شي جينپيڭ بەيجيڭدە 2022 - جىلعى قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن وتكىزۋگە دايىندىق كورۋ، جارىسقا دايىندالۋ قىزمەتىن تەكسەرگەندە بىلاي دەپ باسا دارىپتەدى
سەنىمدى بەكەمدەپ، كۇش ۇستىنە كۇش قوسىپ، دايىندىق قىزمەتتەرىن ويداعىداي يگەرىپ، بەيجيڭ قىسقى وليمپيادا سپورت جارىسىنىڭ، مۇگەدەكتەر قىسقى وليمپيادا سپورت جارىسىنىڭ تولىق تابىستى بولۋىنا شىنايى كەپىلدىك ەتۋ كەرەك
حان جىڭ قىزمەت تەكسەرۋدە بىرگە بولدى
1 - ايدىڭ 4 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ بەيجيڭدە 2022 - جىلعى قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن وتكىزۋگە دايىندىق كورۋ، جارىسقا دايىندالۋ قىزمەتىن تەكسەردى. سۋرەتتە: 1 - ايدىڭ 4 - كۇنى تۇستەن بۇرىن، شي جينپيڭ مەملەكەتتىك تەز سىرعاناۋ سارايىندا قىزمەت تەكسەرۋدە.
□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
1 - ايدىڭ 4 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ بەيجيڭدە 2022 - جىلعى قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن وتكىزۋگە دايىندىق كورۋ، جارىسقا دايىندالۋ قىزمەتىن تەكسەردى. سۋرەتتە: 1 - ايدىڭ 4 - كۇنى تۇستەن كەيىن شي جينپيڭ 27 - زاۆود قار - مۇز ءتۇرى جاتتىعۋ بازاسىنىڭ ارناۋلى سپورتتىق قابىلەت جاتتىعۋ سارايىندا سپورتشىلارمەن، جاتتىقتىرۋشىلارمەن، قىزمەت وتەۋ، قامتاماسىز ەتۋ قىزمەتكەرلەرىمەن ىقىلاسپەن اڭگىمەلەسۋدە.
□ سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن
شينحۋا اگەنتتىگىنىڭ 1 - ايدىڭ 5 - كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جۋىقتا بەيجيڭدە 2022 - جىلعى قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن وتكىزۋگە دايىندىق كورۋ، جارىسقا دايىندالۋ قىزمەتىن تەكسەرگەندە بىلاي دەپ باسا دارىپتەدى: بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن جاقسى وتكىزۋ ءبىزدىڭ حالىقارالىق قوعامعا بەرگەن ايبىندى ۋادەمىز. بىرنەشە جىلدىق قۇلشىنىس ارقىلى دايىندىق كورۋ قىزمەتتەرى نەگىزىنەن ورىندالدى، ءبىزدىڭ دۇنيە جۇزىنە ءبىر كەزەك تارتىمدى، ەرەكشە، ەرەن وليمپيادا سپورت جارىسىن سالتاناتتى جينالىسىن سيلاۋعا سەنىمىمىز كامىل، قۋاتىمىز دا جەتەدى. سەنىمدى بەكەمدەپ، رۋحتى سەرپىلتىپ، كۇش ۇستىنە كۇش قوسىپ، ۇنەمشىل، حاۋىپسىز، تارتىمدى جارىس وتكىزۋ تالابىن جان - جاقتى تياناقتاندىرىپ، ەڭ سوڭعى كەزەڭدەگى جارىس ىستەرىن ۇيىمداستىرۋ، جارىس جينالىسىنا قىزمەت وتەۋ، قولباسشىلىق ەتۋ، سايكەستىرۋ سياقتى دايىندىق قىزمەتتەرىن تىڭعىلىقتى، ويداعىداي يگەرىپ، بەيجيڭ قىسقى وليمپيادا سپورت جارىسىنىڭ، مۇگەدەكتەر قىسقى وليمپيادا سپورت جارىسىنىڭ تولىق تابىستى بولۋىنا شىنايى كەپىلدىك ەتۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ ورىنباسار زۇڭليى حان جىڭ قىزمەت تەكسەرۋدە بىرگە بولدى.
1 - ايدىڭ 4 - كۇنى، شي جينپيڭ جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، بەيجيڭ قالالىق پارتكومنىڭ شۋجيى ساي چي مەن قالا باستىعى چىن جينيڭنىڭ سەرىك بولۋىندا، دەنە تاربيە الاڭ - سارايلارى، اقپارات مەديا ورتالىعى، جاتتىعۋ بازالارى سياقتىلاردى ارالاپ، وليمپيادا سپورت جارىسىن وتكىزۋگە دايىندىق كورۋ، جارىسقا دايىندالۋ جاعدايىن باسى - قاسىندا ۇعىستى.
1 - ايدىڭ 4 - كۇنى تۇستەن بۇرىن شي جينپيڭ الدىمەن مەملەكەتتىك تەز سىرعاناۋ سارايىنا بارىپ، ۇلكەن ەكرانمەن الاڭ - سارايلاردى جوبالاۋ ۇستانىمى، قۇرىلىس بارىسى، جۇمىس ىستەۋ جاعدايى جونىندەگى تانىستىرۋدى تىڭدادى. ”مۇز جىبەكباۋ“ دەپ تە اتالاتىن مەملەكەتتىك تەز سىرعاناۋ سارايى − بەيجيڭ جارىس اۋماعىنداعى بەلگى سيپاتتى الاڭ - ساراي جانە بىردەن - ءبىر جاڭادان سالىنعان مۇز ءۇستى جارىس الاڭ - سارايى، ازياداعى ەڭ ۇلكەن تولىق مۇز بەتىندىك ەتىپ جوبالانعان، قىسقى وليمپيادا سپورت جارىسى كەزىندە كەڭ ارنادا تەز سىرعاناۋ جارىسى مىندەتىن ۇستىنە الادى. ءتوراعالار مىنبەسى اۋماعىندا شي جينپيڭ الاڭ - سارايدىڭ ىشكى ورنالاستىرىلۋى مەن جارىس جولىن تاپتەشتەي كورىپ، الاڭ - سارايدىڭ جارىس كەزىندەگى جۇمىس جوباسى مەن جارىس ىستەرىنە قىزمەت وتەۋ، قامتاماسىز ەتۋ دايىندىعى جاعدايلارىن ۇعىستى. شي جينپيڭ بىلاي دەپ اتاپ كورسەتتى: جاسىل وليمپيادا سپورت جارىسىن وتكىزۋ، بىرگە يگىلىكتەنەتىن وليمپيادا سپورت جارىسىن وتكىزۋ، اشىق وليمپيادا سپورت جارىسىن وتكىزۋ، پاك وليمپيادا سپورت جارىسىن وتكىزۋ ۇستانىمىنا تاباندى بولىپ، عىلىم - تەحنيكا، زەردەلىلىك، جاسىل، ۇنەمشىلدىك ەرەكشەلىكتەرىن كورنەكتىلەندىرۋ كەرەك. مەيلى الاڭ - سارايلاردى جاڭادان سالۋ، الدە الاڭ - سارايلاردى وزگەرتىپ سالۋ بولسىن، بارلىعىندا جالپىلىق پايدالانۋعا جانە تومەن كومىر قىشقىل گازدى پايدالانۋعا ءمان بەرىپ، دەنە تاربيە جارىس ىستەرى، بۇقارالىق دەنە شىنىقتىرۋ، مادەني تىنىعۋ، كورمەلەۋ - كورسەتۋ، قوعامدىق الەۋمەتتىك يگىلىك سياقتى كوپ ءتۇرلى يقۋاتتاردى شوعىرلاندىرۋ كەرەك. ”مۇز جىبەكباۋدى“ جوبالاۋ مەن سالۋدا وسىنداي ۇستانىم وتە جاقسى دايەكتىلەندىرىلگەن. ىستەتۋ، باسقارۋ بارىسىنا ءتىپتى دە كوپ جۇڭگو فاكتورلارىن ءسىڭىرىپ، ولاردى جۇڭگو مادەنيەتىنىڭ ەرەكشە باۋراعىشتىعىن كورسەتەتىن تەرەزەگە، ەلىمىزدىڭ قار - مۇز سپورتىنىڭ دامۋىن كورسەتەتىن ايشىقتى تانىسقىعا اينالدىرۋ كەرەك.
الاڭدا تەحنيكتەر مەن مۇز جاساۋشى قىزمەتكەرلەر جارىس جولىنا سىناق جۇرگىزىپ جاتقان ەدى. شي جينپيڭ ەكراننان سىناق جاعدايىن كورىپ، مۇز جاساۋ بارىسى مەن جارىس جولى مۇز بەتىنىڭ تەمپەراتۋراسى سياقتىلاردى ەگجەي - تەگجەيلى ۇعىستى. ول بىلاي دەپ باسا دارىپتەدى: مۇز بەتى نىسان قۇرىلعىلارىنىڭ مۇز جاساۋ تەحنيكاسىنا قوياتىن تالابى وتە جوعارى. مەملەكەتتىك تەز سىرعاناۋ سارايىنىڭ قاتتى بولشەگى دۇنيە جۇزىندە ماڭداي الدى بولىپ قانا قويماي، مۇز جاساۋ تەحنيكاسى دا دۇنيە جۇزىندە وزىق ورىندا، تومەن كومىر قىشقىل گازدى بولۋ، جاراقسىز زاتتار بولماۋ جۇزەگە اسىرىلعان. وسى نىساننىڭ تەحنيكادان شوعىرلى ۇلگى كورسەتۋ اسەرىن ويداعىداي ساۋلەلەندىرىپ، تەحنيكانى كادەگە جاراتۋ جانە جالپىلاستىرىپ قولدانۋ تەبىنىن ارتتىرىپ، ەكونوميكالىق، قوعامدىق دامۋدىڭ جالپى بەتتىك جاسىل تيپ وزگەرتۋىن ىلگەرىلەتۋگە، كومىر قىشىل گازىنىڭ شىعارىلۋىن ەڭ جوعارى ماننەن اسىرماۋدى، كومىر قىشقىل گازىن بەيتاراپتاندىرۋدى جۇزەگە اسىرۋعا ۇلەس قوسۋ كەرەك.
بەيجيڭ قىسقى وليمپيادا سپورت جارىسىنىڭ، مۇگەدەكتەر قىسقى وليمپيادا سپورت جارىسىنىڭ نەگىزگى اقپارات مەديا ورتالىعى مەملەكەتتىك تەز سىرعاناۋ سارايىنىڭ جانىندا، جارىس كەزىندە الەمدەگى تىركەلگەن جازىق بەتتىك اقپارات مەديا مەن جالعاپ تاراتۋشىلاردىڭ قىزمەت باس شتابى بولادى. شي جينپيڭ ىلگەرىندى - كەيىندى اقپار جاريالاۋ زالىنا، اقپارات مەديا قىزمەت بولمەسىنە، زەردەلى اسحاناعا بارىپ، وسى ورتالىقتىڭ سالىنىپ جۇمىس ىستەۋى، ىندەتتەن ساقتانۋ شارالارىن كەمەلدەندىرۋى، تۇتاس بارىستىق قىزمەت وتەۋ ۇلگىسىن قالىپتاستىرۋى، سونداي - اق جارىس كەزىندەگى ينفورماتسيالاردى جاريالاۋ، اقپارات مەديالارىنىڭ جۇمىسى، اس - سۋ قىزمەت وتەۋى سياقتى جاعدايلاردى باسى - قاسىندا ۇعىستى. اقپارات مەديالارى قىزمەت بولمەسىندە شي جينپيڭ دايىندىق جاساپ جاتقان اقپارات مەديالارى تىلشىلەرىمەن ىقىلاسپەن اڭگىمەلەستى. زەردەلى اسحانادا شي جينپيڭ زەردەلى اس - سۋ جابدىقتارىنىڭ جۇمىس ىستەۋ جاعدايىن كوردى، وسى ورتالىقتىڭ ازىق - تۇلىك حاۋىپسىزدىگىن باقىلاۋ - باسقارۋدى كۇشەيتۋ جاعدايىن ۇعىستى. ول بىلاي دەپ باسا دارىپتەدى: بەيجيڭ قىسقى وليمپيادا سپورت جارىسىنىڭ، مۇگەدەكتەر قىسقى وليمپيادا سپورت جارىسىنىڭ نەگىزگى اقپارات مەديا ورتالىعى نەگىزگى اقپارات ورتالىعى مەن حالىقارالىق راديو ورتالىعىن بىرىكتىرىپ، جارىس كەزىندەگى قىزمەت وتەۋ يقۋاتى مەن جارىستان كەيىنگى كورمە يقۋاتىن ءبىر تۇتاس جوسپارلاپ، جاسىل وليمپيادا سپورت جارىسىن، ۇنەمشىل وليمپيادا سپورت جارىسىن وتكىزۋدى ىسكە اسىردى. ول بىلاي دەپ اتاپ كورسەتتى: بەيجيڭ قىسقى وليمپيادا سپورت جارىسى، مۇگەدەكتەر قىسقى وليمپيادا سپورت جارىسى جونىنەن ايتقاندا، جاڭا تيپتى ايدارشا ۆيرۋس وكپە قابىنۋ ىندەتىنەن ساقتانۋ - تىزگىندەۋ قىزمەتىن جاقسى ىستەۋ ەڭ زور سىناق. ىندەتتىڭ ىقپالى سەبەبىنەن، بەيجيڭ قىسقى وليمپيادا سپورت جارىسىنىڭ، مۇگەدەكتەر قىسقى وليمپيادا سپورت جارىسىنىڭ جارىستارىن ۇستىندە كورۋ زور دارەجەدە شەكتەمەگە ۇشىرادى، اقپاراتتىق تاراتۋ بۇرىنعى وليمپيادالاردان ءتىپتى دە ماڭىزدى بولا ءتۇستى. نەگىزگى اقپارات مەديا ورتالىعى جۇمىس جۇرگىزۋ، قىزمەت وتەۋ، قامتاماسىز ەتۋ قىزمەتتەرىن جاقسى ىستەپ، اقپاراتتىق حابارلاۋ مەن جەتكىزۋ، جالعاپ تاراتۋ يقۋاتتارىنىڭ حاۋىپسىز جۇمىس ىستەۋىن ويداعىداي قامتاماسىز ەتۋمەن بىرگە، ىندەتتەن ساقتانۋ - تىزگىندەۋ حاۋىپسىزدىگىنە دە شىنايى كەپىلدىك ەتۋ كەرەك. ”قوس جابىق اينالىمدىق“ باسقارۋدى قاتاڭ تياناقتاندىرىپ، الاڭ - سارايلارداعى ىندەتتەن ساقتانۋ شارالارىن كەمەلدەندىرىپ، ىندەتتىڭ تۋىلۋىنان ساقتانۋعا بارىنشا قۇلشىنۋ كەرەك. ازىق - تۇلىك حاۋىپسىزدىگىن ءبىرىنشى ورىنعا قويۋ كەرەك، قانشا زەردەلىلەنگەن سايىن، قاينارىنان مەڭگەرۋگە سونشا ءمان بەرىپ، ەشقانداي اعاتتىق جىبەرمەۋگە شىنايى كەپىلدىك ەتۋ كەرەك. ول ەل ءىشى - سىرتىنداعى اقپارات مەديالارى مەن تىلشىلەردىڭ ىشكەرىلەي حابارلاپ، ءار ەل وليمپيادا سپورت جارىسى ساڭلاقتارىنىڭ تاسقىنداعان ىنتامەن سايىسقا ءتۇسۋ حيكايالارىن جاقسى اڭگىمەلەپ، جۇڭگونىڭ بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن وتكىزۋگە دايىندىق كورگەندىگىن جاقسى اڭگىمەلەپ، جۇڭگو حالقىنىڭ قىزۋ مەرەيلى، قوناعۋارلىعىن جاقسى اڭگىمەلەپ، بەيجيڭ قىسقى وليمپيادا سپورت جارىسى سالتاناتتى جينالىسىن جان - جاقتى، ستەرەولدى، جاندى تۇردە بۇكىل دۇنيە جۇزىنە تاراتۋىن ءۇمىت ەتتى.
وسىدان كەيىن شي جينپيڭ بەيجيڭ قىسقى وليمپيادا سپورت جارىسى كەنتىندە (مۇگەدەكتەر قىسقى وليمپيادا سپورت جارىسى كەنتى) قىزمەت تەكسەردى. بەيجيڭ قىسقى وليمپيادا سپورت جارىسى كەنتى (مۇگەدەكتەر قىسقى وليمپيادا سپورت جارىسى كەنتى) قونالقى اۋماق، الاڭ اۋماعى، جۇمىس اۋماعى بولىپ 3 اۋماققا بولىنگەن، جارىس كەزىندە ءار ەل سپورتشىلارىن، سونداي - اق بىرگە كەلگەن ۇكىمەت قىزمەتكەرلەرىن 3000نان استام توسەك ورنىمەن جانە ساۋدالىق قىزمەت وتەۋمەن قامدايدى. الاڭ اۋماعىندا شي جينپيڭ قىسقى وليمپيادا سپورت جارىسى كەنتىنىڭ (مۇگەدەكتەر قىسقى وليمپيادا سپورت جارىسى كەنتى) سالىنۋ بارىسى، جۇمىس ىستەۋ جالپى جاعدايى، ىندەتتەن ساقتانۋ - تىزگىندەۋ سياقتى جاعدايلار جونىندەگى تانىستىرۋدى تىڭدادى، جول بويى گازەت - جۋرنال دۇكەنشەسى جانە ۇكىمەت ارنايى رۇقسات بەرگەن تاۋارلاردى بولشەك ساتۋ دۇكەنى سياقتىلاردى جاعالاي كورىپ، ءتۇرلى ساۋدالىق قىزمەت وتەۋ قۇرىلعىلارىنىڭ جۇمىس ىستەۋ جاعدايىن ۇعىستى. شي جينپيڭ بىلاي دەپ اتاپ كورسەتتى: قىسقى وليمپيادا سپورت جارىسى كەنتى قىسقى وليمپيادا سپورت جارىسىنىڭ ماڭىزدى ورنى جانە ماڭىزدى مۇراسى. سىزدەر جارىس كەزىندەگى قاجەت پەن جارىستان كەيىنگى پايدالانۋدى ءبىر تۇتاس جوسپارلاپ، قىسقى وليمپيادا سپورت جارىسى كەنتىن جارىستان كەيىن دارىندىلار جاتاقحاناسى بولاتىن ماڭگىلىك قۇرىلعى ەتىپ سالىپ شىقتىڭىزدار، بۇل ءادىس وتە جاقسى ەكەن، بەيجيڭنىڭ ”قوس وليمپيادا سپورت جارىسى قالاسى“ سىندى مادەنيەت مازمۇنىن بايىتۋعا ءتيىمدى. سىزدەر سىحىيۋان ۇستانىمىمەن قىسقى وليمپيادا كەنتىن جوبالاپ سالىپ، بەيجيڭنىڭ مىڭ جىلدىق بايىرعى استانا رەتىندەگى ءارى بايىرعى، ءارى وسى زامانعى ەرەكشە باۋراعىشتىعىن ايگىلەدىڭىزدەر.
قونالقى اۋماقتا شي جينپيڭ جالپىلىق ەمحانا، مۇگەدەك سپورتشىلار تۇرعىن ءۇيىنىڭ ۇلگى بولمەسىن تەكسەرىپ، قىسقى وليمپيادا سپورت جارىسى كەنتىنىڭ (مۇگەدەكتەر قىسقى وليمپيادا سپورت جارىسى كەنتى) نەگىزگى ەمدەۋ قىزمەت وتەۋ، ەمدەۋدەگى شۇعىل جاعدايدى ءبىر جاقتى ەتۋ قابىلەتىن جوعارىلاتۋ، ەگجەي - تەگجەيلى قىزمەت وتەۋ، قامتاماسىز ەتۋ دەڭگەيىن جوعارىلاتۋ، ”سپورتشىلار ءۇيىن“ تۇلعالاۋ سياقتى جاعدايلاردى ۇعىستى. شي جينپيڭ بىلاي دەپ باسا دارىپتەدى: سپورتشىلارعا، جاتتىقتىرۋشىلارعا ىشەر اس، جاتار ورىن، ءجۇرىس - تۇرىس، ەمدەلۋ، ساۋىقتىرۋ، كوڭىل اشۋ قاتارلىلار بويىنشا قىزمەت وتەۋ قامتاماسىز ەتۋ قىزمەتى وتە ناقتى بولادى. سپورتشىلاردىڭ ويلاعانىن ويلاپ، سپورتشىلاردىڭ قاجەتىن قاناعاتتاندىرىپ، سپورتشىلارعا قولايلى، تەز، دالمە - ءدال، تىڭعىلىقتى قىزمەت وتەۋ كەرەك، اسىرەسە، مۇگەدەك سپورتشىلاردىڭ ەرەكشە قاجەتىنە قاراي، قاتىستى كەدەرگىسىز قۇرىلعىلاردى كوبەيتىپ ورناتۋ كەرەك. باسقارۋ جوباسىن ۇزدىكسىز كەمەلدەندىرىپ، قىزمەت وتەۋ ءتارتىبىن ساپالىلاندىرىپ، شۇعىل جاعدايعا توتەپ بەرۋ دايىندىق جوباسىن اقاۋسىزداندىرىپ، دالمە - دالدەندىرىپ، ەگجەي - تەگجەيلىلەندىرىپ، باسقارۋ جانە قىزمەت وتەۋ دەڭگەيىن جوعارىلاتىپ، حاۋىپسىز، ىقىلاستى، جايلى ”سپورتشىلار ءۇيىن“ تۇلعالاۋ كەرەك. اۋماققا، تۇرگە ءبولىپ جابىق اينالىمدى باسقارۋ شارالارىن قاتاڭ تياناقتاندىرىپ، ىندەتتەن ساقتانۋ - تىزگىندەۋدى كۇشەيتۋ كەرەك.
شي جينپيڭ جۇمىس باسقارۋ، قىزمەت وتەۋ، قامتاماسىز ەتۋ قىزمەتكەرلەرىمەن جانە ەرىكتىلەرمەن ىقىلاسپەن اڭگىمەلەسىپ، كوپشىلىكتىڭ قاجىرلى ەڭبەگىنە العىس ايتتى. ول بىلاي دەپ باسا دارىپتەدى: بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن ءساتتى وتكىزۋ ءبىزدىڭ جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ سەنىمىمىزدى نىعايتىپ قانا قويماي، مەملەكەتىمىز بەن ۇلتىمىزدىڭ ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە قۇلشىنعان، جارقىن، باي، قۇدىرەتتى، اشىق تاماشا وبرازىن كورسەتىپ، ءار ەل حالىقتارىنىڭ جۇڭگو جونىندەگى تۇسىنىگى مەن تانىمىن ارتتىرۋعا ءتيىمدى. ول بىلاي دەپ اتاپ كورسەتتى: بەيجيڭ قىسقى وليمپيادا سپورت جارىسىنىڭ، مۇگەدەكتەر قىسقى وليمپيادا سپورت جارىسىنىڭ ەرىكتى قىزمەت وتەۋ قىزمەتىنە قاتىناسۋ ومىردەگى وڭاي كەلە بەرمەيتىن وراي، كوپشىلىكتىڭ رۋحتى سەرپىلتىپ، ارىندى اسقاقتاتىپ، ىنتىماقتاسا سەلبەسىپ، بىرگە قۇلشىنىپ، قىسقى وليمپيادا سپورت جارىسى كەزىندەگى قىزمەت وتەۋ، قامتاماسىز ەتۋ قىزمەتتەرىنىڭ ءساتتى جۇرگىزىلۋىنە شىنايى كەپىلدىك ەتىپ، ءار ەلدىڭ جارىسقا قاتىناسۋشىلارىنا جۇڭگو حالقىنىڭ قىزۋ مەرەيلى، قوناعۋار جانە وركەنيەتتى، يبالىلىعىن تولىق سەزىندىرۋىن، كوكتەم كۇنىندەي مەيىردى سەزىندىرۋىن ءۇمىت ەتەمىن.
سول كۇنى تۇستەن كەيىن شي جينپيڭ بەيجيڭ قىسقى وليمپيادا سپورت جارىسىنىڭ جۇمىسقا قولباسشىلىق ەتۋ، سايكەستىرۋ ورتالىعىنا بارىپ، بەيجيڭنىڭ جارىس كەزىندەگى قولباسشىلىق ەتۋ، سايكەستىرۋ جانە قالا جۇمىسىن قامتاماسىزداندىرۋ، سايكەستىرۋ مەحانيزمىن كەمەلدەندىرۋ جاعدايى جونىندەگى تانىستىرۋدى تىڭدادى ءارى جۇمىس باسىنداعى قىزمەتكەرلەردەن تۇتقيىل وقيعالاردى شۇعىل جاعدايدا ءبىر جاقتى ەتۋ جوباسى سياقتى مازمۇنداردى ۇعىستى. شي جينپيڭ بىلاي دەپ اتاپ كورسەتتى: ءبىر تۇتاس قولباسشىلىقتى، سايكەستىرۋدى كۇشەيتۋ بەيجيڭ قىسقى وليمپيادا سپورت جارىسىنىڭ، مۇگەدەكتەر قىسقى وليمپيادا سپورت جارىسىنىڭ ءساتتى وتكىزىلۋىنە شىنايى كەپىلدىك ەتۋدىڭ تەتىگى. بەيجيڭ، يانچيڭ، جاڭجياكوۋ 3 جارىس اۋماعى سايكەسۋدى، سەلبەسۋدى جانە ءبىر تۇتاس قولباسشىلىق ەتۋدى، سايكەستىرۋدى كۇشەيتىپ، ءبىر تۇتاس جۇيە قالىپتاستىرۋ كەرەك. بەيجيڭ باستاماشىلدىقپەن باس قىزمەت جاۋاپكەرشىلىگىن ارقالاۋى كەرەك. ءبىر تۇتاس قولباسشىلىق ەتەتىن، ءبىر تۇتاس جوسپارلاپ سايكەستىرەتىن، ورگانيكالى ۇشتاستىرىلاتىن، اينالىمى ىركىلىسسىز، تەز اڭىس قايتاراتىن، باتىل ءبىر جاقتى ەتەتىن ءتۇزىلىس - مەحانيزمدى اقاۋسىزداندىرىپ، ءتۇرلى قىزمەت ەرەجەلەرى مەن تۇتقيىل جاعدايعا توتەپ بەرۋ جوباسىن كەمەلدەندىرۋ كەرەك. ەڭ سوڭعى ءبىر اي دايىندالۋ ۋاقىتىن مىقتاپ يگەرىپ، سىناۋدى، جاتىلۋدى كۇشەيتىپ، كومەسكى قاتەردى انىقتاپ، ولقىلىقتاردى تولىقتاپ، ءالسىز تۇستاردى كۇشەيتىپ، بەيجيڭ قىسقى وليمپيادا سپورت جارىسىنىڭ، مۇگەدەكتەر قىسقى وليمپيادا سپورت جارىسىنىڭ تولىق تابىستى بولۋىنا شىنايى كەپىلدىك ەتۋ كەرەك.
سايكەستىرۋ ورتالىعىنان شىققاننان كەيىن، شي جينپيڭ 7 - اقپان زاۆودى قار - مۇز ءتۇرى جاتتىعۋ بازاسىنا بارىپ قىزمەت تەكسەردى، تەكسەرۋ - زەرتتەۋ جۇرگىزدى. بۇل عىلمي زەرتتەۋ، جاتتىعۋ ءبىر تۇلعالانعان مەملەكەتتىك قار - مۇز سپورت امبەباپ بازاسى، الاڭ - سارايلار مەن قۇرىلعى جابدىقتار قازىر تۇگەلدەي مەملەكەت قۇراماسىنىڭ قىسقى وليمپيادا سپورت جارىسىنا دايىندالۋعا پايدالانۋىنا بەرىلگەن. شي جينپيڭ ىلگەرىندى - كەيىندى التى ەركىن دارەجە جاتتىعۋ سارايىنا، جالپىلىق اۋا تۋنەل سارايىنا بارىپ، بولات فەرمالى قار شانا سياقتى تۇرلەردىڭ التى ەركىن دارەجە جاتتىعۋ جۇيەسىنىڭ اينالىمىن، مۇزدا تەز سىرعاناۋ توپتىق قۋالاما ءتۇرى بويىنشا اۋا تۋنەلىندە جاتتىعۋ جاساۋ احۋالىن تاپتەشتەي سۇراپ ۇعىسىپ، جول بويى ەلىمىزدە وندىرىلگەن 4 ادامدىق قار شانا، ەلىمىزدە وندىرىلگەن بالاۋىزداۋ ماشيناسى، شۇعىل جاعدايعا توتەپ بەرۋ بويىنشا ەمدەۋ - قۇتقارۋ جابدىعى سياقتى اسپاپ - جابدىقتار كورمەسىن كورىپ، بازا قۇرىلىسىن جانە قار - مۇز سپورتى بويىنشا عىلمي جاتتىعۋ جۇيەسىن قۇرۋ جاعدايىن ۇعىستى. شي جينپيڭ بىلاي دەپ باسا دارىپتەدى: قازىر دۇنيە جۇزىندە عىلىم - تەحنيكانىڭ باسەكەلىك دەنە تاربيەدەگى رولى بارعان سايىن كورنەكتىلەنۋدە. دەنە تاربيەدە قۋاتتى ەل قۇرۋدا، ءسوز جوق، دەنە تاربيە عىلىم - تەحنيكاسىندا ءوز كۇشىنە سۇيەنۋدى، ءوزىن الۋەتتەندىرۋدى جوعارى دەڭگەيدە ورىنداۋ كەرەك. كوپ ءپان، ءپان اتتاعان كۇشتەردى بىرلەستىرىپ، تەحنيكا زەرتتەپ اشۋدى جانە تەحنيكانى كادەگە جاراتۋدى ءبىر تۇتاس جوسپارلاپ ىلگەرىلەتىپ، ەلىمىزدىڭ باسەكەلىك دەنە تاربيەسىندە ءتىپتى دە زور ناتيجە جاراتۋعا پارمەندى تىرەك ازىرلەۋ كەرەك.
تەز سىرعاناۋ سارايىنىڭ 1 - قاباتىندا تەز سىرعاناۋ سپورتشىلارى توپتىق قۋالاما جاتتىعۋىن جاساپ جاتتى. شي جينپيڭ دەن قويا كوردى ءارى جاتتىعۋعا قاتىناسىپ جاتقان سپورتشىلاردان، جاتتىقتىرۋشىلاردان حال سۇراپ، ولاردى جارىسقا عىلمي دايىندالۋعا، قايسارلىقپەن شايقاسۋعا، تاماشا ناتيجەگە قول جەتكىزۋگە شابىتتاندىردى. وسىدان كەيىن شي جينپيڭ تەز سىرعاناۋ سارايىنىڭ جەر استى 1 - قاباتىنا بارىپ، ”300 ميلليون ادامدى قار - مۇز سپورتىنا قاتىناسۋعا باستاۋ جەتىستىكتەر كورمەسىن“ تاماشالاپ، ەلىمىزدىڭ قار - مۇز سپورتىنىڭ دامۋ احۋالىن ۇعىستى. شي جينپيڭ بىلاي دەپ اتاپ كورسەتتى: وسى بىرنەشە جىلدا ءار جاقتىڭ بىرگە قۇلشىنۋىندا قار - مۇز سپورتىنا قىزىعۋشىلار بارعان سايىن كوبەيىپ، ”300 ميلليون ادامدى قار - مۇز سپورتىنا قاتىناسۋعا باستاۋ“ نىساناسى كۇنى بۇرىن ورىندالدى. دەنە تاربيەدە قۋاتتى ەل، سالاماتتى جۇڭگو قۇرۋداعى ەڭ ءتۇبىرلى نەگىز − حالىقتىڭ دەنە ساپاسىن كۇشەيتىپ، حالىقتىڭ سالاماتتىعىن قامتاماسىز ەتۋ. بۇل جاپپاي سوتسياليستىك وسىزاماندانعان مەملەكەت قۇرۋداعى ءبىر ماڭىزدى جاق. بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن وتكىزۋ قالىپتاستىرعان قىزۋ ورلەۋدەن تولىق پايدالانىپ، باسەكەلىك دەنە تاربيە مەن بۇقارالىق دەنە تاربيەنى ءبىر تۇلعالاندىرىپ ىلگەرىلەتۋگە تاباندى بولىپ، ەلىمىزدىڭ قار - مۇز سپورتىنىڭ ۇزدىكسىز دامۋىن ىلگەرىلەتۋ كەرەك.
شي جينپيڭ سپورتشىلاردى ساۋىقتىرۋ، ەمدەۋ قىزمەتىنە ەرەكشە كوڭىل ءبولدى. سپورتتىق قابىلەت ورتالىعى ەمدەۋ پۋنكتىندە شي جينپيڭ بازانىڭ توتەنشە تومەن تەمپەراتۋرادا ەمدەۋ بولمەسى، قالقۋ بولمەسى سياقتى جابدىقتاردان جان - جاقتى پايدالانىپ سپورتشىلاردى ساۋىقتىرۋ، ەمدەۋ دەڭگەيىن جان - جاقتى جوعارىلاتۋ جاعدايىن تاپتەشتەي سۇراپ ۇعىستى. ول بىلاي دەپ باسا دارىپتەدى: 7 - اقپان زاۆودى قار - مۇز ءتۇرى جاتتىعۋ بازاسى ەلىمىزدىڭ قار - مۇز سپورتىندا عىلىم - تەحنيكالىق زەرتتەۋ - اشۋ ماڭىزدى بورىشىن ارقالاپ وتىر. سىزدەردىڭ بورىشتى ارقالاپ، باتىلدىقپەن بيىكتەردى باعىندىرىپ، ەلىمىزدىڭ قار - مۇز سپورتىن جەدەل دامىتۋعا ءتىپتى دە زور ۇلەس قوسۋلارىڭىزدى ءۇمىت ەتەمىن.
ارناۋلى سپورتتىق قابىلەت جاتتىعۋ سارايىندا سپورتشىلار، جاتتىقتىرۋشىلار، قىزمەت وتەۋ، قامتاماسىز ەتۋ قىزمەتكەرلەرى ۋاكىلدەرى قىزۋ شاپالاق سوعىپ باس شۋجيدىڭ كەلگەندىگىن قارسى الدى. شي جينپيڭ كوپشىلىككە قول بۇلعاپ قۇرمەت ءبىلدىردى. ول بىلاي دەپ اتاپ كورسەتتى: ەندى ءبىر ايدان كەيىن بەيجيڭ قىسقى وليمپيادا سپورت جارىسى باستالادى. بۇگىن جاڭا جىل مەرەكەسىنىڭ دەمالىسىنان كەيىن قىزمەتكە شىققان ءبىرىنشى كۇن، مەن بەيجيڭ قىسقى وليمپيادا سپورت جارىسىنىڭ، مۇگەدەكتەر قىسقى وليمپيادا سپورت جارىسىنىڭ دايىندىق قىزمەتىنە ارناۋلى تەكسەرۋ - زەرتتەۋ جۇرگىزە كەلۋدەگى ماقساتىم، باستىسى، كوپشىلىكتى شابىتتاندىرىپ، قايراتتاندىرۋ. داياشى ەل رەتىندە، ءبىز بەيجيڭ قىسقى وليمپيادا سپورت جارىسىن، مۇگەدەكتەر قىسقى وليمپيادا سپورت جارىسىن ويداعىداي وتكىزىپ قانا قويماي، جاقسى ناتيجەلەرگە قول جەتكىزۋگە قۇلشىنۋىمىز كەرەك. كوپشىلىكتىڭ سوڭعى دايىندىق شەشۋشى كەزەڭىن مىقتى يگەرىپ، دەن قويا جاتتىعىپ، ەڭ تاماشا باسەكەلىك كۇيمەن جارىستى قارسى الۋلارىن ءۇمىت ەتەمىن. شي جينپيڭ بىلاي دەپ باسا دارىپتەدى: ومىردە قانشا رەت بەلدەسۋ بولماق، ۇزاق ۋاقىت دايىندىق جاساۋدىڭ ءساتتى - ءساتسىز بولۋى وسى رەتتە كورىنەدى. كوپشىلىكتىڭ مەملەكەتكە داڭق اپەرۋ ەرىك - جىگەرى مەن باتىلدىعىن كۇشەيتىپ، ەرلىكپەن سايىسۋدى ماڭداي الدى ورىنعا قويۋدان جازباي، باتىلدىقپەن سايىسىپ، شەبەرلىكپەن سايىسىپ، وليمپيادا جارىس الاڭىندا جاڭا داۋىردەگى جۇڭگو سپورتشىلارىنىڭ رۋحاني بەت - بەينەسىن جانە باسەكەلىك دەڭگەيىن ايگىلەپ، جارىستا، ءمورالدا، ستيلدە تۇگەل ەڭ جاقسى مەدالعا يە بولۋعا ۇمتىلۋىن ءۇمىت ەتەمىن. شي جينپيڭ كوپشىلىكتىڭ تاماشا ناتيجەگە قول جەتكىزۋىن تىلەدى، كوپشىلىك قىزۋ قول شاپالاق سوعىپ، ”باس شۋجي، الاڭسىز بولىڭىز!“، ”ءبىز دايىندالىپ بولدىق!“ دەپ داۋىستادى.
ديڭ شۋەشياڭ، سونداي - اق ورتالىق پەن مەملەكەتتىڭ قاتىستى تاراۋلارىنداعى جاۋاپتى جولداستار قىزمەت تەكسەرۋدە بىرگە بولدى.
