مەملەكەت ءتوراعاسى شي جينپيڭ 3 - ايدىڭ 16 - كۇنى كەشتە ۇسىنىس بويىنشا يتاليانىڭ زۇڭليى كونتەمەن تەلەفوندا سويلەستى.
شي جينپيڭ بىلاي دەپ باسا دارىپتەدى: وسى ءبىر مەزگىلدە جۇڭگو مەن يتاليا جاڭا تيپتى ايدارشا ۆيرۋس وكپە قابىنۋ ىندەتىنىڭ قاتاڭ سىنىن باستان كەشىردى. نەشە ايلىق قاجىرلى قۇلشىنىستىڭ ارقاسىندا جۇڭگونىڭ ىندەتتەن ساقتانۋ - تىزگىندەۋ جاعدايىندا بەلسەندى وزگەرىس جارىققا شىعىپ، كەزەڭدىك ماڭىزدى تابىسقا قول جەتكىزدى، سونىمەن بىرگە ەكونوميكالىق، قوعامدىق دامۋى جەدەل قالپىنا كەلدى. ءبىز باستان - اياق بايسالدى بولىپ، ىندەتتى كۇنى بۇرىن جاپپاي تۇبەگەيلى جەڭۋگە كۇش سالىپ، ءار ەلدىڭ ىندەتتەن ساقتانۋ - تىزگىندەۋىنە سەنىم ۇستەيمىز.
شي جينپيڭ بىلاي دەپ اتاپ كورسەتتى: يتاليا ۇكىمەتى ىندەتكە توتەپ بەرۋدە ءبىر قىدىرۋ باتىل ساقتانۋ - تىزگىندەۋ شاراسىن قولداندى، جۇڭگو جاق مۇنى باتىل قولدايدى، يتاليا جاقتىڭ ىندەتتى جەڭەتىندىگىنە كامىل سەنەدى. ءبىز يتاليا جاقتىڭ ءزارۋ ىستەرىنە كوڭىل ءبولىپ، يتاليا جاققا ەمدەۋ ماماندار گرۋپپاسىن ۇستەمەلەپ جىبەرەمىز ءارى ەمدەۋ زاتتىق ماتەريالدارى سياقتى جاقتاردا بارىنشا كومەك كورسەتەمىز. جۇڭگو جاق يتاليا جاقپەن بىرگە ىندەتكە قارسى اتتانۋدىڭ حالىقارالىق سەلبەستىگىنە، ”سالاماتتى جىبەك جولىن“ تۇلعالاۋعا ۇلەس قوسۋدى قالايدى. وسى رەت ىندەتكە قول ۇستاسا قارسى اتتانۋ ارقىلى ەكى ەلدىڭ ءداستۇرلى دوستىعى مەن ءوزارا سەنىمنىڭ اناعۇرلىم تەرەڭدەيتىندىگىنە، جۇڭگو مەن يتاليانىڭ جان - جاقتى سەلبەستىگىنىڭ اناعۇرلىم كەڭ بولاشاقتى قارسى الاتىندىعىنا سەنەمىن.
كونتە مىنالاردى ءبىلدىردى: جۇڭگو ۇكىمەتى باتىل شارا قولدانىپ، ىندەتتى ءونىمدى تەجەدى، بۇل يتاليا سياقتى ەلدەر جونىنەن زور شابىت ءارى ۇلگى بولدى، يتاليا جاق مۇنى قۇتتىقتايدى. جۇڭگو جاقتىڭ يتاليا جاق قيىن - قىستاۋ ساتتە تۇرعاندا كورسەتكەن قىمباتتى قولداۋى مەن كومەگىنە العىس ايتادى، بۇل ەكى ەل حالقىنىڭ تەرەڭ دوستىعىن تاعى ءبىر رەت ايعاقتادى، مەن يتاليا ۇكىمەتى مەن حالقى اتىنان جۇڭگو جاققا شىن جۇرەكتەن العىس ايتامىن. ىندەتتەن كەيىن، يتاليا - جۇڭگو قارىم - قاتىناسىنىڭ، ءسوز جوق، اناعۇرلىم بەكەمدەلەتىندىگىنە سەنەمىن.
