ورتالىقتىڭ فينانس قىزمەتى ءماجىلىسى بەيجيڭدە وتكىزىلدى
شي جينپيڭ، لي چياڭ ماڭىزدى ءسوز سويلەدى، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي قاتىناستى
ورتالىقتىڭ فينانس قىزمەتى ءماجىلىسى 10 - ايدىڭ 30 - كۇنىنەن 31 - كۇنىنە دەيىن بەيجيڭدە وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ماجىلىسكە قاتىناستى ءارى ماڭىزدى ءسوز سويلەدى.
□ سۋرەتتى شينحۋا اگەنتتىگىنىڭ ءتىلشىسى جۇي پىڭ تۇسىرگەن
شينحۋا اگەنتتىگىنىڭ 10 - ايدىڭ 31 - كۇنى بەيجيڭنەن بەرگەن حابارى. ورتالىقتىڭ فينانس قىزمەتى ءماجىلىسى 10 - ايدىڭ 30 - كۇنىنەن 31 - كۇنىنە دەيىن بەيجيڭدە وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ماجىلىسكە قاتىناستى ءارى ماڭىزدى ءسوز سويلەدى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەلەرى لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي ماجىلىسكە قاتىناستى.
شي جينپيڭ ماڭىزدى سوزىندە پارتيا 18 - قۇرىلتايىنان بەرگى فينانس قىزمەتىن قورىتىندىلاپ، فينانستى جوعارى ساپالى دامىتۋ ءدوپ كەلگەن جاعدايعا تالداۋ جاساپ، كەزەكتەگى جانە الداعى ءبىر مەزگىلدەگى فينانس قىزمەتىن ورنالاستىردى. لي چياڭ فينانس قىزمەتىن ويداعىداي ىستەۋ جونىندە ناقتى ورنالاستىرۋ جاسادى.
ءماجىلىس مىنالاردى باسا دارىپتەدى: فينانس − حالىق شارۋاشىلىعىنىڭ جان تامىرى، مەملەكەتتىڭ وزەكتى باسەكەلىك قۋاتىنىڭ ماڭىزدى قۇرامداس بولىگى، فينانستا قۋاتتى ەلدى جەدەل قۇرىپ، فينانستى باقىلاۋ - باسقارۋدى جاپپاي كۇشەيتىپ، فينانس ءتۇزىلىسىن كەمەلدەندىرىپ، فينانستىق قىزمەت وتەۋدى ساپالىلاندىرىپ، حاۋىپ - قاتەردەن ساقتانىپ جانە ونى جويىپ، فينانستى دامىتۋدىڭ جۇڭگوشا جولىمەن بۇلجىماي ءجۇرىپ، ەلىمىز فينانسىنىڭ جوعارى ساپالى دامۋىن ىلگەرىلەتىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋگە پارمەندى تىرەك ازىرلەۋ كەرەك.
ءماجىلىس مىنالاردى اتاپ كورسەتتى: پارتيا 18 - قۇرىلتايىنان بەرى پارتيا ورتالىق كوميتەتىنىڭ ورتالىقتانعان ءبىر تۇتاس باسشىلىعىندا، فينانس جۇيەسى ەكونوميكالىق، قوعامدىق دامۋ كەلەلى جاعدايىنا پارمەندى تىرەك بولىپ، ەلەۋلى حاۋىپ - قاتەرلەردەن ساقتانۋدان جانە ونى جويۋدان قامال الۋ شايقاسىن باتىلدىقپەن ويداعىداي جۇرگىزىپ، جاپپاي دوڭگەلەك داۋلەتتى قوعامدى ۋاعىندا قۇرىپ شىعۋعا، ءبىرىنشى 100 جىلدىق كۇرەس نىساناسىن جۇزەگە اسىرۋعا ماڭىزدى ۇلەس قوستى. پارتيا ورتالىق كوميتەتى ماركسيزمنىڭ فينانس نازارياسىن زامانىمىزداعى جۇڭگونىڭ ناقتى ءىس جۇزىندىگىمەن ۇشتاستىرىپ، جۇڭحۋانىڭ تاڭداۋلى ءداستۇرلى مادەنيەتىمەن ۇشتاستىرىپ، جاڭا داۋىردەگى فينانستىڭ دامۋ زاڭدىلىعىن قۇلشىنا يگەرىپ، ەلىمىزدىڭ فينانس ىستەرىنىڭ امالياتتىق جاسامپازدىعىن، نازاريالىق جاسامپازدىعىن، تۇزىمدىك جاسامپازدىعىن ۇزدىكسىز ىلگەرىلەتىپ، فينانستى دامىتۋدىڭ جۇڭگوشا جولىن قۇلشىنا اشىپ، پارتيا ورتالىق كوميتەتىنىڭ فينانس قىزمەتىنە ورتالىقتانعان ءبىر تۇتاس باسشىلىعىنا، ءسوز جوق، تاباندى بولۋ، حالىقتى وزەك ەتكەن قۇن بەتالىسىنا تاباندى بولۋ، فينانستىڭ ناقتى تۇلعالىق ەكونوميكاعا قىزمەت وتەۋىن ءتۇبىرلى باس ماقسات ەتۋگە تاباندى بولۋ، حاۋىپ - قاتەردەن ساقتانۋدى، تىزگىندەۋدى فينانس قىزمەتىنىڭ ماڭگىلىك تاقىرىبى ەتۋگە تاباندى بولۋ، فينانستىڭ جاڭالىق اشا دامۋىن بازارلاندىرىلعان، زاڭمەن باسقارىلاتىن ارنادا ىلگەرىلەتۋگە تاباندى بولۋ، فينانستىڭ قامداۋ جاعىنداعى قۇرىلىمدىق رەفورماسىن تەرەڭدەتۋگە تاباندى بولۋ، فينانستىڭ اشىقتىعى مەن حاۋىپسىزدىگىن ءبىر تۇتاس جوسپارلاۋعا تاباندى بولۋ، ورنىقتىلىق بارىسىندا ىلگەرىلەۋ قىزمەت جالپى ارناسىنا تاباندى بولۋ كەرەكتىگىن باسا دارىپتەدى. وسى امالياتتىق جەتىستىكتەر، نازاريالىق جەتىستىكتەر وڭاي - وسپاق كەلمەگەن. سونىمەن بىرگە فينانس سالاسىندا ءتۇرلى قايشىلىقتار مەن ماسەلەلەردىڭ ءوزارا قاباتتاسقاندىعىن، ءبىر - بىرىنە ىقپال جاسايتىندىعىن، كەيبىرەۋىنىڭ ءالى دە ەرەكشە كورنەكتى ەكەندىگىن، ەكونوميكالىق فينانس حاۋىپ - قاتەرىنىڭ، كومەسكى كىناراتتارىنىڭ ءالى دە ەداۋىر كوپ ەكەندىگىن، فينانستىڭ ناقتى تۇلعالىق ەكونوميكاعا قىزمەت وتەۋ ساپاسى مەن ونىمدىلىگىنىڭ جوعارى ەمەستىگىن، فينانستاعى بىلىقپالىق جانە شىرىكتەسۋ ماسەلەلەرى قايتا - قايتا تيىم سالىنسا دا تەجەلمەگەندىگىن، فينانستى باقىلاۋ - باسقارۋ جانە جونگە سالۋ قابىلەتىنىڭ ءالسىز ەكەندىگىن ايقىن كورە ءبىلۋىمىز كەرەك. فينانس جۇيەسى ساياسي دەڭگەيدى شىن مانىندە جوعارىلاتىپ، ”مەملەكەتتىڭ زور ءىسىن“ كوكەيدە ساقتاپ، بورىشتى، جاۋاپكەرشىلىكتى كۇشەيتىپ، وسى ماسەلەلەردى تۇبىرىنەن شەشۋگە بەلدى بەكەم بايلاپ، فينانستى جوعارى ساپالى دامىتۋ ارقىلى مەملەكەتتى قۇدىرەتتەندىرۋ قۇرىلىسىنا، ۇلتتى گۇلدەندىرۋ ۇلى ىسىنە دەم بەرۋ كەرەك.
ءماجىلىس مىنالاردى باسا دارىپتەدى: قازىر جانە الداعى ءبىر مەزگىلدە، فينانس قىزمەتىن ويداعىداي ىستەۋدە، ءسوز جوق، پارتيانىڭ جالپى بەتتىك باسشىلىعىنا تاباندى بولۋ جانە ونى كۇشەيتۋ، شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتىپ، پارتيا 20 - قۇرىلتايىنىڭ رۋحىن جاپپاي دايەكتىلەندىرىپ، جاڭا دامۋ ۇستانىمىن تولىق، دالمە - ءدال، جاپپاي دايەكتىلەندىرىپ، فينانس قىزمەتىنىڭ ساياسي سيپاتىن، حالىقتىق سيپاتىن ىشكەرىلەي يگەرىپ، فينانستا قۋاتتى ەلدى جەدەل قۇرۋدى نىسانا، فينانستىڭ جوعارى ساپالى دامۋىن ىلگەرىلەتۋدى نەگىزگى تاقىرىپ، فينانستىڭ قامداۋ جاعىنداعى قۇرىلىمدىق رەفورماسىن تەرەڭدەتۋدى نەگىزگى جەلى، فينانس قوسىنىنىڭ كىرشىكسىزدىگىن، ماماندانۋىن، جاۋىنگەرلىك قۋاتىن ماڭىزدى تىرەك، باقىلاۋ - باسقارۋدى جاپپاي كۇشەيتۋدى، حاۋىپ - قاتەردەن ساقتانۋدى جانە ونى جويۋدى ماڭىزدى ءتۇيىن ەتىپ، ورنىقتىلىق بارىسىندا ىلگەرىلەۋ قىزمەت جالپى ارناسىنا تاباندى بولىپ، دامۋ مەن حاۋىپسىزدىكتى ءبىر تۇتاس جوسپارلاپ، جۇيەلىك فينانس حاۋىپ - قاتەرى تۋىلماۋ تومەنگى شەگىن مىقتاپ ساقتاپ، فينانستى دامىتۋدىڭ جۇڭگوشا جولىمەن بۇلجىماي ءجۇرىپ، جۇڭگوشا ەرەكشەلىككە يە وسى زامانعى فينانس جۇيەسىن جەدەل قۇرىپ، ەكونوميكالىق، قوعامدىق دامۋدىڭ جانە حالىق بۇقاراسىنىڭ كۇن سايىن ارتىپ وتىرعان فينانستىق قاجەتىن ۇزدىكسىز قاناعاتتاندىرىپ، جاڭا داۋىردەگى فينانس قىزمەتىنىڭ جاڭا جاعدايىن ۇزدىكسىز اشۋ كەرەك.
ءماجىلىس مىنالاردى اتاپ كورسەتتى: جوعارى ساپالى دامۋ − جاپپاي سوتسياليستىك وسىزاماندانعان مەملەكەت قۇرۋدىڭ ماڭداي الدى مىندەتى، فينانس ەكونوميكالىق، قوعامدىق دامۋعا جوعارى ساپالى قىزمەت وتەۋى كەرەك. تاماشا اقشا فينانس ورتاسىن كۇش سالا قالىپتاستىرىپ، كەلەلى ستراتەگيالارعا، ءتۇيىندى سالالارعا جانە ءالسىز بۋىندارعا ساپالى فينانستىق قىزمەت وتەۋدى شىنايى كۇشەيتۋ كەرەك. اقشا ساياساتىنىڭ ورنىقتىلىعىن باستان - اياق ساقتاپ، پەريود اتتاعان جانە كەرى پەريودتىق رەتكە سالۋدى ويداعىداي ىستەۋگە ونان ارى ءمان بەرىپ، اقشا ساياساتىنىڭ قۇرال ساندىعىن تولىقتاۋ كەرەك. قارجىمەن قامداۋ قۇرىلىمىن ساپالىلاندىرىپ، اناعۇرلىم كوپ فينانس بايلىعىن عىلىم - تەحنيكادا جاڭالىق اشۋدى، وزىق جاساۋدى، جاسىل دامۋدى جەبەۋگە جانە ورتا، شاعىن، ۇساق كاسىپورىندارعا پايدالانىپ، جاڭالىق اشۋ ارقىلى دامۋعا دەم بەرۋ ستراتەگياسىن، وڭىرلىك سايكەستى دامۋ ستراتەگياسىن اتقارۋدى زور كۇشپەن قولداپ، مەملەكەتتىڭ استىق جانە ەنەرگيا حاۋىپسىزدىگى سياقتىلارعا شىنايى كەپىلدىك ەتۋ كەرەك. تومەن ونىمدىلىكپەن يەمدەنگەن فينانس بايلىقتارىن جانداندىرىپ، قارجىنىڭ پايدالانىلۋ ونىمدىلىگىن جوعارىلاتۋ كەرەك. عىلىم - تەحنيكا فينانسى، جاسىل فينانس، جالپىعا ءتيىمدى فينانس، زەينەتكەرلىك فينانسى، سيفرلى فينانس سىندى 5 ۇلكەن جۇمىستى ويداعىداي ىستەۋ كەرەك. وسى زامانعى فينانس قۇرىلىمى مەن بازار جۇيەسىن زور كۇشپەن تۇلعالاپ، قارجىنىڭ ناقتى تۇلعالىق ەكونوميكاعا كىرۋ ارناسىن ىركىلىسسىزدەندىرۋ كەرەك. قارجى قۇراۋ قۇرىلىمىن ساپالىلاندىرىپ، كاپيتال بازارىنىڭ وزەكتىك يقۋاتىن اناعۇرلىم ويداعىداي ساۋلەلەندىرىپ، جارنا بەلەتىن تاراتۋ، تىركەۋگە الدىرۋ ءتۇزىمىنىڭ تەرەڭدەۋىن، ناقتىلانۋىن ىلگەرىلەتىپ، كوپ نەگىزدى جارنا ۇقىعى ارقىلى قارجى قۇراۋدى دامىتىپ، بازارعا شىعارىلعان سەرىكتەستىكتەردىڭ ساپاسىن زور كۇشپەن جوعارىلاتىپ، ماڭداي الدى قارجى قوسۋ بانكەلەرىن جانە قارجى قوسۋ قۇرىلىمدارىن باۋلۋ كەرەك. زايوم بازارىنىڭ جوعارى ساپالى دامۋىن جەبەۋ كەرەك. قۇرىلىمنىڭ ورنىن تۇراقتاندىرۋدى كەمەلدەندىرىپ، مەملەكەت مەنشىگىندەگى ءىرى فينانس قۇرىلىمدارىن ساپالىلاندىرۋدى، كۇشەيتۋدى قولداپ، ناقتى تۇلعالىق ەكونوميكاعا قىزمەت وتەيتىن نەگىزگى قوسىن جانە فينانستىڭ ورنىقتىلىعىن قورعايتىن ورنىقتىرعىش بولىپ، ورتا، شاعىن فينانس قۇرىلىمدارىنىڭ كىرۋىنە رۇقسات ەتۋ ولشەمى مەن باقىلاۋ - باسقارۋ تالابىن قاتايتىپ، جەرگىلىكتى ورىندى تياناق ەتىپ، ەرەكشە شارۋاشىلىق جۇرگىزىپ، ساياساتتىق فينانس قۇرىلىمدارىنىڭ فۋنكتسيالىق ورنىن كۇشەيتىپ، قامسىزداندىرۋ كاسىبىنىڭ ەكونوميكالىق تولقۋدى باسەيتكىشتىك جانە قوعامدىق ورنىقتىرعىشتىق فۋنكتسياسىن ساۋلەلەندىرۋ كەرەك. بازار ەرەجەسىن كۇشەيتىپ، ەرەجە بىرلىككە كەلگەن، باقىلاۋ - باسقارۋ سايكەسكەن فينانس بازارىن تۇلعالاپ، ۇزاق مەرزىمدىك كاپيتالدىڭ قالىپتاسۋىن جەبەۋ كەرەك. زاڭدىق يە باسقارۋىن اقاۋسىزداندىرىپ، جۇڭگوشا ەرەكشەلىككە يە وسى زامانعى فينانس كاسىپورنى ءتۇزىمىن كەمەلدەندىرىپ، مەملەكەت مەنشىگىندەگى فينانس كاپيتالىن باسقارۋدى كەمەلدەندىرىپ، بانكە كاپيتال قورىن تولىقتاۋ ارناسىن كەڭەيتىپ، كاسىپ سالاسى مەن فينانستىڭ حاۋىپ - قاتەرىن ويداعىداي بولەكتەۋ كەرەك. فينانستى جوعارى دەڭگەيدە اشىق ۇستاۋدى زور كۇشپەن ىلگەرىلەتىپ، مەملەكەتتىڭ فينانس جانە ەكونوميكا حاۋىپسىزدىگىنە شىنايى كەپىلدىك ەتۋ كەرەك. ”سىرتتان ەنگىزۋ“ مەن ”سىرتقا شىعارۋعا“ بىردەي ءمان بەرۋگە تاباندى بولىپ، فينانس سالاسىنىڭ تۇزىمدىك ەسىك اشۋىن ورنىقتى قاداممەن كەڭەيتىپ، شەكارا اتتاعان قارجى قوسۋدىڭ، قارجى قۇراۋدىڭ قولايلىلىعىن جوعارىلاتىپ، اناعۇرلىم كوپ شەتەل قارجى قوسقان فينانس قۇرىلىمدارى مەن ۇزاق مەرزىمدىك كاپيتالدى جۇڭگوعا كەلىپ كاسىپ ورىستەتۋگە، شارۋاشىلىعىن گۇلدەندىرۋگە باۋراۋ كەرەك. شاڭحايدىڭ حالىقارالىق فينانس ورتالىعى باسەكەلىك قۋاتى مەن ىقپالىن كۇشەيتىپ، شياڭگاڭنىڭ حالىقارالىق فينانس ورتالىعى ورنىن بەكەمدەۋ، ءوسىرۋ كەرەك.
ءماجىلىس مىنالاردى باسا دارىپتەدى: فينانستى باقىلاۋ - باسقارۋدى جاپپاي كۇشەيتىپ، فينانس حاۋىپ - قاتەرىنەن ءونىمدى ساقتانۋ جانە ونى جويۋ كەرەك. فينانستى باقىلاۋ - باسقارۋدىڭ ونىمدىلىك سيپاتىن شىنايى جوعارىلاتىپ، زاڭ بويىنشا بارلىق فينانس قيمىلدارىن تۇگەل باقىلاۋ - باسقارۋعا ەنگىزىپ، قۇرىلىمدىق باقىلاۋ - باسقارۋدى، ارەكەتتىك باقىلاۋ - باسقارۋدى، فۋنكتسيالىق باقىلاۋ - باسقارۋدى، سىڭبەلى باقىلاۋ - باسقارۋدى، ۇزدىكسىز باقىلاۋ - باسقارۋدى جاپپاي كۇشەيتىپ، باقىلاۋ - باسقارۋ اقتاڭداعىن جانە ەسكەرۋسىز جەرلەردى جويىپ، زاڭدى قاتاڭ اتقارىپ، باتىلدىقپەن ءۇن قاتىپ، زاڭسىز فينانس قيمىلدارىنا قاتاڭ سوققى بەرۋ كەرەك. ورتا، شاعىن فينانس قۇرىلىمدارىنىڭ حاۋىپ - قاتەرىن دەر كەزىندە ءبىر جاقتى ەتۋ كەرەك. جەرگىلىكتى ورىننىڭ قارىز حاۋىپ - قاتەرىنەن ساقتانۋدىڭ جانە ونى جويۋدىڭ ۇزاق ۋاقىت ءونىمدى مەحانيزمىن ورناتىپ، جوعارى ساپالى دامۋمەن ۇيلەسەتىن ۇكىمەتتىڭ قارىز باسقارۋ مەحانيزمىن ورناتىپ، ورتالىق پەن جەرگىلىكتى ۇكىمەتتەردىڭ قارىز قۇرىلىمىن ساپالىلاندىرۋ كەرەك. فينانس پەن قورا - جايدىڭ ۇتىمدى اينالىمىن جەبەپ، قورا - جاي كاسىپورىندارى تۇلعالارىن باقىلاۋ - باسقارۋ ءتۇزىمى مەن قارجىنى باقىلاۋ - باسقارۋدى اقاۋسىزداندىرىپ، قورا - جاي فينانسىن ماكرولىق جاقتان بايىپتىلىقپەن باسقارۋدى كەمەلدەندىرىپ، تۇرلىشە مەنشىكتەگى قورا - جاي كاسىپورىندارىنىڭ ۇيلەسىمدى قارجى قۇراۋ قاجەتىن ءبارىن تەڭ كورىپ قاناعاتتاندىرىپ، قالاعا قاراي شارا قولدانىپ، ساياساتتىق قۇرال ساندىعىنان ويداعىداي پايدالانىپ، ءزارۋ جانە جاقسارتۋ سيپاتتى تۇرعىن ءۇي قاجەتىن اناعۇرلىم ويداعىداي قولداپ، قامتاماسىزداندىرۋ سيپاتتى تۇرعىن ءۇي سياقتى ”ءۇش ۇلكەن ينجەنەريا“ قۇرىلىسىن جەدەلدەتىپ، قورا - جاي دامۋىنىڭ جاڭا ۇلگىسىن ورناتۋ كەرەك. فينانس بازارىنىڭ ورنىقتى، اقاۋسىز اينالىمىن قورعاپ، فينانس بازارىنىڭ تاراتۋ جانە ساۋدا - ساتتىق ارەكەتىن ارناعا ءتۇسىرىپ، مەجەلى مەرزىمگە ۇيلەسىمدى جەتەكشىلىك ەتىپ، حاۋىپ - قاتەردىڭ ءوڭىر اتتاپ، بازار اتتاپ، شەكارا اتتاپ اسەر تۋعىزۋىنان ساقتانۋ كەرەك. شەتەل اقشاسى بازارىن باسقارۋدى كۇشەيتىپ، حالىق اقشاسى سىندىرىلىمىنىڭ ۇيلەسىمدى بىركەلكى دەڭگەيدەگى نەگىزگى ورنىقتىلىعىن ساقتاۋ كەرەك. فينانس حاۋىپ - قاتەرىنەن ساقتانۋدا جانە ونى جويۋدا ۇقىق پەن جاۋاپكەرشىلىكتىڭ قاتىناسىن ويداعىداي يگەرىپ، ۇقىق پەن جاۋاپكەرشىلىك بىردەي، شابىتتاندىرۋ، تەجەۋ قاتار جۇرەتىن حاۋىپ - قاتەردى ءبىر جاقتى ەتۋ جاۋاپكەرشىلىك مەحانيزمىن اقاۋسىزداندىرۋ؛ تەز بولۋ مەن ورنىقتى بولۋدىڭ قاتىناسىن ويداعىداي يگەرىپ، ورنىقتىلىق كەلەلى جاعدايى العى شارتىندا ۋاقىتتى، سەرپىندى، ونىمدىلىكتى يگەرىپ، حاۋىپ - قاتەردى تىڭعىلىقتى، ورنىقتى جويىپ، زاڭعا قايشى قىلمىستاردى جانە شىرىكتەسۋ ارەكەتتەرىن باتىل جازالاپ، ءمورال حاۋىپ - قاتەرىنەن قاتاڭ ساقتانۋ؛ حاۋىپ - قاتەردى ەرتەرەك پارىقتاپ، ەرتەرەك ەسكەرتىپ، ەرتەرەك اشكەرەلەپ، ەرتەرەك ءبىر جاقتى ەتىپ، قاتاڭ تەجەمگە يە فينانس حاۋىپ - قاتەرىن ەرتە كەزدەن تۇزەتۋ مەحانيزمىن اقاۋسىزداندىرۋ كەرەك.
ءماجىلىس مىنالاردى اتاپ كورسەتتى: پارتيا ورتالىق كوميتەتىنىڭ فينانس قىزمەتىنە ورتالىقتانعان ءبىر تۇتاس باسشىلىعىن كۇشەيتۋ − فينانس قىزمەتىن ويداعىداي ىستەۋدىڭ ءتۇبىرلى كەپىلى. پارتيانىڭ فينانس قىزمەتىنە باسشىلىق ەتۋ ءتۇزىلىس - مەحانيزمىن كەمەلدەندىرىپ، ورتالىق كوميتەت فينانس كوميتەتىنىڭ رولىن ويداعىداي ساۋلەلەندىرىپ، ءبىر تۇتاس جوسپارلاۋدى، سايكەستىرۋدى، وتكەلدى يگەرۋدى ويداعىداي ىستەۋ كەرەك. ورتالىق كوميتەت فينانس قىزمەت كوميتەتىنىڭ رولىن ويداعىداي ساۋلەلەندىرىپ، فينانس جۇيەسىنىڭ پارتيا قۇرىلىسىن شىنايى كۇشەيتۋ كەرەك. جەرگىلىكتى پارتكومنىڭ فينانس كوميتەتى جانە فينانس قىزمەت كوميتەتىنىڭ رولىن ويداعىداي ساۋلەلەندىرىپ، قاراستى ورىن جاۋاپكەرشىلىگىن تياناقتاندىرۋ كەرەك. ساياسيدا ىسىلعان، قابىلەتى مىعىم، ستيلى قاتاڭ بولۋ ولشەمىنە تاباندى بولىپ، ادال، كىرشىكسىز، جاۋاپكەرشىلىك ارقالايتىن جوعارى ساپالى ماماندانعان فينانس كادر - دارىندىلار قوسىنىن تۇلعالاۋ كەرەك. فينانس جۇيەسىندە جۇڭحۋانىڭ تاڭداۋلى ءداستۇرلى مادەنيەتىن كۇش سالا اسقاقتاتىپ، ادال، سەنىمدى بولۋعا، ادامگەرشىلىكتى پايدادان جوعارى قويۋعا، سالماقتى، بايىپتى بولۋعا، تۋراشىلدىقتان اينىماي جاڭالىق اشۋعا، زاڭعا، ەرەجەگە ۇيلەسىمدى بولۋعا تاباندى بولۋ كەرەك. فينانستى زاڭمەن باسقارۋ قۇرىلىسىن كۇشەيتىپ، فينانس ءتۇيىندى سالالارىندا جانە جاڭادان گۇلدەنگەن سالالاردا زاڭ شىعارۋدى دەر كەزىندە ىلگەرىلەتىپ، فينانس كاسىبىنىڭ دامۋىن قورعاۋ كەرەك.
ءماجىلىس مىنالاردى باسا دارىپتەدى: باس شۋجي شي جينپيڭنىڭ ماڭىزدى ءسوزى فينانس كاسىبىنىڭ دامۋىنداعى ءبىر قىدىرۋ كەلەلى نازاريالىق جانە امالياتتىق ماسەلەلەرگە عىلمي جاۋاپ بەردى، بۇل − شي جينپيڭ ەكونوميكا يدەياسىنىڭ ماڭىزدى قۇرامداس بولىگى، ماركسيزمدىك ساياسي ەكونوميانىڭ فينانس ماسەلەلەرى جونىندەگى ماڭىزدى جاسامپازدىق جەتىستىگى، جاڭا داۋىردەگى جاڭا جورىقتا فينانستىڭ جوعارى ساپالى دامۋىن ىلگەرىلەتۋگە ءتۇبىرلى بويسۇنۋ ولشەمىن جانە ارەكەت باعدارناماسىن ازىرلەدى. وڭىرلەر، تاراۋلار ىشكەرىلەي ۇيرەنىپ ءتۇسىنۋى، سانالىلىقپەن دايەكتىلەندىرۋى، تياناقتاندىرۋى كەرەك. فينانستى ماكرولىق رەتتەۋ - مەڭگەرۋدى كەمەلدەندىرىپ، اقشا سەنىمدى امانات - قارىزىنىڭ قامداۋ - قاجەتسىنۋ زاڭدىلىعىن جانە جاڭا ەرەكشەلىگىن دۇرىس يگەرىپ، اقشانىڭ قامداۋ جالپى مولشەرى مەن قۇرىلىمىن ەكى جاقتان رەتتەۋدى كۇشەيتۋ كەرەك. فينانستىق قىزمەت وتەۋدى ساپالىلاندىرۋدى كۇشەيتىپ، فينانستى جوعارى دەڭگەيدە اشىق ۇستاۋدى كەڭەيتىپ، ”سىرتقا شىعارۋ“ مەن ”ءبىر بەلدەۋ، ءبىر جول“ قۇرىلىسىنا ويداعىداي قىزمەت وتەپ، حالىق اقشاسىنىڭ حالىقارالانۋىن ورنىقتى، بايىپتى، تىڭعىلىقتى ىلگەرىلەتۋ كەرەك. فينانستى باقىلاۋ - باسقارۋ مەحانيزمىن اقاۋسىزداندىرىپ، باقىلاۋ - باسقارۋ جاۋاپكەرشىلىگىن تياناقتاندىرۋ جانە جاۋاپكەرلىگىن قۋزاۋ ءتۇزىمىن ورناتىپ، اقاۋسىزداندىرىپ، ءتۇيىندى سالالارداعى فينانس حاۋىپ - قاتەرىنەن ءونىمدى ساقتانۋ جانە ونى جويۋ كەرەك. فينانس سالاسىنداعى قازىرگى ءتۇيىندى قىزمەتتەردى كۇش سالا ويداعىداي ىستەپ، ساياساتتى اتقارۋ جانە قىزمەتتى ىلگەرىلەتۋ تەبىنىن زورايتىپ، جىلجىمالىلىق سيپاتى ۇيلەسىمدى، جەتكىلىكتى بولۋىن، قارجى قۇراۋ وزىندىك قۇنىنىڭ ۇزدىكسىز تومەندەۋىن ساقتاپ، كاپيتال بازارىن جانداندىرىپ، ىشكى سۇرانىستى كەڭەيتۋدى ونان ارى ويداعىداي قولداپ، سىرتقى ساۋدانى ورنىقتىرۋدى، سىرتقى قارجىنى ورنىقتىرۋدى جەبەپ، جاڭا عىلىم - تەحنيكاعا، جاڭا جارىس جولىنا، جاڭا بازارعا فينانستىق قولداۋدى كۇشەيتىپ، جاڭا قوزعاۋشى قۋاتتى، جاڭا باسىمدىقتى جەدەل جەتىلدىرۋ كەرەك.
ءماجىلىس مىنالاردى تالاپ ەتتى: وڭىرلەر، تاراۋلار، اسىرەسە، فينانس جۇيەسى يدەيا مەن ارەكەتتى باس شۋجي شي جينپيڭنىڭ ماڭىزدى ءسوزىنىڭ رۋحىمەن جانە پارتيا ورتالىق كوميتەتىنىڭ شەشىمدەرىمەن، ورنالاستىرۋلارىمەن ونان ارى بىرلىككە كەلتىرىپ، نىسانانى باعدار ەتۋگە، ماسەلەنى باعدار ەتۋگە تاباندى بولىپ، پارتيانىڭ فينانس قىزمەتىنە باسشىلىعىن جاپپاي كۇشەيتىپ، فينانستى باقىلاۋ - باسقارۋدى كۇشەيتۋ، فينانس حاۋىپ - قاتەرىنەن ساقتانۋ جانە ونى جويۋ، فينانستىڭ جوعارى ساپالى دامۋىن ىلگەرىلەتۋ سياقتى ءتۇيىندى قىزمەتتەردى تىڭعىلىقتى ويداعىداي ىستەپ، فينانستا قۋاتتى ەل قۇرۋدى جەدەلدەتىپ، ءماجىلىس رۋحىن ۇگىتتەۋدى، دايەكتىلەندىرۋدى مىقتى ۇستاپ، فينانس كادر - دارىندىلارى قوسىنى قۇرىلىسىن كۇشەيتىپ، قىزمەت ورنالاستىرۋلارىن ناقتاپ تياناقتاندىرۋعا شىنايى كەپىلدىك ەتۋى كەرەك.
حى ليفىڭ قورىتىندى ءسوز سويلەدى. جۇڭگو حالىق بانكەسىندەگى، فينانستى باقىلاۋ - باسقارۋ باس مەكەمەسىندەگى، جۇڭگو باعالى قاعاز باقىلاۋ - باسقارۋ كوميتەتىندەگى، بەيجيڭ قالاسىنداعى، لياۋنيڭ ولكەسىندەگى، حۋبەي ولكەسىندەگى، سىچۋان ولكەسىندەگى جاۋاپتى جولداستار پىكىر اۋىستىرىپ، لەبىز ءبىلدىردى.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتىندەگى قاتىستى باسشى جولداستار، مەملەكەتتىك كەڭەستىڭ مۇشەلەرى، ەڭ جوعارى حالىق سوتى مەكەمەسىنىڭ باستىعى، مەملەكەتتىك ساياسي كەڭەستەگى قاتىستى باسشى جولداستار ماجىلىسكە قاتىناستى.
ورتالىق فينانس كوميتەتىنىڭ مۇشەلەرى، ولكەلەردىڭ، اۆتونوميالى رايونداردىڭ، توتە قاراستى قالالاردىڭ جانە جوسپارى بولەك جاسالاتىن قالالاردىڭ، شينجياڭ ءوندىرىس - قۇرىلىس بيڭتۋانىنىڭ، ورتالىق جانە مەملەكەت ورگاندارىنىڭ قاتىستى تاراۋلارىنىڭ، قاتىستى حالىقتىق ۇيىمداردىڭ، ورتالىق اسكەري ىستەر كوميتەتى ورگانىنىڭ قاتىستى تاراۋلارىنىڭ، ورتالىق باسقاراتىن فينانس قۇرىلىمدارىنىڭ، ءىشىنارا كاسىپورىنداردىڭ نەگىزگى جاۋاپتى جولداستارى قاتارلىلار ماجىلىسكە قاتىناستى.
