مەملەكەت ءتوراعاسى شي جينپيڭ 3 - ايدىڭ 23 - كۇنى ريمدە يتاليانىڭ زۇڭليى كونتەمەن كەڭەستى.
شي جينپيڭ بىلاي دەپ اتاپ كورسەتتى: جۇڭگو مەن يتاليانىڭ قارىم - قاتىناسى ەكى جاقتىڭ مىڭ جىلدىق بارىس - كەلىسىنىڭ تاريحي ۇردىسىنە تامىر تارتقان، تەرەڭ حالىق تىلەگى نەگىزىنە يە. تاياۋ جىلداردان بەرى، ەكى ەلدىڭ ءار سالاداعى اۋىس - ءتۇيىسى، سەلبەستىگى ۇزدىكسىز تەرەڭدەپ، وزدەرىنىڭ ەكونوميكالىق، قوعامدىق دامۋىنا كۇش ۇستەدى. جۇڭگو مەن يتاليا ءبىر - ءبىرىنىڭ ماڭىزدى ستراتەگيالىق سەرىگى. ەكى جاق جۇڭگو - يتاليا قارىم - قاتىناسىنا قاشاندا ستراتەگيالىق دەڭگەيدەن جانە ۇزاق بولاشاقتىق تۇرعىدان قاراپ جانە ونى يگەرىپ، بيىل بولاتىن جۇڭگو مەن يتاليانىڭ جان - جاقتى ستراتەگيالىق سەرىكتەستىك قارىم - قاتىناس ورناتقاندىعىنىڭ 15 جىلدىعىن جانە كەلەر جىلى بولاتىن ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن وراي ەتىپ، جۇڭگو - يتاليا قارىم - قاتىناسىنىڭ جاڭا داۋىرگە ءوتۋىن بىرگە ىلگەرىلەتىپ، ءار سالاداعى ناقتى ىستەر سەلبەستىگى تابىسىنىڭ ەكى ەل حالقىنا اناعۇرلىم جاقسى تيىمدىلىك جەتكىزۋىنە مۇمكىندىك جاساۋ كەرەك.
شي جينپيڭ بىلاي دەپ باسا دارىپتەدى: جۇڭگو مەن يتاليا ەكى جاقتىڭ دامۋ نىساناسى قابىسقان، ەكونوميكادا ءبىرىن - ءبىرى تولىقتاۋ سيپاتى كۇشتى، سەلبەستىك بولاشاعى نۇرلى. جۇڭگو جاق يتاليا جاقپەن بىرگە ەكى جاقتى قاتىناستى جاپپاي كەڭەيتۋدى جانە تەرەڭدەتۋدى قالايدى. ەكى جاق جوعارى دەڭگەيدە جوبالاۋدى كۇشەيتىپ، ساياسي نەگىزدى بەكەمدەپ، جوعارى جىكتەگىلەردىڭ اۋىس - ءتۇيىسىن كۇشەيتىپ، ءارقايسى تاراۋ، ءارقايسى جىك اراسىنداعى كەڭەستى جيىلەتىپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ۇزدىكسىز ءوزارا ءتۇسىنۋى جانە قولداۋى كەرەك. جۇڭگو مەن يتاليا بايىرعى جىبەك جولىنىڭ ەكى باسىنا ورنالاسقان، ”ءبىر بەلدەۋ، ءبىر جول“ سەلبەستىگىن ورىستەتۋى، ارينە، داۋسىز. ءبىزدىڭ ۇستاناتىنىمىز − بىرگە اقىلداسۋ، بىرگە قۇرۋ، بىرگە يگىلىكتەنۋ، بويسۇناتىنىمىز − اشىق ۇستاۋ، جاريالى بولۋ پرينسيبى، جۇزەگە اسىراتىنىمىز − سەلبەسىپ تەڭ يگىلىككە كەنەلۋ. جۇڭگو مەن يتاليا ۇكىمەتتەر ارا ”ءبىر بەلدەۋ، ءبىر جول“ سەلبەستىگى تۇسىنىستىك ەسكەرتپە حاتىنا قول قويۋدى وراي ەتىپ، ”ءبىر بەلدەۋ، ءبىر جول“ باستاماسىنىڭ يتاليانىڭ ”سولتۇستىك كەمەجاي قۇرىلىسى“مەن، ”يتالياعا قارجى قوسۋ جوسپارى“ مەن ۇشتاسۋىن كۇشەيتىپ، ءار سالاداعى ءوزارا پايدا جەتكىزۋ سەلبەستىگىن ىلگەرىلەتۋ كەرەك. مۇددەنىڭ توعىسۋىن نىعايتىپ، سەلبەستىكتىڭ ساپالىلانۋىن، دارەجەسىنىڭ كوتەرىلۋىن ىلگەرىلەتىپ، كەڭىستىك عىلىم - تەحنيكاسى، نەگىزدىك قۇرىلعى قۇرىلىسى، قاتىناس، قورشاعان ورتا، ەنەرگيا سياقتى الدىمەن ەسكەرىلەتىن سالالاردا اناعۇرلىم كوپ باستاپقى مەزگىلدىك تابىسقا قول جەتكىزۋ كەرەك. ماكرولىق ەكونوميكالىق ساياسات جونىندەگى كەڭەسۋدى، سايكەسۋدى تەرەڭدەتىپ، ەنەرگيا، فينانس، نەگىزدىك قۇرىلعى قۇرىلىسى سياقتى سالالاردا 3 - جاق بازارىمەن سەلبەسۋدى بىرگە ىلگەرىلەتۋ كەرەك. 2020 - جىلى ەكى ەلدىڭ مادەنيەت، ساياحات جىلىن ءوزارا وتكىزۋىن وراي ەتىپ، ەكى ەلدىڭ الەمدىك مۇرا ورىندارىنىڭ دوستىق ورناتۋىن ىلگەرىلەتىپ، مۇراجاي، جەرگىلىكتى ورىن، حالىق، دەنە تاربيە سياقتى جاقتارداعى اۋىس - ءتۇيىستى، سەلبەستىكتى كۇشەيتۋ كەرەك. ساۋدانىڭ جانە قارجى قوسۋدىڭ ەركىندەسۋىن، قولايلىلانۋىن بىرگە دارىپتەپ، بىرلەسكەن مەملەكەتتەر ۇيىمى ىستەرى، الەمدىك ساۋدا ۇيىمى رەفورماسى، كليمات وزگەرىسى، جاھاندىق جونگە سالۋ سياقتى كەلەلى ماسەلەلەر جونىندە كەڭەسۋدى ۇزدىكسىز كۇشەيتىپ، كوپ جاقتىلىقتى بىرگە قورعاۋ كەرەك.
شي جينپيڭ بىلاي دەپ اتاپ كورسەتتى: جۇڭگو ەسىك اشۋدى كەڭەيتۋگە تاباندى بولادى، يتاليانى قامتىعان ءار ەل كاسىپورىندارىنىڭ جۇڭگوعا كەلىپ قارجى قوسىپ، شارۋاشىلىعىن شالقىتۋلارىن قارسى الادى. ءبىز دە جۇڭگو كاسىپورىندارىن، اسىرەسە، جوعارى تەحنيكالى كاسىپورىندارىن يتاليادا قارجى قوسۋعا، دامۋعا، يتاليانى عىلىم - تەحنيكادا جاڭالىق اشۋ سەلبەستىگىن ورىستەتەتىن ماڭىزدى سەرىكتەسى دەپ قاراۋعا شابىتتاندىرامىز. جۇڭگو ۇكىمەتى باستان - اياق جۇڭگو كاسىپورىندارىن ساۋدا پرينسيبى جانە حالىقارالىق قاعيدا بويىنشا جەرگىلىكتى ورىننىڭ زاڭدارىنا بويسۇنۋ نەگىزىندە شەتەلدە سەلبەستىك جۇرگىزۋگە شابىتتاندىرىپ كەلەدى. يتاليا ۇكىمەتىنىڭ جۇڭگو قارجى قوسۋشىلارىنا ۇزدىكسىز تاماشا تيجارات - ساۋدا ورتاسىن ازىرلەپ بەرۋىن ءۇمىت ەتەمىن.
شي جينپيڭ بىلاي دەپ باسا دارىپتەدى: جۇڭگو دا، ەۆروپا وداعى دا دۇنيە ءجۇزى بەيبىتشىلىگىنىڭ قۇرۋشىلارى، الەمدىك دامۋدىڭ ۇلەس قوسۋشىلارى، حالىقارالىق ءتارتىپتىڭ قورعاۋشىلارى. ەكى جاق الەمنىڭ كوپ ۇيەكتەنۋى، ەكونوميكانىڭ جاھاندانۋى سىندى ءداۋىر اعىمىنا ۇيلەسىپ، اشىق الەمدىك ەكونوميكا قۇرۋدى ىلگەرىلەتۋى كەرەك. ەكى جاق جۇڭگو مەن ەۆروپانىڭ قارجى قوسۋ كەلىسىم كەلىسسوزىن جەدەل ىلگەرىلەتىپ، ”ءبىر بەلدەۋ، ءبىر جول“ باستاماسىنىڭ ەۆروپا وداعىنىڭ دامۋ ستراتەگياسىمەن ۇشتاسۋىن كۇشەيتىپ، كەلەلى حالىقارالىق جانە وڭىرلىك ماسەلەلەر جونىندە كەڭەسۋدى، سايكەسۋدى كۇشەيتۋى ءتيىس. يتاليا جاقتىڭ جۇڭگو مەن ەۆروپا وداعىنىڭ ءار سالادا كەڭەس وتكىزۋىن، سەلبەستىك جاساۋىن تەرەڭدەتۋ جانە جۇڭگو - ەۆروپا وداعى قارىم - قاتىناسىنىڭ دەربەس، ءوز - وزىنە قوجايىن بولۋ، ورنىقتى بولۋ نەگىزىندە دامۋىن ىلگەرىلەتۋ جاعىندا ۇزدىكسىز بەلسەندى رول اتقارۋىن ءۇمىت ەتەمىن.
كونتە مىنالاردى ءبىلدىردى: ءتوراعا شي جينپيڭنىڭ وسى رەت يتالياعا ساپارلاي كەلۋى اسا ماڭىزدى تاريحي مانگە يە، يتاليا - جۇڭگو قارىم - قاتىناسىن اناعۇرلىم جوعارى دەڭگەيگە كوتەرەتىنى داۋسىز. يتاليا مەن جۇڭگو ەكى ەلدىڭ مىڭ جىلدان استام اۋىس - ءتۇيىس تاريحى بار، ەكى بايىرعى وركەنيەت ءوزارا ۇلاسىپ، ەكونوميكا - ساۋدا، مادەنيەت اۋىس - ءتۇيىسىنىڭ باستاۋى ارىدان جالعاسىپ، ەكى جاقتىڭ دوستىق سەلبەستىگىنىڭ ۇزاق ۋاقىتتىق دامۋىنا ماڭىزدى نەگىز قالاعان. يتاليا جاق يتاليا - جۇڭگو قارىم - قاتىناسىنا وسكەلەڭ ءمان بەرەدى، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعىن قارسى الۋ قارساڭىندا، جۇڭگو جاقپەن جان - جاقتى ستراتەگيالىق سەرىكتەستىك قاتىناستى تەرەڭدەتۋدى، ەكونوميكا - ساۋدا، قارجى قوسۋ، ەنەرگيا، اۋىل شارۋاشىلىعى، مادەنيەت، ساياحات، اۆياتسيا سياقتى جاقتارداعى سەلبەستىكتى كەڭەيتۋدى قالايدى. يتاليا ءوزارا ۇلاستىرۋ - تۇتاستىرۋ قۇرىلىسى جاعىندا ەرەكشە جاعراپيالىق ابزالدىلىققا يە، ءبىز تاريحي ورايدى يگەرىپ، ”ءبىر بەلدەۋ، ءبىر جول“دى بىرگە قۇرۋعا ات سالىسقاندىعىمىزعا توتەنشە قۋانىشتىمىز، مۇنىڭ يتاليا - جۇڭگو سەلبەستىگىنىڭ كومەسكى كۇشىن تولىق اشۋعا ءتيىمدى بولاتىندىعىنا كامىل سەنەمىز. مەن 2 - كەزەكتى ”ءبىر بەلدەۋ، ءبىر جول“ حالىقارالىق سەلبەستىك جوعارى دارەجەلى باسشىلاردىڭ تالقى مىنبەرىنە قاتىناسۋدى اسىعا كۇتەمىن. يتاليا جاق جۇڭگو كاسىپورىندارىنىڭ يتالياعا كەلىپ قارجى قوسۋىن، ءوزارا تيىمدىلىك جاساپ، تەڭ يگىلىككە كەنەلۋدى جۇزەگە اسىرۋىن قارسى الادى. يتاليا كوپ جاقتىلىقتى جانە ەركىن ساۋدانى باتىل قولدايدى، جۇڭگو جاقپەن كەڭەسۋدى، سايكەسۋدى جيىلەتىپ، ەۆروپا وداعى مەن جۇڭگونىڭ قارىم - قاتىناسىنىڭ اقاۋسىز، ورنىقتى دامۋىن جەبەۋدى قالايدى.
كەڭەستەن كەيىن ەكى ەل باسشىلارى جۇڭگو مەن يتاليانىڭ ”ءبىر بەلدەۋ، ءبىر جول“ قۇرىلىسىن بىرگە ىلگەرىلەتۋ جونىندەگى تۇسىنىستىك ەسكەرتپە حاتىنا، جۇڭگونىڭ جوعالىپ كەتكەن مادەني مۇرالارىن قايتارىپ بەرۋ سياقتى ەكى جاقتى سەلبەستىك حۇجاتتارىنا قول قويۋعا جانە حۇجاتتاردى اۋىستىرۋعا بىرگە كۋا بولدى.
ەكى ەل باسشىلارى تاعى يتاليا قولعا تۇسىرگەن ءارى جۇڭگوعا قايتارىپ بەرگەن جۇڭگونىڭ اعىلىپ جوعالعان مادەني مۇرالارىن بىرگە ەكسكۋرسيالادى.
شي جينپيڭ بارعان كەزدە، كونتە زۇڭلي اۆتوكولىك توقتاعان جەردەن الدىنان شىعىپ قارسى الدى. اسكەري وركەستر جۇڭگو مەن يتاليا ەكى ەلدىڭ مەملەكەت ءانىن ورىندادى. ەكى ەل باسشىلارى قۇرمەت قاراۋىلىن بىرگە كوزدەن كەشىردى.
ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.
شينحۋا اگەنتتىگىنىڭ 3 - ايدىڭ 23 - كۇنى ريمنەن بەرگەن حابارى (تىلشىلەر حۋاڭيىن جيازى، لي جيانمين). مەملەكەت ءتوراعاسى شي جينپيڭ 3 - ايدىڭ 23 - كۇنى ريمدە يتاليانىڭ زۇڭتۇڭى ماتتارەللا وتكىزگەن سالتاناتتى اتتاندىرىپ سالۋ سالتىنا قاتىناستى.
جەرگىلىكتى ۋاقىت تۇستەن بۇرىن ساعات 9دان 50 مينۋت وتكەندە، شي جينپيڭ مەن حانىمى پىڭ لييۋان زۇڭتۇڭ سارايىنا جەتتى. ەكى ەل باسشىسى ىقىلاسپەن قوش ايتىستى. شي جينپيڭ ماتتارەللا زۇڭتۇڭنىڭ جانە يتاليا ۇكىمەتىنىڭ ىستىق ىقىلاسپەن قارسى العاندىعىنا العىس ايتتى. شي جينپيڭ بىلاي اتاپ كورسەتتى: وسى رەتكى ساپار كەزىندە، مەن زۇڭتۇڭ مىرزا سياقتى يتاليانىڭ باسشىلارىمەن ىشكەرىلەي، دوستىق كەڭەس وتكىزدىم، كەزدەستىم، ەكى جاقتىڭ ءوزارا سەنىمدىلىگى جانە ءار سالاداعى ناقتى سەلبەستىكتەرى تەرەڭدەدى. جۇڭگو مەن يتاليا ەكى جاق جوعارى جىكتەگىلەردىڭ بارىس - كەلىسىن ونان ارى جيىلەتىپ، ەكى ەلدىڭ جان - جاقتى ستراتەگيالىق سەرىكتەستىك قاتىناسىنىڭ تىڭ بەلەسكە كوتەرىلۋىن ىلگەرىلەتۋلەرى كەرەك.
ماتتارەللا مىنالاردى ءبىلدىردى: ءتوراعا شي جينپيڭنىڭ يتالياداعى تاريحي سيپاتتى ساپارىنىڭ تولىق تابىسقا جەتكەندىگىن قىزۋ قۇتتىقتايمىن. مەن ءتوراعا مىرزامەن رياسىز دا ىشكەرىلەگەن، اسا ناتيجەلى كەڭەس وتكىزدىم، بۇل يتاليا مەن جۇڭگو ەكى ەلدىڭ ءار سالاداعى سەلبەستىگىن جەبەۋ جونىنەن توتەنشە ماڭىزدى. مەن ءتوراعا مىرزامەن بايلانىستى كۇشەيتىپ، يتاليا - جۇڭگو قارىم - قاتىناسىنىڭ ۇزدىكسىز تىڭ دامۋعا قول جەتكىزۋىن ىلگەرىلەتۋدى قالايمىن.
ءتوراعا شي جينپيڭ حانىمىمەن بىرگە يتاليا جاقتىڭ نەگىزگى مانساپتىلارىمەن قول الىسىپ قوشتاستى، ماتتارەللا زۇڭتۇڭ جانە قىزى لاۋرا جۇڭگو جاقتىڭ بىرگە بارعان سەرىكتەرىمەن قول الىسىپ قوشتاستى. اسكەري وركەستر جۇڭگو مەن يتاليا ەكى ەلدىڭ مەملەكەت ءانىن ورىندادى. قۇرمەت قاراۋىلىنىڭ باستىعى الدىعا كەلىپ، شي جينپيڭدى كوزدەن كەشىرۋگە ۇسىنىس ەتتى. شي جينپيڭ ماتتارەللا زۇڭتۇڭنىڭ سەرىك بولۋىندا قۇرمەت قاراۋىلىن كوزدەن كەشىردى. ءتوراعا شي جينپيڭ مەن حانىمى، ماتتارەللا زۇڭتۇڭ مەن لاۋرا اۆتوكولىككە وتىراتىن جەردە قوشتاستى.
ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار اتتاندىرىپ سالۋ سالتىنا قاتىناستى.
