شي جينپيڭ دۇنيە جۇزىلىك دەنساۋلىق ساقتاۋ ۇيىمىنىڭ باسالقاسى تان دىسايمەن كەزدەستى
مەملەكەت ءتوراعاسى شي جينپيڭ 1 - ايدىڭ 28 - كۇنى حالىق سارايىندا دۇنيە جۇزىلىك دەنساۋلىق ساقتاۋ ۇيىمىنىڭ باسالقاسى تان دىسايمەن كەزدەستى.
شي جينپيڭ بىلاي دەپ باسا دارىپتەدى: كەزەكتە جۇڭگو حالقى جاڭا تيپتەگى ايدارشا ۆيرۋسپەن جۇعىمدالۋدان بولعان وكپە قابىنۋ ىندەتىمەن قاتاڭ كۇرەس جۇرگىزۋدە. حالىق بۇقاراسىنىڭ ءومىرىنىڭ حاۋىپسىزدىگى مەن دەنساۋلىعى قاي - قاشان دا ءبىرىنشى ورىندا تۇرادى، ىندەتتەن ساقتانۋ - تىزگىندەۋ − كەزەكتەگى ەڭ ماڭىزدى قىزمەت. مەن جۇڭگونىڭ ەگىنشىلىك كالەندارى بويىنشا جاڭا جىلدىڭ ءبىرىنشى كۇنى جۇڭگو كوممۋنيستىك پارتياسى ورتالىق كوميتەتى ساياسي بيۋروسى تۇراقتى كوميتەتىنىڭ ءماجىلىسىن باسقارىپ اشىپ، ىندەتتەن ساقتانۋ - تىزگىندەۋدى كۇشەيتۋ جونىندە جاپپاي ورنالاستىرۋ جاساپ، پارتيا ورتالىق كوميتەتىنىڭ ىندەتكە توتەپ بەرۋ قىزمەت باسشىلىق گرۋپپاسىن قۇرىپ، جەر - جەردىڭ ىندەتتەن ساقتانۋ - تىزگىندەۋ قىزمەتىن ويداعىداي ىستەۋىنە ءبىر تۇتاس باسشىلىق ەتىپ، ءبىر تۇتاس قولباسشىلىق ەتىپ، تۇرگە ءبولىپ جەتەكشىلىك ەتتىم.
شي جينپيڭ بىلاي دەپ اتاپ كورسەتتى: ىندەت − جالماۋىز، ءبىز جالماۋىزدى جاسىرىپ قويمايمىز. جۇڭگو ۇكىمەتى باستان - اياق اشىق بولۋ، جاريا بولۋ، جاۋاپتى بولۋ پوزيتسياسىمەن دەر كەزىندە ەل ءىشى - سىرتىنا ىندەت ينفورماتسياسىن حابارلاپ، ءار جاقتىڭ ءجىتى قاداعالاپ وتىرعان ماسەلەلەرىنە جاۋاپ قايتارىپ، حالىقارالىق قوعاممەن سەلبەستىكتى كۇشەيتەدى. دۇنيە جۇزىلىك دەنساۋلىق ساقتاۋ ۇيىمى تۇتاس جەر شارىنداعى دەنساۋلىق ساقتاۋ ىستەرىن سايكەستىرۋ جاعىندا ماڭىزدى رول اتقارىپ كەلەدى، جۇڭگو جاق دۇنيە جۇزىلىك دەنساۋلىق ساقتاۋ ۇيىمىمەن سەلبەستىك جاساۋعا وسكەلەڭ ءمان بەرەدى. جۇڭگو جاق دۇنيە جۇزىلىك دەنساۋلىق ساقتاۋ ۇيىمىنىڭ وسى رەتكى ىندەتتەن ساقتانۋ - تىزگىندەۋ قىزمەتىنە قاتىناسۋىن قارسى الادى، دۇنيە جۇزىلىك دەنساۋلىق ساقتاۋ ۇيىمى ماماندارى ۋحانعا بارىپ ناقتى تەكسەرۋ - زەرتتەۋ جۇرگىزۋدە. جۇڭگو جاق دۇنيە جۇزىلىك دەنساۋلىق ساقتاۋ ۇيىمىمەن جانە حالىقارالىق قوعاممەن بىرگە ءوڭىردىڭ جانە تۇتاس جەر شارىنىڭ الەۋمەتتىك دەنساۋلىق ساقتاۋ حاۋىپسىزدىگىن ورتاق قورعاۋدى قالايدى. دۇنيە جۇزىلىك دەنساۋلىق ساقتاۋ ۇيىمى مەن حالىقارالىق قوعامنىڭ ىندەتتى وبيەكتيۆ تە ءادىل، بايسالدى دا پاراساتتى ساراپتايتىندىعىنا سەنەمىن. شي جينپيڭ بىلاي دەپ باسا دارىپتەدى: جۇڭگو كوممۋنيستىك پارتياسىنىڭ پارمەندى باسشىلىعىندا، جۇڭگوشا سوتسياليستىك ءتۇزىمنىڭ ابزالدىلىعىن تولىق ساۋلەلەندىرىپ، حالىق بۇقاراسىنا تىعىز ارقا سۇيەپ، سەنىمدى بەكەمدەپ، قيىندىقتى بىلەك بىرىكتىرە جەڭىپ، عىلمي ساقتانىپ جانە ەمدەپ، ءدالمە - ءدال شارا قولدانادى، بىزدە بۇل رەتكى ىندەتتەن ساقتاۋ - تىزگىندەۋ توسقاۋىل شايقاسىنىڭ جەڭىسىنە جەتۋگە تولىق سەنىم، قابىلەت بار.
تان دىساي، اۋەلى، ءتوراعا شي جينپيڭگە جانە جۇڭگو حالقىنا كوكتەم مەرەكەسى بايلانىسىمەن ىزگى تىلەك تىلەدى. ول مىنالاردى ءبىلدىردى: ىندەت الدىندا، جۇڭگو ۇكىمەتى باتىل ساياسي بەكىمىن ايگىلەپ، دەر كەزىندە پارمەندى شارالار قولداندى، بۇل جۇرتتى سۇيىندىرەدى. ءتوراعا شي جينپيڭ ءوزى قولباسشىلىق ەتىپ، ءوزى ورنالاستىرۋ جاساپ، ەرەن باسشىلىق قابىلەتىن ايگىلەدى. جۇڭگو جاق ينفورماتسيانى اشىق، جاريا جاريالاپ، رەكورد جاراتقان قىسقا ۋاقىتتا اۋرۋ قوزدىرعىشتى ايىرىپ شىعىپ، دەر كەزىندە ىرىقتىلىقپەن دۇنيە جۇزىلىك دەنساۋلىق ساقتاۋ ۇيىمىمەن جانە باسقا مەملەكەتتەرمەن قاتىستى ۆيرۋستىڭ گەن تىزبەگىن ءبولىستى. جۇڭگو جاق قولدانعان شارالار تەك جۇڭگو حالقىن قورعاۋ عانا ەمەس، دۇنيە ءجۇزى حالقىن دا قورعاعاندىق، ءبىز بۇعان شىنايى العىسىمىزدى بىلدىرەمىز. جۇڭگو جاقتىڭ ارەكەتىنىڭ جىلدامدىعى تەز، كولەمى ۇلكەن، دۇنيەدە سيرەك ۇشىرايدى، جۇڭگو جىلدامدىعىن، جۇڭگو كولەمىن، جۇڭگو ونىمدىلىگىن ايگىلەدى، ءبىز مۇنى ايرىقشا القايمىز. بۇل جۇڭگو ءتۇزىمىنىڭ ابزالدىلىعى، قاتىستى تاجىريبەلەر باسقا مەملەكەتتەردىڭ ۇلگى الۋىنا تاتيدى. مەن جۇڭگو قولدانعان شارالاردىڭ ىندەتتى ءونىمدى تىزگىندەيتىندىگىنە جانە ەڭ سوڭىندا جەڭەتىندىگىنە سەنەمىن. دۇنيە جۇزىلىك دەنساۋلىق ساقتاۋ ۇيىمى جۇڭگونىڭ ىندەتكە قارسى تۇرۋدا قولدانعان شارالارىن باتىل قولدايدى، جۇڭگو جاقپەن قارىم - قاتىناس جاساۋدى، سەلبەسۋدى كۇشەيتۋدى، بارلىق قاجەتتى كومەكتەرمەن قامداۋدى قالايدى. دۇنيە جۇزىلىك دەنساۋلىق ساقتاۋ ۇيىمى عىلىمدى جانە شىندىقتى نەگىزگە الىپ تۇجىرىم جاساۋعا تاباندى بولىپ، قالىپتان تىس اسەرگە جانە اسىرەلەگەن سوزدەرگە قارسى تۇرادى. دۇنيە جۇزىلىك دەنساۋلىق ساقتاۋ ۇيىمى جۇڭگونىڭ تۇتاس جەر شارىنىڭ دەنساۋلىق ساقتاۋ ىستەرىندە اتقارعان ماڭىزدى رولى مەن قوسقان ماڭىزدى ۇلەسىن ايرىقشا القايدى، جۇڭگو جاقپەن ۇزدىكسىز ستراتەگيالىق سەلبەستىك جاساۋدى قالايدى.
ديڭ شۋەشياڭ، ياڭ جيەچى، ۋاڭ ي قاتارلىلار كەزدەسۋگە قاتىناستى.
