ەتتى. وسىدان كەيىن شي جينپيڭ تاعى دا تالاي رەت ماڭىزدى نۇسقاۋ بەرىپ، بەرىك تۇزىمدىك شەكتەمە قولدانىپ، ءتۇزىمدى قاتاڭ اتقارىپ، باقىلاۋ - تەكسەرۋدى پارمەندى جۇرگىزىپ، قاتاڭ جازالاۋ مەحانيزمىن ىسكە قوسىپ، ۇكىمەت اقشاسىمەن تۇتىنۋداعى ءتۇرلى بەلگىلەمەگە، تارتىپكە، زاڭعا قايشى قۇبىلىستاردى شىن مانىندە تەجەۋدى تالاپ ەتتى ءارى ءبىر ءبولىم مەكتەپتەردە ازىق - تۇلىك ىسىراپشىلدىعى بايقالۋ جانە وقۋشىلاردىڭ ۇنەمشىلدىك تانىمى جەتەرسىز بولۋ ماسەلەسىنە قاراتا، جەتەكشىلىك ەتۋ مەن باسقارۋدى شىنايى كۇشەيتۋ، وقۋشىلاردا قاجىرلى، ۇنەمشىل بولۋ سىندى تاماشا ءمورال جەتىلدىرۋ جونىندە ايقىن تالاپتار قويدى.
پارتيانىڭ 18 - قۇرىلتايىنان بەرى جەر - جەر، تاراۋلار شي جينپيڭنىڭ ماڭىزدى نۇسقاۋىنىڭ رۋحىن دايەكتى تياناقتاندىرىپ، قاتىستى قۇجاتتاردى شىعارۋ، «ىدىستاعى تاماقتى تاۋسىپ جەۋ» ارەكەتىن ورىستەتۋ سياقتى شارالاردى قولدانىپ، ىسىراپشىلدىق ستيلىن زور كۇشپەن وڭادى، داستارقانداعى ىسىراپشىلىق قۇبىلىسىندا بەلگىلى دارەجەدە وڭ وزگەرىس بولدى، اسىرەسە، بۇقارانىڭ اڭىسى كۇشتى بولعان ۇكىمەت اقشاسىمەن تاماقتانۋداعى ىسىراپشىلىق ارەكەتى ءونىمدى تەجەلدى. سونىمەن بىرگە، كەي جەرلەردە تاماقتانۋداعى ىسىراپشىلدىق قۇبىلىسى ءالى دە ورىن تەۋىپ وتىر، قاتىستى تاراۋلار شي جينپيڭنىڭ ماڭىزدى نۇسقاۋىنىڭ رۋحىن دايەكتى تياناقتاندىرىپ، ءتىپتى دە پارمەندى شارالاردى بەلگىلەپ، اتقارىپ، بۇكىل قوعامنىڭ تاماقتانۋداعى ىسىراپشىلدىقتى تەجەۋ قىزمەتىن ىشكەرىلەي ىلگەرىلەتۋدە.
