9 - ايدىڭ 1 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن بەنين زۇڭتۇڭى تالونمەن كەڭەس وتكىزدى.
□ سۋرەتتى شينحۋا اگەنتتىگىنىڭ ءتىلشىسى پاڭ شيڭلەي تۇسىرگەن
شينحۋا اگەنتتىگىنىڭ 9 - ايدىڭ 1 - كۇنى بەيجيڭنەن بەرگەن حابارى (ءتىلشى جىڭ ميڭدا). 9 - ايدىڭ 1 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن بەنين زۇڭتۇڭى تالونمەن كەڭەس وتكىزدى. ەكى ەلدىڭ مەملەكەت باسشىلارى جۇڭگو مەن بەنيننىڭ ستراتەگيالىق سەرىكتەستىك قارىم - قاتىناس ورناتقاندىعىن جاريالادى.
شي جينپيڭ بىلاي دەپ اتاپ كورسەتتى: جۋىق جىلداردان بەرى جۇڭگو − بەنين قارىم - قاتىناسىنىڭ دامۋ جاعدايى جاقسى بولىپ، ەكى ەلدىڭ ناقتى سەلبەستىگى تىڭعىلىقتى ىلگەرىلەدى، ەكى جاق ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءوزارا ءتۇسىنىسىپ، ءوزارا قولداۋ كورسەتىپ، كوپ جاقتى ورىنداردا تاماشا بايلانىستى، سايكەسۋدى ساقتادى، ەكى ەل حالقىنىڭ دوستىعى كۇن سايىن جۇرت جۇرەگىنە تەرەڭ ۇيالادى. جۇڭگو جاق جۇڭگو − بەنين قارىم - قاتىناسىن دامىتۋعا باسا ءمان بەرەدى، بەنين جاقپەن ءارقايسى جىكتەگىلەر ارا بارىس - كەلىستى جيىلەتىپ، ءار سالاداعى دوستىقتى، ءوزارا تيىمدىلىك جەتكىزۋدى، سەلبەستىكتى تەرەڭدەتىپ، جۇڭگو − بەنين قارىم - قاتىناسىنىڭ ۇزدىكسىز تىڭ ساتىعا كوتەرىلۋىن ىلگەرىلەتۋدى قالايدى.
شي جينپيڭ جۇڭگو ۇلگىسىندەگى وسىزامانداندىرۋدىڭ ماندىك مازمۇنىن تەرەڭ بايىمداپ، بىلاي دەپ باسا دارىپتەدى: جۇڭگونىڭ باتىستىكىنە ۇقسامايتىن وسىزامانداندىرۋ جولىمەن ءجۇرۋىنىڭ تەتىگى باستان - اياق جۇڭگونىڭ مەملەكەت جاعدايىن نەگىزگە الۋعا تاباندى بولۋىندا، جۇڭگونىڭ مەملەكەت جاعدايىنا ۇيلەسەتىن جۇڭگوشا سوتسياليزم جولىمەن جۇرۋگە تاباندى بولۋىندا. جۇڭگو جاق بەنيننىڭ ءوز ەلىنىڭ ءىس جۇزىندىك جاعدايىنا ۇيلەسەتىن دامۋ جولىن دەربەس، ءوز كۇشىنە سۇيەنە قاراستىرىپ، ”بەنيننىڭ ەڭسە كوتەرۋ“ ارمانىن ەرتەرەك جۇزەگە اسىرۋىن قولدايدى، بەنين جاقپەن ەل باسقارۋ تاجىريبەلەرى جونىندە اۋىس - كۇيىس جاساۋدى كۇشەيتىپ، رەفورما، دامۋ تاجىريبەلەرىن ءبولىسىپ، ءوزارا قولداۋدان جازباي، بىرگە دامۋدى، گۇلدەنۋدى جۇزەگە اسىرۋدى قالايدى. جۇڭگو جاق جۇڭگو كاسىپورىندارىن بەنينگە بارىپ قارجى قوسۋعا، سەلبەستىك جاساۋعا شابىتتاندىرادى، بەنين جاقتىڭ الەمدىك قىزمەت وتەۋ ساۋدا باسشىلار ءماجىلىسى، جۇڭگو − افريكا ەكونوميكا - ساۋدا كورمەسى سياقتى كولەمدى كورمە - ماجىلىستەردەن تولىق پايدالانىپ، اناعۇرلىم كوپ ەرەكشە ساپالى ونىمدەردىڭ جۇڭگو بازارىنا كىرۋىن ىلگەرىلەتۋىن قارسى الادى. جۇڭگو جاق بەنين جاقپەن گۋمانيتارلىق اۋىس - كۇيىستى جيىلەتىپ، وقۋ - اعارتۋ، باۋلۋ، ەمدەۋ - دەنساۋلىق ساقتاۋ سياقتى سالالارداعى سەلبەستىكتى كۇشەيتىپ، لۋبان شەبەرحاناسىن بىرگە قۇرۋعا ۇزدىكسىز قولداۋ كورسەتۋدى قالايدى. ەكى جاق تاعى لاڭكەستىككە قارسى تۇرۋ بويىنشا حاۋىپسىزدىك سەلبەستىگىن كۇشەيتىپ، حالىقارالىق ىستەردەگى سايكەسۋدى نىعايتىپ، وركەندەپ كەلە جاتقان ەلدەردىڭ ورتاق مۇددەسىن جانە حالىقارالىق ادىلدىكتى، ادىلەتتىلىكتى قورعاۋى، ءوڭىردىڭ جانە دۇنيە ءجۇزىنىڭ بەيبىتشىلىگى مەن دامۋىن قورعاۋى كەرەك.
شي جينپيڭ بىلاي دەپ اتاپ كورسەتتى: بيىل مەنىڭ افريكاعا شىنايى، تۋىسقاندىق نيەتپەن مامىلە جاساۋ ساياساتتىق ۇستانىمىن العا قويعاندىعىمنىڭ 10 جىلدىعى. 10 جىلدان بەرى جۇڭگو افريكاداعى دوستارعا باستان - اياق شىنايى مامىلە جاساپ، افريكانىڭ دامۋىنا ىزگى نيەتپەن قولداۋ كورسەتتى، جۇڭگو − افريكا سەلبەستىگى تۇستىك ەلدەر سەلبەستىگىنىڭ جانە حالىقارانىڭ افريكامەن سەلبەستىگىنىڭ ۇلگىسىنە اينالدى. جۇڭگو افريكانىڭ دۇنيە ءجۇزى ساياسيىنىڭ، ەكونوميكاسىنىڭ، وركەنيەتىنىڭ دامۋىنداعى ماڭىزدى ۇيەككە اينالۋىن قولدايدى، ءوزىنىڭ جاڭا دامۋى ارقىلى افريكاعا جاڭا وراي جاراتىپ، بەنيندى قامتىعان افريكالىق باۋىرلاستارمەن بىرگە جۇڭگو − افريكا سەلبەستىك تالقى مىنبەرىنىڭ جەتىستىكتەرىن ويداعىداي تياناقتاندىرىپ، ”ءبىر بەلدەۋ، ءبىر جولدى“ بىرگە قۇرۋ باستاماسىنىڭ، الەمدىك دامۋ باستاماسىنىڭ افريكا وداعىنىڭ «2063 - جىلعا دەيىنگى كەڭەستىك تارتىبىمەن» جانە افريكا ەلدەرىنىڭ دامۋ ستراتەگياسىمەن ىشكەرىلەي ۇشتاسۋىن ىلگەرىلەتىپ، افريكانىڭ ەكونوميكانىڭ جاندانۋى مەن باياندى دامۋدى جۇزەگە اسىرۋىن قولداپ، جاڭا داۋىردەگى جۇڭگو − افريكا تاعدىرلاس ورتاق تۇلعاسىن قول ۇستاسا قۇرۋدى قالايدى.
تالون مىنالاردى ءبىلدىردى: جۇڭگو بەنيننىڭ ۇلى دوسى، ەكى ەل حالقىنىڭ تەرەڭ شىنايى دوستىعى بار. بەنين مەن جۇڭگو ەكى ەلدىڭ جوعارى ساپالى سەلبەستىگى، ءوزارا تيىمدىلىك جەتكىزىپ، تەڭ يگىلىككە كەنەلۋى بەنيننىڭ ونەركاسىپتەنۋ اياق الىسىن پارمەندى جەبەپ، بەنيننىڭ مەملەكەتتىڭ دامۋىن اناعۇرلىم ويداعىداي جۇزەگە اسىرۋىنا دەم بەرەدى. دەموكراتيانىڭ تەك ءبىر عانا ۇلگىسى بولماۋى كەرەك، ناعىز دەموكراتيا بۇكىل حالىقتى باقىتقا كەنەلتۋگە ءتيىس. بۇل جاعىندا جۇڭگو باسقا ەلدەرگە تاماشا ۇلگى كورسەتتى. جۇڭگو ءوزىنىڭ قۇلشىنىسى مەن كۇرەسى ارقىلى دۇنيە ءجۇزىن جالت قاراتقان تابىستارعا قول جەتكىزىپ، جۇڭگو حالقىنىڭ باقىتىن كوزدەپ قانا قويماي، باسقا ەلدەردىڭ دامۋعا ۇمتىلۋىنا دا قىمباتتى كومەك كورسەتىپ، ماڭىزدى ۇلەس قوستى. بەنين جۇڭگونىڭ ەل باسقارۋ تاجىريبەسىنەن كوپ يگىلىككە كەنەلدى، جۇڭگومەن شىنايى ستراتەگيالىق سەرىكتەستىك قارىم - قاتىناس ورناتىپ، ەكى ەلدىڭ ءار سالاداعى ءوزارا ءتيىمدى سەلبەستىگىن تەرەڭدەتىپ، جۇڭگو سياقتى مەملەكەتتىڭ دامۋىن، گۇلدەنۋىن جۇزەگە اسىرۋدى قالايدى. بەنين جاق ءبىر جۇڭگو ساياساتىن باتىل اتقارادى، ءتوراعا شي جينپيڭ العا قويعان الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن قولدايدى، جۇڭگو جاقپەن تىعىز بايلانىس جاساپ، سەلبەسىپ، ”ءبىر بەلدەۋ، ءبىر جولدى“ بىرگە قۇرۋدى بەلسەنە ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.
كەڭەستەن كەيىن ەكى ەلدىڭ مەملەكەت باسشىلارى ”ءبىر بەلدەۋ، ءبىر جولدى“ بىرگە قۇرۋ، جاسىل دامۋ، سيفرلى ەكونوميكا، اۋىل شارۋاشىلىعى، ازىق - تۇلىك، دەنساۋلىق ساقتاۋ، سالاماتتىق سياقتى سالالارداعى كوپ ءتۇرلى ەكى جاقتى سەلبەستىك حۇجاتتارىنا قول قويىلۋىنا بىرگە كۋا بولدى.
ەكى جاق «جۇڭحۋا حالىق رەسپۋبليكاسى مەن بەنين رەسپۋبليكاسىنىڭ ستراتەگيالىق سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىن» جاريالادى.
كەڭەستىڭ الدىندا شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا تالوندى قارسى الۋ سالتىن وتكىزدى.
تالون كەلگەندە قۇرمەت قاراۋىلى قاتار تۇزەپ قۇرمەت ءبىلدىردى. ەكى ەلدىڭ مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن بەنيننىڭ مەملەكەت ءانىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. تالون شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن كوردى.
سول كۇنى كەشتە شي جينپيڭ حالىق سارايىنىڭ جينسى زالىندا تالوندى قارسى الۋ قوناعاسىن وتكىزدى.
ۋاڭ ي جوعارىداعى قيمىلدارعا قاتىناستى.
