مەملەكەت ءتوراعاسى شي جينپيڭ 7 - ايدىڭ 22 - كۇنى حالىق سارايىندا اراب بىرىككەن امىرلىگى ءابۋدابي امىرلىگىنىڭ تاح مۇراگەرى مۇحاممەدپەن كەڭەس وتكىزدى.شي جينپيڭ بىلاي دەدى: بىلتىر 7 - ايدا اراب بىرىككەن امىرلىگىندە مەملەكەتتىك ساپاردا بولدىم، ءبىز جۇڭگو مەن اراب بىرىككەن امىرلىگىنىڭ جالپى بەتتىك ستراتەگيالىق ارىپتەستىك قاتىناس ورناتقانىن بىرگە جاريالاپ، جۇڭگو مەن اراب بىرىككەن امىرلىگىنىڭ تىزە قوسا العا باسۋىنىڭ شىت جاڭا پاراعىن اشتىق. ءبىر جىلدان بەرى ەكى جاق ساپار تابىسىن بەلسەنە تياناقتاندىرىپ، ەكى ەل قاتىناسى جان - جاقتى، ساپالى دامىدى.
شي جينپيڭ مىنالاردى اتاپ كورسەتتى: جاھاندانۋ داۋىرىندە سەلبەستىك جاساپ، تەڭ يگىلىككە كەنەلۋ ــ ءار ەلدىڭ تاتۋ - ءتاتتى ءوتۋ جولى، ءوزىن - ءوزى تۇمشالاپ، وقشاۋ قالدىرۋ تەك ءوز مۇددەسىنە زيان جەتكىزەدى. جۇڭگو مەن اراب ەلدەرى قاتىناسىنىڭ نىساناسى ۇزاق، مازمۇنى باي، ءوزارا ءتيىمدى ۇزاق بولاشاقتىق ۇلى جوسپار، ول تۇرلىشە ءوڭىر، تۇرلىشە مادەنيەت، تۇرلىشە تيپتەگى ەلدەردىڭ ستراتەگيالىق سەلبەستىك جۇرگىزۋىنىڭ ۇلگىسىنە اينالدى. بيىل ــ جاڭا جۇڭگو قۇرىلعانىنىڭ 70 جىلدىعى، سونداي - اق جۇڭگو مەن اراب بىرىككەن امىرلىگىنىڭ ديپلوماتيالىق قاتىناس ورناتقانىنىڭ 35 جىلدىعى، بۇل بۇرىنعىعا مۇراگەر بولىپ، كەيىنگىگە جول اشۋ سىندى ەرەكشە مانگە يە. وسى كەزدە جۇڭگوعا ساپارلاي كەلىپ وتىرسىز، ءبىز «جۇڭحۋا حالىق رەسپۋبليكاسى مەن اراب بىرىككەن امىرلىگىنىڭ جالپى بەتتىك ستراتەگيالىق ارىپتەستىك قاتىناسىن كۇشەيتۋ جونىندەگى بىرلەسكەن مالىمدەمەنى» بىرگە جاريالايمىز، بۇل جۇڭگو مەن اراب بىرىككەن امىرلىگى قاتىناسى تاريحىنداعى تاعى ءبىر ماڭىزدى باعدارلامالىق قۇجات بولماق. مەن سىزبەن بىرگە قىم - قۋىت كۇردەلى جاعدايدا ۇزدىكسىز تۇراقتىلىقتى ساقتاپ، جاعدايدىڭ وزگەرىسى بارىسىندا بەتالىستى ورنىقتىرىپ، جۇڭگو مەن اراب بىرىككەن امىرلىگىنىڭ جان - جاقتى ستراتەگيالىق ارىپتەستىك قاتىناسىنىڭ ۇزدىكسىز تىڭ تابىسقا قول جەتكىزۋىن جەبەپ، ەكى ەل حالىقتارىنا ءتىپتى دە كوپ، ءتىپتى دە جاقسى باقىت جاراتۋدى قالايمىن.
