مەملەكەت ءتوراعاسى شي جينپيڭ 1 - ايدىڭ 6 - كۇنى حالىق سارايىندا كيريباتيدىڭ زۇڭتۇڭى ماماۋمەن كەڭەس وتكىزدى.
شي جينپيڭ بىلاي دەپ اتاپ كورسەتتى: جاڭا جىل كىرىسىمەن، دۇنيە جۇزىندە ۇنامدى، ۇنامسىز حابارلار قاباتتاسىپ، ورنىقسىز، تۇراقسىز فاكتورلار كوبەيدى. زۇڭتۇڭ مىرزا بەيجيڭدە جاڭا جىلدىڭ العاشقى قارى جاۋعان ساتتە جۇڭگوعا ساپارلاي كەلدى. جۇڭگودا اقشا قار مول ءونىم جىلىنىڭ بەلگىسى دەگەن ءسوز بار. ءبىز 2020 - جىلى جۇڭگونىڭ اناعۇرلىم جاقسى داميتىندىعىنا سەنىمىمىز بار.
شي جينپيڭ بىلاي دەپ باسا دارىپتەدى: بىلتىر 9 - ايدا جۇڭگو كيريباتيمەن ءبىر جۇڭگو پرينسيبى نەگىزىندە ديپلوماتيالىق قارىم - قاتىناستى قالپىنا كەلتىرىپ، ەكى ەل قارىم - قاتىناسىنىڭ دامۋىنىڭ جاڭا تاراۋىن اشتى. زۇڭتۇڭ مىرزا مەن كيريباتي ۇكىمەتى تاريحتىڭ دۇرىس جاعىندا تۇرىپ، ستراتەگيالىق كوز ايا مەن ساياسي باتىلدىقتى تولىق ايگىلەدى، جۇڭگو مۇنى بارىنشا القايدى. ديپلوماتيالىق قارىم - قاتىناستى قالپىنا كەلتىرگەننەن بەرى، ەكى جاقتىڭ ءار سالاداعى، ءار جىكتەگى اۋىس - كۇيىسى سەلبەستىگى قارىشتاپ ورىستەتىلىپ، ءبىرتالاي العاشقى تابىستارعا قول جەتكىزدى. فاكتتەر جۇڭگو مەن كيريباتيدىڭ ديپلوماتيالىق قارىم - قاتىناستى قالپىنا كەلتىرۋىنىڭ ەكى ەل حالقىنىڭ ورتاق مۇددەسىنە ۇيلەسەتىندىگىن، ەكى ەل قارىم - قاتىناسىنىڭ دامۋ بولاشاعىنىڭ نۇرلى ەكەندىگىن دالەلدەدى. زۇڭتۇڭ مىرزانىڭ جۇڭگوداعى وسى جولعى ساپارى جۇڭگو - كيريباتي قارىم - قاتىناسىنىڭ دامۋىنداعى ماڭىزدى بەلەس. ءبىز كيريباتي جاقپەن بىرگە قۇلشىنىپ، ەكى ەل قارىم - قاتىناسىنىڭ تىڭ ساتىعا كوتەرىلىپ، اناعۇرلىم كوپ تابىستارعا جەتۋىن ىلگەرىلەتۋدى قالايمىز.
شي جينپيڭ بىلاي دەپ باسا دارىپتەدى: ەكى جاق ساياسي ءوزارا سەنىمدى تەرەڭدەتۋى كەرەك. جۇڭگو جاق ءىرى، ۇساق ەلدەردىڭ بارلىعى تەڭ، ءار ەل ءبىر - ءبىرىنىڭ يەلىك ۇقىعى مەن تەرريتوريا تۇتاستىعىنا قۇرمەت ەتىپ، تەڭ مامىلە جاساۋى كەرەك دەگەنگە تاباندى بولىپ كەلەدى. جۇڭگو بەيبىت دامۋ جولىمەن جۇرۋگە تاباندى بولادى، ”مەملەكەت قۇدىرەتتەنسە، ءسوز جوق، زورەكەرلىك ىستەيدى“ دەگەندى قۇپتامايدى، باسقا ەلدەردىڭ ىشكى ىستەرىنە كيلىكپەيدى، سونداي - اق باسقا ەلدەردىڭ دە جۇڭگونىڭ ىشكى ىسىنە كيلىگۋىنە جول بەرمەيدى. جۇڭگو جاق كيريباتي جاقتىڭ ءوزىنىڭ مەملەكەت جاعدايىنا ۇيلەسەتىن دامۋ جولىن دەربەس تاڭداۋىنا قۇرمەت ەتەدى، كيريباتي جاقپەن جوعارى جىكتەگىلەر جانە ءار دارەجەلىلەر اراسىنداعى قارىم - قاتىناستى كۇشەيتىپ، ەل باسقارۋ تاجىريبەلەرىن ءبولىسۋدى قالايدى. وسى رەتتە ەكى ەل ”ءبىر بەلدەۋ، ءبىر جول“دى بىرگە قۇرۋ تۇسىنىستىك ەسكەرتپە حاتى سياقتى حۇجاتتارعا قول قويدى، ”ءبىر بەلدەۋ، ءبىر جول“دى بىرگە قۇرۋ باستاماسىن ”كيريباتيدىڭ 20 جىلدىق دامۋ جوباسى“مەن ءتۇيىلىستىرىپ، ناقتى سەلبەستىكتى كەڭەيتۋ كەرەك. جۇڭگو جاق اناعۇرلىم كوپ جۇڭگو كاسىپورىندارىن كيريباتيدا قارجى قوسىپ شارۋاشىلىقتى گۇلدەندىرۋگە ىنتالاندىرۋدى قالايدى. جۇڭگو جاق كيريباتيدى جۇڭگو ازاماتتارىنىڭ ۇيىرمە قۇراپ شەكارادان شىعىپ ساياحاتتاپ باراتىن مەملەكەت ەتىپ بەكىتتى، ەكى جاقتىڭ گۋمانيتارلىق اۋىس - كۇيىس پەن جەرگىلىكتى سەلبەستىكتەردى كۇشەيتۋىنە بولادى. جۇڭگو جاق كيريباتيمەن بىرلەسكەن مەملەكەتتەر ۇيىمى، تىنىق مۇحيت ارال ەلدەرى تالقى مىنبەرى سياقتى كوپ جاقتى مەحانيزم اياسىندا قارىم - قاتىناس پەن سەلبەستىكتى كۇشەيتىپ، وڭتۇستىك پەن وڭتۇستىك سەلبەستىگى اياسىندا كيريباتيدىڭ كليمات وزگەرىسىنە توتەپ بەرۋىنە قولداۋ كورسەتىپ، كومەكتەسىپ، وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى.
ماماۋ مىنالاردى ءبىلدىردى: كيريباتي جاق كەدەرگىلەردى جويىپ، جۇڭحۋا حالىق رەسپۋبليكاسىمەن ديپلوماتيالىق قارىم - قاتىناستى قالپىنا كەلتىرۋدەي كەلەلى ۇيعارىم جاسادى، بۇل كيريباتيدىڭ جۇڭگوعا بولعان سەنىمى جانە نانىمى. كيربياتي مەن جۇڭگونىڭ ديپلوماتيالىق قارىم - قاتىناستى قالپىنا كەلتىرۋىنە ۇزاق بولعان جوق، ءبىراق ەكى جاقتى سەلبەستىك كورنەكتى تابىسقا قول جەتكىزدى. مەن كيريباتيدىڭ ءبىر جۇڭگو ساياساتىن تاباندىلىقپەن اتقارىپ، جۇڭگونىڭ يەلىك ۇقىعى مەن تەرريتوريا تۇتاستىعىنا قۇرمەت ەتىپ، جۇڭگونىڭ ”ءبىر ەل، ەكى ءتۇزىم“ باعىتىن قولدايتىندىعىن، جۇڭگونىڭ بىرلىككە كەلۋ ۇلى ءىسىن جۇزەگە اسىرۋىن قولدايتىندىعىن قايتالاي دارىپتەيمىن. كيريباتي جاق جۇڭگو جاقتىڭ قىمباتتى قولداۋ كورسەتكەنىنە العىس ايتادى، جۇڭگو جاقپەن ەكونوميكا - ساۋدا، قارجى قوسۋ، ساياحات، بالىق شارۋاشىلىعى، وقۋ - اعارتۋ، دەنساۋلىق ساقتاۋ، نەگىزدىك قۇرىلعى سياقتى سالالارداعى سەلبەستىكتى كۇشەيتۋدى كۇتەدى. كيريباتي جاق جۇڭگونىڭ دۇنيە ءجۇزىنىڭ بەيبىتشىلىگىن قورعاۋدا، ورتاق دامۋدى جەبەۋدە ساۋلەلەندىرگەن ماڭىزدى رولىن بارىنشا القايدى، جۇڭگونىڭ وڭتۇستىك پەن وڭتۇستىك سەلبەستىگىن كۇشەيتۋگە بەلسەنە كۇش سالىپ، كيريباتي سياقتى وركەندەپ كەلە جاتقان ورتا، ۇساق ەلدەردىڭ جەدەل دامۋىنا كومەكتەسىپ، كليمات وزگەرىسى سياقتى سىن - سايىستارعا بىرگە توتەپ بەرگەنىنە العىس ايتادى. كيريباتي جاق جۇڭگو جاقپەن بىرگە كيريباتي - جۇڭگو قارىم - قاتىناسىنىڭ ۇزدىكسىز دامۋىن ىلگەرىلەتىپ، ەكى ەل حالىقتارىن باقىتقا كەنەلتۋدى قالايدى.
كەڭەستەن كەيىن، ەكى ەلدىڭ مەملەكەت باسشىلارى ەكى ەل ۇكىمەتتەرىنىڭ ”ءبىر بەلدەۋ، ءبىر جول“ قۇرىلىسىن بىرگە ىلگەرىلەتۋ سياقتى كوپ ءتۇرلى ەكى جاقتى سەلبەستىك حۇجاتتارىنا قول قويۋعا بىرگە كۋا بولدى.
كەڭەستىڭ الدىندا، شي جينپيڭ حالىق سارايىنىڭ سولتۇستىك زالىندا ماماۋدى قارسى الۋ سالتىن وتكىزدى. پىڭ لييۋان، ياڭ جيەچى، جي بيڭشۋان، ۋاڭ ي، حى ليفىڭ، ليۋ شينچىڭ قاتارلىلار قاتىناستى.
