رەفورما جاساپ، جاڭالىق اشۋعا، شىندىققا جۇگىنىپ، ناقتى ٴىس ىستەۋگە تاباندى بولىپ، جۇڭگو ۇلگىسىندەگى وسىزامانداندىرۋدىڭ حۋنان تاراۋىن قۇلشىنا جازۋ كەرەك

شي جينپيڭ حۋناندا قىزمەت تەكسەرگەندە بىلاي دەپ باسا دارىپتەدى

رەفورما جاساپ، جاڭالىق اشۋعا، شىندىققا جۇگىنىپ، ناقتى ٴىس ىستەۋگە تاباندى بولىپ، جۇڭگو ۇلگىسىندەگى وسىزامانداندىرۋدىڭ حۋنان تاراۋىن قۇلشىنا جازۋ كەرەك

ساي چي قىزمەت تەكسەرۋدە بىرگە بولدى

　　　　　3 ـ ايدىڭ 18 ـ كۇنىنەن 21 ـ كۇنىنە دەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ حۋناندا قىزمەت تەكسەردى. سۋرەتتە: 3 ـ ايدىڭ 18 ـ كۇنى تۇستەن كەيىن شي جينپيڭ جۇڭگو _ گەرمانيا بىرلەسىپ قارجىلاندىرعان كاسىپورىن _ باسف شانشان باتارەيا ماتەريالدارى شەكتى سەرىكتەستىگىندە قىزمەت تەكسەرۋدە.

　　　　　　□ سۋرەتتى شينحۋا اگەنتتىگىنىڭ ٴتىلشىسى يان يان تۇسىرگەن

　　　　　　3 ـ ايدىڭ 18 ـ كۇنىنەن 21 ـ كۇنىنە دەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ حۋناندا قىزمەت تەكسەردى. سۋرەتتە: 3 ـ ايدىڭ 19 ـ كۇنى تۇستەن كەيىن شي جينپيڭ چاڭدى قالاسى ديڭچىڭ رايونى شيەجياپۋ قالاشىعى گاڭجۇڭپيڭ قىستاعىندا استىق ەگەتىن ٴىرى وتباسىلارىمەن، اۋىل شارۋاشىلىق تەحنيكتەرىمەن، نەگىزگى ساتى كادرلارىمەن ىقىلاستى اڭگىمەلەسۋدە.

　　　　　　□ سۋرەتتى شينحۋا اگەنتتىگىنىڭ ٴتىلشىسى جۇي پىڭ تۇسىرگەن

　　شينحۋا اگەنتتىگىنىڭ 3 ـ ايدىڭ 21 ـ كۇنى چاڭشادان بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ جۋىقتا حۋناندا قىزمەت تەكسەرگەندە بىلاي دەپ باسا دارىپتەدى: حۋنان جاڭا دامۋ ارناسىن قالىپتاستىرۋداعى ٴوزىنىڭ ستراتەگيالىق ورنىن مىقتاپ يگەرىپ، ورنىقتىلىق بارىسىندا ىلگەرىلەۋ قىزمەت جالپى ارناسىنا تاباندى بولىپ، جوعارى ساپالى دامۋدان اۋىتقىماۋعا تاباندى بولىپ، رەفورما جاساپ جاڭالىق اشۋعا، شىندىققا جۇگىنىپ ناقتى ٴىس ىستەۋگە تاباندى بولىپ، مەملەكەتتىڭ ماڭىزدى وزىق جاساۋ كاسىبى بيىگىن، وزەكتى باسەكەلىك قۋاتقا يە عىلىم ـ تەحنيكادا جاڭالىق اشۋ بيىگىن، ىشكى قۇرلىقتىق وڭىرلەردىڭ رەفورما جاساۋ، ەسىك اشۋ بيىگىن تۇلعالاۋعا ٴۇرتىس كۇش سالىپ، ورتا بولىك وڭىرلەردىڭ ەڭسە كوتەرۋىن جانە چاڭجياڭ ەكونوميكالىق بەلدەۋىنىڭ دامۋىن ىلگەرىلەتۋدە ەرلىكپەن العا ۇمتىلىپ، جۇڭگو ۇلگىسىندەگى وسىزامانداندىرۋدىڭ حۋنان تاراۋىن قۇلشىنا جازۋى كەرەك.

　　3 ـ ايدىڭ 18 ـ كۇنىنەن 21 ـ كۇنىنە دەيىن شي جينپيڭ حۋنان ولكەلىك پارتكومنىڭ شۋجيى شىن شياۋميڭنىڭ جانە ولكە باستىعى ماۋ ۋيميڭنىڭ سەرىك بولۋىندا ىلگەرىندى ـ كەيىندى چاڭشا، چاڭدى قاتارلى جەرلەرگە بارىپ، مەكتەپ، كاسىپورىن، تاريحي مادەنيەت كوشەسى، اۋىل ـ قىستاق سياقتىلاردى ىشكەرىلەي ارالاپ، تەكسەرۋ ـ زەرتتەۋ جۇرگىزدى.

　　3 ـ ايدىڭ 18 ـ كۇنى تۇستەن كەيىن شي جينپيڭ حۋنان 1 ـ شىفان شۋەيۋانىنا (چىڭنان شۋيۋان مەكتەپ رايونى) كەلىپ قىزمەت تەكسەردى. بۇل مەكتەپتىڭ توركىنى سۇڭ داۋىرىندە قۇرىلعان چىڭنان شۋيۋانى بولاتىن، تاياۋ زاماننان بەرى ٴبىر توپ اعا بۋىن پرولەتاريات توڭكەرىسشىلەرى مەن ايتۋلى ۇستازداردى، مامانداردى باۋلىعان. شي جينپيڭ جاس ماۋ زىدۇڭ نەگىزگى تاقىرىپتىق كورمەسىن ەكسكۋرسيالاپ، شۋەيۋاننىڭ دامۋ، وزگەرۋ بارىسىن جانە قىزىل بايلىقتان ويداعىداي پايدالانۋ جاعدايىن، ت . ب ۇعىستى. شۋەيۋاننىڭ ۇلكەن زالىندا شي جينپيڭ وقىتۋشى ـ وقۋشىلار ۋاكىلدەرىمەن ىقىلاسپەن اڭگىمەلەستى. ول بىلاي دەدى: مەملەكەتتى قۇدىرەتتەندىرۋ ٴۇشىن وقۋ ـ اعارتۋدى، ٴسوز جوق، ويداعىداي جۇرگىزۋ كەرەك. حۋنان 1 ـ شىفان شۋەيۋانى _ وتانشىلدىق تاربيە جۇرگىزەتىن، قىزىل گەندى جالعاستىراتىن تاماشا جەر، وسى قىزىل بايلىقتى ويداعىداي قورعاۋ جانە ودان ويداعىداي پايدالانۋ كەرەك. مەكتەپ ٴمورال ارقىلى تاربيەلەۋى، وقىتۋشىلار جاقسى ۇستاز بولۋى، وقۋشىلاردىڭ ٴبىلىم، مادەنيەت ساپاسىن جوعارىلاتۋعا ٴمان بەرۋمەن بىرگە، مۇنان دا ماڭىزدىسى، يدەيا ـ ساياسي ساباعىن ويداعىداي ٴوتىپ، وقۋشىلاردى اسقاق ٴمورالدى ايگىلەپ، ار ـ نامىستى ٴبىلىپ، سوتسياليستىك وزەكتى قۇن كوزقاراسىن بەرىك ورناتىپ، وتانعا قىزمەت ەتۋ، مەملەكەتتى قۇدىرەتتەندىرۋ ۇلى مۇراتىن ورناتىپ، مەملەكەتتى قۇدىرەتتەندىرۋ قۇرىلىسى، ۇلتتى گۇلدەندىرۋ ماڭىزدى مىندەتىن ارقالاي الاتىن تىرەكتى دارىندى بولۋعا قۇلشىنۋعا تاربيەلەۋ، جەتەكتەۋ كەرەك.

　　وسىدان سوڭ شي جينپيڭ باسىف شانشان باتارەيا ماتەريالى شەكتى سەرىكتەستىگىنە كەلىپ قىزمەت تەكسەردى. بۇل باستىسى، ليتي يوندى باتارەيانىڭ وڭ ەلەكترود ماتەريالىن زەرتتەپ اشۋ، ٴوندىرۋ جانە ساتۋمەن شۇعىلداناتىن جۇڭگو _ گەرمانيا بىرلەسىپ قارجىلاندىرعان كاسىپورىن. شي جينپيڭ جەرگىلىكتى ورىننىڭ جاڭا ساپالى وندىرگىش كۇشتەردى جەدەل دامىتۋى، جوعارى دەڭگەيدە سىرتقا ەسىك اشۋدى كەڭەيتۋى سياقتى جاعدايلار جونىندەگى تانىستىرۋدى تىڭداپ، كاسىپورىننىڭ ونىمدەر كورمەسىن تەكسەرىپ كورىپ، ماتەريال يقۋاتىن سىناۋ جاعدايى مەن باتارەيا ٴوندىرىس ٴتارتىبىن ۇعىستى. ول بىلاي دەپ باسا دارىپتەدى: عىلىم ـ تەحنيكادا جاڭالىق اشۋ، جوعارى ساپالى دامۋ _ كاسىپورىننىڭ ۇزدىكسىز جەتىلىپ زورايۋىنىڭ، تابان تىرەپ تۇرۋىنىڭ شەشۋشى تياناعى، حالىقتىق كاسىپورىندار، بىرلەسىپ قارجىلاندىرعان كاسىپورىندار بۇل جاعىندا ٴىرى ىستەر تىندىرا الادى. جۇڭگونىڭ اشىلعان ەسىگى بارعان سايىن ايقارا اشىلادى، ٴبىز دۇنيە جۇزىندەگى ەلدەرمەن اۋىس ـ كۇيىستى، سەلبەستىكتى كۇشەيتۋدى قالايمىز، ٴتىپتى دە كوپ شەتەل كاسىپورىندارىنىڭ جۇڭگوعا كەلىپ قارجى قوسىپ دامۋىن قارسى الامىز.

　　3 ـ ايدىڭ 19 ـ كۇنى شي جينپيڭ چاڭدى قالاسىنا بارىپ قىزمەت تەكسەرىپ، تەكسەرۋ ـ زەرتتەۋ جۇرگىزدى. يۋانجياڭ وزەنى جاعاسىنداعى چاڭدى حىجيە كوشەسى ۇزاق تاريحقا يە، كەزىندە 1943 ـ جىلعى چاڭدى شايقاسىندا قيراعان. سوڭعى جىلدارى چاڭدى قالاسى بايىرعى حىجيە كوشەسىنىڭ كوركىن قالپىنا كەلتىرىپ، بۇل جەردى تاريحي مادەنيەت كوشەسىنە اينالدىردى. سول كۇنى تۇستەن بۇرىن شي جينپيڭ چاڭدى حىجيە كوشەسىنە كەلىپ، ەرەكشەلىككە يە ٴتۇرلى ۇساق تاعامداردى، ەرەكشە ونىمدەردى، ەرەكشەلىككە يە اشەكەي بۇيىمدارىن كورىپ، دۇكەن قوجايىندارىمەن جانە ساياحاتشىلارمەن ىقىلاسپەن اڭگىمەلەستى ٴارى بەيزاتتىق مادەنيەت مۇرالار شەبەرلىك كورسەتىلىمىن تاماشالاپ، چاڭدى بايىرعى قالا كوشەسىن قالپىنا كەلتىرۋ جانە ودان پايدالانۋ، قالا جوباسى، سۋ ورتاسىن كەشەندى وڭاۋ سياقتى جاعدايلاردى ەگجەي ـ تەگجەيلى ۇعىستى. شي جينپيڭ بىلاي دەپ اتاپ كورسەتتى: جەرگىلىكتى ورىننىڭ سان الۋان ەرەكشەلىككە يە ٴداستۇرلى مادەنيەتى شۇعىلالى جۇڭحۋا وركەنيەتىن بىرگە قالىپتاستىردى ٴارى ەكونوميكالىق، قوعامدىق دامۋعا دەم بەردى. چاڭدى مادەنيەتتى جالعاستىرعان جەر، بۇل ارانىڭ سىشيان، گاۋچياڭ، حاۋزى سياقتىلارىن ۇيلەسىمدى دانەكەر ارقىلى ويداعىداي جالعاستىرىپ، ودان ويداعىداي پايدالانىپ، داۋىرمەن بىرگە ىلگەرىلەپ ويداعىداي دامىتۋ كەرەك.

　　حۋنان بۇكىل ەلدەگى استىق وندىرەتىن نەگىزگى 13 ولكەنىڭ ٴبىرى، كۇرىش ەگىلەتىن جەر اۋدانى، جالپى ٴونىم مولشەرى بۇكىل ەل بويىنشا ٴبىرىنشى ورىندا تۇرادى. سول كۇنى تۇستەن كەيىن شي جينپيڭ چاڭدى قالاسى ديڭچىڭ رايونى شيەجياپۋ قالاشىعى گاڭجۇڭپيڭ قىستاعىنا كەلىپ، جەرگىلىكتى ورىننىڭ 10 مىڭ مۋلىق استىق وندىرىسىنەن جالپىلىق ۇلگى كورسەتۋ اۋماعىنا بارىپ، مايسا جەتىلدىرۋ جانە كوكتەمگى ەگىس دايىندىعىنىڭ اياق الىسىن تەكسەرىپ كورىپ، اۋىل شارۋاشىلىعىن وسىزامانداندىرۋدى جوعارى ساپامەن ىلگەرىلەتۋ جاعدايى جونىندەگى تانىستىرۋدى تىڭدادى ٴارى استىق ەگەتىن ٴىرى وتباسىلارىمەن، اۋىل شارۋاشىلىق تەحنيكتەرىمەن، نەگىزگى ساتى كادرلارىمەن بىرگە ۇسىنىلىم، ٴونىم ەسەبىن جاسادى. شي جينپيڭ بىلاي دەپ باسا دارىپتەدى: ەلىمىزدە ٴبىر ميلليارد 400 ميلليوننان استام جان سانى بار، استىق حاۋىپسىزدىگىنە، ٴسوز جوق، ٴوزىمىز كەپىلدىك ەتۋىمىز كەرەك، جۇڭگولىقتاردىڭ اس كەسەسىنە نەگىزىنەن جۇڭگونىڭ استىعى سالىنۋى كەرەك. جوعارى ولشەمدى ەگىنجايدى ويداعىداي قۇرىپ، ۇيلەسىمدى كولەمدەگى تيجاراتتى جۇزەگە اسىرىپ، ساياساتتىق قولداۋ مەن ۇلگى كورسەتىپ جەتەكشىلىك ەتۋدى كۇشەيتىپ، سورتتى تۇقىمدى، ساپالى ماشينا ـ جابدىقتاردى، تاماشا ادىستەردى جالپىلاستىرۋ تەبىنىن ارتتىرىپ، قۇنتتاي باپتاۋعا كۇش سالىپ، استىقتىڭ بىرلىك ٴونىمى مەن ساپاسىن ونان ارى جوعارىلاتىپ، استىق ەگۋمەن بىرگە بايۋعا مۇمكىندىك جاساپ، ٴتىپتى دە كوپ شارۋا وتباسىلارىن وسىزاماندانعان ٴىرى اۋىل شارۋاشىلىعىن دامىتۋعا ات سالىسۋعا ونان ارى باۋراپ، جۇڭگوشا اۋىل شارۋاشىلىعىن وسىزامانداندىرۋ جولىمەن شىن مانىندە ورنىقتى، تىڭعىلىقتى ٴجۇرۋ كەرەك.

　　شي جينپيڭ ىلە ـ شالا استىق ەگەتىن ٴىرى وتباسى داي حۇڭنىڭ ۇيىنە كەلىپ، اۋىل شارۋاشىلىق ماشينا جابدىقتارى مەن كوكتەمگى ەگىس زاتتىق ماتەريالدارى دايىندىعىن تەكسەرىپ كوردى ٴارى قىستاقتىڭ پارتيا مۇشەلەرىنە، بۇقاراعا قىزمەت وتەۋ ورتالىعىنا بارىپ، جەرگىلىكتى ورىننىڭ نەگىزگى ساتىنىڭ اۋىرتپالىعىن جەڭىلدەتۋ، نەگىزگى ساتىنى باسقارۋ ونىمدىلىگىن جوعارىلاتۋ سياقتى جاعدايلاردى ۇعىستى. ول بىلاي دەپ اتاپ كورسەتتى: فورماشىلدىق، تورەشىلدىك ماسەلەسىن باتىل تۇزەتىپ، قوسىندى سۇرىپتاپ، اكىمشىلىك قۇرىلىمدى ىقشامداپ، وسى قىزمەتتى تاباندىلىقپەن ويداعىداي يگەرۋ كەرەك. ول نەگىزگى ساتى كادرلارىن كاسىپ سالاسىن دامىتۋ جانە اۋىل ـ قىستاقتى باسقارۋ جاعىندا كوپ بولىپ اقىل قوسىپ، كوپ بولىپ كۇش سالىپ، شارۋا بۇقاراسى مويىندايتىن ناقتى ناتيجەلەردى ۇزدىكسىز جاراتۋعا شابىتتاندىردى.

　　اتتانار ساتتە قىستاق تۇرعىندارى قاۋمالاي كەلىپ باس شۋجيدى اتتاندىرىپ سالدى. شي جينپيڭ تەرەڭ سۇيىسپەنشىلىكپەن كوپشىلىككە بىلاي دەدى: پارتيا ورتالىق كوميتەتى اۋىل شارۋاشىلىعى، اۋىل ـ قىستاق، شارۋالار قىزمەتىنە ايرىقشا ٴمان بەرەدى، ٴسوز جوق، شىنايى، پارمەندى ساياسات ـ شارالار قولدانىپ، بۇقارانىڭ ٴجىتى قاداعالاپ وتىرعان ماسەلەلەرى مەن قاجەتىنە جاۋاپ قايتارىپ، اۋىل ـ قىستاقتى گۇلدەندىرۋدىڭ تاماشا جوباسىن رەالدىققا اينالدىرادى. قىستاقتى ۇزاققا دەيىن شاپالاق ٴۇنى كەرنەدى.

　　3 ـ ايدىڭ 21 ـ كۇنى تۇستەن بۇرىن شي جينپيڭ حۋنان ولكەلىك پارتكوم مەن ولكەلىك ۇكىمەتتىڭ قىزمەت مالىمەتىن تىڭداپ، حۋناننىڭ ٴتۇرلى قىزمەتتەردە قول جەتكىزگەن ناتيجەلەرىن تۇراقتاندىردى.

　　شي جينپيڭ بىلاي دەپ اتاپ كورسەتتى: عىلىم ـ تەحنيكادا جاڭالىق اشۋ _ جاڭا ساپالى وندىرگىش كۇشتەردى دامىتۋدىڭ وزەكتى فاكتورى. عىلىم ـ تەحنيكادا جاڭالىق اشۋ ارقىلى كاسىپ سالاسىندا جاڭالىق اشۋعا جەتەكشىلىك ەتۋ جاعىنا اناعۇرلىم زور كۇش سالىپ، مەملەكەتتىڭ ستراتەگيالىق عىلىم ـ تەحنيكا كۇشتەرىمەن ىرىقتى تۇردە ۇشتاسىپ، ەل ٴىشى ـ سىرتىنداعى بىرەگەي زەرتتەۋ ـ اشۋ قۇرىلىمدارىن بەلسەنە ەنگىزىپ، شەشۋشى سالالارداعى دەربەس جاڭالىق اشۋ قابىلەتىن جوعارىلاتۋ كەرەك. كاسىپورىنداردىڭ عىلىم ـ تەحنيكادا جاڭالىق اشۋداعى نەگىزگى تۇلعالىق ورنىن كۇشەيتىپ، جاڭالىق اشۋ تىزبەگىنىڭ، كاسىپ سالاسى تىزبەگىنىڭ، قارجى تىزبەگىنىڭ، دارىندىلار تىزبەگىنىڭ ىشكەرىلەي توعىسۋىن جەبەپ، عىلىم ـ تەحنيكا جەتىستىكتەرىنىڭ رەال وندىرگىش كۇشكە جەدەل اينالۋىن ىلگەرىلەتۋ كەرەك. نازاردى باسىمدىققا يە كاسىپ سالالارىنا شوعىرلاندىرىپ، كاسىپ سالاسى نەگىزىن قايتا تۇلعالاۋدى جانە كەلەلى تەحنيكالىق جابدىقتار جاعىندا قامال الۋدى كۇشەيتىپ، وزىق جاساۋ كاسىبىن ۇزدىكسىز زورايتىپ، كۇشەيتىپ، كاسىپ سالاسىنىڭ جوعارى دەڭگەيلى، زەردەلى، جاسىل دامۋىن ىلگەرىلەتىپ، مەملەكەت دارەجەلى كاسىپ سالاسى شوعىرىن قالىپتاستىرۋ كەرەك.

　　شي جينپيڭ بىلاي دەپ باسا دارىپتەدى: رەفورمانى اناعۇرلىم جاپپاي تەرەڭدەتۋدە ماسەلەنى باعدار ەتۋدى كورنەكتىلەندىرىپ، جاڭا دامۋ ارناسىن قالىپتاستىرۋعا جانە جوعارى ساپالى دامۋدى ىلگەرىلەتۋگە تۇساۋ بولاتىن القىمداعان تۇيىندەرى مەن بوگەتتى تۇيىندەر ماسەلەسىن، دامۋ ورتاسى مەن حالىق تۇرمىسى سالاسىنداعى سىزداۋ تۇيىندەرى، قيىن تۇيىندەر ماسەلەسىن، قوعامدىق ادىلدىك پەن ادىلەتتىلىككە قايشى كەلەتىن وزەكتى تۇيىندەر، قولامتالى تۇيىندەر ماسەلەسىن كۇش سالا شەشىپ، ەلەۋلى حاۋىپ ـ قاتەردەن ٴونىمدى ساقتانىپ جانە ونى جويىپ، ەكونوميكالىق، قوعامدىق دامۋعا ۇزدىكسىز قوزعاۋشى كۇش قوسۋ، ومىرشەڭدىك كۇش ۇستەۋ كەرەك. حۋنان رەفورما جۇيەسىنىڭ شوعىرلانۋىن كۇشەيتىپ، بۇكىل ەلدىڭ ٴبىر تۇتاس ٴىرى بازار قۇرىلىسىنا اناعۇرلىم ويداعىداي ات سالىسىپ، ورتا بولىك وڭىرلەردىڭ ەڭسە كوتەرۋىمەن جانە چاڭجياڭ ەكونوميكالىق بەلدەۋىنىڭ دامۋ ستراتەگياسىمەن جاپپاي توعىسىپ، ”ٴبىر بەلدەۋ، ٴبىر جولدى“ بىرگە قۇرۋمەن تەرەڭ توعىسىپ، تۇزىمدىك ەسىك اشۋدى ورنىقتى كەڭەيتىپ، ەركىن ساۋدا سىناق رايونىن جوعارى ولشەممەن ويداعىداي قۇرىپ، جۇڭگو مەن افريكانىڭ ەكونوميكا ـ ساۋدا جاعىنداعى تەرەڭ سەلبەستىگىن الدىمەن اتقارۋ رايونىن كۇش سالا قالىپتاستىرۋ كەرەك.

　　شي جينپيڭ بىلاي دەپ اتاپ كورسەتتى: اۋىل ـ قىستاقتى جاپپاي گۇلدەندىرۋدى ىلگەرىلەتۋ _ جاڭا داۋىردەگى جاڭا جورىقتا اۋىل شارۋاشىلىعى، اۋىل ـ قىستاق، شارۋالار قىزمەتىنىڭ باس تۇتقاسى. حۋنان مەملەكەتتىڭ استىق حاۋىپسىزدىگىن قورعاۋ ماڭىزدى مىندەتىن ارقالاپ، تۇقىم مەن ەگىستىك جەر سىندى ەكى ٴتۇيىندى مىقتى يگەرىپ، تۇقىم شارۋاشىلىعىنىڭ، اۋىل شارۋاشىلىق ماشينالارىنىڭ شەشۋشى، وزەكتى تەحنيكالارىنان قامال الۋدى جەدەلدەتۋى كەرەك. ٴىرى اۋىل شارۋاشىلىعى كوزقاراسىنا، ٴىرى ازىق ـ تۇلىك كوزقاراسىنا تاباندى بولىپ، ەرەكشە اۋىل شارۋاشىلىعى مەن اۋىل شارۋاشىلىق ونىمدەرىن وڭدەۋ كاسىبىن بەلسەنە دامىتىپ، اۋىل شارۋاشىلىعىنىڭ كاسىپ سالالانۋ دەڭگەيىن جوعارىلاتۋ كەرەك. قالا مەن اۋىلدىڭ توعىسپالى دامۋىن ىشكەرىلەي ىلگەرىلەتىپ، اۋدان ٴوڭىرى ەكونوميكاسىن زورايتىپ، قالا ـ اۋىل فاكتورلارىنىڭ قوس باعىتتا اۋىسۋىن ىركىلىسسىزدەندىرىپ، اۋىل ـ قىستاقتىڭ نەگىزدىك قۇرىلعىلارى مەن الەۋمەتتىك قىزمەت وتەۋ ورنالاسىمىن عىلمي، ٴبىر تۇتاس جوسپارلاۋ كەرەك. اۋىل ـ قىستاقتاردىڭ رۋحاني وركەنيەت قۇرىلىسىن شىنايى كۇشەيتىپ، ەسكى سالت ـ سانانى وزگەرتۋدى كۇش سالا ىلگەرىلەتۋ كەرەك. پارتيا ۇيىمىنىڭ باسشىلىعىنداعى ٴوزىن ـ ٴوزى باسقارۋ، زاڭمەن باسقارۋ، مورالمەن باسقارۋ ۇشتاستىرىلعان نەگىزگى ساتىنى باسقارۋ جۇيەسىن اقاۋسىزداندىرىپ، جاڭا داۋىردەگى ”فىڭچياۋ تاجىريبەسىنە“ تاباندى بولۋ جانە ونى دامىتۋ كەرەك. قايتا كەدەيلەسۋدەن ساقتانۋدى قاداعالاۋ، كومەكتەسۋ ـ سۇيەمەلدەۋ مەحانيزمىن تياناقتاندىرىپ، كولەمدى قايتا كەدەيلەسۋ تۋىلماۋىنىڭ تومەنگى شەگىن باتىل ساقتاۋ كەرەك.

　　شي جينپيڭ بىلاي دەپ باسا دارىپتەدى: حۋنان جاڭا مادەنيەت بورىشىن اناعۇرلىم ويداعىداي ارقالاپ، جۇڭحۋا ۇلتىنىڭ وسى زامانعى وركەنيەتىن كوركەيتۋ بارىسىندا تىڭ ىسكەرلىك كورسەتۋى كەرەك. قىزىل بايلىقتى ويداعىداي قورعاپ، ودان ويداعىداي پايدالانىپ، توڭكەرىستىك ٴداستۇر مەن وتانشىلدىق تاربيەنى كۇشەيتىپ، كادرلار مەن بۇقارانى تاڭداۋلى ٴداستۇردى ساۋلەلەندىرىپ، قىزىل قان تامىردى ۇزبەي جالعاستىرىپ، سوتسياليستىك وزەكتى قۇن كوزقاراسىن امالياتتا ايگىلەپ، ٴداۋىردىڭ جاڭا سالتىن، جاڭا كەلبەتىن جەتىلدىرۋگە جەتەكتەۋ كەرەك. مادەنيەت پەن عىلىم ـ تەحنيكانى توعىستىرۋدىڭ ۇتىمدى مەحانيزمى جونىندە ىزدەنىس جاساپ، جاڭاشا مادەنيەت كاسىپ كۇيىن جەدەل دامىتىپ، مادەنيەت شارۋاشىلىعىنىڭ اناعۇرلىم كوپ جاڭا ارتۋ تۇيىندەرىن قالىپتاستىرۋ كەرەك. مادەنيەت پەن ساياحاتتىڭ ىشكەرىلەي توعىسۋىن ىلگەرىلەتىپ، حۋناننىڭ ۇلان ـ بايتاق دالاسىنىڭ جاسىل تاۋىن، تۇنىق سۋىن، اشىق اسپانىن، تازا توپىراعىن ويداعىداي قورعاپ، جاراتىلىستىق كورىنىس پەن گۋمانيتارلىق سالت ـ سانانى ساياحات كاسىبىنىڭ باياندى تارتىمدىلىعىنا اينالدىرۋ كەرەك.

　　شي جينپيڭ بىلاي دەپ اتاپ كورسەتتى: جوعارى ساپالى دامۋدى ىلگەرىلەتۋدە، جۇڭگو ۇلگىسىندەگى وسىزامانداندىرۋدى ىلگەرىلەتۋدە، ٴسوز جوق، پارتيا قۇرىلىسىن كۇشەيتۋ جانە جاقسارتۋ كەرەك. نەگىزگى تاقىرىپتىق تاربيەنىڭ جەتىستىكتەرىن بەكەمدەپ، كەڭەيتىپ، ۇزاق ۋاقىت ٴونىمدى مەحانيزم ورناتىپ جانە اقاۋسىزداندىرىپ، دۇرىس ناتيجە كوزقاراسىن ورناتىپ جانە امالياتتا ايگىلەپ، فورماشىلدىقتى تۇزەتۋ ارقىلى نەگىزگى ساتىنىڭ اۋىرتپالىعىن جەڭىلدەتۋدى ۇزدىكسىز تەرەڭدەتۋ كەرەك. پارتيا ٴتارتىبىن ۇيرەنۋ تاربيەسىن ويداعىداي ورىستەتۋگە ۇيىمداستىرىپ، پارتيالى كادرلاردى ٴتارتىپتى ۇيرەنۋگە، ٴتارتىپتى بىلۋگە، ٴتارتىپتى ايقىنداۋعا، تارتىپكە بويسۇنۋعا جەتەكتەپ، باسشى كادرلاردى دۇرىس ۇقىق كوزقاراسىن ورناتۋعا، ۇقىقتى ٴادىل ىستەتىپ، ۇقىقتى زاڭ بويىنشا ىستەتىپ، ۇقىقتى حالىق ٴۇشىن ىستەتىپ، ۇقىقتى پاكتىكپەن ىستەتۋگە قۋزاۋ كەرەك.

　　جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ساي چي قىزمەت تەكسەرۋدە بىرگە بولدى.

　　لي گانجيە، حى ليفىڭ جانە ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار قىزمەت تەكسەرۋدە بىرگە بولدى.

　　3 ـ ايدىڭ 20 ـ كۇنى تۇستەن بۇرىن شي جينپيڭ چاڭشادا چاڭشادا تۇراتىن اسكەري بولىمدەردىڭ شاڭشياۋ دارەجەلىدەن جوعارى باسشى كادرلارىن ىقىلاسپەن قابىلداپ، پارتيا ورتالىق كوميتەتى مەن ورتالىق اسكەري ىستەر كوميتەتى اتىنان چاڭشادا تۇراتىن اسكەري بولىمدەردەگى بارشا وفيتسەر ـ اسكەرلەرگە شىن ىقىلاسپەن سالەم جولدادى ٴارى كوپشىلىكپەن بىرگە ەستەلىك سۋرەتكە ٴتۇستى. جاڭ يوۋشيا قابىلداۋدا بىرگە بولدى.