شينحۋا اگەنتتىگىنىڭ 3 ـ ايدىڭ 13 ـ كۇنى بەيجيڭنەن بەرگەن حابارى. جۋىقتا جۇڭگو كوممۋنيستىك پارتياسى ورتالىق كوميتەتى كەڭسەسى «مەملەكەت وردەنىنە جانە مەملەكەت داڭق اتاعىنا كورسەتۋ، باعالاۋ قىزمەتىن ويداعىداي ىستەۋ جونىندەگى حابارلاندىرۋدى» (تومەندە قىسقارتىلىپ «حابارلاندىرۋ» دەلىنەدى) باسىپ تاراتتى. «حابارلاندىرۋدا» مىنالار اتاپ كورسەتىلدى: پارتيا ورتالىق كوميتەتى جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعىن قۇتتىقتاۋ قارساڭىندا مەملەكەت وردەنى جانە مەملەكەت داڭق اتاعىن باعالاۋدى، بەرۋدى ورىستەتىپ، جۇڭحۋا حالىق رەسپۋبليكاسىنىڭ قۇرىلىسى مەن دامۋىنا كورنەكتى ۇلەس قوسقان ٴبىر توپ ەڭبەك سىڭىرگەن ۇلگىلى تۇلعالاردى سالتاناتپەن ماداقتاپ ـ سيلاۋدى ۇيعاردى.
«حابارلاندىرۋدا» كورسەتۋ، باعالاۋ قىزمەتىنىڭ جالپى تالابى ايقىندالدى. شي جينپيڭ جاڭا ٴداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، ”ەكىنى تۇراقتاندىرۋدىڭ“ شەشۋشى ٴمانىن تەرەڭ ٴتۇسىنىپ، ”ٴتورت تانىمدى“ كۇشەيتىپ، ”ٴتورت سەنىمدى“ بەكەمدەپ، ”ەكىنى قورعاۋدى“ ورىنداپ، جۇڭحۋا حالىق رەسپۋبليكاسىنىڭ قۇرىلىسى مەن دامۋىنا كورنەكتى ۇلەس قوسقان ەڭبەك سىڭىرگەن ۇلگىلى تۇلعالاردى ەڭ جوعارى ولشەممەن ماداقتاپ ـ سيلاۋ ارقىلى ۇلت رۋحىن جانە ٴداۋىر رۋحىن اسقاقتاتىپ، بۇكىل ەلدەگى ٴار ۇلت حالقىنىڭ باي، قۇدىرەتتى، دەموكراتيالى، وركەنيەتتى، جاراسىمدى، كورىكتى سوتسياليستىك وسىزاماندانعان مەملەكەت قۇرۋ بەلسەندىلىگىن قاۋلاتىپ، تۇتاس قوعامدا جاقسىدان ونەگە الۋعا ۇمتىلۋدى، قاھارمانداردى قادىرلەۋدى، ۇزدىك بولۋعا ۇمتىلۋدى ىلگەرىلەتىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسى، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋگە جاڭا اناعۇرلىم زور ۇلەس قوسۋ كەرەك.
«حابارلاندىرۋدا» كورسەتىلەتىن كانديداتتاردىڭ كولەمى جانە شارتى ايقىندالدى. جۇڭحۋا حالىق رەسپۋبليكاسىنىڭ قۇرىلىسى مەن دامۋىنا كورنەكتى ۇلەس قوسقان جەكەلەردىڭ كورسەتىلۋىنە بولادى، شارتقا ۇيلەسەتىن قايتىس بولعاندارعا تولىقتاپ بەرۋگە بولادى. «رەسپۋبليكا وردەنىنە» كورسەتىلەتىن كانديداتتار جۇڭحۋا حالىق رەسپۋبليكاسىنىڭ قۇرىلىسى مەن دامۋىندا، اسىرەسە، پارتيانىڭ 18 ـ قۇرىلتايىنان بەرى اسا زور ۇلەس قوسقان، ەلەۋلى ەڭبەك سىڭىرگەن، ٴمورالدىق قاسيەتى تاڭداۋلى، بۇقارا مويىندايتىن ۇزدىك قايراتكەرلەر بولۋى كەرەك. «دوستىق وردەنىنە» كورسەتىلەتىن كانديداتتار ەلىمىزدىڭ سوتسياليستىك وسىزامانداندىرۋ قۇرىلىسىندا جانە جۇڭگو مەن شەتەلدىڭ اۋىس ـ كۇيىسىن، سەلبەستىگىن جەبەۋدە، دۇنيە ٴجۇزىنىڭ بەيبىتشىلىگىن قورعاۋدا ەلەۋلى ۇلەس قوسقان، جۇڭگومەن ۇزاق ۋاقىت دوس بولعان، تاماشا بەدەلگە يە شەتەلدىكتەر بولۋى كەرەك. مەملەكەت داڭق اتاعىنا كورسەتىلەتىن كانديداتتار ەكونوميكا، قوعام، مەملەكەت قورعانىسى، ديپلوماتيا، وقۋ ـ اعارتۋ، عىلىم ـ تەحنيكا، مادەنيەت، دەنساۋلىق ساقتاۋ، دەنە تاربيە سياقتى ٴارقايسى سالا، ٴار كاسىپتە، اسىرەسە، پارتيانىڭ 18 ـ قۇرىلتايىنان بەرى كورنەكتى ۇلەس قوسقان، اسقاق بەدەلگە يە، ٴمورالدىق قاسيەتى تاڭداۋلى، بۇقارا جاپپاي مويىنداعان ۇزدىك تۇلعالار بولۋى كەرەك.
«حابارلاندىرۋدا» كورسەتۋدىڭ، باعالاۋدىڭ ٴتارتىبى جانە قىزمەت تالابى ايقىندالدى. ۇيىمدىق باسشىلىقتى كۇشەيتىپ، دەن قويا ورنالاستىرۋ كەرەك. وڭىرلەردىڭ، تاراۋلاردىڭ پارتكومى (پارتيا باسشىلىق گرۋپپاسى) جاۋاپكەرشىلىكتى شىن مانىندە ارقالاپ، دەن قويا ۇيىمداستىرىپ، اتقارىپ، وسكەلەڭ ساياسي جاۋاپكەرشىلىكپەن قاتىستى قىزمەتتەردى ويداعىداي ىستەۋى كەرەك. دۇرىس بەتالىستى يگەرىپ، كورسەتىلگەن كانديداتتاردىڭ العاباسارلىعىنا، ۋاكىلدىك سيپاتىنا جانە داۋىرلىك سيپاتىنا شىنايى كەپىلدىك ەتۋى كەرەك. كورسەتىلگەن كانديداتتاردىڭ بۇرىننان بەرگى بەينەسىن جان ـ جاقتى باعالاپ، ساياسي وتكەلدى، پاكتىك وتكەلىن مىقتى يگەرۋدى كورنەكتىلەندىرىپ، ناقتى ۇلەسىن ماڭىزدى باعالاۋ ولشەمى ەتىپ، اشىق، ٴادىل، تۋراشىل بولۋدان جازباي، بۇقارالىق لۋشيانعا تاباندى بولىپ، دەموكراتيانى تولىق ساۋلەلەندىرىپ، ٴار جاقتىڭ پىكىرىن كەڭىنەن تىڭداپ، جاقسىلاردىڭ ىشىنەن ۇزدىگىن تاڭداۋ كەرەك.
