جۇڭگو مەن ازەربايجاننىڭ ديپلوماتيالىق قارىم - قاتىناس ورناتقاندىعىنىڭ 30 جىلدىعى بايلانىسىمەن
شي جينپيڭ ازەربايجاننىڭ زۇڭتۇڭى اليەۆپەن ءوزارا قۇتتىقتاۋ تەلەگرامماسىن جولدادى
شينحۋا اگەنتتىگىنىڭ 4 - ايدىڭ 2 - كۇنى بەيجيڭنەن بەرگەن حابارى. 4 - ايدىڭ 2 - كۇنى مەملەكەت ءتوراعاسى شي جينپيڭ ازەربايجاننىڭ زۇڭتۇڭى اليەۆپەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 30 جىلدىعىن قۇتتىقتادى.
شي جينپيڭ بىلاي دەپ اتاپ كورسەتتى: جۇڭگو مەن ازەربايجان ءداستۇرلى دوس سەلبەستىك سەرىكتەستەر. ديپلوماتيالىق قارىم - قاتىناس ورناتقان 30 جىلدان بەرى جۇڭگو مەن ازەربايجان قارىم - قاتىناسى اقاۋسىز، ورنىقتى دامۋ جاعدايىن ساقتادى. ەكى جاقتىڭ ساياسي ءوزارا سەنىمدىلىگى تەرەڭدەپ، ءار سالاداعى سەلبەستىگى تىڭعىلىقتى ىلگەرىلەپ، حالىقارالىق جانە وڭىرلىك ىستەردەگى سەلبەستىگى كۇن سايىن قويۋلادى. جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان كەيىن، جۇڭگو مەن ازەربايجان ءوزارا قارايلاسىپ، قيىندىقتى بىلەك بىرىكتىرە جەڭىپ، ەكى ەل حالقىنىڭ ءداستۇرلى دوستىعىن ايگىلەدى.
شي جينپيڭ بىلاي دەپ باسا دارىپتەدى: مەن جۇڭگو مەن ازەربايجان قارىم - قاتىناسىنىڭ دامۋىنا ايرىقشا ءمان بەرەمىن، اليەۆ زۇڭتۇڭمەن بىرگە قۇلشىنىپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 30 جىلدىعىن وراي ەتىپ، جۇڭگو مەن ازەربايجان قارىم - قاتىناسىنىڭ جانە ەكى جاقتىڭ ءار سالاداعى سەلبەستىگىنىڭ اناعۇرلىم مول جەتىستىكتەرگە قول جەتكىزۋىن ىلگەرىلەتىپ، ەكى ەل مەن ەكى ەل حالقىن باقىتقا كەنەلتۋدى قالايمىن.
اليەۆ مىنانى ءبىلدىردى: ازەربايجان مەن جۇڭگو قارىم - قاتىناسى ءوزارا سەنىمدىلىك نەگىزىندە ۇزدىكسىز دامىدى، ەكى جاق ساياسي، ەكونوميكا - ساۋدا سياقتى سالالاردا جوعارى دەڭگەيدەگى ءوزارا پايدا جەتكىزەتىن سەلبەستىك ورىستەتتى، كوپ جاقتى سالالارداعى سەلبەستىگى دە سۇبەلى جەتىستىكتەرگە قول جەتكىزدى. ازەربايجان جاق ”ءبىر بەلدەۋ، ءبىر جول“ باستاماسىن قولدايدى، ازەربايجان مەن جۇڭگونىڭ ءداستۇرلى دوستىق قارىم - قاتىناسىنىڭ ۇزدىكسىز تەرەڭدەپ، ەكى ەل حالقىن باقىتقا كەنەلتەتىندىگىنە سەنەمىن.
