شينحۋا اگەنتتىگىنىڭ 3 - ايدىڭ 23 - كۇنى بەيجيڭنەن بەرگەن حابارى. 3 - ايدىڭ 23 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ جۇڭگو كوممۋنيستىك پارتياسى مەن كۋبا كوممۋنيستىك پارتياسىنىڭ 4 - كەزەكتى نازاريا زەرتتەۋ - تالقى ماجىلىسىنە قۇتتىقتاۋ حات جولدادى.
شي جينپيڭ مىنالاردى ءبىلدىردى: جۇڭگو كوممۋنيستىك پارتياسى مەن كۋبا كوممۋنيستىك پارتياسى ءوز ەلدەرىنىڭ سوتسياليزم ىستەرىنىڭ باسشىلىق ۇيتقىسى. جۇڭگو كوممۋنيستىك پارتياسىنىڭ 18 - قۇرىلتايىنان بەرى جۇڭگو كوممۋنيستىك پارتياسى جۇڭگو حالقىن ىنتىماقتاستىرىپ، باستاپ، رەفورما جاساۋ، ەسىك اشۋ جانە سوتسياليستىك وسىزامانداندىرۋ قۇرىلىسىندا تاريحي تابىسقا قول جەتكىزدى، جۇڭگوشا سوتسياليزم جاڭا داۋىرگە ءوتتى. كۋبا كوممۋنيستىك پارتياسىنىڭ 8 - قۇرىلتايى كەزەكتەگى جانە الداعى ءبىر مەزگىلدەگى كۋبانىڭ پارتيا مەن مەملەكەت ىستەرىنىڭ دامۋى جونىندە ستراتەگيالىق جوسپار جانە ورنالاستىرۋ جاساپ، كۋبانىڭ گۇلدەنگەن، دەموكراتيالى، باياندى سوتسياليزم قۇرۋى ءۇشىن جوبا كەسكىندەدى. جاڭا جاعداي، جاڭا مىندەت الدىندا، جۇڭگو − كۋبا ەكى پارتياسى ”پارتيا قۇرىلىسىن كۇشەيتىپ، جاڭا داۋىردەگى جۇڭگو، كۋبا سوتسياليزمىنىڭ جاڭا جورىعىندا ەرلىكپەن العا باسۋدى“ نەگىزگى تاقىرىپ ەتىپ نازاريالىق زەرتتەۋ - تالقى جۇرگىزۋى ءدال ۋاعىندا بولىپ وتىر، بۇل ءبىزدىڭ ءوز ەلدەرىمىزدىڭ مەملەكەت جاعدايىنا ۇيلەسەتىن سوتسياليزمدى دامىتۋ جولىن قاراستىرۋىمىز جونىنەن ماڭىزدى مانگە يە.
شي جينپيڭ بىلاي دەپ باسا دارىپتەدى: جۇڭگو كوممۋنيستىك پارتياسى كۋبا كوممۋنيستىك پارتياسىمەن ماڭىزدى نازاريالىق جانە امالياتتىق ماسەلەلەر تۋرالى كوزقاراستارى جونىندە ىشكەرىلەي پىكىرلەسىپ، ءبىر - ءبىرىنىڭ ەل باسقارۋ تاجىريبەلەرىنەن ۇيرەنىپ، ۇلگى الىپ، ءوز - ءوزىنىڭ پارتيا قۇرىلىسى مەن سوتسياليزم ىستەرىنىڭ ۇزدىكسىز دامۋىن ىلگەرىلەتۋدى قالايدى.
4 - كەزەكتى جۇڭگو − كۋبا ەكى پارتيانىڭ نازاريا زەرتتەۋ - تالقى ءماجىلىسىن جۇڭگو كوممۋنيستىك پارتياسى ورتالىق كوميتەتىنىڭ سىرتپەن بايلانىس جاساۋ ءبولىمى مەن كۋبا كوممۋنيستىك پارتياسى ورتالىق كوميتەتىنىڭ حالىقارالىق قارىم - قاتىناس ءبولىمى بىرلەسىپ وتكىزدى، ءماجىلىس 3 - ايدىڭ 23 - ، 24 - كۇندەرى بەينە ەكران تاسىلىندە وتكىزىلەدى.
