شينحۋا اگەنتتىگى، 7 - ايدىڭ 11 - كۇنى، بەيجيڭ، ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ مەن چاۋشيان ەڭبەك پارتياسىنىڭ باس شۋجيى، مەملەكەت ىستەرى باستىعى، چاۋشيان قارۋلى كۇشتەرىنىڭ ەڭ جوعارى قولباسشىسى جين جىڭ - ىن 7 - ايدىڭ 11 - كۇنى «جۇڭگو - چاۋشيان دوستىق، سەلبەستىك، ءوزارا كومەكتەسۋ شارتىنا» قول قويىلعانىنىڭ 60 جىلدىعىنا بايلانىستى ءبىر - بىرىنە قۇتتىقتاۋ تەلەگرامماسىن جولدادى.
شي جينپيڭ قۇتتىقتاۋ تەلەگرامماسىندا بىلاي دەپ اتاپ كورسەتتى: 1961 - جىلى جۇڭگو مەن چاۋشياننىڭ اعا بۋىن باسشىلارى بيىكتە تۇرىپ الىستى بولجاپ، «جۇڭگو - چاۋشيان دوستىق، سەلبەستىك، ءوزارا كومەكتەسۋ شارتىنا» قول قويۋ ستراتەگيالىق شەشىمىن جاساپ، ەكى ەل حالىقتارىنىڭ ىستىق قانىنان قالىپتاسقان جاۋىنگەرلىك دوستىعىن بەكەمدەۋگە، ەكى ەلدىڭ باياندى دوستىق سەلبەستىگىن ىلگەرىلەتۋگە ماڭىزدى ساياسي، زاڭدىق نەگىز قالادى. 60 جىلدان بەرى جۇڭگو مەن چاۋشيان شارت رۋحىن ۇستانىپ، ءبىرىن - ءبىرى باتىل قولداپ، تىزە قوسا كۇرەس جۇرگىزىپ، ەكى پارتيانىڭ، ەكى ەلدىڭ تۋىسقاندىق ءداستۇرلى دوستىعىن كۇشەيتىپ، وزدەرىنىڭ سوتسياليزم ىستەرىنىڭ دامۋىن جەبەپ، ءوڭىردىڭ، ءتىپتى، دۇنيە ءجۇزىنىڭ بەيبىتشىلىگى مەن ورنىقتىلىعىن قورعادى.
شي جينپيڭ بىلاي دەپ دارىپتەدى: تاياۋ جىلداردان بەرى مەن باس شۋجي جولداسپەن كوپ رەت ديدارلاسىپ، ەكى پارتيا، ەكى ەل قاتىناسىنىڭ دامۋ جوباسىن جاساپ، جۇڭگو - چاۋشيان دوستىعىنىڭ داۋىرلىك ءمانىن ارتتىرىپ، ءبىرقىدىرۋ ماڭىزدى ورتاق تانىمعا كەلدىك. بۇگىنگى دۇنيەدە ءجۇز جىلدان بەرى بولماعان زور وزگەرىس جەدەل ىلگەرىلەۋدە. مەن باس شۋجي جولداسپەن ستراتەگيالىق قاتىناستى كۇشەيتىپ، جۇڭگو - چاۋشيان قاتىناسىنىڭ العا باسۋ بەتالىسىن ويداعىداي يگەرىپ، ەكى ەلدىڭ دوستىق سەلبەستىگىنىڭ ۇزدىكسىز تىڭ ساتىعا كوتەرىلۋىنە جەتەكشىلىك ەتىپ، ەكى ەلدى جانە ەكى ەل حالىقتارىن اناعۇرلىم ويداعىداي باقىتقا كەنەلتۋدى قالايمىن.
شي جينپيڭ بىلاي دەپ دارىپتەدى: ءبىز تاياۋدا جۇڭگو كوممۋنيستىك پارتياسىنىڭ عاسىرلىق مەرەي تويىن سالتاناتپەن قۇتتىقتادىق. قازىر چاۋشيان حالقى ءبىر نيەتپەن ىنتىماقتاسىپ، چاۋشيان ەڭبەك پارتياسى 8 - قۇرىلتايىنىڭ شەشىمدەرىن، ورنالاستىرۋلارىن بار كۇشپەن دايەكتىلەندىرۋدە. جۇڭگو جاق چاۋشيان جاقتىڭ ەكونوميكانى، حالىق تۇرمىسىن دامىتۋىن، سوتسياليستىك قۇرىلىس ىستەرىن پارمەندى ىلگەرىلەتۋىن باتىل قولدايدى. باس شۋجي جولداستىڭ باستاۋىندا چاۋشيان پارتياسى مەن حالقىنىڭ، ءسوز جوق، تىڭ دا اناعۇرلىم زور تابىستارعا قول جەتكىزەتىنىنە سەنەمىن.
جين جىڭ - ىن قۇتتىقتاۋ تەلەگرامماسىندا مىنانى ءبىلدىردى: «چاۋشيان - جۇڭگو دوستىق، سەلبەستىك، ءوزارا كومەكتەسۋ شارتىنا» قول قويىلۋى بۇكىل دۇنيە جۇزىنە چاۋشيان - جۇڭگو پارتيالارىنىڭ، ەكى ەل ۇكىمەتتەرىنىڭ جانە حالىقتارىنىڭ بەرىك زاڭ نەگىزىندە ۇزاق ۋاقىت ىستىق قانمەن بىتە قايناسقان چاۋشيان - جۇڭگو دوستىعىنىڭ بەرىك ەركىن ايگىلەدى. 60 جىلدان بەرى چاۋشيان مەن جۇڭگو ءبىرىن - ءبىرى قولداپ، ءوزارا كومەكتەسىپ، داڭق سەزىنەرلىك دوستىق تاريحىن جازدى. تاياۋ جىلداردان بەرى كۇردەلى دە قۇبىلمالى حالىقارالىق جاعداي الدىندا چاۋشيان مەن جۇڭگو ەكى ەلدىڭ جولداستىق سەنىمى مەن جاۋىنگەرلىك دوستىعى كۇن سايىن تەرەڭدەپ، ەكى جاقتىڭ قاتىناسى اناعۇرلىم جوعارى ساتىعا كوتەرىلدى.
جين جىڭ - ىن مىنانى ءبىلدىردى: چاۋشيان مەن جۇڭگونىڭ دوستىق سەلبەستىك قاتىناسىن ۇزدىكسىز كۇشەيتۋ جانە دامىتۋ − چاۋشيان پارتياسى مەن ۇكىمەتىنىڭ بۇلجىماس تۇرعىسى. چاۋشيان پارتياسى، ۇكىمەتى جانە حالقى ەكى جاقتىڭ ورتاق باعالى بايلىعى سانالاتىن چاۋشيان - جۇڭگو دوستىعىن اناعۇرلىم قاستەرلەپ، سوتسياليزم، كوممۋنيزم قۇرۋدىڭ قاسيەتتى ساپارىندا جۇڭگو كوممۋنيستىك پارتياسىمەن، جۇڭگو ۇكىمەتىمەن جانە جۇڭگو حالقىمەن قول ۇستاسا العا ىلگەرىلەۋدە تاباندى بولادى. جۇڭگو كوممۋنيستىك پارتياسى قۇرىلعانىنىڭ 100 جىلدىعىن تاعى ءبىر رەت قۇتتىقتايمىن، جۇڭگو پارتياسى مەن حالقىنىڭ جاپپاي سوتسياليستىك وسىزاماندانعان مەملەكەت قۇرۋ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ ىستەرىندە اناعۇرلىم زور جەڭىستەرگە قول جەتكىزۋىن تىلەيمىن.
