شي جينپيڭ بۇكىل ارمياداعى ساقا جولداستاردىڭ كوكتەم مەرەكەسىن قۇتتىقتادى
1 ـ ايدىڭ 29 ـ كۇنى تۇستەن كەيىن ورتالىق اسكەري ىستەر كوميتەتىنىڭ بەيجيڭدە تۇراتىن اسكەري بولىمدەردەگى ساقا كادرلاردان حال سۇراۋ، كوكتەم مەرەكەسىن قارسى الۋ ادەبيەت ـ كوركەمونەر كونسەرتى بەيجيڭدە وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ كونسەرتتى تاماشالادى، كونسەرتكە قاتىناسقان ارمياداعى ساقا جولداستارعا جانە بۇكىل ارمياداعى دەمالىسقا، زەينەتكە شىققان ساقا كادرلارعا مەرەكەلىك سالەم جولدادى ٴارى ولاردىڭ كوكتەم مەرەكەسىنە قۇتتى بولسىن ايتتى.
□ سۋرەتتى شينحۋا اگەنتتىگىنىڭ ٴتىلشىسى لي گاڭ تۇسىرگەن
شينحۋا اگەنتتىگىنىڭ 1 ـ ايدىڭ 30 ـ كۇنى بەيجيڭنەن بەرگەن حابارى (ٴتىلشى مەي چاڭۋي). ورتالىق اسكەري ىستەر كوميتەتىنىڭ بەيجيڭدە تۇراتىن اسكەري بولىمدەردەگى ساقا كادرلاردان حال سۇراۋ، كوكتەم مەرەكەسىن قارسى الۋ ادەبيەت ـ كوركەمونەر كونسەرتى 1 ـ ايدىڭ 29 ـ كۇنى بەيجيڭدە وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ كونسەرتتى تاماشالاپ، كونسەرتكە قاتىناسقان ارمياداعى ساقا جولداستارعا جانە بۇكىل ارمياداعى دەمالىسقا، زەينەتكە شىققان ساقا كادرلارعا مەرەكەلىك سالەم جولدادى ٴارى ولاردىڭ كوكتەم مەرەكەسىنە قۇتتى بولسىن ايتتى.
شايقاس ٴانىن اسقاقتاتىپ كوكتەم مەرەكەسىن قارسى الدى، ارميانى قۇدىرەتتەندىرۋدىڭ جاڭا جورىعىندا ەكپىندەي ىلگەرىلەدى. جۇڭحۋا ۇلتىنىڭ ٴداستۇرلى مەرەكەسى _ كوكتەم مەرەكەسى كەلۋ قارساڭىندا جاڭا جۇڭگونى قۇرۋ، قورعاۋ، كوركەيتۋ، مەملەكەت قورعانىسى مەن ارميا قۇرىلىسى ٴۇشىن كورنەكتى ۇلەس قوسقان بەيجيڭدە تۇراتىن اسكەري بولىمدەردەگى ساقا كادرلار جۇڭگو تەاترحاناسىندا باس قوسىپ، كوكتەم مەرەكەسىن شاتتانا قارسى الدى.
تۇستەن كەيىن ساعات 4 مولشەرىندە شي جينپيڭ ساقا جولداستاردىڭ اراسىنا كەلگەندە تۇتاس زالدا قىزۋ قول شاپالاق ٴۇنى كوتەرىلدى. شي جينپيڭ ولاردىڭ دەنساۋلىق جانە تۇرمىس جاعدايىن ىقىلاسپەن سۇراپ، پارتيا 20 ـ قۇرىلتايى رۋحىنىڭ جەتەكشىلىگىندە وتكەن ٴبىر جىلدان بەرى پارتيا، مەملەكەت، ارميا ىستەرىندە قول جەتكەن كەلەلى تابىستاردى بىرگە ەسكە الدى. ساقا جولداستار ٴبىر اۋىزدان مىنالاردى ٴبىلدىردى: شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، شي جينپيڭ جاڭا ٴداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، شي جينپيڭ ارميانى قۇدىرەتتەندىرۋ يدەياسىن ىشكەرىلەي دايەكتىلەندىرىپ، ”ەكىنى تۇراقتاندىرۋدىڭ“ شەشۋشى ٴمانىن تەرەڭ ٴتۇسىنىپ، ”ٴتورت تانىمدى“ كۇشەيتىپ، ”ٴتورت سەنىمدى“ بەكەمدەپ، ”ەكىنى قورعاۋدى“ ورىنداپ، اسكەري ىستەر كوميتەتىنىڭ ٴتوراعاسى جاۋاپتى بولۋ ٴتۇزىمىن دايەكتىلەندىرىپ، سەنىمدى بەكەمدەپ، رۋحتى سەرپىلتىپ، ىنتىماقتاسا ەكپىندەي ىلگەرىلەپ، ارميا قۇرىلعاندىعىنىڭ 100 جىلدىعى كۇرەس نىساناسىن جۇزەگە اسىرۋدان قامال الۋ شايقاسىن ويداعىداي جۇرگىزىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋ ٴۇشىن تىڭ ۇلەس قوسامىز.
كونسەرت ”ارميانى قۇدىرەتتەندىرۋ يدەياسىن ۇيرەنىپ، ارميانى قۇدىرەتتەندىرۋ ىستەرىنە ۇلەس قوسۋدى“ نەگىزگى تاقىرىپ ەتىپ، ادەبيەت ـ كوركەمونەر اترەتى اسكەريلەر ٴۇشىن قىزمەت ەتەتىن اۋەلگى سلوبتى ايگىلەپ، جاڭا داۋىردەگى ارميانى قۇدىرەتتەندىرۋ ىستەرىنىڭ ۇلى تابىستارىن جاندى بەينەلەپ، بۇكىل ارمياداعى وفيتسەر ـ اسكەرلەردىڭ ۇيتقىنى ادالدىقپەن قورعايتىن، ارميانى قۇدىرەتتەندىرۋدە ەكپىندەي ىلگەرىلەيتىن بىرەگەي رۋحاني بەت ـ بەينەسىن تولىق ايگىلەدى. ”جاڭا ٴداۋىر، جاڭا جورىق، جاڭا ٴبىر جىلداعى جاڭا نىسانا“، ٴان ـ ٴبي «شايقاس جىرىمەن كوكتەم مەرەكەسىن قارسى الايىق» كونسەرتتىڭ شىمىلدىعىن اشىپ، دۋماندى دا قىزۋ مەرەكەلىك راي قالىپتاستىردى. كورىنىستىك ويىندارمەن قويىلعان ٴان «نۇر قۋالاۋ» يدەيامەن بولاشاقتى نۇرلاندىرىپ، كۇرەسپەن بولاشاققا جول اشقان ايبىندى امالياتتى قىزۋ جىرلاپ، پارتيا تۋى استىندا اسكەري رۋحتى بەرىك ورناتۋدىڭ بەكىمىن، ەرىك ـ جىگەرىن ايقىن بەينەلەدى. توعىسپالى حور «قۇرىش بولىپ شىڭدالۋ» ارميانىڭ ساياسي رەتتەۋ ـ تاربيەلەۋدى تەرەڭدەتۋىنەن قاۋلاعان جاڭا اۋقىمدى، دۇرىس سالتتى ايگىلەپ، كىرشىكسىزدىك داڭقىن بەكەمدەۋدەگى، ارميانى قۇدىرەتتەندىرۋ بورىشىن ارقالاۋداعى مىعىم سەنىمدى كورسەتتى. ٴبيلى ٴان «اتتانعان ٴسات» جانە ٴبي «شەشۋشى جەڭىس» سياقتى نومىرلەر اسكەري بولىمدەردىڭ ساقاداي ساي تۇرعان ساقتىق جاعدايى مەن بۇيرىقتى ەستي سالا اتتانىسقا كەلەتىن ەكپىندى كۇيىن بەينەلەدى. حور جانە ٴبيلى ٴان «جاۋىنگەرلەردىڭ اتا مەكەنى الىستا»، «تاۋ ـ وزەنگە جازىلدى»، «حالىققا مالىمەت» دەگەن اندەر اسقاقتاپ، حالىق پەرزەنت اسكەرلەرىنىڭ شەكارا قورعانىسى كۇرەسى، حاۋىپتەن اراشالاپ، اپاتتان قۇتقارۋ، شەتەلدەگى چياۋميندەردى شەگىندىرۋ سياقتى كەلەلى مىندەتتەردى ورىنداعان بورىشى مەن جاۋاپكەرشىلىگىن جانە ۇلى سۇيىسپەنشىلىگىن قايتالاي كورسەتىپ، قاھارمانداردى ايرىقشا جىرلاپ، قاھارمانداردى ماداقتادى. جاڭادان قۇراستىرىلعان كلاسسيكالىق اندەر «يان ـ ان جىرى»، «حۇڭمەيگە ماداق»، «مەن ٴبىر اسكەرمىن» توڭكەرىستىك اسكەريلەردىڭ قىزىل ەستەمەلەرىن وياتتى، قىسقا تەاتر «قۋانىشتى حابار» ارميا مەن جەرگىلىكتى ورىننىڭ ەڭبەگى مول ارداگەر، ۇلگىلەردى قۇرمەتتەگەن اسەرلى اڭگىمەسىن بايانداپ، تاماشا ٴداستۇر ۇرپاق بويى جالعاسقان، مەملەكەتتى قۇدىرەتتەندىرۋدىڭ، ارميانى قۇدىرەتتەندىرۋدىڭ كۇشى شوعىرلانعان اسەرلى كورىنىستەردى كەسكىندەدى. ”كىرشىكسىز سۇيىسپەنشىلىكتى وتانىما ارناپ، مايداندا ارمانعا قۇلاش سەرمەپ ارميانى قۇدىرەتتەندىرۋدىڭ شايقاس ٴانىن شارىقتاتامىن“، كونسەرت «ارميانى قۇدىرەتتەندىرۋدە مەن بارمىن» توعىسپالى حورىمەن اياقتاپ، نىسانادان كوز جازباي بار كۇشپەن قامال الىپ، ارميانى قۇدىرەتتەندىرۋ ىستەرىنىڭ جاڭا جاعدايىن ۇزدىكسىز اشقان اسقاق جىگەردى جەتكىزدى. كونسەرت قاراپايىم سۇلۋلىقتى، ارىندى جىگەردى ايگىلەپ، ارميانى قۇدىرەتتەندىرۋ مادەنيەتىنىڭ شىت جاڭا بەينەسىن ايگىلەدى.
جاڭ يوۋشيا، حى ۋيدۇڭ، ليۋ جىنلي، مياۋ حۋا، جاڭ شىڭمين بىرگە تاماشالادى.
اسكەري ىستەر كوميتەتى ورگانىنىڭ ٴارقايسى تاراۋلارىنداعى، ارميانىڭ بەيجيڭدە تۇراتىن قاتىستى ورىندارىنداعى باسشىلار مەن اسكەري بولىمدەردەگى وفيتسەر ـ اسكەرلەردىڭ ۋاكىلدەرى دە كونسەرتتى تاماشالادى.
