جاڭا جىل قارساڭىندا، مەملەكەت ءتوراعاسى شي جينپيڭ ورتالىق راديو - تەلەۆيزيا باس ستانسياسى جانە ينتەرنەت ارقىلى 2020 - جىلعى جاڭا جىلدى قۇتتىقتاۋ ءسوزىن جاريالادى. □ سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن
جاڭا جىل قارساڭىندا، مەملەكەت ءتوراعاسى شي جينپيڭ ورتالىق راديو - تەلەۆيزيا باس ستانسياسى جانە ينتەرنەت ارقىلى 2020 - جىلعى جاڭا جىلدى قۇتتىقتاۋ ءسوزىن جاريالادى. ءسوزدىڭ تولىعى تومەندەگىدەي:
2020 - جىل كەلۋ الدىندا تۇر، مەن استانا بەيجيڭنەن كوپشىلىككە جاڭا جىلدىق ىزگى تىلەگىمدى جولدايمىن!
2019 - جىلى ءبىز ماڭداي تەرىمىزدىڭ جەمىسىن تاتىپ، تىڭعىلىقتى ىستەپ، نىق قاداممەن العا ىلگەرىلەدىك. جوعارى ساپالى دامۋ ورنىقتى ىلگەرىلەدى، ەلىمىزدىڭ ىشكى ءوندىرىس جالپى ءونىم قۇنى 100 تريلليون يۋانعا تاياپ، جان باسىنا ورتا ەسەپپەن 10 مىڭ امەريكا دوللارلىق بەلەسكە كوتەرىلەتىندىگى مەجەلەندى. ءۇش ءىرى قامال الۋ شايقاسىندا شەشۋشى ىلگەرىلەۋشىلىككە قول جەتتى. بەيجيڭنىڭ - تيانجيننىڭ - حىبەيدىڭ سايكەستى دامۋى، چاڭجياڭ ەكونوميكالىق بەلدەۋىنىڭ دامۋى، گۋاڭدۇڭ - شياڭگاڭ - اۋمىن ۇلكەن شىعاناق رايونى قۇرىلىسى، چاڭجياڭ اتىراۋىنىڭ ءبىر تۇلعالانا دامۋى تەز ىلگەرىلەۋ ساتىسىنا ءوتتى، حۋاڭحى الابىنىڭ ەكولوگياسىن قورعاۋ جانە جوعارى ساپالى دامۋ مەملەكەت ستراتەگياسىنا اينالدى. بۇكىل ەل بويىنشا 340تاي كەدەي اۋدان كەدەيلىك قالپاعىن الادى، 10 ميلليوننان استام ادام كەدەيلىكتەن ارىلادى. چاڭ ى − 4 ادامزات تاريحىندا تۇڭعىش رەت ايدىڭ ارعى بەتىنە قوندى، ۇزاق جورىق − 5 الىستان مەڭگەرىلەتىن 3 - تاسىمال راكەتاسى ءساتتى ۇشىرىلدى، شۋەلۇڭ − 2 تۇڭعىش رەت وڭتۇستىك ۇيەككە باردى، بەيدوۋ باعدار نۇسقاۋشىنىڭ بۇكىل جەر شارىندا توراپ قالىپتاستىرۋى شەشۋشى كەزەڭگە ءوتتى، 5Gدى ساۋدا ىستەرىنە پايدالانۋ جەدەل جۇرگىزىلدى، بەيجيڭ داشيڭ حالىقارالىق اۋەجايى ”سامۇرىقتاي قاناتىن جايدى“... وسى جەتىستىكتەردىڭ بارىنە جاڭا داۋىردەگى كۇرەسكەرلەردىڭ جۇرەك قانى مەن ماڭداي تەرى ءسىڭىپ، وزگەشە كەرەمەت جۇڭگو كەلبەتىن، جۇڭگو كۇشىن ايگىلەدى.
ءبىر جىلدان بەرى، رەفورما جاساۋ، ەسىك اشۋ دامۋدىڭ ومىرشەڭ كۇشىن ۇزدىكسىز قاۋلاتتى. پارتيا مەن مەملەكەتتىڭ قۇرىلىم رەفورماسى تابىسپەن ورىندالدى. ەركىن ساۋدا سىناق رايونىنان ءبىر توبى جانە شاڭحاي ەركىن ساۋدا سىناق رايونىنىڭ جاڭا اۋماعى جاڭادان قوسىلدى. عىلىم - تەحنيكالىق جاڭالىق اشۋ ۇلگىسى ءساتتى ىسكە قوسىلىپ ىلگەرىلەتىلدى. سالىقتى ازايتۋ، اقىنى تومەندەتۋ جالپى سوماسى 2 تريلليون يۋاننان استى. جەكەلەر تابىس سالىعىن الۋدىڭ باستاپقى شەگى جوعارىلاتىلدى، بۇقارا ۇنەمى پايدالاناتىن كوپتەگەن ءدارى - دارمەكتىڭ باعاسى ارزانداتىلدى، ينتەرنەت قارقىنى تەزدەپ، اقىسى تومەندەتىلىپ ينتەرنەتكە قوسىلۋ ءتىپتى تەزدەدى، قوقىر - قوقسىقتى تۇرگە ايىرۋ تومەن كومىرتەكتى تۇرمىستىڭ جاڭا سالتىنا جەتەكشىلىك ەتتى. ”نەگىزگى ساتىنىڭ اۋىرتپالىعىن جەڭىلدەتۋ جىلى“ نەگىزگى ساتى كادرلارىنىڭ شيراقى بەينەمەن جۇمىس ىستەۋىنە مۇمكىندىك جاسادى. وتانىمىزدىڭ ۇلان - بايتاق دالاسىنا نازار سالساق، بارلىق جەردەن جاڭا وزگەرىس، جاڭا بەينە بايقالادى.
ءبىر جىلدان بەرى، مەملەكەت قورعانىسى مەن ارميا رەفورماسى تىڭعىلىقتى ىلگەرىلەتىلىپ، حالىق ارمياسى جاڭا داۋىردەگى قۇدىرەتتى ارميا كەلبەتىن ايگىلەدى. ءبىز مەملەكەت مەرەكەسىن قۇتتىقتاۋ كولەمدى اسكەري پارادىن وتكىزدىك، تەڭىز ارمياسى، اۋە ارمياسى قۇرىلعاندىعىنىڭ 70 جىلدىعىن قۇتتىقتاۋ قيمىلىن وتكىزدىك، 7 - كەزەكتى دۇنيە جۇزىلىك اسكەريلەر سپورت جارىسىن وتكىزدىك. ەلىمىز ءوزى جاساعان تۇڭعىش اۋياماتكا رەسمي قوسىنعا قوسىلدى. حالىق پەرزەنت اسكەرلەرى ماڭگى وتاندى قورعايتىن قۇرىش قورعان، مەكەنىمىزدى قورعاپ جاتقان ادال قورعاۋشىلارعا قۇرمەت بىلدىرەيىك!
2019 - جىلى ەڭ ەستەن كەتپەيتىنى جاڭا جۇڭگو قۇرىلعاندىعىنىڭ 70 جىلدىعىن سالتاناتپەن قۇتتىقتادىق. ءبىز رەسپۋبليكانىڭ 70 جىلداعى شۇعىلالى تابىستارىنا شاتتانامىز، وتانشىلدىقتىڭ قۇدىرەتتى كۇشىنەن اسەرلەنەمىز. اسكەري پارادتاعى شارشى توپتار اسقاق ايبىن كورسەتىپ، بۇقارالىق شەرۋ كوڭىل تولقىتىپ، تيان - انمىن الاڭى شاتتىق شالقارىنا اينالدى. چاڭجياڭ وزەنىنىڭ تۇستىگى مەن تەرىستىگى نارت قىزىل تۇسكە بولەنىپ، ادامداردىڭ جۇزىنەن ماقتانىش كۇلكىسى ەستى، «مەن جانە مەنىڭ وتانىم» ۇلكەن - كىشى كوشەلەردە كەڭ تارالدى. وتانشىلدىق سۇيىسپەنشىلىك كوزىمىزگە ىستىق جاس الدىرىپ، وتانشىلدىق رۋح ۇلتتىڭ تىرەگىن تۇلعالادى. وسىنىڭ بارلىعى جاڭا جۇڭگونى جىرلاۋدىڭ، جاڭا داۋىردە كۇرەس جۇرگىزۋدىڭ العا تارتاتىن جويقىن اعىنى بولىپ توپتالىپ، بىزگە سارقىلماس كۇش قوستى.
ءبىر جىلدان بەرى، مەن بىرسىپىرا جەرگە باردىم. شيۇڭان جاڭا رايونىنىڭ كارتيناسى بىرتىندەپ كەستەلەندى، تيانجين پورتى قارىشتاپ كوركەيدى، بەيجيڭنىڭ قالا قوسالقى ورتالىعى ومىرشەڭدىك كۇشكە تولدى، ىشكى موڭعۇل ساحاراسى كوركەم كەلبەتىمەن كوز تارتتى، مىڭ جىلدىق تاريحتى وتكەرگەن حىشي ءدالىزى جاڭا بەينەگە ەندى، يرەلەڭدەگەن حۋاڭحىنىڭ ۇشى - قيىرىنا كوز جەتپەيدى، جوڭكىلگەن حۋاڭپۋجياڭنىڭ ەكى جاعالاۋىنا ىرعىنشىلىق ورناپ، كوز تارتادى... وتاننىڭ جەر - جەرىندە گۇلدەنگەن كورىنىستەر جارىققا شىقتى. مەن جۇڭگو توڭكەرىسىنىڭ ساپار جولىن بويلاپ، اۋەلگى ماقساتىمدى شىڭدادىم. جياڭشيدىڭ يۇيدۋىنداعى قىزىل ارميا ۇزاق جورىققا جينالىپ جولعا شىققان جەردەن حىناننىڭ شينشيانىنداعى حۋبەي - حىنان - انحۇي سوۆەتتىك رايونى ورتالىعى توڭكەرىستىك مۇراجايىنا، گانسۋدىڭ گاۋتايىنداعى باتىس باعىت ارمياسىنىڭ ەسكەرتكىشىنەن بەيجيڭنىڭ شياڭشانىنداعى توڭكەرىستىك ەسكەرتكىش ورنىنا دەيىنگى ءاربىر جەر مەنىڭ وي - قيالىمدى سان قيىرعا شارىقتاتتى، اۋەلگى ماقسات پەن بورىش − ءبىزدىڭ جاڭا داۋىردەگى ۇزاق جورىق ساپارىن ويداعىداي باسۋىمىزدىڭ سارقىلماس قوزعاۋشى كۇشى.
جايشىلىقتاعىداي قانشا قاربالاس بولسام دا، ۋاقىت شىعارىپ اۋىلداستاردىڭ اراسىنا بارىپ جاعداي ۇعىستىم. كوپشىلىك ماعان كوپتەگەن جۇرەك سوزدەرىن ايتتى، كوكەيىمدە ساقتاپ كەلەمىن. يۇنناننىڭ گۇڭشانىنداعى دۋلۇڭ ۇلتى بۇقاراسى، فۋجياننىڭ شوۋنيڭ اۋدانى شياداڭ اۋىلىنداعى اۋىلداستار، ”ۋاڭجيە بانىندەگى“ بارلىق جاۋىنگەرلەر، بەيجيڭ دەنە تاربيە داشۋەسىنىڭ اسپيرانت اعا جۇلدەگەرلەر كلاسىنداعى وقۋشىلار، اۋمىندىق بالاقايلار جانە بوداۋسىز جۇمىس ىستەۋشى قارتتار ماعان حات جازدى. مەن جاۋاپ حاتىمدا كوپشىلىكتىڭ قول جەتكىزگەن ناتيجەلەرىن تۇراقتاندىردىم ءارى ىزگى تىلەك ءبىلدىردىم.
ءبىر جىلدان بەرى، كوپتەگەن ادام مەن ىستەر ءبىزدى اسەرلەندىردى. ءومىر بويى اتاعىن جاسىرىپ، اۋەلگى ماقساتتان اينىماعان جاڭ فۋچيڭ، جاستىق ورالى مەن ءومىرىن كەدەيلىكتەن ارىلتۋ ىسىنە ارناعان حۋاڭ ۋىنشيۋ، ءورت اپاتىنان قۇتقارۋ جولىندا باسىن ءباي تىككەن سىچۋاننىڭ مۋليىنداعى 31 باتىر، ءوز دەنەسىمەن جاۋىنگەر سەرىگىن قورعاعان دۋ فۋگو، الەمدىك ساۋىتقا تالاسۋ جارىسىنىڭ اعا جۇلدەگەرلىگىن ءۇرتىس 11 رەت جەڭىپ العان جۇڭگو ايەلدەر ۆولەيبول كومانداسى... وكپە - وكىنشى جوق، بار پەيىلىمەن ءوزىن ارناعان كوپتەگەن اتسىز قاھارماندار قاراپايىم ادامدارعا ءتان قاراپايىمدىلىقپەن كەرەمەت ءومىر داستانىن جازدى.
2019 - جىلى جۇڭگو قۇشاعىن ۇزدىكسىز كەڭ جايىپ، دۇنيە جۇزىمەن قاۋىشتى. ءبىز 2 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلىلەر تالقى مىنبەرىن، بەيجيڭ الەمدىك باۋ - باقشا كورمەسىن، ازيا وركەنيەتتەر تىلدەسۋى جينالىسىن، 2 - كەزەكتى جۇڭگو حالىقارالىق يمپورت كورمەسىن وتكىزىپ، دۇنيە جۇزىنە وركەنيەتتى، اشىق، سيىسىمدى جۇڭگونى ايگىلەدىك. مەن كوپتەگەن ەلدەردىڭ مەملەكەت باسشىلارىمەن جانە ۇكىمەت باسشىلارىمەن ديدارلاسىپ، جۇڭگونىڭ دارىپتەمەسىن ءبولىسىپ، دوستىقتى نىعايتىپ، ورتاق تانىمدى تەرەڭدەتتىم. دۇنيە جۇزىندە تاعى دا ءبىرقانشا مەملەكەت ەلىمىزبەن ديپلوماتيالىق قارىم - قاتىناس ورناتىپ، ەلىمىزبەن ديپلوماتيالىق قارىم - قاتىناس ورناتقان مەملەكەتتەر 180گە جەتتى. ءبىزدىڭ دوستارىمىز توڭىرەكتىڭ ءتورت بۇرىشىندا بار!
2020 - جىل − بەلەستىك مانگە يە ءبىر جىل. ءبىز جاپپاي دوڭگەلەك داۋلەتتى قوعام ورناتىپ، ءبىرىنشى 100 جىلدىق كۇرەس نىساناسىن جۇزەگە اسىرامىز. 2020 - جىل كەدەيلىكتەن ارىلتۋدان قامال الۋدىڭ شەشۋشى شايقاسىنىڭ شەشۋشى جەڭىسىنە قول جەتكىزەتىن جىل. اتوي دابىلى قاعىلدى. ءبىز ءبىر جاعادان باس، ءبىر جەڭنەن قول شىعارىپ، قايراتتانا ىستەپ، نەعۇرلىم ماشاقاتتى، قاتەرلى بولعان سايىن سولعۇرلىم العا ۇمتىلىپ، ولقىلىقتاردى ونان ارى تىڭعىلىقتى تۇردە تولىقتاپ، نەگىزدى تاعى دا بەكەمدەي ءتۇسىپ، كەدەيلىكتەن ارىلتۋدان قامال الۋ شايقاسىنىڭ جەڭىسىنە باتىل قول جەتكىزىپ، قازىرگى ولشەمنەن تومەن اۋىل - قىستاقتاعى كەدەي حالىقتىڭ تۇگەل كەدەيلىكتەن ارىلۋىن، كەدەي اۋدانداردىڭ تۇگەل كەدەيلىك قالپاعىن الۋىن ۋاعىندا جۇزەگە اسىرۋىمىز كەرەك.
بىرنەشە كۇننىڭ الدىندا مەن اۋمىن وتان قۇشاعىنا ورالعاندىعىنىڭ 20 جىلدىعىن قۇتتىقتاۋ قيمىلىنا قاتىناستىم، مەن اۋمىننىڭ گۇلدەنۋى مەن ورنىقتىلىعىنا سۇيىنەمىن. اۋمىننىڭ تابىستى امالياتى ”ءبىر ەل، ەكى ءتۇزىم“نىڭ بۇكىلدەي ىسكە اساتىندىعىن، ورىندالاتىندىعىن، جۇرت قالاۋىنان شىعاتىندىعىن كورسەتتى. سوڭعى بىرنەشە ايدان بەرى، شياڭگاڭ جاعدايى كوپشىلىكتى الاڭداتتى. جاراسىمدى، ورنىقتى ورتا بولماسا، تىنىش ءومىر، شات - شادىمان تىرشىلىك ەتەتىن مەكەن قايدان بولسىن! شياڭگاڭنىڭ جاقسى بولا بەرۋىن، شياڭگاڭدىق باۋىرلاستاردىڭ جاقسى بولا بەرۋىن شىنايى ءۇمىت ەتەمىن. شياڭگاڭنىڭ گۇلدەنۋى، ورنىقتىلىعى شياڭگاڭدىق باۋىرلاستاردىڭ ارمانى ءارى وتان حالقىنىڭ تىلەگى.
تاريح وزەنى دامىلسىز اعۋدا، تىنىش كىلكىپ اعاتىن ساتتەرى دە، تولقىندانىپ وركەشتەنە اعاتىن ساتتەرى دە بولادى. ءبىز بوران - شاشىننان قورىقپايمىز، حاۋىپ - قاتەر، كەدەرگىلەردەن دە تايسالمايمىز. جۇڭگو بەيبىت دامۋ جولىمەن بۇلجىماي جۇرەدى، دۇنيە ءجۇزىنىڭ بەيبىتشىلىگىن بۇلجىماي قورعايدى، بىرگە دامۋدى جەبەيدى. ءبىز دۇنيە جۇزىندەگى ءار ەل حالقىمەن قول ۇستاسىپ، ”ءبىر بەلدەۋ، ءبىر جول“دى بەلسەنە بىرگە قۇرىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتىپ، ادامزاتتىڭ كوركەم بولاشاعىن اشۋ جولىندا قاجىماي - تالماي قۇلشىنىس جاساۋدى قالايمىز.
ءدال وسى ساتتە كوپتەگەن ادام قىزمەت ورىندارىنان تاپجىلماي جۇمىس ىستەۋدە، كوپتەگەن ادام تىنىشتىقتى قورعاۋدا، كوپتەگەن ادام قاجىرلى ەڭبەك ەتۋدە. كوپشىلىك جاپا شەكتىڭىزدەر!
ۋاقىتپەن جارىسىپ، ەسىل ساتتەردى زايا كەتىرمەي، 2020 - جىلدى بىرگە قارسى الايىق.
كوپشىلىك جاڭا جىلدارىڭىز قۇتتى بولسىن!
