12 - ايدىڭ 4 - كۇنى مەملەكەت ءتوراعاسى شي جينپيڭ بەيجيڭدەگى دياۋيۇيتاي مەملەكەتتىك قوناق ۇيىندە بەلورۋسسيا زۇڭتۇڭى لۋكاشەنكومەن كەزدەستى.
□ سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
شينحۋا اگەنىتتىگىنىڭ 12 - ايدىڭ 4 - كۇنى بەيجيڭنەن بەرگەن حابارى (ءتىلشى سۇن ي). 12 - ايدىڭ 4 - كۇنى مەملەكەت ءتوراعاسى شي جينپيڭ دياۋيۇيتاي مەملەكەتتىك قوناق ۇيىندە بەلورۋسسيا زۇڭتۇڭى لۋكاشەنكومەن كەزدەستى.
شي جينپيڭ بىلاي دەپ اتاپ كورسەتتى: بيىل 2 - ايدىڭ سوڭىندا زۇڭتۇڭ مىرزا جۇڭگوعا كەلىپ، ءساتتى تۇردە مەملەكەت ىستەرى ساپارىندا بولدى، ءبىز جۇڭگو − بەلورۋسسيا قارىم - قاتىناسىنىڭ جوعارى دەڭگەيدە دامۋىن ىلگەرىلەتۋ جونىندە ماڭىزدى ورتاق تانىمعا كەلدىك. ءبىر جىلدان بەرى ەكى ەلدىڭ ساياسي ءوزارا سەنىمدىلىگى اناعۇرلىم بەكەمدەلىپ، حالىقارالىق ىستەستىگى ءتىپتى دە جيىلەي ءتۇستى. جۇڭگو جاق جۇڭگو − بەلورۋسسيا قارىم - قاتىناسىنا قاشاندا ستراتەگيالىق بيىكتەن جانە ۇزاق بولاشاقتىق تۇرعىدان مامىلە جاساپ، بەلورۋسسيانىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن باتىل قولدايدى، سىرتقى كۇشتەردىڭ بەلورۋسسيانىڭ ىشكى ىسىنە كيلىگۋىنە قارسى تۇرادى. جۇڭگو جاق بەلورۋسسيا جاقپەن ستراتەگيالىق ىستەستىكتى ۇزدىكسىز كۇشەيتىپ، ءوزارا قولداۋ كورسەتۋدەن جازباي، ناقتى ىستەر سەلبەستىگىن ىلگەرىلەتىپ، جۇڭگو − بەلورۋسسيا قارىم - قاتىناسىن ۇزدىكسىز تەرەڭدەتۋدى قالايدى.
شي جينپيڭ بىلاي دەپ باسا دارىپتەدى: 10 جىلدىڭ الدىندا مەن ”ءبىر بەلدەۋ، ءبىر جولدى“ بىرگە قۇرۋ باستاماسىن العا قويعان ەدىم، قازىر 150دەن استام مەملەكەت سەلبەستىككە ات سالىستى. تاياۋدا مەن جۇڭگونىڭ ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى قولداۋ جونىندەگى 8 ءتۇرلى ارەكەتىن العا قويدىم، بەلورۋسسيا جاقتىڭ ۇزدىكسىز بەلسەنە ات سالىسۋىن، ونان اناعۇرلىم كوپ ناقتى دامۋ ورايىنا يە بولۋىن قارسى الامىن. ەكى جاق جۇڭگو − بەلورۋسسيا ونەركاسىپ باقشاسى سياقتى نىسانداردى ويداعىداي اتقارىپ، جۇڭگو − بەلورۋسسيا ونەركاسىپ سەلبەستىگىنىڭ اناعۇرلىم كوپ تابىستارعا قول جەتكىزۋىن ىلگەرىلەتۋى كەرەك. ەكى جاق شەكارا اتتاعان تاسىمالعا قولايلىلىق جاساۋ دەڭگەيىن جوعارىلاتىپ، ەكونوميكا - ساۋدا جانە ادامداردىڭ بارىس - كەلىسىن جەبەۋى كەرەك. مەرزىم بويىنشا مادەنيەت كۇنى قيمىلىن ءوزارا وتكىزىپ، وقۋ - اعارتۋ، دەنساۋلىق ساقتاۋ، دەنە تاربيە، ساياحات سەلبەستىگىن كەڭەيتىپ، ەكى ەل جاستارىنىڭ اۋىس - كۇيىس، سەلبەستىك ورىستەتۋىن قولداپ، ەكى ەل حالقىنىڭ ءوزارا ءتۇسىنىسۋى مەن دوستىعىن كۇشەيتۋ كەرەك. جۇڭگو − بەلورۋسسيا ەكى جاق − الەمدىك باسقارۋ جۇيەسى رەفورماسى مەن قۇرىلىسىنا ات سالىساتىن ماڭىزدى كۇش. جۇڭگو جاق بەلورۋسسيا جاقپەن بىرلەسكەن مەملەكەتتەر ۇيىمى، شاڭحاي سەلبەستىك ۇيىمى سياقتى كوپ جاقتى مەحانيزم اياسىندا سايكەسۋ مەن سەلبەسۋدى كۇشەيتىپ، الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن تياناقتاندىرۋدى ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.
لۋكاشەنكو مىنالاردى ءبىلدىردى: ءتوراعا شي جينپيڭنىڭ باسشىلىعىندا جۇڭگونىڭ دامۋى وراسان زور تابىستارعا قول جەتكىزدى، ءبىر ميلليارد 400 ميلليوننان استام جۇڭگو حالقى باقىتتى تۇرمىس كەشىرىپ، دۇنيە جۇزىنە ماڭىزدى ۇلەس قوستى. ءتوراعا شي جينپيڭنىڭ ەل باسقارۋداعى تابىستى تاجىريبەلەرى ءار جاقتى يگىلىككە كەنەلتتى، ۇيرەنۋگە، ۇلگى الۋعا تاتيدى. بەلورۋسسيا جۇڭگونىڭ ۇزدىكسىز دامىپ قۇدىرەتتەنۋىن شىن جۇرەكتەن ءۇمىت ەتەدى، بۇل بۇكىل دۇنيە ءجۇزىنىڭ بەيبىتشىلىك، دامۋ ىستەرىنە ءتيىمدى. بەلورۋسسيا جۇڭگومەن دوستىق قارىم - قاتىناسىن بۇلجىماي دامىتادى، جۇڭگو جاقتىڭ جوعارى جىكتەگىلەرىمەن بارىس - كەلىستى جيىلەتىپ، ءوزارا قولداۋدى بەكەمدەپ، ءوزارا ءتيىمدى سەلبەستىكتى تەرەڭدەتىپ، حالىقارالىق جانە كوپ جاقتى ستراتەگيالىق ىستەستىكتى كۇشەيتىپ، بەلورۋسسيا مەن جۇڭگونىڭ بارلىق جاعدايدا بىردەي جان - جاقتى ستراتەگيالىق سەرىكتەستىك قارىم - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتۋدى قالايدى. بەلورۋسسيا جاق ءتوراعا شي جينپيڭ العا قويعان ”ءبىر بەلدەۋ، ءبىر جولدى“ بىرگە قۇرۋ سياقتى الەمدىك باستامالاردىڭ حالىقارالىق قوعامنىڭ ورتاق تانىمى مەن سەلبەستىگىن شىن مانىندە ۇيىستىراتىن ۇلى ءىس ەكەندىگىنە كامىل سەنەدى، وعان ۇزدىكسىز بەلسەنە ات سالىسادى.
ەكى ەلدىڭ مەملەكەت باسشىلارى تاعى ۋكراينا داعدارىسى سياقتى ماسەلەلەر جونىندە پىكىر اۋىستىردى.
ساي چي، ۋاڭ ي كەزدەسۋگە قاتىناستى.
