12 - ايدىڭ 15 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدە رەسەيدىڭ زۇڭتۇڭى پۋتينمەن بەينە ەكراندا ديدارلاستى.
□سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن
12 - ايدىڭ 15 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدە رەسەيدىڭ زۇڭتۇڭى پۋتينمەن بەينە ەكراندا ديدارلاستى.
□ سۋرەتتى شينحۋا اگەنتتىگىنىڭ ءتىلشىسى يىن بوگۋ تۇسىرگەن
شينحۋا اگەنتتىگىنىڭ 12 - ايدىڭ 15 - كۇنى بەيجيڭنەن بەرگەن حابارى (ءتىلشى ياڭ يجۇن). مەملەكەت ءتوراعاسى شي جينپيڭ 12 - ايدىڭ 15 - كۇنى تۇستەن كەيىن بەيجيڭدە رەسەيدىڭ زۇڭتۇڭى پۋتينمەن بەينە ەكراندا ديدارلاستى.
شي جينپيڭ بىلاي دەپ اتاپ كورسەتتى: جىل سوڭى قارساڭىندا سىزبەن بيىل 2 - مارتە بەينە ەكراندا ديدارلاسقانىما ايرىقشا قۋانىشتىمىن، بۇل ءبىزدىڭ 2013 - جىلدان بەرگى 37 - رەتكى ديدارلاسۋىمىز. ءسىز كوپتەگەن ورىنداردا جۇڭگو - رەسەي قارىم - قاتىناسىن ”21 - عاسىرداعى مەملەكەتتەر ارا سەلبەستىكتىڭ ۇلگىسى“ دەپ القاپ، جۇڭگو جاقتىڭ ءوز ەلىنىڭ وزەكتى مۇددەسىن قورعاۋىنا باتىل قولداۋ كورسەتىپ، جۇڭگو مەن رەسەيدىڭ اراسىنا ىرتكى سالۋ دامەسىنە قارسى تۇردىڭىز. مەن مۇنى ايرىقشا القايمىن، سىزبەن بىرگە بيىلعى ەكى جاقتى قارىم - قاتىناستىڭ دامۋىنداعى جاڭا جەتىستىكتەردى جان - جاقتى قورىتىندىلاپ، ءار سالاداعى سەلبەستىكتەر جونىندە جاڭا جوبا جاساپ، ەكى ەل قارىم - قاتىناسىنىڭ ۇزدىكسىز جوعارى ساپالى دامۋىن ىلگەرىلەتۋدى قالايمىن.
شي جينپيڭ بىلاي دەپ باسا دارىپتەدى: قازىر دۇنيە ءجۇزىنىڭ 100 جىلدىق وزگەرىسى مەن عاسىرلىق ىندەتتىڭ قاباتتاسا ىقپال جاساۋىندا دۇنيە ءجۇزى اۋمالى - توكپەلى وزگەرىس كەزەڭىنە ءوتتى. جۇڭگو - رەسەي قارىم - قاتىناسى ءتۇرلى داۋىلدى - تولقىنداردىڭ سىنىنا توتەپ بەرىپ، تىڭ جالىندى ومىرشەڭدىك كۇش كورسەتتى. زۇڭتۇڭ مىرزا ەكەۋىمىز ءتۇرلى تاسىلدەر ارقىلى كەلەلى كەڭەستىك تاقىرىپتار جونىندە تىلدەسۋدى جانە سايكەسۋدى ساقتاپ، جۇڭگو - رەسەي قارىم - قاتىناسى ءۇشىن بىرگە رول ۇستاپ، باعدار نۇسقادىق. ەكى جاق «جۇڭگو - رەسەي تاتۋ كورشىلىك، دوستىق سەلبەستىك شارتىنىڭ» مەرزىمى ۇزارتىلعاندىعىن رەسمي جاريالادىق جانە وعان جاڭا داۋىرلىك ءمان ۇستەدىك، ءبىر - ءبىرىمىزدىڭ وزەكتى مۇددەمىزگە ساياتىن ماسەلەلەردە باتىلدىقپەن ءوزارا قولداۋ كورسەتىپ، ءوز ەلمىزدىڭ بەدەلى مەن ەكى ەلدىڭ ورتاق مۇددەسىن قورعادىق.
شي جينپيڭ بىلاي دەپ اتاپ كورسەتتى: جۇڭگو مەن رەسەيدىڭ جان - جاقتى، ناقتى ىستەر سەلبەستىگى وراسان زور ساياسي باسىمدىق پەن وراي باسىمدىعىن ايگىلەدى. ەكى جاقتى ساۋدا سوماسى الدىڭعى 3 ماۋسىمدا تۇڭعىش رەت 100 ميلليارد دوللارلىق ۇلكەن وتكەلدەن ءوتتى، تۇتاس جىلدا بۇل جاعىندا تاعى دا تىڭ بيىككە جەتۋدەن ءۇمىت بار. جۇڭگو مەن رەسەيدىڭ عىلىم - تەحنيكادا جاڭالىق اشۋ جىلىنىڭ شىمىلدىعى ءساتتى جابىلىپ، ءبىر قىدىرۋ ستراتەگيالىق ءىرى نىساندار ءساتتى اتقارىلىپ، ”ءبىر بەلدەۋ، ءبىر جولدى“ بىرگە قۇرۋدى ەۆروپا - ازيا ەكونوميكالىق وداعىمەن ۇشتاستىرۋ ءساتتى ىلگەرىلەدى. ەكى ەل ءىرى ەلدىك جاۋاپكەرشىلىكتەرىن بەلسەنە ايگىلەپ، حالىقارالىق قوعاممەن ىنتىماقتاسا وتىرىپ ىندەتكە قارسى اتتانىپ، دەموكراتيا مەن ادامدىق ۇقىقتىڭ دۇرىس ءمانىن ءتۇسىندىرىپ، ناعىز كوپ جاقتىلىقتى امالياتتا ايگىلەۋدىڭ، حالىقارالىق ادىلدىك پەن تۋراشىلدىقتى قورعاۋدىڭ مىزعىماس تىرەگىنە اينالدى.
شي جينپيڭ بىلاي دەپ اتاپ كورسەتتى: كەلەر جىلى جۇڭگو كوممۋنيستىك پارتياسى 20 - قۇرىلتايىن اشادى، رەسەي «2030 - جىلعا دەيىنگى مەملەكەتتىڭ دامۋ نىساناسىن» تياناقتاندىرۋدىڭ شەشۋشى كەزەڭىنە وتەدى. ەكى جاق ءبىر - بىرىنە ەسىك اشۋدان بىرگە يگىلىكتەنۋ ورايىن بەرۋگە تاباندى بولىپ، الەمدىك دامۋدى ىلگەرىلەتۋ كەڭەستىك ءتارتىبىن ىلگەرىلەتۋگە تاباندى بولىپ، جاڭاشا حالىقارالىق قارىم - قاتىناس ورناتۋ، ادامزاتتىڭ تاعدىرلاس ورتاق تۇلعاسىن قۇرۋ ءۇشىن رول اتقارۋى كەرەك.
شي جينپيڭ بىلاي دەپ باسا دارىپتەدى: ەندى ءبىر ايدان استام ۋاقىتتان كەيىن، ءسىز جۇڭگودا ساپاردا بولاسىز ءارى بەيجيڭ قىسقى وليمپيادا سپورت جارىسىنىڭ اشىلۋ سالتىنا قاتىناسىپ، ءىس جۇزىندىك ارەكەتىڭىز ارقىلى جۇڭگونىڭ وليمپيادا وتكىزۋىنە قولداۋ كورسەتەسىز. بەيجيڭ دۇنيە ءجۇزى بويىنشا جازعى وليمپيادا سپورت جارىسىن دا، قىسقى وليمپيادا سپورت جارىسىن دا وتكىزگەن تۇڭعىش قالا بولماق. قازىر ءبىز ”ىقشام، حاۋىپسىز، تارتىمدى بولۋ“ پرينسيبى بويىنشا بار كۇشپەن دايىندىق كورىپ وتىرمىز، ءتۇرلى قىزمەتتەر نەگىزىنەن ورىندالىپ بولدى. ءبىز وليمپيادا اياسىندا ءوزارا ساپاردا بولۋدى جۇزەگە اسىرامىز، الداعى 2 جىلدا جۇڭگو مەن رەسەي تاعى جۇڭگو - رەسەي دەنە تاربيە اۋىس - كۇيىس جىلىن وتكىزەدى. وسىنى وراي ەتىپ، دەنە تاربيە اۋىس - كۇيىسىن ەكى ەل حالقىنىڭ ءوزارا تۇسىنىستىك پەن دوستىقتى نىعايتاتىن كوپىرى مەن دانەكەرىنە اينالدىرۋىمىز كەرەك. ءسىزدىڭ وسى رەت جۇڭگودا ساپاردا بولۋىڭىز ءبىزدىڭ جاقىنعى 2 جىلدان بەرى تۇڭعىش رەت ينتەرنەت جەلىسىنەن تىسقارى ديدارلاسۋىمىز بولماق. مەن سىزبەن سول كەزدە ەكى جاقتى قارىم - قاتىناس، ەلەۋلى حالىقارالىق جانە وڭىرلىك ماسەلەلەر جونىندە ىشكەرىلەي پىكىر اۋىستىرۋدى كۇتەمىن، ءبىزدىڭ اناعۇرلىم كوپ جاڭا، ماڭىزدى ورتاق تانىمعا كەلەتىندىگىمىزگە سەنەمىن. مەن ءبىزدىڭ ”قىسقى وليمپيادادا كەزدەسۋىمىزدى“ ەرەكشە كۇتۋدەمىن، سىزبەن قول ۇستاسا وتىرىپ ”بولاشاققا بىرگە بەت الۋدى“، ىندەتتەن كەيىنگى مەزگىلدەگى جۇڭگو - رەسەي قارىم - قاتىناسىنىڭ شىت جاڭا تاراۋىن بىرگە اشۋدى قالايمىن.
شي جينپيڭ بىلاي دەپ اتاپ كورسەتتى: تاياۋدا جۇڭگو كوممۋنيستىك پارتياسى 19 - كەزەكتى ورتالىق كوميتەتىنىڭ التىنشى جالپى ءماجىلىسى جەڭىسپەن اشىلدى، ءماجىلىس جاڭا تاريحي قارار ماقۇلداپ جانە جاريالاپ، جۇڭگو كوممۋنيستىك پارتياسىنىڭ 100 جىلدىق كۇرەسىنىڭ كەلەلى تابىستارى مەن تاريحي تاجىريبەلەرىن جان - جاقتى قورىتىندىلادى. مەن ءبىزدىڭ نىسانامىز وتە ايبىندى ءارى وتە قاراپايىم، سايىپ كەلگەندە، بارشا جۇڭگو حالقىن تۇگەل جاقسى تۇرمىسقا كەنەلتۋ دەپ ۇنەمى ايتىپ كەلەمىن. حالىقتى وزەك ەتۋ − ءبىزدىڭ ءتۇبىرلى بيلىك جۇرگىزۋ ۇستانىمىمىز. جۇڭگو مەن رەسەي ەكى ەل دۇنيە جۇزىندە ىقپالعا يە ءىرى ەلدەر، سونىمەن بىرگە ەكەۋى دە ءوز ەلىنىڭ مەملەكەت جاعدايىنا ۇيلەسەتىن دامۋ جولىن تاپتى. جۇڭگو جاق رەسەي جاقتىڭ مەملەكەتتىڭ باياندى تىنىشتىعىن قورعاۋ جولىندا جاساعان قۇلشىنىسىنا اۋەلگىدەي باتىل قولداۋ كورسەتەدى. مەن ۇنەمى سىزبەن ەل باسقارۋ تاجىريبەلەرى جونىندە بۇكپەسىز، ىشكەرىلەي پىكىر اۋىستىرىپ، جۇڭگو - رەسەي قارىم - قاتىناسىنىڭ ۇزدىكسىز جوعارى دەڭگەيدە دامۋىنا بىرگە جەتەكشىلىك ەتۋدى، ەكى ەلدىڭ ۇلتتىڭ گۇلدەنۋىن جۇزەگە اسىرۋىنا جەتەكشىلىك ەتۋدى قالايمىن.
شي جينپيڭ بىلاي دەپ اتاپ كورسەتتى: قازىر حالىقاراداعى كەيبىر كۇشتەر ”دەموكراتيانى“، ”ادامدىق ۇقىقتى“ جەلەۋ ەتىپ، جۇڭگو مەن رەسەيدىڭ ىشكى ىسىنە قيسىنسىز كيلىگىپ، حالىقارالىق زاڭ مەن جاپپاي مويىندالعان حالىقارالىق قارىم - قاتىناس ولشەمىن دورەكىلىكپەن اياق استى ەتتى. جۇڭگو مەن رەسەي ەكى جاق اناعۇرلىم كوپ بىرلەسكەن ارەكەتتەر ورىستەتىپ، ەكى جاقتىڭ حاۋىپسىزدىك مۇددەسىن اناعۇرلىم ءونىمدى قورعاۋى كەرەك. ەكى جاق حالىقارالىق ىستەردەگى سايكەسۋ مەن سەلبەسۋدى كۇشەيتىپ، الەمدىك جونگە سالۋدا اناعۇرلىم اسقاق ءۇن قاتىپ، ىندەتكە قارسى اتتانۋ، كليمات وزگەرىسى سياقتى الەمدىك ماسەلەلەر جونىندە شىنايى، ۇتىمدى جوبا الىپ شىعىپ، حالىقارالىق جانە وڭىرلىك قولامتالى ماسەلەلەردى شەشۋ بارىسىندا حالىقارالىق ادىلدىك پەن تۋراشىلدىقتى باتىل قورعاپ، ”كوپ جاقتىلىق“ پەن ”ەرەجە“ تونىن جامىلعان زورەكەرلىك ارەكەت پەن قىرعي قاباقتىق سوعىس ويىنا باتىل قارسى تۇرۋى كەرەك.
شي جينپيڭ بىلاي دەپ اتاپ كورسەتتى: بىلتىردان بەرى جۇڭگو مەن رەسەي ىندەتكە قارسى اتتانۋ سەلبەستىگىن بەلسەنە ورىستەتىپ، ءوزارا قارايلاسىپ، ءبىر - بىرىنە جاردەم بەرەتىن ەكى جاقتى قارىم - قاتىناستىڭ ءمانىن جاندى ءتۇسىندىردى، سونداي - اق حالىقارالىق قوعامنىڭ ىنتىماقتاسىپ ىندەتكە قارسى تۇرۋىن ىلگەرىلەتۋگە، ادامزاتتىڭ دەنساۋلىق ساقتاۋ، سالاماتتىق ورتاق تۇلعاسىن قۇرۋعا بەلسەندى ۇلەس قوستى. ەكى جاق كوبىرەك ءادىس - امال قاراستىرىپ، ءبىر بەتالىستا ىلگەرىلەپ، ىندەتتىڭ شەكارا اتتاپ تارالۋىنان قاتاڭ ساقتانۋ العى شارتىندا، ”بوگەلىستەردى“ ىركىلىسسىزدەندىرۋدىڭ اناعۇرلىم كوپ ناقتى شارالارىن تياناقتاندىرۋ كەرەك. ءبىز رەسەيمەن ۆيرۋستى تەكسەرۋ، ۆاكسينا جانە ءدارى - دارمەك زەرتتەۋ - اشۋ جاعىنداعى سەلبەستىكتى، ۇشتاسۋدى كۇشەيتۋدى دە قالايمىز.
شي جينپيڭ بىلاي دەپ اتاپ كورسەتتى: جاڭا جاعدايدا ەكى جاق دامۋ ورايىنان بىرگە يگىلىكتەنىپ، سەلبەستىك اياسىن كەڭەيتۋ كەرەك. جاڭا كەزەكتى عىلىم - تەحنيكا توڭكەرىسى مەن كاسىپ سالاسى وزگەرىسى ورايىن مىقتى يگەرىپ، الدىڭعى لەكتەگى عىلىم - تەحنيكا كاسىپ سالاسى سەلبەستىگىن جەدەلدەتۋ كەرەك. جۇڭگو مەن رەسەيدىڭ ەنەرگيا سەلبەستىگىنىڭ نەگىزى بەرىك، سايكەسۋ تۇيىندەرى كوپ، ەكى جاق ءداستۇرلى ەنەرگيا سەلبەستىگىندەگى ساقتالعان شامانى بەكەمدەپ، جاڭا ەنەرگيا سەلبەستىگىندەگى ارتقان شامانى تولىقتاپ، يادرو ەنەرگياسى سالاسىنداعى ءبىر قىدىرۋ سەلبەستىكتەردى ىلگەرىلەتىپ، قايتا تۋىندايتىن ەنەرگيا سياقتى جاڭا سەلبەستىك بەتالىستارىن كەڭەيتۋدى اقىلداسۋى كەرەك.
شي جينپيڭ بىلاي دەپ اتاپ كورسەتتى: بيىل 9 - ايدا مەن 76 - كەزەكتى بىرلەسكەن مەملەكەتتەر ۇيىمى جينالىسىندا الەمدىك دامۋ باستاماسىن العا قويدىم. بۇل جۇڭگونىڭ ءار جاقتىڭ، اسىرەسە، جاڭادان گۇلدەنگەن بازار ەلدەر مەن وركەندەپ كەلە جاتقان ەلدەر ءدوپ كەلگەن بازار سىن - سايىسىن كوزدەپ، بىرلەسكەن مەملەكەتتەر ۇيىمىنىڭ 2030 - جىلعا دەيىنگى باياندى دامۋ كەڭەستىك ءتارتىبىن تياناقتاندىرۋعا كۇش سالا وتىرىپ ۇسىنعان تاعى ءبىر الەمدىك الەۋمەتتىك ءونىمى. جۇڭگو جاق رەسەي جاقپەن سەلبەستىكتى كۇشەيتىپ، الەمدىك جونگە سالۋدى كەمەلدەندىرۋ، الەمدىك دامۋ ىستەرىن ىلگەرىلەتۋ ءۇشىن رول اتقارۋدى قالايدى.
وڭىرلىك سەلبەستىك جونىندە شي جينپيڭ بىلاي دەپ اتاپ كورسەتتى: شاڭحاي سەلبەستىك ۇيىمى قۇرىلعان 20 جىلدان بەرى، جۇڭگو مەن رەسەي باستان - اياق جوعارى دەڭگەيدەگى ستراتەگيالىق سەلبەستىكتى ساقتاپ، باسقا مۇشە ەلدەرمەن بىرگە ”شاڭحاي رۋحىنا“ باتىل بويسۇنىپ، ىنتىماقتى، ءوزارا سەنىمدىلىكتى ۇزدىكسىز كۇشەيتىپ، ءار سالاداعى سەلبەستىكتى تەرەڭدەي ورىستەتتى. ەكى جاق وسى ۇيىمعا مۇشە ەلدەردىڭ ەل ىشىندەگى ماڭىزدى ساياسي كەڭەستىك تارتىپتەردى ورنىقتى ىلگەرىلەتۋىن قولداۋى، سىرتقى كۇشتەردىڭ ءارقانداي سىلتاۋمەن وڭىردەگى ەلدەردىڭ ىشكى ىسىنە كيلىگۋىنە استە جول بەرمەۋى كەرەك. شاڭحاي سەلبەستىك ۇيىمى دامۋىنىڭ دۇرىس بەتالىسىن مىقتاپ يگەرىپ، ىنتىماقتاسا سەلبەسۋ، حاۋىپسىز بەن قاتەردى بىرگە ارقالاۋ، ەسىك اشىپ توعىسۋ، ءوزارا ۇيرەنىپ، ءبىر - بىرىنەن ۇلگى الۋ، ءادىل، تۋراشىل بولۋ جولىمەن ءجۇرۋ كەرەك. جۇڭگو جاق ۇزدىكسىز تۇردە رەسەي جاقپەن جانە كوللەكتيۆ حاۋىپسىزدىك شارتى ۇيىمىنا مۇشە ەلدەرمەن يكەمدى، الۋان ءتۇرلى سەلبەستىك ورىستەتىپ، ءوڭىردىڭ حاۋىپسىزدىگى مەن ورنىقتىلىعىن قورعاۋدى قالايدى.
بريكس ەلدەرى سەلبەستىگى جونىندە شي جينپيڭ بىلاي دەپ اتاپ كورسەتتى: جۇڭگو جاق كەلەر جىلى بريكس ەلدەرىنە ءتوراعا ەل مىندەتىن وتەيدى، باسشىلاردىڭ 14 - رەتكى ديدارلاسۋى سياقتى قيمىلداردى باسقارىپ وتكىزەدى. ءبىز رەسەي جاقپەن جوعارى دەڭگەيدەگى ستراتەگيالىق ىستەستىكتى ساقتاپ، بريكس ەلدەرىنىڭ ءار سالاداعى سەلبەستىكتەردى جاپپاي تەرەڭدەتۋىن ىلگەرىلەتۋدى قالايمىز. ناعىز كوپ جاقتىلىقتى امالياتتا ايگىلەۋدى، كوپ جاقتى ساۋدا ءتۇزىلىسىن قولداۋدى، اشىق دۇنيە ءجۇزى ەكونوميكاسىن قۇرۋدى دارىپتەيمىز. بريكس ەلدەرىنىڭ ناقتى سەلبەستىگىن ويداعىداي يگەرىپ، الەۋمەتتىك دەنساۋلىق ساقتاۋ سەلبەستىگىن تەرەڭدەتىپ، ”بريكس +“ ۇلگىسىن كەڭەيتىپ، بريكس ەلدەرى سەلبەستىگىنىڭ يگىلىككە كەنەلۋ كولەمىن كەڭەيتۋ كەرەك. مەن جۇڭگو مەن رەسەيدىڭ بىرگە قۇلشىنۋىندا كەلەر جىلعى بريكس ەلدەرى سەلبەستىگىنىڭ، ءسوز جوق، بەلسەندى جەتىستىكتەرگە قول جەتكىزەتىندىگىنە سەنەمىن.
بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ سەلبەستىگى جونىندە شي جينپيڭ بىلاي دەپ اتاپ كورسەتتى: قازىرگى جاعدايدا حاۋىپسىزدىك القالار كەڭەسىنە تۇراقتى القا 5 ەل ىندەتكە قارسى اتتانۋ سەلبەستىگىن تەرەڭدەتۋ، حالىقارالىق بەيبىتشىلىك پەن حاۋىپسىزدىكتى قورعاۋ، ەكونوميكانىڭ قايتا جاندانۋىن جەبەۋ جونىندە سايكەسۋدى كۇشەيتىپ، حالىقارالىق قوعامنىڭ جالپىلىق تىلەگىنە بەلسەنە جاۋاپ قاتۋى قاجەت. جۇڭگو جاق رەسەي جاقپەن تىعىز بايلانىستى ساقتاۋدى قالايدى.
ەكى جاق كەزەكتەگى ءىرى ەلدەر قارىم - قاتىناسى جانە دەموكراتيا ماسەلەسى جونىندە پىكىر اۋىستىردى. شي جينپيڭ بىلاي دەپ باسا دارىپتەدى: دەموكراتيا بۇكىل ادامزاتتىڭ تاماشا تالپىنىسى جانە ورتاق قۇندىلىعى، سونىمەن بىرگە ءار ەل حالقىنىڭ ۇقىعى. ءبىر مەملەكەتتە دەموكراتيانىڭ بار - جوقتىعىنا، دەموكراتيانى قايتكەندە اناعۇرلىم ويداعىداي جۇزەگە اسىرۋعا بولاتىندىعىنا تەك سول ەل حالقى عانا تورەلىك ايتا الادى. حالىقاراداعى ىستەردى ءار ەل بىرگە اقىلداسىپ ىستەۋگە ءتيىس، حالىقارالىق قارىم - قاتىناستىڭ دەموكراتيالانۋىن ىلگەرىلەتۋ، ناعىز كوپ جاقتىلىقتى امالياتتا ايگىلەۋ عانا جۇرت قالاۋى، زور اۋقىمدىق بەتالىس بولىپ تابىلادى. جۇڭگو جاق رەسەي جاقپەن بايلانىس جاساۋدى، سايكەسۋدى كۇشەيتىپ، حالىقارالىق قوعامدى دۇرىس دەموكراتيا كوزقاراسىن ورناتۋعا جەتەكتەپ، ءار ەلدىڭ ورىندى دەموكراتيالىق ۇقىعىن قورعاۋدى قالايدى.
پۋتين مىنالاردى ءبىلدىردى: قازىر رەسەي - جۇڭگو قارىم - قاتىناسى بۇرىن بولماعان تاريحتاعى ەڭ جاقسى مەزگىلدە تۇر، وسكەلەڭ ستراتەگيالىق ءوزارا سەنىمدىلىكتى ايگىلەپ، ءبىر - ءبىرىنىڭ ىشكى ىسىنە كيلىكپەۋ، ءبىر - ءبىرىنىڭ مۇددەسىنە ءوزارا قۇرمەت ەتۋ نەگىزىندە ءوزارا پايدا جەتكىزىپ، تەڭ يگىلىككە كەنەلۋدىڭ ونەگەسىن ورناتتى، مۇنى 21 - عاسىرداعى حالىقارالىق قارىم - قاتىناستىڭ ۇلگىسى دەۋگە بولادى. بيىل «رەسەي - جۇڭگو تاتۋ كورشىلىك، دوستىق سەلبەستىك شارتىنا» قول قويىلعاندىعىنىڭ 20 جىلدىعى، رەسەي مەن جۇڭگو شارت مەرزىمىنىڭ ۇزارتىلعاندىعىن رەسمي جاريالادى. ەكى جاق جاڭا تيپتى ايدارشا ۆيرۋس وكپە قابىنۋ ىندەتىنىڭ ىقپالىن جويىپ، تىعىز بارىس - كەلىستى ساقتاپ، ەكونوميكا - ساۋدا، ەنەرگيا، عىلىم - تەحنيكا سياقتى سالالارداعى ناقتى سەلبەستىكتىڭ ورنىقتى قاداممەن دامۋىن بەلسەنە ىلگەرىلەتىپ، حالىقارالىق جانە وڭىرلىك ماسەلەلەر جونىندە بايلانىس جاساۋدى، سايكەسۋدى ورىستەتتى. رەسەي مەن جۇڭگونىڭ ستراتەگيالىق ىستەستىگى ءتۇرلى حالىقارالىق قولامتالى ماسەلەلەردى ءونىمدى شەشۋدىڭ، حالىقارالىق بەيبىتشىلىكتى قورعاۋدىڭ ماڭىزدى بەلسەندى فاكتورىنا اينالىپ، حالىقارالىق زاڭدى نەگىز ەتكەن حالىقارالىق ءتارتىپتى بەكەمدەۋدە ماڭىزدى رول اتقاردى. مەن جۇڭگودا تەز ارادا ساپاردا بولۋدى ءارى بەيجيڭ قىسقى وليمپيادا سپورت جارىسىنىڭ اشىلۋ سالتىنا قاتىناسۋدى كۇتۋدەمىن، رەسەي جاق دەنە تاربيەنى ساياسيلاندىرۋ قاسكۇنەمدىگىنە باستان - اياق قارسى تۇرادى. مەن سول كەزدە سىزبەن بىرگە ورتاق كوڭىل ءبولىپ وتىرعان ماڭىزدى ماسەلەلەر جونىندە ىشكەرىلەي پىكىر اۋىستىرىپ، رەسەي - جۇڭگو قارىم - قاتىناسىنىڭ ۇزدىكسىز جوعارى دەڭگەيدە دامۋىن ىلگەرىلەتۋدى ءۇمىت ەتەمىن. رەسەي جاق جۇڭگو جاقپەن ەكونوميكا - ساۋدا، مۇناي - گاز، فينانس، اۆياتسيا - عارىش سياقتى سالالارداعى، سونداي - اق ستراتەگيالىق ءىرى نىساندار سەلبەستىگىن ۇزدىكسىز كۇشەيتىپ، ەۆروپا - ازيا ەكونوميكالىق وداعىن ”ءبىر بەلدەۋ، ءبىر جول“ باستاماسىمەن ونان ارى ۇشتاستىرۋدى ىلگەرىلەتۋدى قالايدى. ىندەتكە قارسى اتتانۋ سەلبەستىگىن كۇشەيتىپ، ىندەتتى ساياسيلاندىرۋعا قارسى تۇرۋ كەرەك. گۋمانيتارلىق اۋىس - كۇيىستى ونان ارى كۇشەيتىپ، كەلەر جىلعى جانە ونان ارعى جىلعى دەنە تاربيە اۋىس - كۇيىس جىلىن ويداعىداي وتكىزۋ كەرەك. رەسەي جاق جۇڭگو ۇكىمەتىنىڭ تايۋانعا ساياتىن ماسەلەدەگى ورىندى تۇرعىسىنا ەڭ باتىل قولداۋ كورسەتەدى، ءارقانداي كۇشتىڭ تايۋانعا ساياتىن ماسەلەدەن پايدالانىپ جۇڭگو جاقتىڭ مۇددەسىنە زيان جەتكىزۋىنە باتىل قارسى تۇرادى، ازيا - تىنىق مۇحيت وڭىرىندە ءارقانداي فورماداعى ”شاعىن توپ“ قۇرۋعا باتىل قارسى تۇرادى، رەسەي - جۇڭگو قارىم - قاتىناسىنا ىرتكى سالاتىن ءارقانداي قاسكۇنەمدىك ەشقاشان ىسكە اسپايدى. رەسەي جاق جۇڭگو جاقپەن شاڭحاي سەلبەستىك ۇيىمى، بىرلەسكەن مەملەكەتتەر ۇيىمى حاۋىپسىزدىك القالار كەڭەسى سياقتى كوپ جاقتى ورىندارداعى تىعىز سەلبەستىكتى ۇزدىكسىز تەرەڭدەتۋدى قالايدى، جۇڭگو جاقتىڭ كەلەر جىلى بريكس ەلدەرىنە ءتوراعا ەل بولۋ قىزمەتىن اتقارۋىنا قولداۋ كورسەتەدى، رەسەي مەن جۇڭگونىڭ ىشكى ىسىنە كيلىگۋ جانە ەكى ەلدىڭ ورىندى دامۋ مۇددەسىن شاۋجايلاۋ دامەسىنە باتىل قارسى تۇرادى، حالىقارالىق ادىلدىك پەن تۋراشىلدىقتى قورعايدى، حالىقارالىق ستراتەگيالىق حاۋىپسىزدىك پەن ورنىقتىلىقتى قورعايدى. رەسەي جاق جۇڭگو جاقپەن ءار ەلدىڭ ناعىز دەموكراتيالىق ۇقىعىن قورعاۋ ماسەلەسى جونىندە بايلانىس جاساۋدى كۇشەيتۋدى قالايدى.
ەكى جاق تاعى باسقا دا ورتاق كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە پىكىر اۋىستىردى.
ەكى ەلدىڭ مەملەكەت باسشىلارى كەلەر جىلى 2 - ايدا بەيجيڭدە كەزدەسۋگە ۋادەلەستى.
ديڭ شۋەشياڭ، ۋاڭ ي، حى ليفىڭ قاتارلىلار جوعارىدا اتالعان قيمىلعا قاتىناستى.
