9 - ايدىڭ 13 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن ۆەنەسۋەلا زۇڭتۇڭى مادۋرومەن كەڭەس وتكىزدى. سۋرەتتە: كەڭەستەن بۇرىن شي جينپيڭ مەن حانىمى پىڭ لييۋان مادۋرو مەن حانىمى فلورەسپەن سۋرەتكە ءتۇسىپ ەستەلىك قالدىردى.
□ سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 9 - ايدىڭ 13 - كۇنى بەيجيڭنەن بەرگەن حابارى (ءتىلشى ليۋ حۋا). 9 - ايدىڭ 13 - كۇنى تۇستەن كەيىن مەملەكەت ءتوراعاسى شي جينپيڭ حالىق سارايىندا جۇڭگوعا مەملەكەتتىك ساپارمەن كەلگەن ۆەنەسۋەلا زۇڭتۇڭى مادۋرومەن كەڭەس وتكىزدى. ەكى ەلدىڭ مەملەكەت باسشىسى جۇڭگو − ۆەنەسۋەلا قارىم - قاتىناسىن بارلىق جاعدايدا بىردەي ستراتەگيالىق سەرىكتەستىك قارىم - قاتىناس دەڭگەيىنە كوتەرۋدى جاريالادى.
شي جينپيڭ بىلاي دەپ اتاپ كورسەتتى: جۇڭگو مەن ۆەنەسۋەلا ءوزارا سەنىمدى جاقسى دوس، بىرگە داميتىن جاقسى سەرىكتەر. تاياۋ جىلداردان بەرى جۇڭگو مەن ۆەنەسۋەلا ەكى ەل دە تىم وزگەشە دامۋ بارىسىن باستان كەشتى، ەكى جاق حالىقارالىق اۋمالى - توكپەلى جاعدايدا ءبىرىن - ءبىرى قولداپ، اينىماس دوستىق سۇيىسپەنشىلىك ورناتتى. جۇڭگو جاق ۆەنەسۋەلامەن قارىم - قاتىناستى دامىتۋعا باستان - اياق ستراتەگيالىق بيىكتەن جانە ۇزاق بولاشاقتىق تۇرعىدان مامىلە جاسايدى، ۆەنەسۋەلا جاقتىڭ مەملەكەتتىڭ يەلىك ۇقىعىن، ۇلتتىڭ ار - نامىسىن، قوعامنىڭ ورنىقتىلىعىن قورعاۋ قۇلشىنىسىن باتىل قولدايدى، ۆەنەسۋەلا جاقتىڭ سىرتقى كيلىگۋگە قارسى تۇراتىن ادىلەتتى ءىسىن باتىل قولدايدى. جۇڭگو مەن ۆەنەسۋەلانىڭ بارلىق جاعدايدا بىردەي ستراتەگيالىق سەرىكتەستىك قارىم - قاتىناس ورناتۋى ەكى ەل حالقىنىڭ ورتاق تىلەگىنە ۇيلەسەدى، تاريح دامۋىنىڭ ۇلكەن اۋقىمىنا سايكەسەدى. ەكى جاق جۇڭگو − ۆەنەسۋەلا ستراتەگيالىق سەلبەستىگىنىڭ اناعۇرلىم كوپ سۇبەلى جەمىس بەرۋىن ىلگەرىلەتىپ، ەكى ەل حالقىنا اناعۇرلىم كوپ قۇت - ىرىس اكەلۋى ءارى دۇنيە ءجۇزىنىڭ بەيبىتشىلىگى مەن دامۋىنا اناعۇرلىم كوپ وڭ ەنەرگيا قوسۋى كەرەك.
شي جينپيڭ جۇڭگونىڭ رەفورما جاساۋ، ەسىك اشۋ، اسىرەسە، ەكونوميكالىق ەرەكشە رايون قۇرىلىسىنا قاتىستى جاعدايلارىن تانىستىرىپ، بىلاي دەپ اتاپ كورسەتتى: رەفورما جاساۋ، ەسىك اشۋ − جۇڭگونىڭ ارشىندى قاداممەن داۋىرگە ىلەسۋىنىڭ ماڭىزدى اسىلى، زامانىمىزداعى جۇڭگونىڭ تاعدىرىن بەلگىلەيتىن شەشۋشى امال، جۇڭگو وسى بارىستا قول جەتكىزگەن قۇندى تاجىريبەلەرىن قاستەرلەپ، رەفورما جاساۋدى، ەسىك اشۋدى ۇزدىكسىز العا ىلگەرىلەتەدى. ءارقانداي كۇش جۇڭگونىڭ دامۋ، العا باسۋ قادامىنا بوگەت جاساي المايدى. جۇڭگو جاق ۆەنەسۋەلا جاقپەن ءبىر - ءبىرىنىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولى جونىندە ىزدەنىس جاساۋىن باتىل قولداپ، پارتيانى باسقارۋ، ەل باسقارۋ تاجىريبەلەرى جونىندە اۋىس - كۇيىس جاساۋدى كۇشەيتىپ، ۆەنەسۋەلا جاقتىڭ ەكونوميكالىق ەرەكشە رايون قۇرۋىن قولداۋدى قالايدى، ۆەنەسۋەلا جاقپەن قاتىستى تاجىريبەلەردەن ورتاقتاسىپ، ۆەنەسۋەلا جاقتىڭ مەملەكەت قۇرىلىسىن ىلگەرىلەتۋىنە كومەكتەسۋدى قالايدى.
شي جينپيڭ بىلاي دەپ اتاپ كورسەتتى: كەلەر جىلى جۇڭگو مەن ۆەنەسۋەلا ديپلوماتيالىق قارىم - قاتىناس ورناتقاندىعىنىڭ 50 جىلدىعى، ەكى جاق بۇنى سالتاناتتى قۇتتىقتاۋى كەرەك. جۇڭگو جاق ۆەنەسۋەلا جاقپەن گۋمانيتارلىق اۋىس - كۇيىستى قويۋلاتىپ، ۆەنەسۋەلادا حانزۋ ءتىلى وقىتۋىن ورىستەتۋدى، كۇڭزى شۋەيۋانىن ويداعىداي جۇرگىزۋدى قولداپ، مەديالار اۋىس - كۇيىسىن كۇشەيتىپ، جۇڭگو مەن ۆەنەسۋەلانىڭ دوستىق حيكاياسىن ويداعىداي بايانداۋدى قالايدى. ەكى جاق جۇڭگو − ۆەنەسۋەلا جوعارى دارەجەلىلەر قۇراما كوميتەتىنىڭ 17 - رەتكى ءماجىلسى قول جەتكىزگەن جەتىستىكتەردى مۇقيات تياناقتاندىرىپ، كەلەسى ساتىداعى ءارقايسى سالاداعى ناقتى ىستەر سەلبەستىگىن كۇشەيتۋى كەرەك. جۇڭگو جاق ۆەنەسۋەلانىڭ ساپالى، ەرەكشە ونىمدەرىن يمپورت ەتۋدى كەڭەيتۋدى قالايدى. ۆەنەسۋەلانىڭ جۇڭگو ورتاعا قويعان حالىقارالىق اي شارىن عىلمي زەرتتەۋ پۋنكتى سەلبەستىگىنە قوسىلعان امەريكا قۇرلىعىنداعى تۇڭعىش مەملەكەت بولعاندىعىن قۇتتىقتايمىن. ەكى جاق بىرلەسكەن مەملەكەتتەر ۇيىمى، ”77 ەل توبى مەن جۇڭگو“ سياقتى كوپ جاقتى مەحانيزمدە تىعىز سايكەسىپ، باسقا دا وركەندەپ كەلە جاتقان ەلدەرمەن ىنتىماقتى، سەلبەستىكتى كۇشەيتىپ، بىرلەسكەن مەملەكەتتەر ۇيىمى ۋستاۆىنىڭ باس ماقساتى مەن پرينسيبىن بىرگە قورعاپ، قالىڭ وركەندەپ كەلە جاتقان ەلدەردىڭ ورتاق مۇددەسىن قورعاۋى كەرەك. جۇڭگو جاق جۇڭگو − لاتىن امەريكاسى قارىم - قاتىناسىنىڭ دامۋىنا ايرىقشا ءمان بەرەدى. كەلەر جىلى − جۇڭگو − لاتىن امەريكاسى تالقى مىنبەرى قۇرىلعاندىعىنىڭ 10 جىلدىعى. جۇڭگو جاق ۆەنەسۋەلا قاتارلى وڭىردەگى ەلدەرمەن بىرگە جۇڭگو مەن لاتىن امەريكاسىنىڭ جالپى تۇلعالىق سەلبەستىگىن جەبەپ، جۇڭگو − لاتىن امەريكاسى تاعدىرلاس ورتاق تۇلعاسىن بىرگە قۇرۋدى قالايدى.
مادۋرو مىنالاردى ءبىلدىردى: ءتوراعا شي جينپيڭنىڭ باسشىلىعىندا، جۇڭگو بۇكىل ادامزاتتىڭ بەيبىتشىلىگىنە، دامۋىنا جانە قۇت - ىرىسىنا كۇش سالاتىن ۇلى مەملەكەتكە اينالدى ءارى كوپ ۇيەكتەنگەن جاڭا دۇنيەنى ىلگەرىلەتەتىن ماڭىزدى قوزعالتقىش. وسى رەت جۇڭگودا ساپاردا بولعانىمدا، كورگەن - بىلگەندەرىمنىڭ بارلىعى جۇڭگونىڭ العا باسۋى مەن كۇش - قۋاتىن تولىق ايگىلەدى، مەن جۇڭگو كوممۋنيستىك پارتياسىنىڭ قول جەتكىزگەن ۇلى تابىستارىن شىن جۇرەكتەن قۇتتىقتايمىن. ۆەنەسۋەلا مەن جۇڭگو ەكى ەلدىڭ دوستىعى تەرەڭ، سەلبەستىگىنىڭ جەتىستىگى مول، ەكى ەلدىڭ قارىم - قاتىناسىن بۇكىل جەر شارىنداعى وڭتۇستىك ەلدەر قارىم - قاتىناسىنىڭ ۇلگىسى دەۋگە بولادى. ۆەنەسۋەلا حالقى جۇڭگو ۇكىمەتى مەن حالقىنىڭ ۆەنەسۋەلا زاڭسىز سىڭار جاقتى جازالاۋعا جانە جاڭا تيپتى ايدارشا ۆيرۋس ىندەتىنىڭ قات - قابات قيىنشىلىعىنا ۇشىراعاندا قىمباتتى قولداۋ جانە كومەك كورسەتكەندىگىنە شىن جۇرەكتەن العىس ايتادى. جۇڭگولىق باۋىرلاستارىنىڭ كومەگىنىڭ ارقاسىندا، ۆەنەسۋەلا حالقى سىننان سۇرىنبەي ءوتىپ، مەملەكەتتىڭ ەكونوميكالىق قۇرىلىس ىستەرىندە كەرەمەت تابىستارعا قول جەتكىزدى. قازىر ۆەنەسۋەلانىڭ مەملەكەتتىك دامۋى جانە ۆەنەسۋەلا − جۇڭگو قارىم - قاتىناسى تۇگەلدەي ماڭىزدى كەزەڭدە تۇر، مەنىڭ جۇڭگودا مەملەكەتتىك ساپاردا بولۋىم ءارى ءتوراعا شي جينپيڭمەن بىرگە ۆەنەسۋلا − جۇڭگو قارىم - قاتىناسىن بارلىق جاعدايدا بىردەي ستراتەگيالىق سەرىكتەستىك قارىم - قاتىناس دەڭگەيىنە كوتەرۋدى جاريالاۋىمىز تاريحي مانگە يە، ءسوز جوق، ۆەنەسۋەلا − جۇڭگو قارىم - قاتىناسىنىڭ جاڭا ءداۋىرىن اشادى. ۆەنەسۋەلا جاق جۇڭگو جاقتىڭ ەكونوميكالىق ەرەكشە رايون قۇرۋ تاجىريبەلەرىنەن ۇيرەنىپ، ۇلگى الىپ، ەكى ەلدىڭ اۋىل شارۋاشىلىعى، قارجى قوسۋ، وقۋ - اعارتۋ، ساياحات سياقتى سالالارداعى ناقتى ىستەر سەلبەستىگىن تەرەڭدەتۋدى قالايدى. ۆەنەسۋەلا جاق ”ءبىر بەلدەۋ، ءبىر جولدى“ بىرگە قۇرۋدى بەلسەنە قولدايدى، ءتوراعا شي جينپيڭ العا قويعان الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن قولدايدى، جۇڭگو جاقپەن بىرلەسكەن مەملەكەتتەر ۇيىمى، بريكس مەحانيزمى سياقتى كوپ جاقتى جۇلگەدەگى كەڭەسۋدى، ىستەستىكتى جيىلەتىپ، كوپ جاقتىلىقتى جانە وركەندەپ كەلە جاتقان ەلدەردىڭ ورىندى مۇددەسىن قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى. ۆەنەسۋەلا جاق لاتىن امەريكاسى ورتاق تۇلعاسىنىڭ جۇڭگومەن قارىم - قاتىناسىن ونان ارى دامىتۋىن جەبەۋدە بەلسەندى رول اتقارۋدى قالايدى.
كەڭەستەن كەيىن ەكى ەلدىڭ مەملەكەت باسشىسى ”ءبىر بەلدەۋ، ءبىر جولدى“ بىرگە قۇرۋ، ەكونوميكا - ساۋدا، وقۋ - اعارتۋ، ساياحات، عىلىم - تەحنيكا، دەنساۋلىق ساقتاۋ، عارىش، حالىقتىق اۆياتسيا سياقتى سالالارداعى كوپتەگەن ەكى جاقتى سەلبەستىك حۇجاتتارى جونىندە كەلىسىم جاساسۋعا بىرگە كۋا بولدى.
ەكى جاق «جۇڭحۋا حالىق رەسپۋبليكاسى مەن ۆەنەسۋەلا بوليۆار رەسپۋبليكاسىنىڭ بارلىق جاعدايدا بىردەي ستراتەگيالىق سەرىكتەستىك قارىم - قاتىناس ورناتۋى جونىندەگى بىرلەسكەن مالىمدەمەسىن» جاريالادى.
كەڭەستەن بۇرىن شي جينپيڭ حالىق سارايىنىڭ شىعىس قاقپاسىنىڭ سىرتىنداعى الاڭدا مادۋرونى قارسى الۋ سالتىن وتكىزدى.
مادۋرو جەتكەن كەزدە قۇرمەت قاراۋىلى قاتار تۇزەپ قۇرمەت ءبىلدىردى. ەكى ەلدىڭ مەملەكەت باسشىسى پارات مىنبەسىنە شىقتى، اسكەري وركەستر جۇڭگو − ۆەنەسۋەلا ەكى ەلدىڭ مەملەكەت ءانىن ورىندادى، تيان - انمىن الاڭىندا 21 رەت قۇرمەت ساليۋتى اتىلدى. مادۋرو شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ءارى سالتانات قاتارىن تاماشالادى.
شي جينپيڭنىڭ حانىمى پىڭ لييۋان مەن مادۋرونىڭ حانىمى فلورەس قارسى الۋ سالتىنا سەرىك بولىپ قاتىناستى. سول كۇنى كەشتە شي جينپيڭ مەن پىڭ لييۋان حالىق سارايىنىڭ جينسى زالىندا مادۋرو مەن فلورەسكە ارناپ قارسى الۋ قوناعاسىن بەردى.
ۋاڭ ي جوعارىداعى قيمىلدارعا قاتىناستى.
