1. اعىمداعى ورىن:
  2. باس بەت
  3. اعىم جاڭالىقتارى
  4. باس حابار
  5. زاڭ - ەرەجە

شي جينپيڭ جۇڭحۋا حالىق رەسپۋبليكاسىنىڭ بىرلەسكەن مەملەكەتتەر ۇيىمىنداعى زاڭدى ورنى قالپىنا كەلگەندىگىنىڭ 50 جىلدىعىن ەسكە ءتۇسىرۋ ماجىلىسىنە قاتىناستى ءارى ماڭىزدى ءسوز سويلەدى

日期:2021年10月26日
来源:新疆日报
【字体:

جۇڭگونىڭ بەيبىت دامۋ جولىمەن، رەفورما جاساۋ، ەسىك اشۋ جولىمەن، كوپ جاقتىلىق جولىمەن جۇرۋگە تاباندى بولاتىندىعىن باسا دارىپتەدى

ءار ەلدى بۇكىل ادامزاتقا ورتاق قۇندىلىقتاردى اسقاقتاتىپ، ناعىز كوپ جاقتىلىقتى امالياتتا ايگىلەۋگە، ادامزاتتىڭ تاعدىرلاس ورتاق تۇلعاسىن قول ۇستاسا قۇرۋعا ۇندەدى

  شينحۋا اگەنتتىگىنىڭ 10 - ايدىڭ 25 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 10 - ايدىڭ 25 - كۇنى بەيجيڭدە جۇڭحۋا حالىق رەسپۋبليكاسىنىڭ بىرلەسكەن مەملەكەتتەر ۇيىمىنداعى زاڭدى ورنى قالپىنا كەلگەندىگىنىڭ 50 جىلدىعىن ەسكە ءتۇسىرۋ ماجىلىسىنە قاتىناستى ءارى ماڭىزدى ءسوز سويلەدى. شي جينپيڭ بىلاي دەپ باسا دارىپتەدى: جاڭا جۇڭگونىڭ بىرلەسكەن مەملەكەتتەر ۇيىمىنداعى زاڭدى ورنى قالپىنا كەلگەننەن بەرگى 50 جىل جۇڭگونىڭ بەيبىت دامىعان، ادامزاتتى باقىتقا كەنەلتكەن 50 جىل بولدى. جۇڭگو بەيبىت دامۋ جولىمەن جۇرۋگە تاباندى بولىپ، باستان - اياق دۇنيە ءجۇزى بەيبىتشىلىگىنىڭ قۇرۋشىسى بولادى؛ رەفورما جاساۋ، ەسىك اشۋ جولىمەن جۇرۋگە تاباندى بولىپ، باستان - اياق الەمدىك دامۋدىڭ ۇلەس قوسۋشىسى بولادى؛ كوپ جاقتىلىق جولىمەن جۇرۋگە تاباندى بولىپ، باستان - اياق حالىقارالىق ءتارتىپتىڭ قورعاۋشىسى بولادى. جۇڭگو ءار ەلمەن بىرگە اقىلداسۋ، بىرگە قۇرۋ، بىرگە يگىلىكتەنۋ ۇستانىمىن بەرىك ۇستانىپ، بۇكىل ادامزاتقا ورتاق قۇندىلىقتاردى اسقاقتاتىپ، ناعىز كوپ جاقتىلىقتى امالياتتا ايگىلەپ، تاريحتىڭ دۇرىس جاعىندا تۇرىپ، ادامزاتتىڭ العا باسۋ جاعىندا تۇرىپ، دۇنيە ءجۇزىنىڭ باياندى، بەيبىت دامۋىن جۇزەگە اسىرۋ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ جولىندا قاجىماي - تالماي كۇرەس جۇرگىزۋدى قالايدى.

  جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت شۋجيچۋىنىڭ شۋجيى ۋاڭ حۋنيڭ ماجىلىسكە قاتىناستى.

  التىن كۇزدەگى بەيجيڭدە قوڭىر كۇزدىڭ سالقىن سامالى ەسىپ، كوگىلدىر اسپاندا اقشا بۇلتتار باياۋ قالقيدى. نەگىزگى ءماجىلىس ورنى حالىق سارايىنىڭ جينسى زالىندا شىراقتار سامالاداي جارقىراپ، گۇل - بايشەشەك قۇلپىرا اشىلدى. جۇڭحۋا حالىق رەسپۋبليكاسىنىڭ مەملەكەت تۋى مەن بىرلەسكەن مەملەكەتتەر ۇيىمىنىڭ تۋى ءبىر - بىرىنە كورىك بەرىپ، بىرلەسكەن مەملەكەتتەر ۇيىمىنا مۇشە ەلدەردىڭ مەملەكەت تۋلارىنان قۇرالعان تۋلار شەبى ايبىندى بەينە اڭداتىپ تۇر.

  «بەيبىتشىلىك − تاعدىرلاس ورتاق تۇلعا» اتتى مۋزيكا ءۇنى ىشىندە شي جينپيڭ ءماجىلىس زالىنا كىردى. ءماجىلىس زالىنان دۋ قول شاپالاق ءۇنى كوتەرىلدى.

  شي جينپيڭ ماڭىزدى ءسوز سويلەدى.

  شي جينپيڭ بىلاي دەپ اتاپ كورسەتتى: 50 جىلدىڭ الدىنداعى وسى كۇندە 26 - كەزەكتى بىرلەسكەن مەملەكەتتەر ۇيىمىنىڭ جينالىسى باسىم كوپ داۋىسپەن 2758 - ءنومىرلى قاۋلىنى ماقۇلداپ، جۇڭحۋا حالىق رەسپۋبليكاسىنىڭ بىرلەسكەن مەملەكەتتەر ۇيىمىنداعى بارلىق ۇقىعىن قالپىنا كەلتىرۋدى، جۇڭحۋا حالىق رەسپۋبليكاسى ۇكىمەتى ۋاكىلى − جۇڭگونىڭ بىرلەسكەن مەملەكەتتەر ۇيىمىنداعى بىردەن - ءبىر زاڭدى ۋاكىلى ەكەندىگىن مويىنداۋدى ۇيعاردى. بۇل جۇڭگو حالقىنىڭ جەڭىسى، سونداي - اق دۇنيە جۇزىندەگى ءار ەل حالقىنىڭ جەڭىسى!

  شي جينپيڭ بىلاي دەپ باسا دارىپتەدى: جاڭا جۇڭگونىڭ بىرلەسكەن مەملەكەتتەر ۇيىمىنداعى زاڭدى ورنىنىڭ قالپىنا كەلۋى دۇنيە جۇزىندەگى ءىرى وقيعا ءارى بىرلەسكەن مەملەكەتتەر ۇيىمىنداعى ءىرى وقيعا. بۇل دۇنيە جۇزىندەگى بەيبىتشىلىكتى سۇيەتىن جانە ادىلەتتىلىكتى جاقتايتىن بارشا ەلدەردىڭ ورتاق قۇلشىنىسىنىڭ ناتيجەسى، دۇنيە ءجۇزى جان سانىنىڭ تورتتەن ءبىرىن ۇستايتىن جۇڭگو حالقىنىڭ وسىدان باستاپ بىرلەسكەن مەملەكەتتەر ۇيىمى ساحناسىنا قايتا شىققاندىعىنىڭ بەلگىسى. بۇل جۇڭگو جونىنەن دە، دۇنيە ءجۇزى جونىنەن دە كەلەلى دە تەرەڭ ماڭىز الادى.

  شي جينپيڭ بىلاي دەپ باسا دارىپتەدى: جاڭا جۇڭگونىڭ بىرلەسكەن مەملەكەتتەر ۇيىمىنداعى زاڭدى ورنى قالپىنا كەلگەننەن بەرگى 50 جىل − جۇڭگو بەيبىت دامىعان، ادامزاتتى باقىتقا كەنەلتكەن 50 جىل بولدى.

  − وسى 50 جىلدا جۇڭگو حالقى ءوزىن تىنباي الۋەتتەندىرۋ رۋحىن باستان - اياق ساۋلەلەندىرىپ، اۋمالى - توكپەلى الماعايىپ جاعدايدا جۇڭگونىڭ العا باسۋ بەتالىسىن يگەرىپ، جۇڭگونىڭ جانە ادامزاتتىڭ دامۋىنىڭ ايبىندى تاريحي ەپوسىن جازدى. جاڭا جۇڭگو قۇرىلعاننان بەرگى مەملەكەت قۇرىلىسى مەن دامۋ نەگىزىندە، جۇڭگو حالقى رەفورما جاساۋدىڭ، ەسىك اشۋدىڭ تاريحي جاڭا كەزەڭىن اشىپ، جۇڭگوشا سوتسياليزمدى ءساتتى اشىپ جانە دامىتىپ، وندىرگىش كۇشتەردىڭ سالىستىرمالى مەشەۋ جاعدايىنان ەكونوميكالىق جالپى شاما جاعىندا دۇنيە ءجۇزى بويىنشا ەكىنشى ورىنعا ءوتۋ سىندى تاريحي سەرپىلىستى جۇزەگە اسىردى. قاجىرلىلىقپەن كۇرەس جۇرگىزۋ ارقىلى جۇڭگو حالقى ءوزىنىڭ قوس قولىمەن جۇڭحۋانىڭ بايتاق دالاسىندا جاپپاي دوڭگەلەك داۋلەتتى قوعام ورناتۋ نىساناسىن جۇزەگە اسىرىپ، كەدەيلىكتەن ارىلتۋدان قامال الۋ شايقاسىنىڭ جەڭىسىنە قول جەتكىزىپ، مۇلدەم كەدەيلىك ماسەلەسىن تاريحي سيپاتتى شەشىپ، جاپپاي سوتسياليستىك وسىزاماندانعان مەملەكەت قۇرۋدىڭ جاڭا ساپارىن باستاپ، جۇڭحۋا ۇلتىنىڭ ۇلى گۇلدەنۋىنىڭ نۇرلى بولاشاعىن قارسى الدى.

  − وسى 50 جىلدا جۇڭگو حالقى دۇنيە جۇزىندەگى ءار ەل حالقىمەن باستان - اياق ىنتىماقتاسىپ، سەلبەسىپ، حالىقارالىق ادىلدىك پەن تۋراشىلدىقتى قورعاپ، دۇنيە ءجۇزىنىڭ بەيبىتشىلىگى مەن دامۋىنا كەلەلى ۇلەس قوستى. جۇڭگو باستان - اياق دەربەس، ءوز - وزىنە قوجا بولۋ سىندى بەيبىت ديپلوماتيالىق ساياسات اتقارىپ، ادىلەتتىلىكتى جاقتاپ، تۋراشىلدىقتى قۋاتتاپ، زورەكەرلىك پەن وكتەمدىك ساياسيعا باتىل قارسى تۇردى. قالىڭ وركەندەپ كەلە جاتقان ەلدەردىڭ ءوز يەلىك ۇقىعىن، حاۋىپسىزدىگىن، دامۋ مۇددەسىن قورعاۋ جولىنداعى ادىلەتتى كۇرەسىنە باتىل قولداۋ كورسەتتى. جۇڭگو حالقى بىرگە دامۋدى ىلگەرىلەتۋگە كۇش سالىپ، ”تانزانيا - زامبيا تەمىر جولىنان“ ”ءبىر بەلدەۋ، ءبىر جول“ باستاماسىنا دەيىن وركەندەپ كەلە جاتقان ەلدەرگە قولىنان كەلگەنشە كومەكتەسىپ، جۇڭگونىڭ دامۋى ارقىلى دۇنيە جۇزىنە ۇزدىكسىز جاڭا وراي ازىرلەدى. جاڭا تيپتى ايدارشا ۆيرۋس وكپە قابىنۋ ىندەتى بۇكىل الەمدى شارپىعان قىسىلتاياڭ ساتتە، جۇڭگو ساقتانۋ - تىزگىندەۋ تاجىريبەسىن دۇنيە جۇزىمەن بەلسەنە ءبولىسىپ، ءار ەلگە قىرۋار ىندەتكە قارسى زات، ۆاكسينا، ءدارى - دارمەك جەتكىزىپ، ۆيرۋستىڭ تەگىن انىقتاۋ عىلمي سەلبەستىگىن ىشكەرىلەي ورىستەتىپ، ادامزاتتىڭ ىندەتتى ءۇزىلدى - كەسىلدى جەڭىپ شىعۋى ءۇشىن شىنايى، بەلسەنە قۇلشىنىس جاسادى.

  − وسى 50 جىلدا جۇڭگو حالقى بىرلەسكەن مەملەكەتتەر ۇيىمىنىڭ بەدەلى مەن ورنىن باستان - اياق قورعاپ، كوپ جاقتىلىقتى امالياتتا ايگىلەدى، جۇڭگونىڭ بىرلەسكەن مەملەكەتتەر ۇيىمىمەن سەلبەستىگى كۇن سايىن تەرەڭدەدى. جۇڭگو بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلىندىك مىندەتى مەن بورىشىن ادالدىقپەن وتەپ، بىرلەسكەن مەملەكەتتەر ۇيىمى ۋستاۆىنىڭ باس ماقساتى مەن پرينسيبىن قورعادى، بىرلەسكەن مەملەكەتتەر ۇيىمىنىڭ حالىقارالىق ىستەردەگى ۇيتقىلىق رولىن قورعادى. جۇڭگو تالاس - تارتىستى بەيبىت تاسىلمەن، ساياسي جولمەن شەشۋدى بەلسەنە دارىپتەپ، بىرلەسكەن مەملەكەتتەر ۇيىمىنىڭ مىڭ جىلدىق دامۋ نىساناسىن ءبىرىنشى بولىپ جۇزەگە اسىرىپ، 2030 - جىلعا دەيىنگى باياندى دامۋ كەڭەستىك ءتارتىبىن باستاماشىلدىقپەن تياناقتاندىردى. جۇڭگو بىرلەسكەن مەملەكەتتەر ۇيىمىنىڭ ۋستاۆى مەن «دۇنيە جۇزىلىك ادامدىق ۇقىق جارناماسىنىڭ» رۋحىنا باستان - اياق بويسۇنىپ، ادامدىق ۇقىقتىڭ جالپىلىق سيپاتىن جۇڭگونىڭ ءىس جۇزىندىگىمەن ۇشتاستىرۋعا تاباندى بولىپ، ادامدىق ۇقىقتى دامىتۋدىڭ ءداۋىر اعىمىنا ۇيلەسەتىن، جۇڭگوشا ەرەكشەلىككە يە جولىمەن ءجۇرىپ، جۇڭگونىڭ ادامدىق ۇقىعىنىڭ العا باسۋىنا جانە حالىقارالىق ادامدىق ۇقىق ىستەرىنە ماڭىزدى ۇلەس قوستى.

  شي جينپيڭ بىلاي دەپ باسا دارىپتەدى: دۇنيە ءجۇزىنىڭ بەتالىس اۋقىمىنىڭ ارىنى قاتتى، ايبىنى ۇستەم، وعان ۇيلەسكەندەر وركەندەيدى، قارسى كەلگەندەر قۇريدى. قازىر دۇنيە جۇزىندە 100 جىلدا بولماعان ۇلكەن وزگەرىس جەدەل قۇبىلىپ، بەيبىت دامۋ، العا باسۋ كۇشى ۇزدىكسىز ارتۋدا. ءبىز تاريحتىڭ ۇلكەن اۋقىمىنا ءساتتى سايكەسىپ، سەلبەسۋگە، قارسىلاسپاۋعا تاباندى بولىپ، ەسىك اشۋعا، توماعا - تۇيىق بولماۋعا تاباندى بولىپ، ءوزارا پايدا جەتكىزىپ، تەڭ يگىلىككە كەنەلۋگە، تەكە تىرەسپەن اينالىسپاۋعا تاباندى بولىپ، ءارقانداي فورماداعى زورەكەرلىك پەن وكتەمدىك ساياسيعا باتىل قارسى تۇرۋعا، ءارقانداي فورماداعى سىڭار جاقتىلىق پەن قورعامپازدىققا باتىل قارسى تۇرۋعا ءتيىسپىز.

  − ءبىز بەيبىتشىلىك، دامۋ، ادىلدىك، تۋراشىلدىق، دەموكراتيا، ەركىندىك سىندى بۇكىل ادامزاتقا ورتاق قۇندىلىقتاردى بارىنشا اسقاقتاتىپ، اناعۇرلىم كوركەم دۇنيە ءجۇزىن بىرگە قۇرۋعا دۇرىس ۇستانىم جەتەكشىلىگىن ۇسىنۋعا ءتيىسپىز. بەيبىتشىلىك پەن دامۋ ءبىزدىڭ ورتاق ءىسىمىز، ادىلدىك پەن تۋراشىلدىق ءبىزدىڭ ورتاق مۇراتىمىز، دەموكراتيا مەن ەركىندىك ءبىزدىڭ ورتاق تالپىنىسىمىز. الۋان تۇرلىلىك ادامزات وركەنيەتىنىڭ تارتىمدىلىعى، ونان دا ماڭىزدىسى، دۇنيە ءجۇزى دامۋىنىڭ ومىرشەڭدىگى مەن قوزعاۋشى كۇشىنىڭ قاينار كوزى. وركەنيەت جوعارى - تومەن، جاقسى - جامان دەپ بولىنبەيدى، وركەنيەتتە تەك ەرەكشەلىك، وڭىرلىك ايىرماشىلىق قانا بولادى، تەك اۋىس - كۇيىس بارىسىندا عانا توعىسۋعا، توعىسۋ بارىسىندا عانا العا باسۋعا بولادى. ءبىر ەلدىڭ ءجۇرىپ كەلە جاتقان جولىنىڭ جاقسى - جامان ەكەندىگىن ءبىلۋ ءۇشىن، باستىسى، ونىڭ ءوز ەلىنىڭ مەملەكەت جاعدايىنا ۇيلەسكەن - ۇيلەسپەگەندىگىنە، ءداۋىردىڭ دامۋ اعىمىنا ۇيلەسكەن - ۇيلەسپەگەندىگىنە، ەكونوميكاعا دامۋ، قوعامعا العا باسۋ، حالىق تۇرمىسىنا جاقسارۋ، قوعامعا ورنىقتىلىق اكەلگەن - اكەلمەگەندىگىنە، حالىقتىڭ قولداۋى مەن قۋاتتاۋىنا يە بولعان - بولماعاندىعىنا، ادامزاتتىڭ العا باسۋ ىستەرىنە ۇلەس قوسقان - قوسپاعاندىعىنا قاراۋ كەرەك.

  − ءبىز ادامزاتتىڭ تاعدىرلاس ورتاق تۇلعاسىن قۇرۋدى قول ۇستاسا ىلگەرىلەتىپ، باياندى بەيبىت، جاپپاي حاۋىپسىز، بىرگە گۇلدەنەتىن، اشىق تا سيىسىمدى، تازا دا كورىكتى دۇنيە ءجۇزىن بىرگە قۇرۋعا ءتيىسپىز. ادامزات ءبىر نيەتپەن كۇش بىرىكتىرىپ قيىندىقتى جەڭىپ، جاراسىمدى، تاتۋ - ءتاتتى بىرگە ءومىر سۇرۋگە ءتيىس. ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ ءبىر ءتۇرلى ءتۇزىمدى ەندى ءبىر ءتۇرلى ءتۇزىمنىڭ ورنىنا قويۋ ەمەس، ءبىر ءتۇرلى وركەنيەتتى ەندى ءبىر ءتۇرلى وركەنيەتتىڭ ورنىنا قويۋ ەمەس، قايتا تۇرلىشە قوعامدىق تۇزىمگە، تۇرلىشە يدەولوگياعا، تۇرلىشە تاريح پەن مادەنيەتكە، تۇرلىشە دامۋ دەڭگەيىنە يە ەلدەردىڭ حالىقارالىق ىستەردە مۇددەلەس بولىپ، ۇقىقتان بىرگە يگىلىكتەنىپ، جاۋاپكەرشىلىكتى بىرگە ارقالاپ، كوركەم دۇنيەنى بىرگە قۇرۋدىڭ ەڭ ۇلكەن ورتاق بولگىشىن قالىپتاستىرۋى بولىپ تابىلادى.

  − ءبىز ءوزارا پايدا جەتكىزۋگە، تەڭ يگىلىككە كەنەلۋگە تاباندى بولىپ، ەكونوميكالىق، قوعامدىق دامۋدىڭ حالىقتى اناعۇرلىم ويداعىداي باقىتقا كەنەلتۋىن بىرگە ىلگەرىلەتۋگە ءتيىسپىز. حالىق ءۇشىن دامىعاندا عانا، دامۋ ءماندى بولادى؛ حالىققا سۇيەنىپ دامىعاندا عانا، دامۋ قوزعاۋشى كۇشكە يە بولادى. دۇنيە جۇزىندەگى ءار ەل حالىقتى وزەك ەتۋگە تاباندى بولىپ، اناعۇرلىم جوعارى ساپالى، اناعۇرلىم ءونىمدى، اناعۇرلىم ءادىل، اناعۇرلىم باياندى، اناعۇرلىم حاۋىپسىز دامۋدى قۇلشىنا جۇزەگە اسىرۋعا ءتيىس. دامۋدىڭ بىركەلكى بولماۋى، تولىق بولماۋى ماسەلەسىن شەشىپ، دامۋدىڭ بىركەلكىلىگىن، سايكەسىمدىلىگىن، قامتىمدىلىعىن جوعارىلاتۋ كەرەك. حالىقتىڭ دامۋ قابىلەتىن كۇشەيتىپ، بارلىق ادام ات سالىساتىن، بارلىق ادام يگىلىكتەنەتىن دامۋ ورتاسىن قالىپتاستىرىپ، دامۋ تابىستارىنىڭ ءار ەلگە، ءار ادامعا اناعۇرلىم كوپ، اناعۇرلىم ءادىل تيىمدىلىك جەتكىزەتىن دامۋ جاعدايىن جاراتۋ كەرەك. تاياۋدا مەن 76 - كەزەكتى بىرلەسكەن مەملەكەتتەر ۇيىمىنىڭ جينالىسىندا الەمدىك دامۋ باستاماسىن العا قويدىم، ءار ەلدىڭ بىرگە قۇلشىنىپ، جاڭا تيپتى ايدارشا ۆيرۋس وكپە قابىنۋ ىندەتىنىڭ الەمنىڭ دامۋىنا جاسايتىن سوققىسىن جەڭىپ، 2030 - جىلعا دەيىنگى باياندى دامۋ كەڭەستىك ءتارتىبىن جەدەل تياناقتاندىرىپ، الەمدىك دامۋدىڭ ورتاق تۇلعاسىن قۇرۋىن ءۇمىت ەتەمىن.

  − ءبىز سەلبەستىكتى كۇشەيتىپ، ادامزات ءدوپ كەلىپ وتىرعان ءتۇرلى سىن - سايىستارعا جانە الەمدىك ماسەلەلەرگە بىرگە توتەپ بەرۋگە ءتيىسپىز. اناعۇرلىم سيىسىمدى الەمدىك جونگە سالۋ، اناعۇرلىم ءونىمدى كوپ جاقتى مەحانيزم، اناعۇرلىم بەلسەندى وڭىرلىك سەلبەستىك قالىپتاستىرعاندا عانا الەمدىك ماسەلەلەرگە ءونىمدى توتەپ بەرۋگە بولادى. دۇنيە جۇزىندەگى ءار ەل ءىس جۇزىندىك ارەكەتتەرى ارقىلى تابيعات ءۇشىن حاۋىپسىزدىك شەكاراسىن ساقتاپ، جاسىل ءتۇستى قالپىنا كەلتىرۋگە، جاسىل وندىرىسكە، جاسىل تۇتىنۋعا ىنتالاندىرىپ، وركەنيەتتى، اقاۋسىز تۇرمىس ءتاسىلىن قالىپتاستىرۋدى ىلگەرىلەتىپ، ادام مەن تابيعات جاراسىمدى قاتار ءومىر سۇرەتىن جاعداي قالىپتاستىرىپ، تاماشا ەكولوگيالىق ورتانى باياندى دامۋدىڭ سارقىلماس قاينارىنا اينالدىرۋ ءتيىس.

  − ءبىز بىرلەسكەن مەملەكەتتەر ۇيىمىنىڭ بەدەلى مەن ورنىن باتىل قورعاپ، ناعىز كوپ جاقتىلىقتى بىرگە امالياتتا ايگىلەۋگە ءتيىسپىز. دۇنيە جۇزىندەگى ءار ەل بىرلەسكەن مەملەكەتتەر ۇيىمىن ۇيتقى ەتكەن حالىقارالىق جۇيەنى، حالىقارالىق زاڭدى نەگىز ەتكەن حالىقارالىق ءتارتىپتى، بىرلەسكەن مەملەكەتتەر ۇيىمى ۋستاۆىنىڭ باس ماقساتى مەن پرينسيبىن نەگىز ەتكەن حالىقارالىق قارىم - قاتىناستىڭ نەگىزگى ولشەمىن قورعاۋى ءتيىس. حالىقارالىق ەرەجەلەردى تەك بىرلەسكەن مەملەكەتتەر ۇيىمىنا مۇشە 193 ەل عانا بىرگە جاساۋى كەرەك، ونى ءىشىنارا ەلدەر مەن مەملەكەتتەر توبىنىڭ بەلگىلەۋىنە بولمايدى؛ وعان بىرلەسكەن مەملەكەتتەر ۇيىمىنىڭ 193 مۇشەسى بىرگە بويسۇنۋعا ءتيىس، ەشقانداي مەملەكەت بۇدان قاعىس قالمايدى ءارى قالماۋعا ءتيىس. بىرلەسكەن مەملەكەتتەر ۇيىمى جونىندە دۇنيە جۇزىندەگى ءار ەل تۇگەلدەي قۇرمەت ەتۋ پوزيتسياسىن ۇستانىپ، وسى ۇلكەن شاڭىراقتى ويداعىداي ايالاۋعا، ويداعىداي قورعاۋعا ءتيىس، قولايىنا جاقسا پايدالانىپ، جاقپاسا تاستاي سالۋعا استە بولمايدى، بىرلەسكەن مەملەكەتتەر ۇيىمىنىڭ ادامزاتتىڭ بەيبىتشىلىگى مەن دامۋىن جەبەۋ سىندى وسكەلەڭ ىستەردە اناعۇرلىم بەلسەندى رول اتقارۋىنا مۇمكىندىك جاساۋ كەرەك. جۇڭگو ءار ەلمەن بىرگە اقىلداسۋ، بىرگە قۇرۋ، بىرگە يگىلىكتەنۋ ۇستانىمىن بەرىك ۇستانىپ، سەلبەستىك وي جەلىسى جونىندە ىزدەنىس جاساپ، سەلبەستىك ۇلگىسىندە جاڭالىق اشىپ، جاڭا جاعدايداعى كوپ جاقتىلىق امالياتىن ۇزدىكسىز بايىتۋدى قالايدى.

  شي جينپيڭ سوڭىندا بىلاي دەپ باسا دارىپتەدى: بۇگىنگى ارقىلى وتكەندى ەسكە الىپ، كەشەگىگە ءۇڭىلىپ، كەلەشەكتى بولجاۋ كەرەك. جاڭا تاريحي باستامادا جۇڭگو بەيبىت دامۋ جولىمەن جۇرۋگە تاباندى بولىپ، باستان - اياق دۇنيە ءجۇزى بەيبىتشىلىگىنىڭ قۇرۋشىسى بولادى؛ رەفورما جاساۋ، ەسىك اشۋ جولىمەن جۇرۋگە تاباندى بولىپ، باستان - اياق الەمدىك دامۋدىڭ ۇلەس قوسۋشىسى بولادى؛ كوپ جاقتىلىق جولىمەن جۇرۋگە تاباندى بولىپ، باستان - اياق حالىقارالىق ءتارتىپتىڭ قورعاۋشىسى بولادى. ”تاعدىرلاسپىز، جولىمىز دا جالعاسقان، مەكەن ورتاق، ورتاق ءارى ايلى اسپان“. ءبىز قول ۇستاسىپ، تاريحتىڭ دۇرىس جاعىندا تۇرىپ، ادامزاتتىڭ العا باسۋ جاعىندا تۇرىپ، دۇنيە ءجۇزىنىڭ باياندى بەيبىت دامۋىن جۇزەگە اسىرۋ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ جولىندا قاجىماي - تالماي كۇرەس جۇرگىزەيىك.

  بىرلەسكەن مەملەكەتتەر ۇيىمىنىڭ باس حاتشىسى گۋتەرەس ارناۋ ءسوز سويلەپ مىنالاردى ءبىلدىردى: جۇڭگونىڭ بىرلەسكەن مەملەكەتتەر ۇيىمىنداعى زاڭدى ورنى قالپىنا كەلگەن 50 جىلدان بەرى بىرلەسكەن مەملەكەتتەر ۇيىمىنا كۇن سايىن ماڭىزدى ۇلەستەر قوسىپ، بىرلەسكەن مەملەكەتتەر ۇيىمىنىڭ سەنىمدى سەرىكتەسى جانە حالىقارالىق سەلبەستىكتىڭ مىعىم تىرەگى بولدى. جۇڭگونىڭ بىرلەسكەن مەملەكەتتەر ۇيىمىنىڭ 2030 - جىلعا دەيىنگى باياندى دامۋ نىساناسىن جۇزەگە اسىرۋدا، كەدەيلىكتى جويۋدا، ەنەرگيانىڭ جاسىل، تومەن كومىر قىشقىل گازدى دامۋىندا ماڭىزدى رول اتقارعاندىعىنا العىس ايتامىن. بىرلەسكەن مەملەكەتتەر ۇيىمى الەمدىك دامۋ باستاماسىن تياناقتاندىرۋعا قولداۋ كورسەتەدى. حالىقارالىق قوعامدى كوپ جاقتىلىقتى قولداۋعا، كوپ جاقتى جۇيەنى كۇشەيتۋگە، الەمدىك سايىستارعا ىنتىماقتاسا توتەپ بەرۋگە ۇندەيدى. ول بىرلەسكەن مەملەكەتتەر ۇيىمىنىڭ ۇزدىكسىز تۇردە جۇڭگونىڭ مىعىم سەرىكتەسى بولىپ، اناعۇرلىم ءادىل، باياندى بولاشاقتى بىرگە قۇراتىندىعىن باسا دارىپتەدى.

  ديڭ شۋەشياڭ، ياڭ جيەچى قاتارلىلار ماجىلىسكە قاتىناستى.

  ۋاڭ ي ءماجىلىستى باسقاردى.

  قاتىستى تاراۋلاردىڭ جاۋاپتىلارى، جۇڭگونىڭ ۇزاق ۋاقىت بىرلەسكەن مەملەكەتتەر ۇيىمى قىزمەتىمەن شۇعىلدانعان ديپلوماتيالىق قىزمەتكەرلەرىنىڭ ۋاكىلدەرى، ءار ەلدىڭ جۇڭگودا تۇراتىن ەلشىلەرى جانە حالىقارالىق ۇيىمداردىڭ جۇڭگودا تۇراتىن ۋاكىلدەرى، ت.ب 200دەن استام ادام ماجىلىسكە قاتىناستى. جۇڭگونىڭ بىرلەسكەن مەملەكەتتەر ۇيىمىنداعى بۇرىنعى تۇراقتى ۋاكىلى ۋاڭ گۋاڭيا، رەسەيدىڭ جۇڭگودا تۇراتىن باس ەلشىسى دەنيسوۆ، الجيريانىڭ جۇڭگودا تۇراتىن باس ەلشىسى بۋحەلفا جەكە - جەكە ءسوز سويلەدى.