4 - ايدىڭ 19 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن گابون زۇڭتۇڭى بونگومەن كەڭەس وتكىزدى. سۋرەتتە: كەڭەستەن ىلگەرى شي جينپيڭ مەن حانىمى پىڭ لييۋان بونگومەن جانە ونىڭ حانىمى سيلۆيامەن بىرگە سۋرەتكە ءتۇستى.
□ سۋرەتتى شينحۋا اگەنتتىگىنىڭ ءتىلشىسى لي شۋەرىن تۇسىرگەن
شينحۋا اگەنتتىگىنىڭ 4 - ايدىڭ 19 - كۇنى بەيجيڭنەن بەرگەن حابارى (ءتىلشى جىڭ ميڭدا). 4 - ايدىڭ 19 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن گابون زۇڭتۇڭى بونگومەن كەڭەس وتكىزدى. ەكى ەلدىڭ مەملەكەت باسشىلارى جۇڭگو مەن گابوننىڭ جاپپاي سەلبەستىك سەرىكتەستىك قارىم - قاتىناسىن جاپپاي ستراتەگيالىق سەلبەستىك سەرىكتەستىك قارىم - قاتىناسىنا كوتەرۋدى ۇيعاردى.
شي جينپيڭ بونگونىڭ جۇڭگوعا ساپارلاي كەلگەندىگىن قارسى الاتىندىعىن ءبىلدىردى. شي جينپيڭ بىلاي دەپ اتاپ كورسەتتى: كەلەر جىلى ءبىز جۇڭگو − گابون ديپلوماتيالىق قارىم - قاتىناس ورناتقاندىعىنىڭ 50 جىلدىعىن قارسى الامىز. جارتى عاسىردان بەرى، ەكى ەلدىڭ نەشە ۇرپاق باسشىلارىنىڭ كوڭىل ءبولىپ، جەتەكشىلىك ەتۋىندە جۇڭگو − گابون دوستىعى باستان - اياق قۇرىشتاي بەرىك بولدى. ەكى جاق ءبىرىن - ءبىرى باتىل قولداپ، ەكى ەلدىڭ ورتاق مۇددەسىن جانە حالىقارالىق ادىلدىكتى، تۋراشىلدىقتى قورعادى. جۇڭگو گابوننىڭ شىنايى دوسى. ءسىزدىڭ وسى رەتكى جۇڭگوعا ساپارىڭىز جۇڭگو − گابون قارىم - قاتىناسىنىڭ ماڭىزدىلىعى مەن جوعارى دەڭگەيىن تاعى ءبىر رەت تولىق ايگىلەدى. جۇڭگو − گابون قارىم - قاتىناسىن ىشكەرىلەي، ءۇرتىس ىلگەرىلەتۋ ەكى ەلدىڭ ورتاق جانە ۇزاق بولاشاقتىق مۇددەسىنە ۇيلەسەدى ءارى ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ جونىنەن ماڭىزدى ۇلگى كورسەتۋ رولى بار. جۇڭگو جاق گابون جاقپەن بىرگە جۇڭگو مەن گابوننىڭ جاپپاي ستراتەگيالىق سەلبەستىك سەرىكتەستىك قارىم - قاتىناسىنىڭ ورنىقتى دا باياندى بولۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: جۇڭگو قازىر جوعارى ساپالى دامۋ مەن جۇڭگو ۇلگىسىندەگى وسىزامانداندىرۋدى جاپپاي ىلگەرىلەتۋدە، گابون دا ”جاڭادان كوركەيگەن گابوندى“ قۇرىپ شىعۋ ستراتەگيالىق نىساناسىن ەرتەرەك جۇزەگە اسىرۋعا بەلسەنە كۇش سالۋدا. جۇڭگو جاق گابون جاقپەن ەل باسقارۋ جاعىنداعى تاجىريبە اۋىس - كۇيىسىن كۇشەيتىپ، ستراتەگيالىق ءوزارا سەنىمدىلىكتى تەرەڭدەتىپ، ءبىر - ءبىرىنىڭ وزەكتى مۇددەسى مەن كەلەلى ءجىتى قاداعالاپ وتىرعان قاتىستى ماسەلەلەردە ءبىرىن - ءبىرى باتىل قولداۋىن قالايدى. جۇڭگو جاق گابون جاقتىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن باتىل قولدايدى، گابون جاقپەن ستراتەگيالىق توعىسۋدى كۇشەيتىپ، نەگىزدىك قۇرىلعى قۇرىلىسى، ورمان شارۋاشىلىعى، بالىق شارۋاشىلىعى، سيفرلى ەكونوميكا جانە كاسىپ سالاسى باقشاسى قۇرىلىسى سياقتى سالالارداعى سەلبەستىكتى ىلگەرىلەتىپ، گابوننىڭ ەكونوميكاسىنىڭ كوپ نەگىزدى دامۋىن جانە كاسىپ سالاسىنىڭ دارەجەسىن ءوسىرۋىن جۇزەگە اسىرۋىنا قولداۋ كورسەتىپ، جاسىل ”ءبىر بەلدەۋ، ءبىر جولدى“ بىرگە قۇرۋدى ىلگەرىلەتىپ، كليمات وزگەرىسىنە توتەپ بەرۋ، تۇستىك ەلدەر سەلبەستىگى ۇلگىسىن تۇلعالاۋدى قالايدى. ەكى جاق گۋمانيتارلىق اۋىس - كۇيىستى تەرەڭدەتىپ، ساياحات، اۋىل - قىستاقتى گۇلدەندىرۋ، كەدەيلىكتى ازايتۋ، شارۋالارعا تيىمدىلىك جاساۋ سياقتى جاقتارداعى سەلبەستىكتى كۇشەيتۋى كەرەك. ەكى جاق تاعى بىرلەسكەن مەملەكەتتەر ۇيىمى سياقتى كوپ جاقتى تۇعىردا ستراتەگيالىق سەلبەستىكتى كۇشەيتىپ، دۇنيە ءجۇزىنىڭ بەيبىتشىلىگىن، دامۋىن جانە حالىقارالىق ادىلدىكتى، تۋراشىلدىقتى قورعاپ، وركەندەپ كەلە جاتقان ەلدەردىڭ ورتاق مۇددەسىن قورعاۋى كەرەك. جۇڭگو جاق گابون جاقپەن بىرگە قۇلشىنىپ، الداعى جەردە ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن قارسى الۋدى وراي ەتىپ، ەكى جاقتىڭ دوستىق سەلبەستىگىنىڭ بيىك ورەگە كوتەرىلۋىنە مۇمكىندىك جاساۋدى قالايدى.
شي جينپيڭ بىلاي دەپ اتاپ كورسەتتى: قازىرگى دۇنيە جۇزىندە كوپ ءتۇرلى سىن - سايىستار جانە سان الۋان داعدارىستار ارالاسىپ، ءوزارا قاباتتاسىپ وتىر. جۇڭگو مەن افريكا ەلدەرى بۇرىنعى ءارقانداي كەزدەگىدەن دە ىنتىماقتى، سەلبەستىكتى كۇشەيتۋدى اناعۇرلىم قاجەت ەتەدى. ەكى جاق ”جۇڭگو − افريكا دوستىق سەلبەستىك رۋحىنا“ مۇراگەرلىك ەتىپ جانە ونى اسقاقتاتىپ، بەيبىت قاتار تۇرۋ 5 ءتۇرلى پرينسيبى سياقتى حالىقارالىق قارىم - قاتىناستىڭ نەگىزگى ولشەمىنە تاباندى بولىپ، ءارقانداي فورماداعى زورەكەرلىككە جانە وكتەمدىك ساياسيعا باتىل قارسى تۇرادى، وزگە ەلدىڭ ىشكى ىسىنە كيلىگۋگە قارسى تۇرىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتەدى. جۇڭگو جاق افريكانىڭ وزىندىك ەرەكشەلىككە يە، دەربەس، وزىنە - ءوزى قوجايىن بولاتىن دامۋ جولىمەن ءجۇرۋىن باتىل قولدايدى، افريكانىڭ استىق حاۋىپسىزدىگىن، ونەركاسىپتەنۋ اياق الىسىن، جاسىل دامۋدى ىلگەرىلەتۋىن باتىل قولدايدى، افريكانىڭ دۇنيە ءجۇزىنىڭ ساياسي، ەكونوميكا، وركەنيەت دامۋىنىڭ ماڭىزدى ءبىر ۇيەگىنە اينالۋىن باتىل قولدايدى، ءوزىنىڭ تىڭ دامۋى ارقىلى افريكا جاقتى جاڭا ورايمەن قامداپ، جۇڭگو − افريكا ناقتى ىستەر سەلبەستىگىن تۇستىك ەلدەر سەلبەستىگىنىڭ جانە حالىقارانىڭ افريكاعا قاراتىلعان سەلبەستىگىنىڭ تيپتىك ۇلگىسى ەتىپ تۇلعالاپ شىعۋدى قالايدى.
بونگو مىنالاردى ءبىلدىردى: ءتوراعا شي جينپيڭ تاعى ءبىر رەت سايلانىپ، ۇزدىكسىز مىندەت وتەگەننەن كەيىن كوپ ۇزاماي، ۇسىنىس بويىنشا جۇڭگوعا ساپارلاي كەلگەندىگىمدى توتەنشە داڭق سانايمىن، مەن جۇڭگو كوممۋنيستىك پارتياسى 20 - قۇرىلتايىنىڭ جانە جۇڭگونىڭ مەملەكەتتىك ەكى ءماجىلىسىنىڭ تابىسپەن اشىلعاندىعىن تاعى ءبىر رەت قۇتتىقتايمىن، 2 رەتكى سالتاناتتى جينالىس جۇڭگو حالقىنىڭ ءتوراعا شي جينپيڭگە دەگەن وسكەلەڭ سەنىمىن تولىق ايگىلەپ قانا قويماي، ءبىزدىڭ دە جۇڭگونىڭ گۇلدەنۋ، دامۋ جولىندا ۇزدىكسىز اناعۇرلىم كوپ تابىسقا قول جەتكىزەتىندىگىنە ءتىپتى دە بەرىك سەنىمدە بولۋىمىزعا مۇمكىندىك جاسادى. گابون جاق ءبىر جۇڭگو ساياساتىن باتىل اتقارادى، ءتوراعا شي جينپيڭ ورتاعا قويعان ”ءبىر بەلدەۋ، ءبىر جولدى“ بىرگە قۇرۋ، الەمدىك دامۋ باستاماسى، الەمدىك حاۋىپسىزدىك باستاماسى جانە ادامزاتتىڭ تاعدىرلاس ورتاق تۇلعاسىن قۇرۋ سياقتى ماڭىزدى ۇستانىمداردى قولدايدى. گابون - جۇڭگو ەكى جاقتا وسكەلەڭ ساياسي ءوزارا سەنىم بار، باستان - اياق ءوزارا قۇرمەت ەتىپ، ءوزارا قولداۋ كورسەتىپ كەلەدى. جۇڭگو جاقتىڭ ۇزاق ۋاقىتتان بەرى گابونعا كورسەتكەن قىمباتتى كومەگىنە، گابوننىڭ ەكونوميكاسىنىڭ كوپ نەگىزدى دامۋىن جانە ونەركاسىپتەنۋ اياق الىسىن جەبەۋ ءۇشىن ماڭىزدى رول اتقارعاندىعىنا العىس ايتامىن، ەكى جاقتىڭ نەگىزدىك قۇرىلعى، اۋىل شارۋاشىلىعى جانە ساياحات سياقتى سالالارداعى سەلبەستىكتى اناعۇرلىم كۇشەيتۋىن ءۇمىت ەتەمىن، جۇڭگو جاق كاسىپورىندارىنىڭ گابونعا كەلىپ ونەركاسىپ باقشاسى قۇرىلىسىنا ات سالىسۋىن قارسى الامىز، جۇڭگو جاق كاسىپورىندارىنا تاماشا ورتا ازىرلەۋدى قالايمىز. گابون جاق جۇڭگو جاقپەن كەلەر جىلعى ديپلوماتيالىق قارىم - قاتىناس ورناتقاندىقتىڭ 50 جىلدىعىن بىرگە سالتاناتپەن قۇتتىقتاپ، دوستىق سەلبەستىكتى بەكەمدەپ، تەرەڭدەتىپ، ەكى ەلدىڭ جاپپاي ستراتەگيالىق سەلبەستىك سەرىكتەستىك قارىم - قاتىناسىن ىلگەرىلەتۋدى كۇتەدى. گابون مەن جۇڭگونىڭ كوپتەگەن حالىقارالىق ىستەردە ۇقساس نەمەسە قارايلاس تۇرعىسى بار، تۇگەلدەي ءار ەلدىڭ يەلىك ۇقىعىنا قۇرمەت ەتۋدى دارىپتەپ، وزگە ەلدەردىڭ ىشكى ىسىنە كيلىگۋگە قارسى تۇرادى، ادامدىق ۇقىق ماسەلەسىن ساياسيلاندىرۋعا جانە قوس ولشەم قولدانۋعا قارسى تۇرادى. گابون جاق جۇڭگو جاقپەن كوپ جاقتى ستراتەگيالىق ىستەستىكتى ۇزدىكسىز جيىلەتىپ، جۇڭگو − افريكا سەلبەستىك تالقى مىنبەرىنىڭ جانە افريكا − جۇڭگو قارىم - قاتىناسىنىڭ اناعۇرلىم ويداعىداي دامۋىن جۇزەگە اسىرۋدى، اناعۇرلىم كوپ تابىستارعا قول جەتكىزۋىن ىلگەرىلەتۋدى قالايدى.
كەڭەستەن كەيىن ەكى ەل مەملەكەت باسشىلارى قارجى قوسۋ، اۋىل شارۋاشىلىعى، تۇرعىن ءۇي جانە قالا قۇرىلىسى، كليمات وزگەرىسى سياقتى سالالاردا كوپ ءتۇرلى ەكى جاقتى سەلبەستىك حۇجاتتارىنىڭ قول قويىلۋىنا بىرگە كۋا بولدى.
ەكى جاق «جۇڭحۋا حالىق رەسپۋبليكاسى مەن گابون رەسپۋبليكاسىنىڭ جاپپاي ستراتەگيالىق سەلبەستىك سەرىكتەستىك قارىم - قاتىناس ورناتۋ جونىندەگى بىرلەسكەن مالىمدەمەسىن» جاريالادى.
كەڭەستەن ىلگەرى شي جينپيڭ حالىق سارايىنىڭ سولتۇستىك زالىندا بونگونى قارسى الۋ سالتىن وتكىزدى.
بونگو كەلگەندە تيان - انمىن الاڭىندا 21 رەت قۇرمەت ساليۋتى اتىلدى، قۇرمەت قاراۋىلى قاتار تۇزەپ قۇرمەت ءبىلدىردى. ەكى ەل مەملەكەت باسشىلارى پارات مىنبەسىنە شىقتى، اسكەري وركەستر جۇڭگو مەن گابون ەكى ەلدىڭ مەملەكەت ءانىن ورىندادى. بونگو شي جينپيڭنىڭ سەرىك بولۋىمەن جۇڭگو حالىق ازاتتىق ارمياسى قۇرمەت قاراۋىلىنىڭ سالتانات قاتارىن تاماشالادى.
شي جينپيڭنىڭ حانىمى پىڭ لييۋان مەن بونگونىڭ حانىمى سيلۆيا قارسى الۋ سالتىنا بىرگە قاتىناستى.
سول كۇنى كەشتە شي جينپيڭ مەن حانىمى پىڭ لييۋان حالىق سارايىنىڭ جينسى زالىندا بونگو مەن حانىمى سيلۆيانى قارسى الۋ قوناعاسىن وتكىزدى.
ۋاڭ ي، چين گاڭ قاتارلىلار جوعارىداعى قيمىلدارعا قاتىناستى.
