شي جينپيڭ تەلەفوندا جەكە - جەكە برازيليانىڭ زۇڭتۇڭىمەن، قازاقستاننىڭ زۇڭتۇڭىمەن، پولشانىڭ زۇڭتۇڭىمەن سويلەستى
مەملەكەت ءتوراعاسى شي جينپيڭ 3 - ايدىڭ 24 - كۇنى كەشتە ۇسىنىس بويىنشا برازيليانىڭ زۇڭتۇڭى بولسونارومەن تەلەفوندا سويلەستى.
شي جينپيڭ جۇڭگو ۇكىمەتى مەن جۇڭگو حالقى اتىنان برازيليا ۇكىمەتىنەن جانە برازيليا حالقىنان جاڭا تيپتى ايدارشا ۆيرۋس وكپە قابىنۋ ىندەتىنە قارسى تۇرۋ بايلانىسىمەن شىنايى حال سۇرايتىندىعىن جانە باتىل قولدايتىندىعىن ءبىلدىردى. شي جينپيڭ مىنالاردى اتاپ كورسەتتى: جۋىقتان بەرى ىندەت بۇكىل جەر شارىنداعى كوپ جەردە تۋىلىپ، وتە تەز تارالدى. ءار ەلدىڭ سەلبەستىكتى كۇشەيتۋى كەزەكتەگى كەزەك كۇتتىرمەيتىن جۇمىس. جۇڭگو جاق باستان - اياق ادامزات تاعدىرلاس ورتاق تۇلعا ۇستانىمىنان جازباي، اشىق، جاريا، جاۋاپكەرشىلىكتە بولۋ پوزيتسياسىمەن ىندەت ينفورماتسيالارىن دەر كەزىندە جاريالاپ، دۇنيە جۇزىلىك دەنساۋلىق ساقتاۋ ۇيىمىمەن جانە حالىقارالىق قوعاممەن ساقتانۋ - تىزگىندەۋ، ەمدەۋ تاجىريبەلەرىن ەش بۇكپەسىز ورتاق پايدالاندى ءارى ءار جاقتى مۇمكىندىگىنشە كومەكپەن قامدادى. مەن برازيلياداعى ىندەتتىڭ دامۋ جاعدايىنا قاداعالاي نازار اۋدارىپ وتىرمىن، برازيليا جاقتىڭ ىندەتتىڭ تارالۋىن ەرتەرەك تىزگىندەۋىن ءۇمىت ەتەمىن. بۇگىن جۇڭگو برازيليانى قامتىعان لاتىن امەريكاسى جانە كارايب ەلدەرىمەن بەينەجازبا قىزمەت ءماجىلىسىن اشىپ، ىندەتتەن ساقتانۋ - تىزگىندەۋ جونىندە پىكىر اۋىستىردى. جۇڭگو جاق برازيليا جاققا قولىنان كەلگەنىنشە كومەك بەرىپ، ىندەتتىڭ دۇنيە ءجۇزى كولەمىندە تارالۋىنان ساقتانۋعا كۇش قوسۋدى قالايدى.
شي جينپيڭ مىنالاردى باسا دارىپتەدى: جۇڭگو ىندەتكە قارسى تۇرۋدا وراسان زور بوداۋ بەرىپ، حالىقارالىق قوعام ءۇشىن قىمباتتى ۋاقىت ۇتتى، حالىقارالىق قوعام بۇل جونىندە الدەقاشان ءادىل پىكىرىن ايتىپ وتىر. جۇڭگو - برازيليا ەكى ەل ءوزارا جالپى بەتتىك ستراتەگيالىق سەرىكتەر. ەكى جاق ستراتەگيالىق تاباندىلىقتى ساقتاپ، ءبىر - ءبىرىنىڭ وزەكتى مۇددەسى مەن ءجىتى قاداعالاپ وتىرعان كەلەلى ىستەرىن قولداپ، بىرگە حالىقارالىق قوعامعا ىنتىماقتى، ءبىر اۋىزدى ءۇن شىعارىپ، قول ۇستاسا ىندەتكە توتەپ بەرۋدىڭ بەلسەندى سيگنالىن جەتكىزۋى، سونىمەن بىرگە ءتۇرلى سالاداعى ناقتى سەلبەستىكتى ىلگەرىلەتىپ، 20 ەل توبى، بريكس ەلدەرى، ت.ب كوپ جاقتى جۇلگەدەگى بايلانىستى جانە سەلبەسۋدى كۇشەيتىپ، جۇڭگو - برازيليا جالپى بەتتىك ستراتەگيالىق سەرىكتەستىك قارىم - قاتىناسىن بىرگە جاقسى قورعاۋى، جاقسى دامىتۋى كەرەك. مەن جۇڭگو - برازيليا ەكى ەلدىڭ، ءسوز جوق، قول ۇستاسا ىندەتتى جەڭەتىندىگىنە، سونداي - اق جۇڭگو مەن برازيليانىڭ جان - جاقتى سەلبەستىگىنىڭ ۇزدىكسىز تىڭ ساتىعا كوتەرىلۋىن ىلگەرىلەتەتىندىگىنە سەنەمىن.
بولسونارو مىنالاردى ءبىلدىردى: قازىر جاڭا تيپتى ايدارشا ۆيرۋس وكپە قابىنۋ ىندەتىنىڭ برازيليادا ءورشۋ بەتالىسى جارىققا شىعۋدا. برازيليانىڭ جۇڭگودان قاجەتتى ەمدەۋ زاتتىق ماتەريالدارىن ساتىپ الۋىنا جۇڭگو جاقتىڭ قولايلىلىقتار جاساعاندىعىنا برازيليا جاق العىس ايتادى، جۇڭگو جاقپەن ساقتانۋ - تىزگىندەۋ تاجىريبەلەرىن اۋىستىرۋدى كۇشەيتىپ، ىندەتكە بىرگە قارسى تۇرىپ، ەل ىشىندەگى ىندەتتىڭ تارالۋىن تەز ارادا تىزگىندەۋدى ءۇمىت ەتەدى. مەن ۇلى جۇڭگو حالقىنا قۇرمەت بىلدىرەمىن، سونداي - اق برازيليا - جۇڭگو دوستىعىنىڭ جانە برازيليا - جۇڭگو جالپى بەتتىك ستراتەگيالىق سەرىكتەستىك قارىم - قاتىناسىنىڭ مىزعىمايتىندىعىن قايتالاي دارىپتەيمىن. برازيليا جاق جۇڭگو جاقپەن ەكى جاقتى سەلبەستىكتى كۇشەيتۋدى، سونداي - اق 20 ەل توبى، ت.ب كوپ جاقتى جۇلگەدەگى بايلانىستى، سايكەسۋدى كۇشەيتىپ، ىندەتكە قارسى تۇرۋ جانە ەكونوميكانى قالپىنا كەلتىرۋ ءۇشىن ءتيىستى رولىن ساۋلەلەندىرۋدى قالايدى.
شينحۋا اگەنتتىگىنىڭ 3 - ايدىڭ 24 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 3 - ايدىڭ 24 - كۇنى كەشتە قازاقستاننىڭ زۇڭتۇڭى توقايەۆپەن تەلەفوندا سويلەستى.
شي جينپيڭ مىنالاردى اتاپ كورسەتتى: بۇل رەتكى جاڭا تيپتى ايدارشا ۆيرۋس وكپە قابىنۋ ىندەتى سۇراپىل ارىنمەن كەلىپ، ءار ەل جونىنەن تۇگەلدەي ءبىر رەتكى ۇلكەن سىناق بولدى. جۇڭگونىڭ ىندەتتەن ساقتانۋ - تىزگىندەۋ جاعدايى ەڭ ماشاقاتتى ساتتە، قازاقستان ۇكىمەتى مەن ءار سالاسى جۇڭگونى ايرىقشا قولدادى. قازىر قازاقستاندا دا ىندەتتىڭ ءورشۋ بەتالىسى جارىققا شىقتى. زۇڭتۇڭ مىرزانىڭ باستاۋىندا، قازاقستان تەز ارادا باتىل شارا قولدانىپ، جالپى حالىققا جاۋاپتى بولۋ پوزيتسياسىن ايگىلەدى، جۇڭگو جاق مۇنى وسكەلەڭ باعالايدى. دوس كورشى ەل جانە ماڭگىلىك جالپى بەتتىك ستراتەگيالىق سەرىك رەتىندە، جۇڭگو جاق قازاقستاننىڭ قازىرگى جاعدايىن تەرەڭ سەزىنىپ وتىر، بەلسەنە قولداۋ جانە كومەك كورسەتەدى. جۇڭگو مەن قازاقستاننىڭ ءوزارا قولداۋى ەكى ەل قارىم - قاتىناسىنىڭ جوعارى ورەسى مەن وزگەشەلىگىن ايگىلەپ، حالىقارالىق قوعامنىڭ ىندەتكە سەلبەسە قارسى تۇرۋىنا ۇلگى كورسەتتى.
شي جينپيڭ بىلاي دەپ باسا دارىپتەدى: ۆيرۋستا مەملەكەت شەكاراسى بولمايدى، ىندەت ناسىلگە بولىنبەيدى. وسى ءبىر الەمدىك الەۋمەتتىك دەنساۋلىق ساقتاۋ داعدارىسىنا توتەپ بەرۋ بارىسىندا، ادامزاتتىڭ تاعدىرلاس ورتاق تۇلعاسىن قۇرۋدىڭ كوكەي تەستىلىگى مەن ماڭىزدىلىعى اناعۇرلىم كورنەكتىلەندى. ىنتىماقتاسا سەلبەسىپ، تىزە قوسا توتەپ بەرگەندە عانا، حالىقارالىق قوعام ىندەتتى جەڭىپ، ادامزاتتىڭ ورتاق مەكەنىن قورعاي الادى. جۇڭگو جاق قازاقستاندى قامتىعان دۇنيە جۇزىندەگى ءار ەلمەن بىرگە ىندەتكە قارسى تۇرۋدىڭ حالىقارالىق سەلبەستىگىن كۇشەيتىپ، الەمدىك الەۋمەتتىك دەنساۋلىق ساقتاۋ حاۋىپسىزدىگىن بىرگە قورعاۋدى قالايدى. ىندەت − ۋاقىتشا، سەلبەستىك − ۇزاق ۋاقىتتىق. ىندەت جۇڭگو - قازاقستان سەلبەستىگىنە سىن - سايىس اكەلدى، سونداي - اق تىڭ ورايلاردى دا ازىرلەدى. جۇڭگو - قازاقستان ساياسي جاقتاعى ءوزارا سەنىمدىلىكتى مىزعىماستان تەرەڭدەتىپ، سيفرلى ەكونوميكا، ەمدەۋ - دەنساۋلىق ساقتاۋ سياقتى سالالارداعى سەلبەستىكتى كەڭەيتىپ، جۇڭگو - قازاقستان قارىم - قاتىناسىنىڭ جاڭا ارتۋ ءتۇيىنىن قالىپتاستىرۋ كەرەك. بوران - شاشىننان كەيىن جۇڭگو - قازاقستان ”ءبىر بەلدەۋ، ءبىر جولدى“ بىرگە قۇرۋدا، ءسوز جوق، اناعۇرلىم كوپ جەتىستىكتەرگە قول جەتكىزەتىندىگىنە سەنەمىن.
توقايەۆ مىنالاردى ءبىلدىردى: ءتوراعا مىرزانىڭ دانىشپان باسشىلىعىندا جۇڭگو حالقى ىندەتتەن ساقتانۋ - تىزگىندەۋ جاعىندا كورنەكتى تابىستارعا قول جەتكىزىپ، دۇنيە جۇزىندەگى ءار ەل حالقىنا سەنىم جانە ءۇمىت سيلادى. بۇكىل دۇنيە ءجۇزى جۇڭگونىڭ ەمدەۋ جۇيەسىنىڭ اسا جوعارى دەڭگەيىن جانە جۇڭگونىڭ ەمدەۋ قىزمەتكەرلەرىنىڭ كاسىبىن وسكەلەڭ قۇرمەتتەيتىندىگىن ءوز كوزدەرىمەن كوردى، جۇڭگو كۇردەلى دە قيىن سايىستارعا توتەپ بەرۋدەگى جوعارى ءونىمدى جونگە سالۋ قابىلەتىن تاعى ءبىر رەت ايگىلەدى. قازاقستان جاق مۇنى ايرىقشا باعالايدى ءارى قۇتتىقتايدى. قازىر جاڭا تيپتى ايدارشا ۆيرۋس وكپە قابىنۋ ىندەتى دۇنيە ءجۇزى كولەمىندە ورشۋدە، قازاقستان دا ءوزىنىڭ عانا قامىن ويلامايدى. قازاقستان جاق جۇڭگو جاقپەن سەلبەستىكتى كۇشەيتىپ، ىندەتتى تەز ارادا جەڭىپ شىعۋدى ءۇمىت ەتەدى. قازاقستان جاق قازاقستان مەن جۇڭگونىڭ ماڭگىلىك جالپى بەتتىك ستراتەگيالىق سەرىكتەستىك قارىم - قاتىناسىن تەرەڭدەتىپ، ”ءبىر بەلدەۋ، ءبىر جولدى“ بىرگە قۇرۋدى ىلگەرىلەتۋگە كۇش سالادى، بۇل ەكى ەل حالقىنىڭ ورتاق مۇددەسىنە بۇكىلدەي ۇيلەسەدى. قازاقستان جاق جۇڭگو جاقپەن بىرلەسكەن مەملەكەتتەر ۇيىمى، شاڭحاي سەلبەستىك ۇيىمى جۇلگەسىندەگى بايلانىس پەن سەلبەستىكتى كۇشەيتۋدى قالايدى.
شينحۋا اگەنتتىگىنىڭ 3 - ايدىڭ 24 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 3 - ايدىڭ 24 - كۇنى كەشتە پولشانىڭ زۇڭتۇڭى دۋدامەن تەلەفوندا سويلەستى.
شي جينپيڭ بىلاي دەپ اتاپ كورسەتتى: جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان كەيىن، پولشا ۇكىمەتى مەن قوعامىنداعى ءار سالا جۇڭگو جاقتان حال سۇرادى جانە قولداۋ كورسەتتى، جۇڭگو حالقى مۇنى كوكەيىندە بەرىك ساقتايدى. ناعىز سۇيىسپەنشىلىك قيىندىقتا سىنالادى. جۇڭگو جاق پولشا ۇكىمەتى مەن پولشا حالقىنىڭ ىندەتكە قارسى تۇرۋداعى قۇلشىنىسىن باتىل قولدايدى. جۇڭگو جاق تاعى پولشانى قامتىعان ورتا، شىعىس ەۆروپاداعى 17 ەلمەن دەنساۋلىق ساقتاۋ ماماندارىنىڭ بەينەجازبا ءماجىلىسىن وتكىزىپ، ىندەتتەن ساقتانۋ - تىزگىندەۋ ينفورماتسيالارىن جانە قاتىستى ادىستەردى دەر كەزىندە ورتاق پايدالاندى. جۇڭگو جاق ادامزات تاعدىرلاس ورتاق تۇلعا ۇستانىمىنان جازباي، پولشانى قامتىعان دۇنيە جۇزىندەگى ءار ەلمەن ىندەتكە قارسى تۇرۋ سەلبەستىگىن كۇشەيتۋدى، الەمدىك الەۋمەتتىك دەنساۋلىق ساقتاۋ حاۋىپسىزدىگىن بىرگە قورعاۋدى قالايدى.
شي جينپيڭ بىلاي دەپ باسا دارىپتەدى: وسى رەتكى ىندەتتى جەڭۋدە جۇڭگو حالقى بىزگە كۇش - قۋات جانە سەنىم بەردى. جۇڭگوداعى ءبىر ميلليارد 400 ميلليون حالىق تىزە قوسا سەلبەسىپ، قيىندىقتى بىلەك بىرىكتىرە جەڭىپ، ەل بىرلىگىنەن بەرىك قامال تۇرعىزىپ، سەنىمدى بەكەمدەپ، ىندەتكە قارسى قايسارلىقپەن كۇرەس جۇرگىزدى. جۇڭگوداعى قالىڭ ەمدەۋ قىزمەتكەرلەرى جان قيارلىق كورسەتىپ، باستارىن ءباي تىكتى، مۇنداي اسقاق رۋحتان توتەنشە اسەرلەندىم. حالىق قانا ناعىز قاھارمان. تەك حالىققا تىعىز سۇيەنگەندە عانا، ءبىز بارلىق قيىندىقتار مەن كەدەرگىلەردى، ءسوزسىز، جەڭىپ، جۇڭحۋا ۇلتىنىڭ ۇلى گۇلدەنۋىن ىسكە اسىرا الامىز.
شي جينپيڭ بىلاي دەپ باسا دارىپتەدى: پولشا − جۇڭگونىڭ ەۆروپا وداعىنداعى جانە ورتا، شىعىس ەۆروپا ەلدەرىندەگى ماڭىزدى سەلبەستىك سەرىگى، جۇڭگو جاق پولشا جاقپەن بىرگە جوعارى جىكتەگىلەردىڭ بارىس - كەلىسىن كۇشەيتىپ، ءوزارا تۇسىنىكتى جانە ستراتەگيالىق ءوزارا سەنىمدىلىكتى نىعايتىپ، جۇڭگو مەن پولشا قارىم - قاتىناسىنىڭ ۇزدىكسىز العا باسۋىن ىلگەرىلەتىپ، جۇڭگو ورتا، شىعىس ەۆروپا ەلدەرىنىڭ سەلبەستىگىن جانە جۇڭگو - ەۆروپا قارىم - قاتىناسىن دامىتۋعا بىرگە ماڭىزدى ۇلەس قوسۋدى قالايدى.
دۋدا مىنالاردى ءبىلدىردى: جۇڭگو جاق دەر كەزىندە باتىل، پارمەندى شارا قولدانىپ، ىندەتتىڭ ءورشۋىن ءونىمدى تەجەدى، مەن جۇڭگو حالقىنا جانە ىندەتكە قارسى تۇرعان جۇڭگونىڭ ەمدەۋ قىزمەتكەرلەرىنە سۇيىنەمىن. جۇڭگو جاقتىڭ قاتىستى تاجىريبەلەرى پولشانىڭ ۇلگى الۋىنا تاتيدى. پولشا ىندەتتىڭ قاتاڭ سايىسىنا ءدوپ كەلىپ، ەمدەۋ، قورعانۋ زاتتىق ماتەريالدارىنا ەرەكشە ءزارۋ بولۋدا. جۇڭگو جاقتىڭ دەر كەزىندە قىمباتتى كومەك كورسەتكەنىنە العىس ايتامىن، بۇل پولشا مەن جۇڭگونىڭ تەرەڭ دوستىق سۇيىسپەنشىلىگىنىڭ بەينەسى. جۇڭگونىڭ ەكونوميكالىق نەگىزى مىعىم، مەن جۇڭگونىڭ ىندەتتى جەڭىپ شىعا الاتىنىنا، اناعۇرلىم جاقسى دامۋدى ىسكە اسىراتىندىعىنا كامىل سەنىمدەمىن. پولشا جاق جۇڭگو جاقپەن ءار سالاداعى سەلبەستىكتى كۇشەيتىپ، ورتا، شىعىس ەۆروپا ەلدەرى مەن جۇڭگو اراسىنداعى سەلبەستىكتى جەبەۋگە بىرگە كۇش سالۋدى ءۇمىت ەتەدى. مەن ءتوراعا شي جينپيڭمەن دوستىعىمدى قادىرلەيمىن، ىندەت اياقتاعاننان كەيىن ەرتەرەك جۇڭگوعا ساپارلاي بارۋدى كۇتەمىن.
