2 ـ ايدىڭ 28 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن سەررا _ لەون زۇڭتۇڭى بيومەن كەڭەس وتكىزدى. سۋرەتتە: كەڭەستەن بۇرىن شي جينپيڭ مەن حانىمى پىڭ لييۋان حالىق سارايىنىڭ سولتۇستىك ۇلكەن زالىندا بيو مەن حانىمى فاتيمانى قارسى الۋ سالتىن وتكىزدى.
□ سۋرەتتى شينحۋا اگەنتتىگىنىڭ ٴتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 2 ـ ايدىڭ 28 ـ كۇنى بەيجيڭنەن بەرگەن حابارى (ٴتىلشى سۇن ي). 2 ـ ايدىڭ 28 ـ كۇنى تۇستەن كەيىن مەملەكەت ٴتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن سەررا _ لەون زۇڭتۇڭى بيومەن كەڭەس وتكىزدى.
شي جينپيڭ بىلاي دەپ اتاپ كورسەتتى: جۇڭگو مەن سەررا _ لەوننىڭ دوستىعى ۇزاق تاريحقا يە، ەكى جاق ٴبىر ـ ٴبىرىنىڭ وزەكتى مۇددەسىنە ساياتىن جانە ٴجىتى قاداعالاپ وتىرعان كەلەلى ماسەلەلەردە ٴوزارا قولداۋ كورسەتىپ، ەكونوميكالىق، قوعامدىق دامۋ سالاسىندا جوعارى ٴونىمدى سەلبەستىك جاساپ، دۇنيە ٴجۇزىنىڭ بەيبىتشىلىگى جانە دامۋى سياقتى كەڭەستىك تاقىرىپتاردا تىعىز سايكەسىپ، ەبولا ىندەتىنە، جاڭا تيپتى ايدارشا ۆيرۋس ىندەتىنە قارسى اتتانعاندا ۋاقىتتىق قيىنشىلىقتاردى بىرگە جەڭدى، جۇڭگو _ سەررا _ لەون قارىم ـ قاتىناسىن جۇڭگو مەن افريكا ىنتىماعىنىڭ، سەلبەستىگىنىڭ تيپتىك ۇلگىسى دەپ ايتۋعا بولادى. جۇڭگو جاق سەررا _ لەون جاقپەن بىرگە جوعارى دەڭگەيدەگى ساياسي ٴوزارا سەنىمدىلىكتى بەكەمدەپ، ناقتى دا ٴوزارا تيىمدىلىك جەتكىزەتىن سەلبەستىكتى ىلگەرىلەتىپ، حالىقارالىق جانە وڭىرلىك ىستەردە سايكەسۋدى كۇشەيتىپ، جۇڭگو _ سەررا _ لەون قارىم ـ قاتىناسىنىڭ تاعى دا تىڭ ساتىعا كوتەرىلۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: جۇڭگو جاق سەررا _ لەون حالقىنىڭ ٴوز ەلىنىڭ مەملەكەت جاعدايىنا ۇيلەسەتىن دامۋ جولىمەن ٴجۇرۋىن باتىل قولدايدى، سەررا _ لەون جاقپەن ەل باسقارۋ جونىندەگى اۋىس ـ كۇيىستى كۇشەيتۋدى، ٴبىر ـ ٴبىرىنىڭ ٴجىتى قاداعالاپ وتىرعان كەلەلى ماسەلەلەردە ۇزدىكسىز ٴوزارا قولداۋ كورسەتۋدى، يەلىك ۇقىق، حاۋىپسىزدىك، دامۋ مۇددەسىن قورعاۋدى قالايدى. جۇڭگو جاق سەررا _ لەوننىڭ اۋىل شارۋاشىلىعى، نەگىزدىك قۇرىلعىلار قۇرىلىسى، ادام كۇشى بايلىعى سياقتى سالالارداعى دامۋىنا شاماسىنىڭ كەلگەنىنشە كومەكتەسۋدى جانە قولداۋ كورسەتۋدى قالايدى، جۇڭگو كاسىپورىندارىن سەررا _ لەونعا بارىپ قارجى قوسىپ، شارۋاشىلىقتى گۇلدەندىرۋگە ىنتالاندىرادى، قولداۋ كورسەتەدى. ەكى جاق بىرلەسكەن مەملەكەتتەر ۇيىمى حاۋىپسىزدىك القالار كەڭەسى ىستەرىندەگى سەلبەستىكتى كۇشەيتىپ، افريكانىڭ جانە قالىڭ وركەندەپ كەلە جاتقان ەلدەردىڭ مۇددەسىن بىرگە قورعاۋى كەرەك. سەررا _ لەون جاقتىڭ الەمدىك دامۋ باستاماسىنا، الەمدىك حاۋىپسىزدىك باستاماسىنا، الەمدىك وركەنيەت باستاماسىنا بەلسەنە قاتىناسىپ، ادامزاتتىڭ تاعدىرلاس ورتاق تۇلعاسىن قۇرۋدى قول ۇستاسا ىلگەرىلەتۋىن قارسى الامىز.
شي جينپيڭ بىلاي دەپ اتاپ كورسەتتى: جۇڭگو _ افريكا حالقى تاعدىرلاس. جۇڭگو افريكا ەلدەرىمەن ىنتىماقتى، سەلبەستىكتى دامىتۋدى باستان ـ اياق سىرتقى ساياساتىنىڭ ماڭىزدى ىرگە تاسى ەتىپ كەلەدى. جۇڭگو جاق شىنايى، بۇكپەسىز، باۋىرمال، ادال بولۋ ۇستانىمىنان جازباي، افريكا ەلدەرىمەن ٴوزارا قولداۋ كورسەتۋدى جانە دوستىق سەلبەستىكتى كۇشەيتىپ، افريكانىڭ ونەركاسىپتەندىرۋ باستاماسىنا قولداۋ كورسەتىپ، افريكانىڭ اۋىل شارۋاشىلىعىن وسىزامانداندىرۋ جوسپارىنا دەم بەرىپ، جۇڭگو _ افريكا دارىندىلاردى باۋلۋ سەلبەستىك جوسپارىن افريكا وداعىنىڭ «2063 ـ جىلعا دەيىنگى كەڭەستىك تارتىبىمەن»، افريكا ەلدەرىنىڭ دامۋ ستراتەگياسىمەن تىعىز ٴتۇيىلىستىرىپ، جۇڭگونىڭ دامۋىن، افريكانىڭ دامۋىن، دۇنيە ٴجۇزىنىڭ دامۋىن اناعۇرلىم بىرلەستىرىپ، جۇڭگو _ افريكا سەلبەستىگىنىڭ ساپاسىن جوعارىلاتۋدى، دەڭگەيىن ٴوسىرۋدى ىلگەرىلەتىپ، دۇنيە ٴجۇزىنىڭ بەيبىت، حاۋىپسىز، گۇلدەنگەن، العا باسقان نۇرلى بولاشاققا بەت الۋىن ىلگەرىلەتەدى. جۇڭگو جاق سەررا _ لەوندى قامتىعان افريكاداعى دوستارمەن بىرگە بيىلعى جۇڭگو _ افريكا سەلبەستىك تالقى مىنبەرىن ويداعىداي وتكىزۋدى، جۇڭگو مەن سەررا _ لەوننىڭ، جۇڭگو مەن افريكانىڭ دوستىعىن اسقاقتاتا ٴتۇسۋدى قالايدى.
بيو مىنالاردى ٴبىلدىردى: جۇڭگو سەررا _ لەوننىڭ سەنىمدى جانە ارقا سۇيەيتىن دوسى، ەكى جاق باستان ـ اياق ٴبىرىن ـ ٴبىرى قۇرمەتتەپ، تەرەزەسى تەڭ تۇرعىدا مامىلە جاساپ كەلەدى، ٴداستۇرلى دوستىعى تەرەڭ. سەررا _ لەون جاق جۇڭگو جاقتىڭ سەررا _ لەوننىڭ ەكونوميكاسىنىڭ، قوعامىنىڭ دامۋىنا زور كۇشپەن قولداۋ كورسەتكەندىگىنە العىس ايتادى، جۇڭگو كوممۋنيستىك پارتياسىنىڭ جۇڭگو حالقىن باستاپ قارىشتاپ دامۋدى جۇزەگە اسىرعاندىعىن، ۇلتتىڭ گۇلدەنۋىن ىلگەرىلەتكەندىگىن ايرىقشا القايدى. جۇڭگونىڭ تاجىريبەسى وركەندەپ كەلە جاتقان ەلدەردىڭ دامۋدى تەزدەتۋىنە تەرەڭ وي سالدى. ٴتوراعا شي جينپيڭ العا قويعان ”ٴبىر بەلدەۋ، ٴبىر جول“ باستاماسى بۇكىل ادامزاتتىڭ ورتاق مۇددەسىن جەبەۋگە كەڭ دە بەلسەندى ىقپال جاسادى. سەررا _ لەون جاق ٴبىر جۇڭگو پرينسيبىنە قاتاڭ بويسۇنادى، جۇڭگو جاقتىڭ يەلىك ۇقىعى مەن تەرريتوريا تۇتاستىعىن قورعاۋىن باتىل قولدايدى، جۇڭگو جاقتىڭ ٴوزىنىڭ وزەكتى مۇددەسىن قورعاۋىن قولدايدى، جۇڭگونىڭ تاجىريبەسىنەن ۇيرەنۋدى، ۇلگى الۋدى، جۇڭگو جاقپەن ”ٴبىر بەلدەۋ، ٴبىر جولدى“ بىرگە قۇرۋ سەلبەستىگىن كۇشەيتۋدى، نەگىزدىك قۇرىلعىلار قۇرىلىسى، ساۋدا، وقۋ ـ اعارتۋ، الەۋمەتتىك قىزمەت وتەۋ سياقتى سالالارداعى سەلبەستىكتىڭ جاڭا ٴورىسىن كەڭەيتۋدى، سەررا _ لەون مەن جۇڭگونىڭ ٴداستۇرلى دوستىعىنا جاڭا قوزعاۋشى كۇش ۇستەۋدى، سەررا _ لەون مەن جۇڭگونىڭ جاپپاي ستراتەگيالىق سەلبەستىك سەرىكتەستىك قاتىناسىنىڭ ونان ارى دامۋىن ىلگەرىلەتۋدى قالايدى. سەررا _ لەون جاق جۇڭگو جاقپەن وڭىرلىك جانە حالىقارالىق ىستەردە سايكەسۋدى، سەلبەسۋدى كۇشەيتىپ، دۇنيە ٴجۇزىنىڭ بەيبىتشىلىگى مەن دامۋىن بىرگە جەبەۋدى قالايدى.
كەڭەستەن كەيىن ەكى ەلدىڭ مەملەكەت باسشىلارى ”ٴبىر بەلدەۋ، ٴبىر جولدى“ بىرگە قۇرۋ، اۋىل شارۋاشىلىعىن، ەكونوميكانى دامىتۋ، الەمدىك دامۋ باستاماسىن تياناقتاندىرۋ سياقتى سالالارداعى كوپ ٴتۇرلى ەكى جاقتى سەلبەستىك حۇجاتتارىنا قول قويىلۋىنا بىرگە كۋا بولدى.
ەكى جاق «جۇڭحۋا حالىق رەسپۋبليكاسى مەن سەررا _ لەون رەسپۋبليكاسىنىڭ جاپپاي ستراتەگيالىق سەلبەستىك سەرىكتەستىك قارىم ـ قاتىناسىن تەرەڭدەتۋ جونىندەگى بىرلەسكەن مالىمدەمەسىن» جاريالادى.
كەڭەستەن بۇرىن شي جينپيڭ مەن حانىمى پىڭ لييۋان حالىق سارايىنىڭ سولتۇستىك ۇلكەن زالىندا بيو مەن حانىمى فاتيمانى قارسى الۋ سالتىن وتكىزدى.
تيان ـ انمىن الاڭىندا 21 رەت قۇرمەت ساليۋتى اتىلىپ، قۇرمەت قاراۋىلى قاتارعا تۇرىپ قۇرمەت ٴبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىعىپ، اسكەري وركەستر جۇڭگو مەن سەررا _ لەون ەكى ەلدىڭ مەملەكەت ٴانىن ورىندادى. بيو شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ٴارى قاتارعا ٴبولىنىپ پاراتتان ٴوتۋىن كوردى.
سول كۇنى كەشتە شي جينپيڭ مەن پىڭ لييۋان حالىق سارايىنىڭ جينسى زالىندا بيو مەن حانىمىنا ارناپ قارسى الۋ قوناعاسىن وتكىزدى.
ۋاڭ ي جوعارىداعى قيمىلدارعا قاتىناستى.
