شي جينپيڭ مەملەكەتتىك ەكولوگيالىق ورتانى قورعاۋ جينالىسىندا بىلاي دەپ باسا دارىپتەدى
كورىكتى جۇڭگو قۇرىلىسىن جاپپاي ىلگەرىلەتىپ، ادام مەن تابيعات جاراسىمدى قاتار ءومىر سۇرەتىن وسىزاماندانۋدى جەدەل ىلگەرىلەتۋ كەرەك
لي چياڭ باسقاردى، جاۋ لىجي، ۋاڭ حۋنيڭ، ساي چي، لي شي قاتىناستى، ديڭ شۋەشياڭ ءسوز سويلەدى
مەملەكەتتىك ەكولوگيالىق ورتانى قورعاۋ جينالىسى 7 - ايدىڭ 17 - كۇنىنەن 18 - كۇنىنە دەيىن بەيجيڭدە اشىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ماجىلىسكە قاتىناستى ءارى ماڭىزدى ءسوز سويلەدى.
سۋرەتتى شينحۋا اگەنتتىگىنىڭ ءتىلشىسى راۋ ايمين تۇسىرگەن
شينحۋا اگەنتتىگىنىڭ 7 - ايدىڭ 18 - كۇنى بەيجيڭنەن بەرگەن حابارى. مەملەكەتتىك ەكولوگيالىق ورتانى قورعاۋ جينالىسى 7 - ايدىڭ 17 - كۇنىنەن 18 - كۇنىنە دەيىن بەيجيڭدە اشىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ماجىلىسكە قاتىناستى ءارى ماڭىزدى ءسوز سويلەپ بىلاي دەپ باسا دارىپتەدى: الداعى 5 جىل − كورىكتى جۇڭگو قۇرىلىسىنىڭ ماڭىزدى مەزگىلى، جاڭا ءداۋىر جۇڭگوشا سوتسياليستىك ەكولوگيالىق وركەنيەت يدەياسىن ىشكەرىلەي دايەكتىلەندىرىپ، حالىقتى وزەك ەتۋگە تاباندى بولىپ، تۇنىق سۋ، جاسىل تاۋ − باعالى بايلىق ۇستانىمىن بەرىك ورناتىپ جانە امالياتتا ايگىلەپ، كورىكتى جۇڭگو قۇرۋدى مەملەكەتتى قۇدىرەتتەندىرۋ قۇرىلىسىنىڭ، ۇلتتى گۇلدەندىرۋدىڭ كورنەكتى ورنىنا قويىپ، قالا مەن اۋىلدىڭ قونىس ورتاسىنىڭ كورنەكتى جاقسارۋىن، كورىكتى جۇڭگو قۇرىلىسىنىڭ كورنەكتى ونىمدىلىككە قول جەتكىزۋىن ىلگەرىلەتىپ، جوعارى ساپالى ەكولوگيالىق ورتا ارقىلى جوعارى ساپالى دامۋعا تىرەك بولىپ، ادام مەن تابيعات جاراسىمدى قاتار ءومىر سۇرەتىن وسىزاماندانۋدى جەدەل ىلگەرىلەتۋ كەرەك.
لي چياڭ ءماجىلىستى باسقاردى. جاۋ لىجي، ۋاڭ حۋنيڭ، ساي چي، لي شي ماجىلىسكە قاتىناستى. ديڭ شۋەشياڭ قورىتىندى ءسوز سويلەدى.
شي جينپيڭ سوزىندە بىلاي دەپ باسا دارىپتەدى: پارتيا 18 - قۇرىلتايىنان بەرى ءبىز ەكولوگيالىق وركەنيەت قۇرىلىسىن جۇڭحۋا ۇلتىنىڭ ماڭگى ۇزدىكسىز دامۋىنا ساياتىن ءتۇبىرلى ۇلى جوسپار ەتىپ، ءبىر قىدىرۋ جاسامپازدىق قىزمەتتەردى ورىستەتتىك، بەكىمىمىزدىڭ زور، سەرپىنىمىزدىڭ كۇشتى، ونىمدىلىگىمىزدىڭ مول بولۋى بۇرىن بولماعان دەڭگەيگە كوتەرىلدى، ەكولوگيالىق وركەنيەت قۇرىلىسىندا نازاريادان امالياتقا دەيىن تاريحي سيپاتتى، بۇرىلىس سيپاتتى، جالپى جاعداي سيپاتتى وزگەرىستەر تۋىلدى، كورىكتى جۇڭگو قۇرىلىسىندا ماڭىزدى قادام تاستالدى. ءبىز كورنەكتى ەكولوگيالىق ورتا ماسەلەسىن شەشۋدەن باستاپ ىسكە كىرىسىپ، ءتۇيىن مەن كولەمدى ۇشتاستىرۋعا، ۇستىنەن وڭاۋ مەن تۇبىرىنەن وڭاۋعا تەڭ ءمان بەرۋگە ايرىقشا نازار اۋدارىپ، ءتۇيىندى وڭاۋدان جۇيەلى وڭاۋعا دەيىنگى كەلەلى بۇرىلىستى جۇزەگە اسىردىق؛ كوزقاراستا بۇرىلىس جاساۋعا، جاۋاپكەرشىلىكتى قاتايتۋعا تاباندى بولىپ، بۇكىل پارتيانىڭ، بۇكىل ەلدىڭ ەكولوگيالىق وركەنيەت قۇرىلىسىن ىلگەرىلەتۋ سانالىلىعىن، ىرىقتىلىعىن ۇزدىكسىز كۇشەيتىپ، ىرىقسىز تۇردە توتەپ بەرۋدەن ىرىقتىلىقپەن ىسكەرلىك كورسەتۋگە دەيىنگى كەلەلى بۇرىلىستى جۇزەگە اسىردىق؛ داۋىرگە ءجىتى ىلەسىپ، دۇنيە جۇزىنە كوز جىبەرىپ، ءىرى ەل جاۋاپكەرشىلىگىن ارقالاپ، ءىرى ەل جاۋاپكەرشىلىگىن ايگىلەپ، الەمدىك قورشاعان ورتانى وڭاۋعا قاتىناسۋشىدان باستاۋشىعا دەيىنگى كەلەلى بۇرىلىستى جۇزەگە اسىردىق؛ ەكولوگيالىق وركەنيەت قۇرىلىسىنىڭ زاڭدىلىعى جونىندەگى تانىمدى ۇزدىكسىز تەرەڭدەتىپ، جاڭا ءداۋىر جۇڭگوشا سوتسياليستىك ەكولوگيالىق وركەنيەت يدەياسىن قالىپتاستىرىپ، امالياتتىق ىزدەنىستەن عىلمي نازاريانىڭ جەتەكشىلىگىنە دەيىنگى كەلەلى بۇرىلىستى جۇزەگە اسىردىق. قايسارلىقپەن قۇلشىنۋ ارقىلى ەلىمىزدىڭ اسپانى اناعۇرلىم اشىق، جەرى اناعۇرلىم جاسىل، سۋى اناعۇرلىم تۇنىق بولا ءتۇستى، ۇلان - بايتاق وزەن - تاۋلارى ءتىپتى دە تۇلەجىپ قۇلپىردى. جاڭا داۋىردەگى ەكولوگيالىق وركەنيەت قۇرىلىسىنىڭ تابىستارى دۇنيە ءجۇزىن جالت قاراتىپ، جاڭا داۋىردەگى پارتيا مەن مەملەكەت ىستەرىندە تاريحي تابىسقا قول جەتكىزۋدىڭ، تاريحي وزگەرىس تۋىلۋىنىڭ كورنەكتى بەلگىسىنە اينالدى.
شي جينپيڭ بىلاي دەپ باسا دارىپتەدى: ەلىمىزدىڭ ەكولوگيالىق ورتانى قورعاۋىنداعى قۇرىلىمدىق سيپاتتى، قاينار سيپاتتى، بەتالىستىق سيپاتتى قىسىم ءالى تۇبەگەيلى باسەڭدەگەن جوق. ەلىمىزدىڭ ەكونوميكالىق، قوعامدىق دامۋى جاسىل، تومەن كومىر قىشقىل گازدى جوعارى ساپالى دامۋ جەدەلدەگەن كەزەڭگە ءوتتى، ەكولوگيالىق وركەنيەت قۇرىلىسى ءالى دە قىسىم قاباتتاسقان، اۋىر مىندەت ارقالاپ العا باسقان شەشۋشى كەزەڭدە تۇر. ءسوز جوق، جاڭا جورىقتاعى ەكولوگيالىق ورتانى قورعاۋ قىزمەتىن اناعۇرلىم جوعارى دەڭگەيمەن، اناعۇرلىم كەڭ كوز ايامەن، اناعۇرلىم زور تەبىنمەن جوسپارلاپ جانە ىلگەرىلەتىپ، جاڭا داۋىردەگى ەكولوگيالىق وركەنيەت قۇرىلىسىنىڭ جاڭا تاراۋىن جازۋ كەرەك.
شي جينپيڭ بىلاي دەپ اتاپ كورسەتتى: جاڭا ءداۋىردىڭ 10 جىلىنداعى امالياتتىق تاجىريبەلەردى قورىتىندىلاپ، كەزەكتە ءدوپ كەلىپ وتىرعان جاڭا جاعدايلارعا، جاڭا ماسەلەلەرگە تالداۋ جاساپ، ەكولوگيالىق وركەنيەت قۇرىلىسىن ۇزدىكسىز ىلگەرىلەتۋدە، ءسوز جوق، جاڭا ءداۋىر جۇڭگوشا سوتسياليستىك ەكولوگيالىق وركەنيەت يدەياسىن جەتەكشى ەتىپ، بىرنەشە كەلەلى قاتىناستى دۇرىس ءبىر جاقتى ەتۋ كەرەك. ءبىرىنشى، جوعارى ساپالى دامۋ مەن جوعارى دەڭگەيدە قورعاۋدىڭ قاتىناسىندا دامۋدى ادام مەن تابيعاتتىڭ جاراسىمدى قاتار ءومىر ءسۇرۋ بيىك تۇرعىسىنان جوسپارلاپ، قورشاعان ورتانى جوعارى دەڭگەيدە قورعاۋ ارقىلى دامۋدىڭ جاڭا قوزعاۋشى كۇشىن، جاڭا باسىمدىعىن ۇزدىكسىز سومداپ، جاسىل، تومەن كومىر قىشقىل گازدى اينالمالى ەكونوميكالىق جۇيەنى كۇش سالا قالىپتاستىرىپ، دامۋدىڭ بايلىق ورتاسىن بوداۋ ەتۋىن ءونىمدى تومەندەتىپ، دامۋدىڭ كومەسكى كۇشى مەن تەبىنىن ۇزدىكسىز كۇشەيتۋ كەرەك. ەكىنشى، ءتۇيىندى قامال الۋ مەن سايكەستى وڭاۋدىڭ قاتىناسىندا جۇيە كوزقاراسىنا تاباندى بولىپ، باستى قايشىلىق پەن قايشىلىقتىڭ باستى جاعىن مىقتى يگەرىپ، كورنەكتى ەكولوگيالىق ورتا ماسەلەلەرىنە پارمەندى شارا قولدانۋ، سونىمەن قاتار نىسانانى سايكەستىرۋدى، كوپ ءتۇرلى لاس زاتتاردى تىزگىندەۋدى سايكەستىرۋدى، تاراۋلاردى سايكەستىرۋدى، وڭىرلەردى سايكەستىرۋدى، ساياساتتاردى سايكەستىرۋدى كۇشەيتىپ، ءتۇرلى قىزمەتتەردىڭ جۇيەلىلىگىن، تۇتاستىعىن، سايكەسىمدىلىگىن ۇزدىكسىز كۇشەيتۋ كەرەك. ءۇشىنشى، تابيعي قالپىنا كەلتىرۋ مەن جاساندى جولمەن قالپىنا كەلتىرۋدىڭ قاتىناسىندا تاۋ، سۋ، ورمان، اتىز، كول، جايلىم، قۇمدى ءبىر تۇلعالاندىرا قورعاۋ مەن جۇيەلى وڭاۋعا تاباندى بولىپ، تاۋ توبەسىنەن تەڭىز - مۇحيتقا دەيىنگى قورعاۋ، وڭاۋ ۇلكەن ارناسىن قالىپتاستىرىپ، تابيعي قالپىنا كەلتىرۋ مەن جاساندى جولمەن قالپىنا كەلتىرۋ سىندى ەكى ءتۇرلى ءتاسىلدى كەشەندى قولدانىپ، جەرگىلىكتى جاعدايعا، اۋقىمعا قاراي ىستەپ، وڭىرگە، تۇرگە ءبولىپ شارا قولدانىپ، ەكولوگيانى قورعاۋدىڭ، قالپىنا كەلتىرۋدىڭ ەڭ تاماشا شەشۋ جوباسىن قۇلشىنا تابۋ كەرەك. ءتورتىنشى، سىرتقى شەكتەمە مەن ىشكى قوزعاۋشى كۇشتىڭ قاتىناسىندا ەڭ قاتاڭ ءتۇزىم، ەڭ قاتاڭ زاڭمەن باسقارۋ ارقىلى ەكولوگيالىق ورتانى قورعاۋعا باستان - اياق تاباندى بولىپ، ۇدايىلانعان سىرتقى قىسىمدى ساقتاۋ، سونىمەن بىرگە تۇتاس قوعامنىڭ ەكولوگيالىق ورتانى بىرگە قورعاۋداعى ىشكى قوزعاۋشى كۇشىن تاسقىنداتۋ كەرەك. بەسىنشى، ”كومىر قىشقىل گازىن شىعارۋدى ەڭ جوعارى مانگە جەتكىزۋ، كومىر قىشقىل گازىن بەيتاراپتاندىرۋ“ ۋادەسى مەن دەربەس ارەكەتتىڭ قاتىناسىندا ءبىز ۋادە بەرگەن ”كومىر قىشقىل گازىن شىعارۋدى ەڭ جوعارى مانگە جەتكىزۋ، كومىر قىشقىل گازىن بەيتاراپتاندىرۋ“ نىساناسى مىزعىمايدى، الايدا وسى نىساناعا جەتۋدىڭ جولى مەن ءتاسىلىن، ريتىمى مەن تەبىنىن، ءسوز جوق، ءوزىمىز بەلگىلەۋگە ءتيىستىمىز، استە باسقالاردىڭ بيلەپ - توستەۋىنە جول بەرمەيمىز.
شي جينپيڭ بىلاي دەپ باسا دارىپتەدى: لاستانۋدان ساقتانۋ جانە ونى وڭاۋدان قامال الۋ شايقاسىن ۇزدىكسىز ىشكەرىلەي ويداعىداي جۇرگىزىپ، لاستانۋدى دالمە - ءدال وڭاۋعا، لاستانۋدى عىلمي وڭاۋعا، لاستانۋدى زاڭ بويىنشا وڭاۋعا تاباندى بولىپ، تەبىندى ساقتاپ، تەرەڭدىكتى ارتتىرىپ، ءورىسىن كەڭەيتىپ، اشىق اسپان، تۇنىق سۋ، تازا توپىراق سىندى 3 ۇلكەن قورعاۋ شايقاسىن ىشكەرىلەي ىلگەرىلەتىپ، ەكولوگيالىق ورتانىڭ ساپاسىن ۇزدىكسىز جاقسارتۋ كەرەك. دامۋ ءتاسىلىن جاسىل، تومەن كومىر قىشقىل گازدى تيپكە قاراي ويىستىرۋدى جەدەل ىلگەرىلەتىپ، جاسىل، تومەن كومىر قىشقىل گازدى دامۋدى ەكولوگيالىق ورتا ماسەلەسىن شەشۋدىڭ ءتۇبىرلى شاراسى ەتۋگە تاباندى بولىپ، جاسىل ءوندىرىس ءتاسىلى مەن تۇرمىس ءتاسىلىن جەدەل قالىپتاستىرىپ، جوعارى ساپالى دامۋدىڭ جاسىل ءتۇستى نەگىزىن بەكەمدەۋ كەرەك. ەكولوگيالىق جۇيەنىڭ الۋان تۇرلىلىگىن، ورنىقتىلىعىن، باياندىلىعىن كۇش سالا جوعارىلاتىپ، ەكولوگيالىق جۇيەنى قورعاۋ تەبىنىن ارتتىرىپ، ەكولوگيانى قورعاۋدى، قالپىنا كەلتىرۋدى باقىلاۋ - باسقارۋدى شىنايى كۇشەيتىپ، تۇنىق سۋ، جاسىل تاۋدىڭ باعالى بايلىققا اينالۋ جولىن كەڭەيتىپ، ۇرپاقتارعا تاۋى جاسىل، سۋى تۇنىق ەكولوگيالىق كەڭىستىك قالدىرۋ كەرەك. كومىر قىشقىل گازىن شىعارۋدى ەڭ جوعارى مانگە جەتكىزۋدى، كومىر قىشقىل گازىن بەيتاراپتاندىرۋدى بەلسەنە، ورنىقتى ىلگەرىلەتىپ، بۇكىل ەل بويىنشا ءبىر تۇتاس جوسپارلاۋ، ۇنەمشىلدىكتى الدىمەن ويلاستىرۋ، قوس دوڭگەلەكتى قوزعاۋشى كۇش ەتۋ، ءىش پەن سىرتتى ىركىلىسسىزدەندىرۋ، حاۋىپ - قاتەردەن ساقتانۋ سىندى پرينسيپكە تاباندى بولىپ، كومىر قىشقىل گازىن شىعارۋدى ەڭ جوعارى مانگە جەتكىزۋ، كومىر قىشقىل گازىن بەيتاراپتاندىرۋ جانە ”N+1“ ساياسات جۇيەسىن ويداعىداي تياناقتاندىرىپ، تازا، تومەن كومىر قىشقىل گازدى، حاۋىپسىز، جوعارى ءونىمدى ەنەرگيا جۇيەسىن ورناتىپ، جاڭاشا ەلەكتر قۋاتى جۇيەسىن جەدەل قالىپتاستىرىپ، مەملەكەتتىڭ مۇناي - تابيعي گاز حاۋىپسىزدىگىن قامتاماسىز ەتۋ قابىلەتىن جوعارىلاتۋ كەرەك. كورىكتى جۇڭگو قۇرىلىسىنىڭ حاۋىپسىزدىك تومەنگى شەگىن بەرىك ساقتاپ، جالپى تۇلعالىق مەملەكەت حاۋىپسىزدىگى كوزقاراسىن دايەكتىلەندىرىپ، ءتۇرلى حاۋىپ - قاتەرلەر مەن سايىستارعا بەلسەنە، ءونىمدى توتەپ بەرىپ، ەكولوگيا حاۋىپسىزدىگى، يادرو جانە رادياتسيا حاۋىپسىزدىگى سياقتىلاردى شىنايى قورعاپ، ءبىز ءومىر سۇرۋدە، دامۋدا يەك سۇيەيتىن جاراتىلىستىق ورتا مەن شارت - جاعدايدىڭ حاۋىپ - قاتەرگە ۇشىراماۋىن جانە ويراندالماۋىن قامتاماسىز ەتۋىمىز كەرەك.
شي جينپيڭ بىلاي دەپ اتاپ كورسەتتى: كورىكتى جۇڭگو قۇرىلىسىن قامتاماسىز ەتۋ جۇيەسىن اقاۋسىزداندىرۋ كەرەك. ءار سالاداعى بايلىقتى ءبىر تۇتاس جوسپارلاپ، ءار جاقتىڭ كۇشىن ۇيىستىرىپ، زاڭمەن باسقارۋ، بازار، عىلىم - تەحنيكا، ساياسات ”كەشەندى شاراسىن“ ويداعىداي اتقارۋ كەرەك. زاڭمەن باسقارۋ قامتاماسىزدىعىن كۇشەيتىپ، ەكولوگيالىق ورتا، بايلىق، ەنەرگيا سياقتى سالالارداعى قاتىستى زاڭداردى شىعارۋدى جانە ولارعا وزگەرىس ەنگىزۋدى ءبىر تۇتاس جوسپارلاپ ىلگەرىلەتىپ، ەڭ قاتاڭ جەر ءۇستى، جەر استى، قۇرلىق پەن تەڭىزدى ءبىر تۇتاس جوسپارلايتىن، وڭىرلەر بىرلەسىپ قيمىلدايتىن ەكولوگيالىق ورتانى وڭاۋ ءتۇزىمىن اتقارىپ، لاس زاتتاردى شىعارۋعا رۇقسات ەتۋ ءتۇزىمىن جاپپاي اتقارىپ، جاراتىلىستىق بايلىقتى، مال - مۇلىكتى باسقارۋ ءتۇزىمى جۇيەسىن كەمەلدەندىرىپ، مەملەكەت جەرى كەڭىستىگىن پايدالانۋدى باسقارۋ ءتۇزىمىن اقاۋسىزداندىرۋ كەرەك. جاسىل، تومەن كومىر قىشقىل گازدى ەكونوميكانى دامىتۋ ساياساتىن كەمەلدەندىرىپ، قازىنالىق قولداۋدى، سالىق ساياساتى قولداۋىن، فينانستىق قولداۋدى، باعا ساياساتى قولداۋىن كۇشەيتۋ كەرەك. ءونىمدى بازار مەن ىسكەر ۇكىمەتتى اناعۇرلىم ويداعىداي ۇشتاستىرۋدى ىلگەرىلەتىپ، كومىر قىشقىل گازىن شىعارۋ ۇقىعى، ەنەرگيادان پايدالانۋ ۇقىعى، سۋدان پايدالانۋ ۇقىعى، لاس زاتتاردى شىعارۋ ۇقىعى سياقتى بايلىق ورتاسى فاكتورلارىن ءبىر تۇلعالاندىرا وتىرىپ ماڭىزدى فاكتورلاردى بازارلاندىرىپ ورنالاستىرۋ رەفورماسى جالپى جۇيەسىنە ەنگىزىپ، ساتىپ بەرۋ، وتكەرمەلەۋ، كەپىلگە قويۋ، جارنا قوسۋ سياقتى بازار ساۋداسى ارەكەتتەرىن قولداپ، قورشاعان ورتانى قورعاۋ سەنىمدىلىگىن باقىلاۋ - باسقارۋ جۇيەسىن جەدەل ورناتىپ، قورشاعان ورتانى وڭاۋ بازارىن جۇيەگە ءتۇسىرىپ، قورشاعان ورتانى قورعاۋ كاسىپ سالاسى مەن قورشاعان ورتاعا قىزمەت وتەۋ سالاسىنىڭ اقاۋسىز دامۋىن جەبەۋ كەرەك. عىلىم - تەحنيكالىق تىرەكتى كۇشەيتىپ، جاسىل، تومەن كومىر قىشقىل گازدى عىلىم - تەحنيكاسىندا ءوز كۇشىنە سۇيەنۋدى، ءوزىن - ءوزى الۋەتتەندىرۋدى ىلگەرىلەتىپ، كليمات وزگەرىسىنە توتەپ بەرۋ، جاڭا لاستاۋشى زاتتاردى وڭاۋ سياقتىلاردى مەملەكەتتىڭ نەگىزگى زەرتتەۋىنىڭ جانە عىلىم - تەحنيكادا جاڭالىق اشۋىنىڭ ءتۇيىندى سالاسى ەتىپ، شەشۋشى، وزەكتى تەحنيكالاردان قامال الۋدى مىقتاپ يگەرىپ، ەكولوگيالىق ورتا عىلىم - تەحنيكاسىندا جاڭالىق اشۋ كەلەلى ارەكەتىن اتقارىپ، جوعارى دەڭگەيدەگى ەكولوگيالىق ورتا عىلىم - تەحنيكا دارىندىلارى قوسىنىن باۋلىپ، جەتىلدىرىپ، جاساندى زەردە سياقتى سيفرلى تەحنيكانى قولدانۋدى تەرەڭدەتىپ، كورىكتى جۇڭگونى سيفرلاندىرا باسقارۋ جۇيەسىن ورناتىپ، جاسىل، پاراساتتى سيفرلى ەكولوگيالىق وركەنيەتتى قۇرۋ كەرەك.
شي جينپيڭ بىلاي دەپ باسا دارىپتەدى: كورىكتى جۇڭگو قۇرۋ − جاپپاي سوتسياليستىك وسىزاماندانعان مەملەكەت قۇرۋدىڭ ماڭىزدى نىساناسى، ءسوز جوق، پارتيانىڭ جالپى بەتتىك باسشىلىعىنا تاباندى بولۋ جانە ونى كۇشەيتۋ كەرەك. پارتيا ورتالىق كوميتەتى، مەملەكەتتىك كەڭەس تاياۋدا كورىكتى جۇڭگو قۇرىلىسىن جاپپاي ىلگەرىلەتۋ جونىندە جۇيەلى ورنالاستىرۋ جاسايدى. جەر - جەر، تاراۋلار جاۋاپكەرشىلىك سەزىمىن، بورىشتىلىق سەزىمىن ۇزدىكسىز كۇشەيتىپ، پارتيا ورتالىق كوميتەتىنىڭ شەشىمدەرىن، ورنالاستىرۋلارىن بۇلجىماي دايەكتىلەندىرۋ، تياناقتاندىرۋ كەرەك. جەرگىلىكتى ءار دارەجەلى پارتكومدار مەن ۇكىمەتتەر كورىكتى جۇڭگو قۇرىلىسىنىڭ ساياسي جاۋاپكەرشىلىگىن باتىل ارقالاپ، جەرگىلىكتى پارتيا، ۇكىمەت باسشى كادرلارىنىڭ ەكولوگيالىق ورتانى قورعاۋ جاۋاپكەرشىلىك ءتۇزىمىن جەدەل اقىلداسىپ جاساپ، جاپپاي قامتيتىن، ۇقىق پەن جاۋاپكەرشىلىك بىردەي بولاتىن، سيلاۋ مەن جازالاۋ انىق، ءار بۋىن ساباقتاسقان جاۋاپكەرشىلىك جۇيەسىن ورناتۋ كەرەك. قاتىستى تاراۋلار ەكولوگيالىق وركەنيەت قۇرىلىسى جاۋاپكەرشىلىك تىزىمدىگىن مۇقيات تياناقتاندىرىپ، جۇمىس ءبولىسى بويىنشا جاۋاپتى بولۋدى كۇشەيتىپ، سايكەسە بىرلەسىپ ارەكەتتەنۋدى كۇشەيتىپ، تەڭ يگەرىپ، بىرگە باسقاراتىن قۋاتتى بىرىككەن كۇش قالىپتاستىرۋ كەرەك. ءار دارەجەلى حالىق قۇرىلتايلارى جانە ونىڭ تۇراقتى كوميتەتتەرى ەكولوگيالىق وركەنيەتتى قورعاۋدى زاڭمەن باسقارۋ قۇرىلىسىن جانە زاڭنىڭ اتقارىلۋىن باقىلاۋدى كۇشەيتۋى، ءار دارەجەلى ساياسي كەڭەستەر ەكولوگيالىق وركەنيەت قۇرىلىسىن ارناۋلى تاقىرىپتا كەڭەسۋ جانە دەموكراتيالىق باقىلاۋ سەرپىنىن كۇشەيتۋى كەرەك. ورتالىقتىڭ ەكولوگيالىق ورتانى قورعاۋدى باقىلاۋ - تەكسەرۋدەگى سەمسەرلىك رولىن ۇزدىكسىز ساۋلەلەندىرۋ كەرەك.
لي چياڭ ءماجىلىستى باسقارعاندا بىلاي دەپ اتاپ كورسەتتى: باس شۋجي شي جينپيڭنىڭ ماڭىزدى ءسوزى ەلىمىزدىڭ ەكولوگيالىق وركەنيەت قۇرىلىسىندا قول جەتكىزگەن كۇللى الەمنىڭ نازارىن اۋدارعان وراسان زور تابىسىن، اسىرەسە، تاريحي سيپاتتى، بۇرىلىس سيپاتتى، جالپى جاعداي سيپاتتى وزگەرىستەرىن جاپپاي قورىتىندىلادى، كەزەكتەگى ەكولوگيالىق وركەنيەت قۇرىلىسى ءدوپ كەلىپ وتىرعان جاعدايعا ىشكەرىلەي تالداۋ جاسادى، جاڭا جورىقتا ەكولوگيالىق وركەنيەت قۇرىلىسىن ىلگەرىلەتۋدە ويداعىداي ءبىر جاقتى ەتۋگە قاجەتتى كەلەلى قاتىناستى تەرەڭ بايىمدادى، كورىكتى جۇڭگو قۇرىلىسىن جاپپاي ىلگەرىلەتۋدەگى ستراتەگيالىق مىندەتتەر مەن كەلەلى شارالاردى جۇيەلى ورنالاستىردى، ەكولوگيالىق ورتانى قورعاۋدى اناعۇرلىم كۇشەيتۋ، ەكولوگيالىق وركەنيەت قۇرىلىسىن ىلگەرىلەتۋ ءۇشىن بەتالىس كورسەتكىشىن جانە ءتۇبىرلى بويسۇنۋ ولشەمىن ازىرلەدى. باس شۋجي شي جينپيڭنىڭ ماڭىزدى ءسوزىنىڭ رۋحىن مۇقيات ۇيرەنىپ، ءتۇسىنىپ، ىشكەرىلەي دايەكتىلەندىرىپ، تياناقتاندىرىپ، ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ەكىنى قورعاۋدى“ باتىل ورىنداپ، ءماجىلىستىڭ رۋحىن دايەكتىلەندىرۋدى، تياناقتاندىرۋدى نەگىزگى تاقىرىپتىق تاربيەنى ىشكەرىلەي ورىستەتۋمەن ۇشتاستىرىپ، ەكولوگيالىق ورتانى قورعاۋ قىزمەتىن ويداعىداي ىستەۋدىڭ قۋاتتى قوزعاۋشى كۇشىن اناعۇرلىم قاۋلاتىپ، ەكولوگيالىق وركەنيەت قۇرىلىسىن تىڭعىلىقتى ىلگەرىلەتىپ، كورىكتى جۇڭگو قۇرىلىسىن جەدەلدەتۋ كەرەك.
ديڭ شۋەشياڭ قورىتىندى ءسوزىن سويلەگەندە بىلاي دەپ اتاپ كورسەتتى: پارتيا 20 - قۇرىلتايىنىڭ رۋحىن جانە باس شۋجي شي جينپيڭنىڭ ماڭىزدى ءسوزىنىڭ رۋحىن ىشكەرىلەي ۇيرەنىپ، دايەكتىلەندىرىپ، شي جينپيڭ جاڭا ءداۋىر جۇڭگوشا سوتسياليزم يدەياسىن، اسىرەسە، شي جينپيڭنىڭ ەكولوگيالىق وركەنيەت يدەياسىن جەتەكشى ەتىپ، كورىكتى جۇڭگو قۇرىلىسىنىڭ ساياسي جاۋاپكەرشىلىگىن باتىل ارقالاپ، ادام مەن تابيعات جاراسىمدى قاتار ءومىر سۇرەتىن وسىزاماندانۋدى جەدەل ىلگەرىلەتۋ كەرەك. لاستانۋدان ساقتانۋ جانە ونى وڭاۋدان قامال الۋ شايقاسىن تاباندىلىقپەن ويداعىداي جۇرگىزىپ، ەكولوگيالىق ورتا ساپاسىنىڭ ۇزدىكسىز جاقسارۋىن ىلگەرىلەتۋ؛ جاسىل، تومەن كومىر قىشقىل گازدى دامۋدى تۇبىرىنەن وڭاۋ شاراسى ەتىپ، ەنەرگيانى ۇنەمدەۋ مەن ورتانى قورعاۋدىڭ كەڭىستىك ارناسىن، كاسىپ سالاسى قۇرىلىمىن، ءوندىرىس ءتاسىلىن، تۇرمىس ءتاسىلىن جەدەل قالىپتاستىرۋ؛ ادام مەن تابيعاتتىڭ جاراسىمدى قاتار ءومىر سۇرۋىنە تاباندى بولىپ، ەكولوگيانى قورعاۋ جانە ونى قالپىنا كەلتىرۋ سەرپىنىن كۇشەيتىپ، ەكولوگيانى قورعاۋدى، قالپىنا كەلتىرۋدى باقىلاۋ - باسقارۋ ءتۇزىمىن كەمەلدەندىرۋ؛ بەلگىلەنگەن نىسانانى كوزدەي وتىرىپ، كومىر قىشقىل گازىنىڭ شىعارىلۋىن جوعارى مانگە جەتكىزۋدى، كومىر قىشقىل گازىن بەيتاراپتاندىرۋدى بەلسەنە، ورنىقتى ىلگەرىلەتىپ، الدىمەن ورناتىپ، ونان سوڭ كۇشىنەن قالدىرۋعا تاباندى بولىپ، ەنەرگيانىڭ جاسىل، تومەن كومىر قىشقىل گازدى بولۋعا قاراي بۇرىلىس جاساۋىن تىڭعىلىقتى ىلگەرىلەتۋ؛ تومەنگى شەكتە ويلاۋدى كۇشەيتىپ، ەكولوگيالىق ورتا حاۋىپ - قاتەرلەرىن ۇدايىلاندىرا باقىلاپ - مەڭگەرىپ، كورىكتى جۇڭگو قۇرىلىسىنىڭ ەكولوگيالىق حاۋىپسىزدىك نەگىزىن بەكەمدەۋ؛ قاتاڭ بولۋ نەگىزگى اۋەنىن ساقتاپ، ەكولوگيالىق ورتانى قورعاۋدى باقىلاۋ - تەكسەرۋدى جانە زاڭ اتقارۋدى باقىلاۋ - باسقارۋدى ىشكەرىلەي ورىستەتىپ، ەكولوگيالىق ورتا جاعىنداعى زاڭعا قايشى ارەكەتتەرگە قاتاڭ سوققى بەرۋ كەرەك. جەر - جەر، تاراۋلار، ورىندار ۇيىمدىق باسشىلىقتى كۇشەيتىپ، جاۋاپكەرشىلىكتى قاتاڭ تياناقتاندىرىپ، تىرەكتىك قامتاماسىزدىقتى كۇشەيتىپ، پارتيا ورتالىق كوميتەتىنىڭ شەشىمدەرىنىڭ، ورنالاستىرۋلارىنىڭ ناقتى تياناقتاندىرىلۋىنا، ناقتى ونىمدىلىككە قول جەتكىزۋىنە شىنايى كەپىلدىك ەتۋ كەرەك.
ەكولوگيالىق ورتا مينيسترلىگىندەگى، جاراتىلىستىق بايلىق مينيسترلىگىندەگى، مەملەكەتتىك دامۋ جانە رەفورما كوميتەتىندەگى، قازىنا مينيسترلىگىندەگى، ىشكى موڭعۇل اۆتونوميالى رايونىنداعى، جىجياڭ ولكەسىندەگى، حۋبەي ولكەسىندەگى، گۋاڭشي جۋاڭزۋ اۆتونوميالى رايونىنداعى جاۋاپتى جولداستار پىكىر اۋىستىرىپ ءسوز سويلەدى.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك حالىق قۇرىلتايى تۇراقتى كوميتەتىندەگى قاتىستى باسشى جولداستار، مەملەكەتتىك كەڭەستىڭ مۇشەلەرى، ەڭ جوعارى حالىق سوتى مەكەمەسىنىڭ باستىعى، ەڭ جوعارى حالىق پروكۋراتۋراسىنىڭ باس پروكۋرورى، مەملەكەتتىك ساياسي كەڭەستەگى قاتىستى باسشى جولداستار ماجىلىسكە قاتىناستى.
ءماجىلىس تەلەۆيزور - تەلەفون ءماجىلىسى فورماسىندا اشىلدى، ءارقايسى ولكە، اۆتونوميالى رايون، توتە قاراستى قالالارداعى جانە جوسپارى ايىرىم جاسالاتىن قالالارداعى، شينجياڭ ءوندىرىس - قۇرىلىس بيڭتۋانىنداعى پارتيا، ۇكىمەت نەگىزگى جاۋاپتى جولداستارى جانە قاتىستى تاراۋلاردىڭ نەگىزگى جاۋاپتى جولداستارى، ورتالىق پەن مەملەكەت ورگاندارىنىڭ قاتىستى تاراۋلارىنداعى، قاتىستى حالىقتىق ۇيىمدارداعى، ارميانىڭ قاتىستى ورىندارىنداعى نەگىزگى جاۋاپتى جولداستار، ورتالىق باسقاراتىن ءىشىنارا فينانس قۇرىلىمدارىنداعى جانە كاسىپورىندارداعى جاۋاپتى جولداستار قاتارلىلار ماجىلىسكە قاتىناستى.
